تقبل تبدل جنسيتك المصريه بالجنسيه السعوديه ...؟؟

[se_ Elsyed]

قال جنسية غير مصر قال .... ده انا هاتبت في الجنسية المصرية لحد ما اموت ويغطوني بجوزا السفر الكبير الحلو اللي كله منافع ...

الغريب بقى إن اليومين دول الواد عمر طالع لي في حاجة غريبة قوي ... ووالله العظيم من غير ما حد يقول له أو يعمله فكل شويه آلاقيه جاي يقولي يا بابا عايزين نرجع بلدنا بقى !!!!!! أقول له طب بلدنا إيه يا عمر ؟ يقولي مصررررررررر .... وعنده أي طيار طايرة في السما بتبقى رايحه مصر .... وكل ما نبقى خاريجين ووالدته تحضر شُنط او حاجة هاناخدها معانا .. يبقى كده إحنا طالعين على المطار ورايحين مصر ... والولد بالرغم من إنه بيلعب مع أولاد الجيران اللي من جنسيات مختلفة ومنهم المصريين وله أصدقاء كثير ويبلف هنا في اماكن الترفيه وخلافه .. إلا إنه لا يحمل أي ذكريات عن السعودية ... بخلاف بقى لو كان في الإجازة وراح مكان في مصر يفضل واكل دماغي بالساعات ويحكيلي عن ذكرياته هناك وعمل إيه .. وكان بيلعب فين ومع مين ... ويا سلام بقى لما يكلم ولاد عمته أو ولاد عمه في التليفون .. وبالرغم من صغر سنهم كلهم وعيشتهم بره مصر في بلاد الله لخلق الله إلا إن كل ذكرياتهم هي عن مصر فقط...

ونرجع وناكد تاني إن الحكومة السعودية مُصممة على شرط إسقاط الجنسية الحالية لكي يتم منح المتقدم الجنسية السعودية .. ولو إكتشفوا في أي وقت أي تلاعب هايسحبوا منه السعودية كمان ويبقى شخص محايد ومالوش جنسية :rolleyes:

[Tafshan]

.... وعنده أي طيار طايرة في السما بتبقى رايحه مصر ....

و انا بنتي برضو بتقول : رايحة مصر عند جدو !!!

يا عمي ، مصر هي امي و اهلي و اللي ما لوش اهل : الحكووووومة اهله (على رأي فيلم زينب) :unsure:

و مع ذلك انا مش ممكن اتخيل نفسي غير مصري .. مصري و بس مش معاها اي جنسية مع احترامي لكل الجنسيات ..

يعني مثلاً يعني لو حد منا لقي ام روشة شعرها اصفر و عينيها خضراء و غنية و مثقفة و وزيرة كمان .. حيقبل يغير امه :rolleyes:

[yasovinas]

تعرف يا ابو عمر

انا عندي ابني الكبير محمد عاش هنا في الامارات من سن5شهور لغاية تانية ابتدائي وهو مستسلم للوضع

وطبعا حدث ولا حرج عن ولد ليس له هويه لا في لعبة ولا اصحابة ولا طريقة كلامه مره يقول (هون) ومره يقول (عارف كيف) ومرة يقول (شنهو)

لغاية ما نزل مع امه لظروف مرض حماتي الله يرحمها ودخل المدرسه هناك وراح النادي ولعب في فريق السله واصبح له اصحاب وزمايل ومن يومها رافض رفض تام مجرد فكرة الحضور للامارات ولو للزيارة

مهما كانت الاغراءات

تعالى اسبوعين اجازة نص السنه هات اللبس اللي عايزة والكوتشي اللي تعجبك والموبايل اللي على مزاجك والعاب البلاي ستيشن ابداً

في بداية استقرارة هناك كان التهديد بارساله الى بابا هو التهديد الوحيد اللي ممكن يخليه يرجع عن اي شيء

ولما كبر وفهم

بقى رده هقطع الباسبور مش عايز اسافر

طبعا مش هقول لك عن اختلاف الشخصيه والتحول 180درجه من الانطواء والكسوف الى اللسانين اللي اتركبو مع بعض واللماضه

فعلا مصر جنه

مهما حصل

[Farida]

أما هنا فى السعودية فأنا لا أكاد أرى منكرا لأنكره .. تخيل طول اليوم متشفش منكر .. والله نعمة كبيرة جدا ..

