رحله الى الصين

[Cleo]

Cleo شارك في تاريخ Nov 30 2004, 12:02 PM

  أستاذ ماجد...

تقبلنى تلميذة فى مدرستك حضرتك الأدبرحلاتية؟؟؟ 

كليو قعدت ساعه لما فهمت اخر كلمه

حقك عليا يا فرى... أنا بس حبيت أتفذلك شوية :P

[ماجد]

اكمل .......

(13)

كان قد انتهى وقت المعرض فأخبرت مستر بيل بأنى عازمه على الغدا بس بشروطى …..

و كانت شروطى هى :

- ان انا ادفع الحساب

- انه يطلب لى الأكل اللى انا عاوزه .

- انه المطعم يكون ريحته حلوه .

- ان المطعم ما يكونش فيه بيض كيوى او حيوانات غريبه او تعابين .

فوافق ثم افهمنى بأن حكاية الرائحه دى من نوعية التوابل مش علشان نظافة المطعم و فعلا انتبهت الى ان كل المطاعم ريحتها مزبله فقلت له تمام بس انا عاوز مطعم مش بيستخدم توابل مزبله فقال لى أوكى بس ايه حكاية الحيوانات الغريبه فلما حكيتله قال لى شوف الصين تعدادها اد ايه 1200 مليون نسمه و علشان تكفى الناس دى فلازم ناكل اى حاجه و عندنا مثل معناه نحن نأكل كل ما يسير على الأرض عدا السيارات و كل ما يطير فى الجو عدا الطائرات و كل ما يعوم فى البحر عدا الغواصات .

من ساعتها و انا واخد بالى من نفسى كويس و محرص أوى .

المهم قلتله يالا ركبنى اقرب طياره للمطعم و خدنى فى حنانك خدنى وودينى مطرح المطعم ودينى . وصلنا المطعم و حاجه آخر شياكه زى المعابد الصينيه كدا . الأسقف اللى الزوايا بتاعتها مشمئنطه لفوق و مكونه من أجزاء متركبه على بعضها زى القرميد ( جارى فى اسكندريه مصّر على انه اسمه القرموط ) و المطعم له جنينه فيها اشجار كبيره ممكن تقعد جنبها او يحط لك شمسيه لو مش عاوز تقعد جنب الشجر و ممكن تقعد جوه المطعم طبعا لكن انا فضلت قعدة الجنينه . الكراسى و الترابيزه و المفرش حاجه آخر شياكه و آخر راحه . و ادوات المائده من العاج آخر فخامه . و ادوات المائده تتكون من عصايتين و ملعقه صغيره ( اكبر من معلقة الشاى و اصغر و اقصر من معلقة الشوربه عندنا ) و جت المينى قلتله اطلب اللى انت عاوزه بس اطلب لى انا مكرونه سباجتى ( الصين ام المكرونه و منها سرق الفكره ماركو بولو الرحاله الأيطالى ) و هاتلى سمك اى نوع و يكون معمول بطريقه خفيفه فى الهضم و حاجه ساقعه امريكانى ( بيبسى او كولا حاجه اكون عارفها ) و شوربة جمبرى بدون اى اضافات يعنى جمبرى و بس خد بالك سألنى طيب و السلطات قلتله مش عارف اطلبها انت ( هاقول سلطة طحينه بالأنجليزى ازاى حد يعرفها ) بس تكون كلها نباتيه . فالراجل سألنى هوا انت نباتى ده انت طالب سمك . وقعت فى حيص بيص هاقوله ازاى اصل انتو كفره ماينفعش آكل عندكو لحمه . المهم جاوبته بأن عقيدتى تمنعنى من حاجتين فى الأكل و الشرب الخمور و البيره و اللحوم فى ظروف معينه .

