الفرق بين ثوراتنا وثوراتهم وضحايانا وضحاياهم وبلدنا وبلدهم

[se_ Elsyed]

والله ده اللي أقصدة في كل الأحداث اللي بتمر بها مصر بعد الثورة

إن في داهية وزارة الداخلية كمبنى ... ووزارة الدفاع كمبنى .. والمجمع العلمي كمبنى

لان كل دول يتعوضوا والإنسان هو اللي بيبنى كل ده وافضل من الأول كمان ...

والحاجات دي لو أتدمرت في زلزال .. أو حريق .. ما عادي بنعمل غيرها وأحسن ....

لكن لا يمكن تعويض أصبع إنسان قد قطع .....

كل هذا دون الدخول في رمز الدولة وهيبة الدولة والكلام المكلكع ده اللي موجود عندنا بس .. وعشان كده بنقدس الاهرام ... وما بنذكرش الناس اللي إتفحتت وهي بتبني هذه الاهرام

ما علينا وهاشرح وأستفيض في الكلام ده

لكن كنت عاوز أركز على المظاهرات والإعتصامات والبهدلة اللي بتتم في اليونان الأن نتيجة سياسة التقشف اللي هاتتبعها الدولة هناك لتفادي حالة الأفلاس والمشاكل المالية اللي بتتعرض لها البلاد مش بس كده .. إنتوا عارفين إن من ضمن حزم التقشف إنهم هايخفضوا المرتبات ؟

طب قولنا المرتبات ممكن الواحد بصحته يشتغل شغلانتين وتلاته ويشتري توك توك يوناني يلقط بها رزقه وينحت في الصخر ويعوض فرق التخفيض

طب إذا قولت لكم إن اليونان هاتخفض معاشات الناس الكبار كمان ... وقولوا لي إنتم بقى ممكن يحصل إيه في البلد وممكن الناس دي تعمل إيه في المؤسسات والبشر بل والحجر ؟

طب بإختصار دلوقت عشان مستعجل شوفوا اللي حصل اليومين اللي فاتوا دول بتوع الإضطرابات في اليونان

احتجاجات اليونان بالأرقام : (حتى الان )

احتراق 42 مبنى في العاصمة أثينا .

احتراق 3 فروع بنوك (يوروبنك..ألفا بنك.. أتيكا بنك)..

احتراق المكتبة الوطنية اليونانية..

احتراق مبنى اداري يضم عدة مكاتب لأعضاء فى البرلمان

اقتحام مبنى التليفزيون المحلي لمدينة كريتي..

" جنود شرطة تشتعل بهم النيران .. وسلاحهم هو العصي وفقط !

" عدد الاصابات حتى الان :57 اصابة من المتظاهرين .. 52 شرطي..

" عدد القتلى حتى الان : ....... صــــفــــــر "

شوفتوا البلاد بتتقدم إزاي .. وبتتقدم ليه ؟

[ذهبية]

لسبب بسيط جدا يا استاذ سى السيد

ان البلاد دى بيفعل فيها القانون و لما بيفعل فيها القانون يعنى لازم اللى عمل جريمة بيحاكم

ولازم لما يطلع الحكم الكل بيشهد على دة

و المفاجاة و من عجائب الكون اللى عندهم

ان المجرم لما بيصدر ضدة حكم بينفذ فية الاحكام

ومفيش تاجيلات و لا اصابع مجهولة و لا لهو خفى

فبيكون عبرة لمن يعتبر و بيفكر اى واحد فى سلطة الف مرة قبل ما يرتكب شىء خارج القانون لان عارف كويس انهم معندهموش خيار و فاقوس و لا كوسة و ا الخضار اللى عندنا هنا

هنا بقى الوضع مختلف تمام

هنا المجرم على ثقة تاااااامة انة مش هتمسك ولو اتمسك مش هتحاكم لو بدات محاكمتة يكون الناس اساسا

نسيت هو اتمسك لية

ممكن حضرتك تقولى

بعد الشجب و الرفض و التهديد و الوعيد

والصداع فى كل الفضائيات

عرفنا مين اللى ورا احداث ماسبيرو

مين اللى ورا حريق قصر الثقافة زمان

مين السبب فى غرق السفيينة السلام 98

مين اللى ورا قتل المتظاهرين

مين اللى ورا مجزرة بورسعيد

والسطور هتطول قوى و الجانى ؟؟؟؟؟؟؟؟؟ اللهو الخفى

يا سيدى احنا هنا القانون فى اجازة

هنا القانون لة ناسة الناس الكبيرة مفيش قانون بيمشى عليها

المجرم صاحب السلطة و المال لدية حصانة ممنوع الاقتراب

هو دة الفرق بينا و بينهم