:blink: ksh:: tot:: tot::

معقوله حضرتك ما شفتش منكر مطلقا طب ما سمعتش حتى......

[عصام أبوالفتح]

أما هنا فى السعودية فأنا لا أكاد أرى منكرا لأنكره .. تخيل طول اليوم متشفش منكر .. والله نعمة كبيرة جدا ..

gt: rs: clp:: h):

معقوله حضرتك ما شفتش منكر مطلقا طب ما سمعتش حتى......

أقسم بالله على ذلك ..

لا خناقة .. ولا واحدة شبه عريانة .. أو حتى متبرجة .. بالكتير أوى وجوه بعض النساء فقط واصبحت الهيئة لا تنكر عليهم لأنها محل اختلاف بين العلماء ..

ولا واحد بيضرب حيوان مسكين .. ولا بيفترى على بنى أدم غلبان ..

ولا واحد بيسرق عينى عينك .. ولا واحد بيسب ويلعن عمال على بطال ...

ولا ناس بتفطر فى نهار رمضان .. ومفيش اعلانات مسخرة فى الشوارع ..

هدوووووووووووووووء تام

الأخت فريدة .. ألا ترين هذه نعمة كبيرة كما قلت ..

[عصام أبوالفتح]

وحجود النعمة هو عدم التحدث بها .. فما بالك أن الكثيرين جدا من المصريين الذين أكرمهم الله بالعيش على هذه الأرض لا يكتفون بجحود هذه النعمة ..

بل يفعلون ما هو أكثر ..

وهو تبنى الإشاعات والأخبار المغرضة عن السعوديين .. وتضخيم أى حادثة حتى تكون منطبقة على الجميع بداية من خادم الحرمين لأصغر رضيع ..

ويستقبلونك هنا بكميات هائلة من الأخبار والنوادر والطرائف والتى كلها تصب فى خانة الحقد والغل الغير مبرر على الإطلاق ..

إحدى الليالى قضيتها ساهرا مع بعض هؤلاء حتى أوحى إلى كلامهم أن هذه بلد الأباليس .. ولما سألت أحدهم .. لما البلد مش عجباك .. قاعد فيها ليه ..؟؟ .. وبعدين انت شفت حاجة من اللى انت بتقولها دى

اجابنى صمته بعدما أطرق للأرض قائلا :

لا بس ده اللى سمعته .. ومش عايزين مصريين يزاحمونا فى لقمة عيشنا هنا ..

بس ..

وهذا هو الدافع الحقيقى وراء كل ما تسميعه انتى ... وما ألقيه أنا خارج أذنى وعقلى ..

جشع وحقد وغل ومشاعرجدا سيئة تجاه أناس كل ذنبهم أنهم أتوا بأمثال هؤلاء إلى هذا الوطن .

بعدها لم أصغ مجرد الإصغاء لمثل هؤلاء .. ولم أخض هذه النقاشات أبدا ولم أسمح بها أمامى أيضا ..

ويشهد الله أنى لم أشهد من السعوديين إلا كل تقدير واحترام وخلق رفيع المستوى ..

[amostafa]

طيب يا جماعه عندى سؤال ,

لو اهللك و اصحابك و جرانك و معارفك و زميلك و ..... وكل واحد تعرفه وممكن تقعد معاه و تقابله لما بتنزل مصر اجازه .....لو كل دول بقو معاك فى الغربه (فى السعوديه مثلا) ... هل سعاتها هاتفكر تنزل مصر تانى؟

انا عن نفسى ,ممكن منزلهاش تانى ,لانها سعتها بالنسبالى بقت زى اى بلد تانيه ,ناسها غريبه عنى ....