استغرب الراجل جدا و قال يعنى مش ها تشرب قلتله لأ . المهم الراجل سألنى طيب هتاخد ايه فى الحلو قلتله بدون تردد سلطة فواكه . طيب مش هاتجرب الرز بتاعنا قلتله لألألألألألألألألألألألألألألألألألألألألألألألألألألأ . المهم الراجل طلب الأكل لى و لنفسه و قلتله انا عاوز 3 اطقم من العيدان دى آخدهم و ادفع تمنهم و طلبهم من الجرسونه.

جاء الأكل و التهمنا . و الحق انها كانت وليمه عظيمه . عن نفسى استمتعت ايما استمتاع . بدأت بالشوربه و كانت رائعه ثم بالسمك و كانت سمكه واحده طوله حوالى 20 سم و حولها بعض الأعشاب مقدمه بطريقه فعلا تفتح النفس و متنضفه من جوا و كانت السمكه مسلوقه و لونها ككل فضى بس انا مش عارف نوعها ايه لكن شكلها مش غريب عليا يعنى تشبه سمك السلمون كدا . المكرونه كانت بيضا و لذلك بدأت احط عليها من السلطات اللى كانت كلها عباره عن سوائل اشى اسود و اشى اخضر و اشى بنى و سألت الراجل يقول دى صويا ( السودا …..عارفها ) و دى مش عارف ايه و دى ايه المهم اطمنت انه كله نباتى فاتكلت على الله . اما الراجل فطلب رز و الصلصه السودا و البتاعه الخضرا اياها و سمكه زى بتاعتى . و قعدت اتفرج عليه و هو بياكل فى الأعشاب الخضرا زى العفريت لدرجة انه لاحظ فقلتله اصلى حاولت آكلها ماعرفتش قال انها اكله شعبيه جدا و انها بتتقلب بسرعه اوى فى طاسه فيها شوية زيت و خد حته جرب تانى قلتله لآلآلآلآلآلآلآلآلآلآلآلآلآلآلآ شكرا .

جه الحلو و بالنسبه له كان حاجه كده معجنات معرفتش ايه دى و بالنسبه لى كان سلطة الفواكه لقيتها عباره عن فواكه نصها ماعرفوش يعنى كان فيه حاجات زى المشمش و زى البرقوق لكن اغرب حاجتين فاكهه حمرا و صغيره زى الكريز كده بس على كبير و بدون بذر و حاجه بيضا فى حجم البصل المخلل و شكله بالضبط و تقريبا نوع من انواع البصل الحلو . المهم استمتعت جدا و شبعه بعد جوعه .

نسيت اقول على حاجه ووشى مكسوف شويه و عنيا بتبربش :P . انا عندى لازمه كده انى بعد ما خلص الفواكه لازم اشرب المياه بتاعة سلطة الفواكه ( السيرب يعنى ) و بطريقه معينه يعنى من الطبق على طول ……باحبها اعمل ايه يعنى …. و باحبها اكتر من الفواكه كمان ….. هه . و هاشربها كمان …. و اللى يحصل يحصل .

الحكومه بتاعتنا بقه ساعة ماتلاقى سلطة فواكه فى اى مكان صحرا ان كان او بستان تروح خافياها علشان المصيبه اللى هاتحصل و لو هربت طبق ولا سلطانيه منها قدام الناس و ماعرفتش تلحقنى تفضل تضربنى على ايدى و تقول امسك نفسك …. امسك نفسك علشان عارفه المصيبه اللى هاعملها و فى الآخر و قبل ما خلص الطبق تروح واخداها منى و كفايه كدا علشان الضغط . المهم انا طبعا فى الصين وما حدش عارفنى و اي حاجه اعملها هايقولوا اختلافات ثقافيه بين الشعوب . المهم خلصت طبق سلطة الفواكه و فضلت الميه و انا عمال ابص لها . فضلت ماسك نفسى حوالى 10 ثوانى كده و فجأة انهارت مقاومتى و قبل ما حد يعرف يوقفنى رحت عاملها .

