ليه بعض الناس مش طايقة النشطاء دلوقتى ؟؟

[الدكتور ياسر]

لا ينكر عاقل الدور الإيجابى الذى بذله النشطاء وشباب الثورة ..

ولكن هناك آراء أخرى يجب ان نسمعها ونلتفت إليها ..

لماذا أصبح الكثيرون لا يطيقون هؤلاء النشطاء ؟؟

بصراحة استمعت لآراء بعض الناس في هذا المقطع وأرجو ان أستمع لآرائكم بعد سماعه

ياترى الناس المتصلين دول مأجورين و لا دة رأيهم بجد ؟؟

http://www.youtube.com/watch?v=pdgUPKRryas&feature=player_embedded

[se_ Elsyed]

أنا مش هاقدر أسمع الفيديو دلوقت

لكن أنا عرفت الناس مش طايقة الثوار ليه

بأقلب في التليفزيون على القناة الأولى .. وياريتني ما عملت كده

لقيتهم جايبين برنامج مخصوص فيه إتنين مذيعات من اللي حاطين خمسة كيلو ورنيش على وشهم .. مع واحد كده ما أعرفش تخصصة إيه وبيعرضوا فيلم عاملينه عن قناع فانديتا والمخربين اللي عاوزين يخربوا مصر ويحرقوها لصالح إسرائيل

واخد بالك .. النهاردة والبرنامج كان على الهوا لأنهم قطعوه ساعات الأذان

مرة أخرى .. اليوم بعد اليوم الجميل بتاع إمبارح

كل سنة وإنت طيب

[se_ Elsyed]

وبأعرف ليه الناس مش طايقاهم لما بأشوف أي برنامج فيه نطع من أنطاع وزارة الداخلية وهو بيقول : دي عيال قلالات الأدب وما أتربوش أساساً .

في دي بأتفق معاه

دول عيال ما أتربوش على الذل ولحس الجزم

[لماضة مصرية جدا]

السلام عليكم و رحمة الله و بركاته

استاذي العزيز انا لسه مشفتش الفيديو

بس لسه قاعدة اقرا في السؤال

ليه "بعض" الناس مش طايقة النشطاء دلوقتي؟؟

ارفع لحضرتك القبعة لاستخدامك لفظ بعض و البعد عن التعميم

بس علشان اجاوب سؤال حضرتك لازم اسأل سؤال قبله

يعني ايه اصلا "ناشط"

لو من باب علم اللغة علشان نرد الاشياء للاصل هتلاقي ان نشاط هو اسم فاعل من الفعل نشط...(اسم الفاعل عادة بيوصف شخص بفعل ما و الاصرار علي هذا الفعل)

طب ما ممكن تسرح من نفسك شوية و تلاقيك بتفتكر كيميا بتاع الثانوية العامة و يقولك العنصر دوت دونا عن باقي العناصر....ناشط....(يعني مهم لتحريك التفاعل الكيميائي علي ما اتذكر)

ما لو جينا لعلم الاجتماع كان فيه نظرية زمان كلمنا عنها استاذنا و اسمحلي افكر فيها بصوت عالي مع حضرتك

احنا بنسمي الاشياء ازاي...يعني ليه بنقول علي الكوب...كوب....و ليه بنقول علي الترابيزة كده...يعني ايه اصلهم

و عمل تجربة هايلة جدا

مسك ورقة و قطعها بطريقة معينة و بعدين قالنا دي اسمها "شلوفة"

طبعا احنا في الاول كل واحد فينا طرطأ ودانه و قال مين فين يعني ايه

و طبعا هو رد علينا بكل ثقة و قال

ايوة دي اسمها شلوفة بس انتو مش عارفين حاجة

تمام

اول يوم استغربنا

تاني يوم استغربنا برضه

تالت يوم

ابتدينا نستخدم اللفظ علي استحياء بس و احنا بنستخدمه بنقول اصل الدكتور الفولاني قال كده

بنهاية الاسبوع

كانت ال "شلوفة" هي شيء عادي جدا في حياتنا

بنهاية الشهر

كان لل "شلوفة"....مجموعة من السمات و الصفات و الخصائص اللي تتارجح ما بين القبح و الجمال

و بعد ما خلصت التجربة

استاذنا جابنا و قالنا

مافيش حاجة اسمها "شلوفة" يا حمير....(ايون هو لسانه طويل حبتين تلاتة عشرة)

هو كان عايز يعرض لينا ببساطة ازاي مفهوم بيتكون

و ازاي مجموعة من الناس بتاخده

و ازاي ممكن "تلعب" في الحاجة الوهمية ديت علشان توجه الناس لفكرة معينة

انا بقول ده ليه

لاني شخصيا مش فاهمة معني "ناشط"