فكل علاقتنا بمصر ,ليست الارض و ليست الوطنيه و ليست الذكريات ... و انما هو وجود بعض الناس نعرفهم و يعرفونا ,ألفناهم و عاشرناهم و و تعودنا عليهم و كبرنا معهم (وهم الاهل و الصحاب و الجران و كل واحد نعرفه شخصيا ..) , ولعلمنا ان من المستحيل انشاء علاقات مشابهه مره اخرى على نفس الدرجه من القرب و الحميميه ( بسبب كبر السن و اسباب اخرى) , فالعقل الباطن دائما يحن لهذا الشعور اللذى لايجده الا للتواجد وسط هؤلاء الناس ولا تجد تفسير لذلك بل تجد نفسك مره تقول وطنيه و مره ارض مصر و مره ذكرياتى .....

ده رئيى clp::

[فــيــروز]

فكل علاقتنا بمصر ,ليست الارض و ليست الوطنيه و ليست الذكريات ... و انما هو وجود بعض الناس نعرفهم و يعرفونا ,ألفناهم و عاشرناهم و و تعودنا عليهم و كبرنا معهم (وهم الاهل و الصحاب و الجران و  كل واحد نعرفه شخصيا ..) , ولعلمنا ان من المستحيل انشاء علاقات مشابهه مره اخرى على نفس الدرجه من القرب و الحميميه ( بسبب كبر السن و اسباب اخرى) , فالعقل الباطن دائما يحن لهذا الشعور اللذى لايجده الا للتواجد وسط هؤلاء الناس ولا تجد تفسير لذلك بل تجد نفسك مره تقول وطنيه و مره ارض مصر و مره ذكرياتى  .....

ده رئيى  stnd::

هينفع ناخد النيل معانا طيب؟ stnd::

الحقيقه ربما يكون فعلا الوطن بالنسبه للبعض هو الاشخاص الذين يهمونهم فى هذه الحياه

وانا لا انكر ان لو كل اهلى بالخارج ربما لا تكون فكرة السفر صعبه بالنسبة لى لكن وجودهم بالخارج لا يعنى ان وطنى اصبح بالخارج ..

يا جماعه المكان و البيئه لهما تاثيرات "طبعا سلبيه و ايجابيه لا ادعى انها ايجابيه وبس" على الاشخاص .. وهذا التاثير هو الذى يميز شعب عن آخر بالاضافه لامور اخرى طبعا ..

وبالتالى لا اظن اننا لو صحبنا معنا من يهمنا امرهم من الاهل الى اى مكان آخر نكون قد اقمنا وطننا فى الغربه

هناخد معانا اصدقاءنا كمان طيب؟ هناخد معانا الاماكن التى شهدت ذكرياتنا الحلوه او المره؟ هناخد معانا "طبيعة" الانسان المصرى بكل ما تحمله من عيوب و حسنات؟

طبعا كلها امور عاطفيه بالدرجه الاولى .. لكن طالما نناقش مفهوم الوطن من البدايه فنحن نناقش امرا عاطفيا بحتا .. bag):

[yasovinas]

مثال بسيط

اخواتنا الفلسطينين منهم اللي عايش هنا في الامارات هو واهله اخوانه واقرباءه بل ان في منهم اللي اتولد هنا لكن برضه لو اتيحت لهم الفرصه انهم يرجعوا هيرجعوا وانا شخصيا كان بيشتغل معايا قلسطيني من غزة اهله كلهم تقريبا هنا وهو ترك غزة من زمان ولكن اول ما عملوا السلطه وقالوا اهل غزة ممكن يرجعوا جري على هناك ولغى وثيقة السفر المصريه اللي معاه واستخرج جواز فلسطيني بل واشترى ارض هناك وبنى منزل واخر معلوماتي ان هذا البيت انضرب بصاروخ اسرائيلي وتوجد فتحه قطرها متر تقريبا من واجهة البيت وخرج الصاروخ من الخلف وهو معه صورة لهذه الفتحة وسعيد بيها جدا والسنة دي برغمن كل ما حدث وما يحدث سافر الى غزة

لن نشعر بغلاوة الشيء الا اذا فقدناه

[Farida]

لا خناقة .. ولا واحدة شبه عريانة .. أو حتى متبرجة .. بالكتير أوى وجوه بعض النساء فقط واصبحت الهيئة لا تنكر عليهم لأنها محل اختلاف بين العلماء ..