و عملوها الوحوش ………… :lol:

و تعيش مصر حره …………. و اخيرا استريحت mc:

كده الوجبه تبقى ممتعه وورينى شطارتك يا حكومه ……. و احنا مافيش حد يهمنا صحيح المياه كانت حراقه شويه …… لكن برضه حلوه.

لقيت الراجل بيبص لى بصه غريبه و بيضحك . ايه يا عم فيه ايه اظن هاتقولى غلطت فى البرتوكول و كنت هامسكه و اردح له و اجيب له الجديد و القديم من ايام ماو و اكل الوطاويط و قبل ما اسخن عليه لقيت الراجل بيسألنى انت شربت المياه

قلتله ايوه

قاللى : كلها

قلتله ايوه ….. قال طيب و ضحك . قلتله يا عم فيها ايه دى …… قال لأ مافيش مشكله …. و راح نده للجرسونه و قال تشرب شاى قلتله طبعا بس شاى احمر زى الشاى الهندى . المهم شربنا الشاى و بعدها دفعت الحساب و كان حوالى 200 جنيه ( شوفوا التفاصيل بعشرة قروش خس ) و خدت اطقم العيدان و مشينا .

الراجل قال لى تروح الأوتيل دلوقتى و تستريح علشان انا عازمك بالليل على فسحه كويسه .

قلتله اتفقنا ……

يتبع .....

[ماجد]

الأخ sos

و الأخت nashwa

يافندم اهلا بكم و سهلا

الأخت Cleo

أستاذ ماجد...

تقبلنى تلميذة فى مدرستك حضرتك الأدبرحلاتية؟؟؟

ده سعادتك الفن كله .... و منكم نستفيد :)

اخونا سقراط المصري

البرمجيات بصفه عامه نوعان مفتوحة و مغلقة المصدر. المفتوحه كأنظمة الليونكس و هى التى تستطيع التعديل فيها بما يناسبك . و المغلقه كالويندوز و هى التى تستخدمها كما هى .

يستحيل عمليا فك شفره البرامج الكبيره بعد انتهاؤها و لذلك لا تنفع عمليات الهندسه العكسيه مثلا لفك شفرات الويندوز و لذلك طلبت حكومة الصين هذه الشفرات لكى تطلع عليها و تغلق اى ثغرات جاسوسيه امريكيه على النسخ الحكوميه الصينيه مقابل السماح ببيع الويندوز و المنتجات مايكروسوفت فى الصين بطريقه شرعيه و مقاومة عمليات النسخ الغير قانونيه.

تحياتى و اى خدمه

تم تعديل 1 ديسمبر 2004 بواسطة ماجد

[yasovinas]

االبرمجيات بصفه عامه نوعان مفتوحة و مغلقة المصدر.تحياتى و اى خدمه

بيقولوا في السفر سبع فوائد

وانا اقول في سماع او قراءة قصص الرحلات (ادبرحلات) على راي كليو

عشرميت فايده

عرفنا اسامي احجار كريمه وانواع اكل وبيض كيوي هو الكيوي بيبيض اهي دي اول مرة اعرفها

وكمان معلومه البرامج المفتوحه والمقفوله يا سلام العلم نورون

[disappointed]

دار المحاورات للنشر

تقدّم :

الرحّالة / ماجد

فى كتابه الجديد :

البيان و التبيين...فى رحلتى للصين

مكتبة المحاورات للأسرة و المطبخ

تقدّم :

الشيف / ماجد

بالتعاون مع أبلة نظيرة فى كتاب الطبخ الجديد :

الوصفات العلّيوى... لتحضير بيض الكيوى

محاورات فيلم للإنتاج السينمائى تقدّم :

النجم / ماجد الرحّال

فى فيلم الموسم

صراع خلف السور

مدينة المحاورات للإنتاج الإعلامى تقدّم :

أقوى أفلام الآكشن لهذا الموسم

للنجم / ماجد شان

باى باى... شنغهاى

[yasovinas]