و اللي من اول الثورة ما قامت بيتم استهدافه بشكل غريب

طب ما نسال نفسنا مين هو الناشط

و احيانا تلاقي ان فيه حاجة اسمها ناشط سياسي وواحد تاني ناشط اجتماعي

طب انا ايه بقي ناشط من منازلهم مثلا

الادهي من كده مش فكرة "تكوين المفهوم" و لا "المصطلح نفسه

لكن الصفات اللي بتتفصل علي حاجة مش موجودة اصلا

يعني علي سبيل المثال

افلام وحيد حامد اعتمدت لفترة طويلة علي فكرة "الارهابي" صح

و صورته و فصلته في قالب معين

و يمكن كلنا وقعنا في الفخ ده في الوقت اللي امريكا نفسها عمالة تروج لفكرة الاسلاموفوبيا

و احنا نفسنا كنا اكبر شاري ليها

هتنكر ان في مصر ناس بتخاف من اللي مربي دقنه او اللي لابسة نقاب

ده اسمه نمذجة

ده اسمه صب الناس في قوالب و ابتدي اصد عليهم احكام مسبقة من مجرد "مسميات"

زي برضه جزء من ثقافتنا الغبي جدا...في ان احنا نتريق علي الصعايدة...و الصعيدي دايما لازم يطلع عنده شنب يقف عليه الصقر و داقق عصافير جنب عينه اليمين و لازمن ينضحك عليه

دي ثقافة

دي نمذجة...كلنا بنقع فيها

طب نيجي لثورتنا دلوقتي

شخصيا

انا مش عارفة يعني ايه ناشط

و ارفض ان مجرد اسم نوارة نجم و لا احمد حرارة و لا مالك مصطفي مع احترامي لكل توجهاتهم

ارفض ان يتقال ان ده ناشط سياسي

نوارة نجم....مترجمة و صحفية

احمد دكتور

مالك مدون و مشهور جدا في التدوين

انا برفض ان ال"نشطاء" يكونوا فريق معين لابس "صفات معينة

عارف ليه

علشان لو احناححدناهم و خنقناهم كده...هيبقي استهدافهم سهل جدا و ده الللي بيحصل و بيسموه التلاعب بالعقل ,mind manipulation

اول ما حد يقولك ده "ناشط" لازم تترسم في ذهنك صورة معينة عنه

و يا سلام بقي زي لما ازق في الصورة دي واحدة زي علياء المهدي اللي....في مدونتها

و اوقلك اوعي بقي دي ناشطة كمان

هتلاقي عقلك اتبرمج لا اراديا ان كل ما تيجي الكلمة.....تستدعي معاها صورة ذهنية معينة

و ده قمة القولبة و التعميم

و قمة تسليم عقلك لحد تاني يلعب فيه

انت عارف حضرتك انك انت شخصيا انا بشوفك "ناشط"

مش بتقضي وقت علي النت ب "تنشط" في قضية ما

يبقي دكتور ياسر....ناشط.....(اقبضوا عليه بقي:)

ليه الرغي الكتير ده

علشان اقول لحضرتك متسلمشي دماغك لفكرة هتتصب فيها

عارف ليه

علشان اعتقد ان الوعي الحقيقي هو انك تفلتر كل كلمة تعدي عليك و تشوفها ب "صورة" تحليلية

لو اللي مسمي نفسه "ناشط" طلع النهاردة و قال كلام متوافقشي مع رؤيتي او تحليلي المنطقي

يبقي كتر خيره و ادور علي غيره

و اكون انا نفسي الناشط

و اصلا

الشعب ده كله....نشطاااااااااااء جمعاااااااااااااء

اسفة جدا علي التطويل

بس سؤالك حضرتك استدعي عندي "صورة ذهنية" لل "شلوفة"...:)

صباح حضرتك.....حد مصري...ماشي في البلد دي...و بيحلم بيها تبقي كويسة...

يبقي ناشط

يبقي بتاع بطاطا....

يبقي تلميذ غلبان كاره الجامعة بس لازم يروح :closedeyes: ...