ولا واحد بيضرب حيوان مسكين .. ولا بيفترى على بنى أدم غلبان ..

ولا واحد بيسرق عينى عينك .. ولا واحد بيسب ويلعن عمال على بطال ...

ولا ناس بتفطر فى نهار رمضان .. ومفيش اعلانات مسخرة فى الشوارع ..

هدوووووووووووووووء تام

الأخت فريدة .. ألا ترين هذه نعمة كبيرة كما قلت ..

معك ان كل اللى بتقوله منكر ظاهر جدا لكن فيه بلاوى اخرى مستتره و ادعو الله الا تراها ....وخد بالك لو اتعرضت لحد مثلا مثلا من الأسره الحاكمه او لو قابلت واحد منهم فى اى بلد اوروبى او امريكى و رأيت تصرفاته او بذخه او اذا لا قدر الله حد دخل سجونهم او لو اختلفت مع رب عمل سعودى او او ربنا يستر و ما يحدث من امراض فى المجتمعات المنغلقه كالسعوديه معروفه و هى امور لم يأمر بها الاسلام و انما هى عادات و تقاليد ....

ثانيا لما بتشوف منكر زى ده فى بلدك و تحاول ان تقول قوله حق او تسهم بشكل او باخر فى امر بمعروف او نهى عن منكر و تذكر بالله و تحاول ان تغير ثوابت خطأ و تحاول ان تربى اولاد لا يخافون فى الحق لومة لائم ...ثوابه اكثر ام من لا يرى منكر او يتغاضى عنه او يتوهم بذلك و يرتمى فى احضان مجتمع غريب عنه لن يقبله باى حال من الأحوال عند المصائب الكبرى و عندما يحدث تصادم مع اى واحد كبير هناك

[amir]

معك ان كل اللى بتقوله منكر ظاهر جدا لكن فيه بلاوى اخرى مستتره و ادعو الله الا تراها ....

اكيد طبعا السعوديه مثلها مثل اى دوله اخرى فيها خناقات و ناس بتسرق و ناس بتنصب و ناس بترتكب كل المحرمات , و لكن يبدو أن الزميل الفاضل لا يتعامل مع مختلف طبقات المجتمع , و يكفى اذا رجعت بذاكرتك الى ثلاث أو اربع سنوات و تذكرت قصه الطبيب المصرى و ابنه مع ناظر المدرسه و انت حتعرف أن هناك شعب عادى بيرتكب المعاصى و لكن كل شئ بيتم التكتم عليه و لا يتم نشره و لكن هذا لا يعنى انه لا يحدث .

و نحن كمصريين نعرف ما يقوم به السعوديين فى اجازاتهم فى مصر و ايضا فى اوربا .

المجتمع السعودى مجتمع مغلق و امراضه اكثر من امراض أى مجتمع لديه القليل من الحريه .

[عصام أبوالفتح]

يا سيدتى الفاضلة : فريدة

.. رأيك هذا بالذات بيفرسنى ويفكرنى بالحواديت اللى سمعتها قبل أن أطأ هذه الأرض .. ومن قبل هذا أيضا

لكن معلش واحدة واحدة أرد عليكى :

ومعلش زى ما طلعتى عينى فى الرد على كلامك .. يا ريت تقرأى كلامه كله

قولتى :

معك ان كل اللى بتقوله منكر ظاهر جدا لكن فيه بلاوى اخرى مستتره و ادعو الله الا تراها ....---------------

عدم رؤية المنكر نجاح رائع للحاكم مهما كان فساده .. فلا يعنينى .. وأمره لله ..

المهم تطبيقه لشرع الله ومحاربه الفساد والمنكرات ..

والمستتر من الكلمة نفسها هو غير معلوم لى ولايعنينى فى شئ ..

لا يضركم من ضل اذا اهتديتم .. مبدأ قرآنى .. والدولة التى تشجع على الهداية وليس الفجور والفساد تبقى عملت اللى عليها ..