بس علشان ما ننساش وانت كمان لاتنسى يا ماجد

صديقك الصيني استغرب ليه انك شربت الماء بتاع الفروت سلاط

على فكرة انا كمان بحبها جدا وبرضه بشربها بس ايه اذاعة شرب يا ابني فاكر عادل امام في مدرسة المصريين لما كان بيوصف شرب الشوربه

[se_ Elsyed]

وانا ليكو عليه أتبنى كليو وكابتن ماجد عشان يمتعنوا بالأدبرحلاتي .. ولو أضطريت إني أقطع لهم تذاكر على حسابي عشان يرجعوا يوصفوا ويتفننوا في هذا السرد الممتع ...

بس ليه شرط

تروحوا المكان اللي أقولكم عليه ..

يعني حد يرجع يقولي الصومال لأ .. تورابورا مش عارف أبصر إيه .. ماعنديش ياما أرحميني .. وفي شرط مهم .. تاكلوا أي حاجة تقابلكم ... يعني ماجد الله يسامحه حرمنا من متعة وصف أكل بيض الكيوي البريش بالمايونيز .... يا أخي طب جرب عشان اخواتك ... جرب عشان مصر والمصريين ... ماهم الصينيين بقى لهم آلاف السنين عمالين ياكلوه ومشفناش حد جرى له حاجة .

بفلوسي اعمل اي حاجة وإنتوا عليكوا التنفيذ وترجعوا تحكولي وتسلوني بتفاصيل التفاصيل...

كفاية إنكم خلتوني أكذب على مراتي .. كل يوم اروح وبدل ما أدخل على العيال بالليل ببطيخه يلاقوني داخل برزمة ورق ( من سفريات كابتن ماجد ) ... تسألني ام عمر .. إنت هاتشتغل في البيت كمان مش كفاية التليفونات والموبيلات اللي خوتانا ؟

أقول لها اعمل إيه عندي ضغط شغل اليومين دول ونهاية السنة وكده :)

واتاريني عامل زي العيل الصغير اللي حاطط مجلة ميكي جوه الكتاب وبيقرطس اللي حواليه ومنهمك في المذاكرة الواد الجن ...

[se_ Elsyed]

بس بأمانة يا ماجد ..

من ساعة ما أبتديت تخبط في الأكل الصيني والمطاعم الصينية وانا كنت هاخد منك موقف عدائي .. لأن أفخم مطاعم هي المطاعم الصينية على الأقل اللي جربتها في الخليج .. ولا في ريحة ولا في اكلات غربية .. طبعاً هما عارفين طبيعة البلاد العربية وما يقدروش يعملوا حركات نقص .. كيوي وقطط وتعابين وخلافه ...

لكن أنا تصورت إنك هاتهيص هناك وهاتاكل من السورس نفسه وهايبقى شغل على ميه بيضا ...

لكن وصفك للمطعم الاخراني رجع المياه لمجاريها وصافي يا لبن ...

[SilverSwan]

دار المحاورات للنشر

تقدّم :

الرحّالة / ماجد

فى كتابه الجديد :

البيان و التبيين...فى رحلتى للصين

مكتبة المحاورات للأسرة و المطبخ

تقدّم :

الشيف / ماجد

بالتعاون مع أبلة نظيرة فى كتاب الطبخ الجديد :

الوصفات العلّيوى... لتحضير بيض الكيوى

محاورات فيلم للإنتاج السينمائى تقدّم :

النجم / ماجد الرحّال

فى فيلم الموسم

صراع خلف السور

مدينة المحاورات للإنتاج الإعلامى تقدّم :

أقوى أفلام الآكشن لهذا الموسم

للنجم / ماجد شان

باى باى... شنغهاى

هااايل :lol:

[SilverSwan]

تابع يا استاذ ماجد .. بجد انامستمتعه جدا

وبعد اذنك انا هاخد كوبي من الموضوع كله احتفظ بيه و ابقى اقراه تاني على روقان قبل النوم :lol:

[ماجد]

ياهلا فيكون ...... ( وش واحد لبنانى )

نورتو الديره ....... ( وش بن عجلان من مسلسل واضحا وبن عجلان) ....