بس من حقه يحلم...و ينشط علشان يحققه

علي جنب بقي

ع فكرة استاذي بتاع ال "شلوفة"

درسني سنتين و انا فاكرة انه جاسوس

اوعي وشك بقي

عارف ليه

علشان كان فلسطيني من عرب 48 و معاه جنسية امريكية

انا طبعا عرفت المعولمتين دولما (مثني دوت يعني:)...و فضلت اتعامل معاه بمنتهي القولبة الصعيدي اللي في الدنيا

بس مطلعشي جاسوس....(قال يعني لو كان فعلا جاسوس كنت عرفت)...[س متأكدة انه مش جاسوس بس كان عنده قدرة انه يتحكم في افكر اللي قدامه...متهيالي لو حد فينا عنده نصها كنا زماننا حررنا القدس من زمان اوي

تم تعديل 26 يناير 2012 بواسطة لماضة مصرية جدا

[ماستر]

يوووة الله يسمحك يا لماضه, انا مبقتش عارف ارد على الدكتور ياسر ولا اشوف اية اصل الشلوفة, بس هى دى كائن برمائى يعنى ولا بسبع رجلين؟ وبيطير زى بن تن كدة يعنى :)

نرجع للموضوع الاصلى, عزيزى د. ياسر,

شوف مثل هذة البرامج الغرض منها واضح جدا وهو زرع فكرة سلبية لدى المستمع او المشاهد عن كل من يتبع الثورة ووصفة بناشط وتكرار الموضوع باسلوب مختلف حتى يتم التأثير على المشاهدين وتكوين صورة سيئة حتى تصبح كلمة ناسط مساوية ومكافئة الى شكل الاشكيف او الغولة مثلا

معلومة لحضرتك بس علشان انت عزيز على "مش كل المتصلين بالبرامج بيكون المتصل هو الى بيقول الكلام من عندة يعنى فى اوقات كثيرة بيكون البرنامج هو من يتصل بالناس ومجهز ليهم الكلام الى هيتقال"

[م تيمور المراغي]

بعد اللي شوفته امبارح من نزول شعب مصر كله للميادين والشوارع وهتافاتهم مع الثوار والنشطاء والتحامهم بيهم

ما بقاش يهمني رأي توفيق عكاشه ورولا خرسا وكل رموز الثورة المضادة الاعلاميه اللي عاوزين يوهمونا ان الشعب والاغلبيه الصامته ضد الثورة والثوار

والنوعية اللي اتصلت بخنفة صوتهم دي ازعم واقول انهم متحضرين من فريق اعداد زوجة عبد اللطيف المناوي وما ادراك من هما ,,

النشطاء هم عيون الوطن حراس القيم والمبادئ بدون اي مكاسب شخصية او سياسية

تحيتي ,,

[لماضة مصرية جدا]

السلام عليكم و رحمة الله و بركاته

معلشي انا تاني

و معذرة استاذي ماستر....(بس لو تتخيل احنا قعدنا ندرس في الشلوفة دي اد ايه...مش هتصدق)

بعيدا عن شلوفيات الثورة :closedeyes:

نرجع تاني للسؤال...ليه بعض الناس مش طايقة النشطاء؟؟

افتكر كان من مطالب الميدان "تطهير" الاعلام

و ساعتهاانا شخصيا مفهمتش ايه المطلوب هل هو يعني تغيير قيادات ماسبيرو و لا تنقلات وظيفية لاسماء ليها ثقل في الشارع المصري

بس الحقيقة دلوقتي بقيت اتبني اتجاه اكثر تحديدا و هو "تحرير" الاعلام....(المسمي و الفكرة للمدون وائل عباس...عشان منلفش في حكاية ال شلوفة تاني:)

الفكرة جذرها من "ميدان التحرير" اللي بيرسم حلم ال "تحرير" للبلد كلها

و التحرير لازم يبقي فيه قطبين اساسين

تحرير الاعلام

و تحرير المجتمع المدني....(و يمكن ده مش السياق بتاعه دلوقتي في التوبيك هنا)

لكن تحرير الاعلام

ببساطة انه يكون عندك اعلام مستقل يعمل علي تحرير العقل من القوالب الجاهزة

ببساطة يكون عندك اعلام مالوش توجه مسبق

اعلام يفتح خلايا دماغك للتحليل و التفكير و البحث عن الحقيقة مش بيقدملك وجبة جاهزة معلبة الافكار عن ما يراه هو كأداة للسلطة "حقيقة".

الاعلام مش ان احنا نمثل "اعلام" و لا ننقل خبر....و لا نمثل "حرية"

لو قدرت توفرلي الاعلام ده

صدقني

محدش لا هيحب و لا هيكره النشطاء و لا هيتريق ع الصعايدة:)

هيوضع امامك حقائق...معلومات....و انت تشغل عقلك و توصل للدلالات و تاخد قراراك

انت مؤيد الفكرة...(و ليس الشخص) ام انت ضدها

انت بتشتري الفكرة دي من شخص و بترفض فكرة تانية من نفس ذات الشخص

هي قدرتك ع التحليل

طب احنا عندنا ده....(انا شخصيا معنديش بس بحاول اتغير)