وقولتى :

وخد بالك لو اتعرضت لحد مثلا مثلا من الأسره الحاكمه او لو قابلت واحد منهم فى اى بلد اوروبى او امريكى و رأيت تصرفاته او بذخه ....

---------------

.. واحد زى الوليد بن طلال دافع للانتفاضة بعد حصار عرفات الاول ايام القمة الهبلية 100 مليون ريال تبرعات ( لوحده ) وفى نفس الوقت مشغل قناة روتانا .. بادعيله فى الاولى ..وباقول ربنا يهديه فى التانية ..

والانكار على الامراء موجود وفى التليفزيون واولهم بن طلال على قناة روتانا دى .. بس مش منى ومنك ومن الفرد العادى .. من الشيوخ الكبار .. يعنى كل برغوت على قد دمه ..

انما فى مصر مفيش انكار للمنكر على اى مستوى .... مش حاجة تفرس

الفرد العادى بيتقال عليه مستشيخ وعم الشيخ وخدنا على جناحك ..

والشيوخ الكباراللى فى الميديا .. حاجة تكسف بصراحة متخليناش نغلط ..

وقولتى :

او اذا لا قدر الله حد دخل سجونهم او لو اختلفت مع رب عمل سعودى او او ربنا يستر ....

---------------

انا لم أدخل هذه السجون ولا أعلم عنها إلا انها بالتأكيد أفضل من كثير من بلدان العالم .. وقد كان المفروض ان أبيت ليلة بالقسم بالحبس دى حسب القانون لأنى كنت المخطئ فى حادث سير بنسبة 75 % .. وفؤجئت بالمسؤلين فى القسم يطلبون منى المجئ غدا ومعى خطاب من الكفيل لدفع قيمة الأضراريعنى نصيبى من مسئولية الحادثة .. تصرف فى منتهى الاحترام والاخلاق والثقة ... وكل شئ .. بدون محسوبية .. او اتصال من الكفيل .. بدون رشوة او اكرامية ..

..

فقط لأنك أخ مصرى ... هكذا قالها الضابط .. وستظل ترن فى أذنى ما حييت ..مواقف شهامة كثيرة من اناس بسطاء .. وعند التعامل مع ذوى المكانة فإن الأمر يكون اكثر ادهاشا واثارة للاعجاب ..

رجل مثل الراجحى أغنى من معظم الامراء .. ولكن تواضعه مثير للذهول ..

رجل مثل محمد الموسى .. ملك العقارات .. يعاملنى كجدى بطيبته وخلقه الرفيع .. وفى نفس الوقت عارف حدودى معاه .. فى أكثر من كده ..

انتى عارفة المشكلة فى ايه ..

ان المصريين عمرهم ما يحكوا المواقف الحلوة .. يمكن عشان ما يتحسدوش ..

وكمان لأن المصريين اللى سلوكهم كويس واخلاقهم عالية ومجتهدين فى العمل .. مبيرجعوش مصر .. !!!!!!!!!!

فكل اللى بيرجع بيصرف نظرأهله واللى حواليه عن اللى حوشه بحكاوى القهاوى القذرة دى ..

والمصرى بصفة عامة الوحيد من أهل الأرض لما يرجع مصر لازم يقعد يشتم سنة ولا اثنين فى السعودية والسعوديين .. والخليج والخليجين ... وهو يتمنى الرجوع . ;)

فقط عشان الناس تتعاطف معاه وتقدر ( غربته ) وبهدلته ..

وقولتى :

و ما يحدث من امراض فى المجتمعات المنغلقه كالسعوديه معروفه و هى امور لم يأمر بها الاسلام و انما هى عادات و تقاليد ....

....

---------------

حسستينى انى فى مستشفى للمجانين taz::

وعلى فكرة يا ريت تنورينى بالأمراض دى عشان مش عارفها ..

ممكن يكون قصدك على اهل شارع الهرم .. والكبت والحاجات دى .. دول يا ستى ( اللى فى شارع الهرم واللى زيه ) أهل المعاصى ولولا شافوا اهلهم كده لما اصبحوا كذلك .. ولولا سمحت لهم الدول الرخيصة اللى فيها لحم رخيص بكده .. لما دخلوها للمعصية فيها

..

وكمان لولا الدولة هنا بتراعى ربنا لما خرج منها الفساق لزيارة اندية اللهو والقمار والدعارة .. فى البلدان الاخرى

الله ..

ماهو فى مصرالاغنياء الفاسدين ممكن يجيبوا كل يوم واحدة من فرنسا ولا امريكا تبات ليلتها وتروح .. كل يوم واحدة شكل ..

انما فى السعودية .. مستحيل

زى واحد مربى ولاده كويس .. بس فيه واحد بايظ عشان لازم يكون فى ناس بايظة .. لانها مش يوتوبيا .. والواحد ده راح شقة دعارة ..

تهاجمى الواحد ده وشقة الدعارة ..

ولا تهاجمى أبوه عشان معودوش على الدعارة ....!!!!!!!

أما العادات والتقاليد فلو من الاسلام فعلى العين والراس .. ولو مش يبقى مش ...

ومعظم العادات والتقاليد هنا اصلها اسلامى او من قبل الاسلام وقبل واستمرت معه لقبوله اياها.. ولى مآخذ صغيرة على بعض عاداتهم وتقاليدهم التى هى فى النهاية امور صغيرة غير مؤثرة ..

وقولتى :

ثانيا لما بتشوف منكر زى ده فى بلدك و تحاول ان تقول قوله حق او تسهم بشكل او باخر فى امر بمعروف او نهى عن منكر و تذكر بالله و تحاول ان تغير ثوابت خطأ و تحاول ان تربى اولاد لا يخافون فى الحق لومة لائم ...ثوابه اكثر ام من لا يرى منكر او يتغاضى عنه او يتوهم بذلك ....

....

---------------

تحاول تقول ... اقول ايه يا اخت فريدة .. ما طهقنا من المحاولات ..

المشكلة العظمى فى مصر .. ان بقى فيه اسلام مصرى رافض لاى اسلام اخر ..

حتى لو كان اصح واقرب للكتاب والسنة .. واى طفل بيتربى بينشأ داخل منظومة ها الاسلام .. يسقيه له كل يوم اصدقائة والتلفزيون و الناس قبلى ..

يتشرب الطفل الآن فى مصر مجموعة من القيم الفاسدة شاء الأب أم ابى ..

وما أحاول ان اسقيه له يحدث له نزيف اسميه بنزيف القيم نتيجة الفساد المنتشر حوله .. مهما فعلت .. لذلك كانت الهجرة وانا لا أدعى ان السعودية كانت مقصدى

كانت كندا .. والتمايز فيها بين مسلم وكافر .. تمايز الحق والباطل .. يجعل مهمة تربية الطفل اكثر سهولة من تربيته فى مجتمع يصحو مؤمنا ويمسى كافرا ويصبح كافرا ويمسى مؤمنا .. مذبذبين لا إلى هؤلاء ولا إلى هؤلاء .. ايامنا هذه توقع بها النبى صلى الله عليه وسلم وشرح حيرة المؤمنين فيها ..

أما هنا والمهمة اكثر واكثر سهولة .. فالحمد لله على نعمته

يعنى هنا الواحد بيعرف الصح من الغلط .. الابيض من الاسود .. وفى مصر جريهاااااااااات كتييييييييييييير .. وفى الحالتين فى الصالح والطالح .. وطبعا النسبة مختلفة ..

وقولتى :

و يرتمى فى احضان مجتمع غريب عنه لن يقبله باى حال من الأحوال عند المصائب الكبرى و عندما يحدث تصادم مع اى واحد كبير هناك

....

---------------

يا سيدتى الفاضلة ..

المجتمع ليس غريبا عنى .. وجدت هنا ما تمنيته طوال عمرى ..

وانا لم ارتم فى احضان أمريكا ولا اسرائيل مثلا .. .. هم طلبوا خبرتى أولاً وانا لبيت الطلب ..

وهم من يتمنون ان اكون مواطنا فى هذه الدولة .. ولست أنا من سهلت قانون الجنسية للكفاءات .