طب احنا عندنا اعلام....حر.......استحالة

يبقي هتتوقع ايه

غير الفرزة اللي في وش القفص اللي اسمه التلفزيون

محصلة منطقية...لمدخلات هشة....متوقع ايه تاني

و برضه دي وجهة نظري

كان معكم

الناشط الاعلامي

لماضة ابو العافية:closedeyes:

[Ahmed Anwer]

معلهشي يا جماعة مع إحترامي

بعض النشطاء و مش هأقول كلهم

بيضروا الثورة أكثر ما بيفيدوها

و مكروهين شعبيا

بسبب تعاليهم و عنجيتهم و بذاءة لسانهم و إسرافهم في الظهور الإعلامي

و هما غير مؤهلين تماما لذلك

و الأفضل تجاهلهم و كفاية عليهم تلميع و إظهارهم بصورة رموز للثورة

[ابو محمود]

صلو على النبى كلنا نشطاء اذآ كلنا قوالب وبما انى قالب زي أي قالب منكم يا ثوار حاولت اغير القالب بتاعاى يعنى اعمل تغيير سريع

نزلت التحرير نعم شاهدت وعملت مع الثورة نعم والحمد للة

كان هناك جيران لي من أمن الدولة نعم يسكن بجوارى وفى منطقتى نعم

كان لى اصدقاء يحبون مبارك ولهم مصالح من حكمة نعم

هل اختلفت معهم نعم واقسم بالله وتشاجرت من اول يوم 25 الى نهاية الخلع المبارك

هل اخافك الأمن وسيطرت عليك قوتة البوليسية فى جزء من تفكيرك

نعم وكن اعرف اننى لو لم تنجح تلك الثورة فانا فى خبر كان هههههههههههههه

لكنى كنت أؤمن بان الله معى

وبعد انتهاء الخلع وتعهد الجيش كسلطة بانتخابات نزيهة عندها ادركت اننى لا بد ان اذهب الى مصنعى واحاول ان اكافح لتشغيلة مهما صادفنى من متاعب وصادفتنى حرب شديدة القسوة الفساد من حولى بالطن وتعرضت لمصاعب لكنى كنت اؤمن بالله فلم استسلم ولم اطرد عامل واحد بل حافظت عليهم جميعآ والان اتمنى ان يخيم على مصر الامان والأمن حتى اعوض ما خسرتة من عطلة دامت ما يقرب من 300 يوم الى الان اتمنى ان تتم

لكنى فى النهاية ناشط سياسى وثورى ومكافح وعامل وصاحب عمل اجتهد فى مصنعى وناشط فية ومدافع عنة ومحافظ على من يعمل معى ولم اتأخر فى تسليمهم مرتباتهم مرة واحدة والحمد للة ولو كان على حساب بيتى واولادى لانى احس واشعر بان من يعولون ايضآ اولادى ولهذا انا اقف بكل شرف وعزيمة فى صفوف النشطاء والثوريين لكنى اختلف معهم فهم فى ميادين مصر وانا فى ميدان العمل وهذا هو الفارق بين ناشط وأخر

اتمنى ان نصبح جميعآ نشطاء فى بناء مصر ورفعتها فهذا من وجهة نظرى هو الناشط الحقيقى اذا كان هناك من يمثلنا واعطينا له اهم ما نملك وهو ثقتنا فية كممثل لنا فى المجلس النيابى عندها يجب ان نحارب كل دقيقة على ان ننتج ونعرق حتى نترك مصر لابناءنا صرح شامخ يكملون هم تعليتة وتأمينة كما سلمناهم الامانة

تحيتى الى المهندس / ياسر علام هذا الرجل شاهدتة بالامس القريب بالميدان وكان معى ابنى وتواعدنا باللقاء وشاهدنا الميدان وادركنا ان هناك اختلاف وان من يقف بالميدان ليسو كمن وقفو ايام البداية او لنقل بعضهم حتى لا نظلم احدآ وكانت هذة اول مرة يشاهد ابنى محمود الميدان فهو صغير صاحب ال12 سنة وعند مغادرتنا الميدان كنت اشعر اننى اشاهد صورة مختلفة او لنقل تقسيم الميدان وهذا مالم اشاهدة فى العام الماضى ..

كانت زيارتى فى الواحدة صباحآ وكنت قد غادرت مصنعى فى ال12 مساء بعد منتصف الليل وكنت متعب لكنى ذاد علي تعبى عندما تجولت وشاهدت الانقسام وحمدت الله بانى الناشط الذى لم يتغير وكنت كما كنت بالسنة الماضية من المصنع للميدان ولم انقسم على نفسى او كانت لى اطماع الحمد لله الحمد لله الحمد لله