ولولا أن مصر أخرجتنى منها .. ما خرجت

تم تعديل 9 ديسمبر 2004 بواسطة المهاجر

[عصام أبوالفتح]

أستاذ أمير .. نفس الرد .. بالضبط ;)

تم تعديل 9 ديسمبر 2004 بواسطة المهاجر

[عصام أبوالفتح]

 

أستاذ أمير ... نفس الرد ... بالضبط ;)

[Farida]

الأخ المهاجر ربنا يسعدك فى السعوديه و ما كنش فيه داعى للرد كلمه كلمه لما قلته عموما حصل خير انت مبسوط فى السعوديه برغم ما فيها و احنا مبسوطين فى مصر بالرغم ما فيها و كل واحد يقعد فى المكان اللى يستريح فيه بس الموضوع بسيط ...

اما بخصوص ان المصريين كلهم اللى كانوا شغالين فى السعوديه لما بيرجعوا بيقولوا كلام غير صحيح علشان الحسد اسمح لى نظره قاصرة شويه اللى بيحكى زى ما بتقول المفروض بيحكى تجربه شخصيه زى ما حضرتك بتحكى تجربه شخصيه يعنى لو صدقتهم المفروض اصدقك و لو المفروض ما أصدقهمش يبقى الأولى انى لا أصدقك يعنى حضرتك عايزنى الصق بافراد من عائلتى تهمه الكذب بامارة ايه ؟؟؟ انا مش محتاجه منهم حاجه و هم مش بيدونى حاجه و الحمد لله يعنى احنا هنا فى المنتدى مش بنكتب علشان حد معين يشوف احنا بنتكلم عنه ازاى فمن غير المعقول لما حد فينا يقول انا عارف كذا مش المفروض نقول عارف ازاى و مين اللى قال ده اللى قال لك كذا و كذا كل واحد مسئول عن كلامه و يجب ان يحترم ....

و بعدين ما الداعى ن أى ام او اب يلصقوا بابنهم الصغير مثلا مثلا فعل معين هم يدركون تماما انه سيلصق به طول العمر لمجرد انهم يخزوا العين ......مش معقول ....انا لا أقصد الأسأة لأحد و لكن ليس هناك شعب فى الدنيا لا يخطئ و لكن هناك من تستطيع ان تنصحه لأنك قريب منه او تحاول ان تغير فى مكان ما لأن هناك اعتراف بالتقصير او بالنقص و هناك اماكن لا تستطيع ان تغير فيها لأن ليس هناك اعتراف من اصله بالتقصير او بالنقص زى النعامه كده ...هذا هو الفرق فى رأيى

و ان كان المفروض اننا لا نلصق بمجتمع ما تهمه ما لأن بعض افراده غير اسوياء يبقى من الغلط جدا انى اقول على الشعب المصرى انه كله مرتشى او ان سيداته منحلات مثلا و بمقارنة القله هنا و هناك العمليه نسبه و تناسب 70 مليون قله منهم غير 5 او 6 مليون و القله منهم ...فى النهايه بدلا من لعن مجتمعاتنا و الصاق كل ما هو سئ بها و نسيان او تناسى ان لنا دور فى هذا السوء نحاول نصلح ولو شئ يسير و مش انا اللى باقول لأ ربنا بيقول ان الله لا يضيع اجر من احسن عملا اى عملا حتى و لو بسيط ....فى النهايه مصر مليئه بالفساد و كل الدول ايضا و لكن بدرجات و ليست هناك دوله هى جنه الله على الأرض و ربنا يهدينا كلنا لما فيه صلاحنا

[Amal]

حب الوطن في القلب والانتماء شعور داخلي واثبات على الارض من خلال التصرفات...

الجنسيه مجرد وثيقه تثبت انتمائك وتبعيتك لاي دولة اي كانت

وتحافظ على امتيازاتك في هذه الدوله ...

اختصار للموضوع كلكل ... et:(

[yasovinas]

مدام فريدة

تحياتي سلمت يمينك والله

لا فض فوكي

مش بيقولوها كده