على فكره انا هاعمل جايزة للى يقول لى المسلسل ده بطولة مين وهاقولكم على ارقام تتصلوا بيها .... :P

( كده المسائل تمشى و القرد يعرف يلعب و اهو يبقى مسلاسلات على مسابقات و نعرف نجيب تمن المشاريب )

wst::

و اتوجه بالشكر لكافة المسئولين و الغير مسئولين الللى شرفوا . و تقبلوا هذه الردود الخاصه :

عمنا disappointed

استنى علّى شويه ..... ده لسه فيه الرحاله / ماجد فى ..... و كابتن / ماجد فى ..... و عبد الودود / ماجد فى ...... و المذعور / ماجد فى ...... wst::

عمنا se_ Elsyed

سعادتك بالذات لى حساب خاص .

أولا :لأنى قلتلك هات حتة بيتزا و طنشت و ده ماكانش العشم :lol: :D

ثانيا : لأنى قلتلك آخر مره كلت من عندكو جالى مغص و برضه طنشت :lol: .

ثالثا : لأن المطاعم الصينى اللى بتشوفوها دى بتاعة - لأ مؤاخذه - السياح bk: .... يعنى لما يجيلك ضيف خواجه كدا مش بتسحبه من ايده و على واحد كلابجى - أقصد كبابجى . و عشان كده يفضل الراجل يشعر فى أكل مصر و نضافة مصر و الذى منه .

انما تعال بقه و خده كده عند مسمط الحسين taz:: و ارزعه فشه على كرشه على ممبار على جواهر و لسان ولحمه راس وانت تلاقيه نطق بالعربى و هاتك يا شتيمه ...

اهو المطاعم اللى انا رحتها كده .... مش بتاعة السياح ولا مؤخذه ... :lol:

اخونا yasovinas

ايوه كده ......انا احب الناس الصاحيه معايا. ماتخافش كله محطوط فى البروجران بتاع الليله .علشان نشوف مين الصاحى و مين اللى لامؤاخذه شارب مية سلطه .

[yasovinas]

ماجد باشا انا من نصف ساعه لمحتك دخلت المنتدى وانا كنت ناوي اطلع قلت بس هيتحفنا بواحده من الحلقات الحلوة ففضلت اتمشى في المنتدى اقرا شوية مداخلات لكليو على ابو السيد على فيروز منتظرك تخلص واول نا لمحتك خلصت دخلت جري الاقيك بترد علينا بس طيب والحلقه امتى

بقيت عامل ذي الام بي سي 2 طول الاسبوع يجيبو لك اعلان عن الفيلم وبعدين تيجي يومها يا تنام يا تنشغل في مشوار حاجه تجنن

[فــيــروز]

او خدت اطقم العيدان و مشينا .

طيب سؤال :lol:

يا ترى العيدان دى هى المقصود بها العصا التى ياكل بها اليابانيون يعنى !! :lol: الصينيون كمان بيستخدموها ولا ايه :lol:

[disappointed]

نورتو الديره ....... ( وش بن عجلان من مسلسل واضحا وبن عجلان) ....

على فكره انا هاعمل جايزة للى يقول لى المسلسل ده بطولة مين وهاقولكم على ارقام تتصلوا بيها .... :lol:

المسلسل من إنتاج التليفزيون الأردنى سنة 1975 و من بطولة عفاف شعيب و يوسف شعبان

هاااا...فين جايزتى؟؟؟

(إوعى تقول لى حتبعت لى كرتونة بيض كيوى :lol: )

[ماجد]

المسلسل من إنتاج التليفزيون الأردنى سنة 1975 و من بطولة عفاف شعيب و يوسف شعبان

اسم البطله غلط يا دك ...... راجع معلوماتك هاهاها

طيب سؤال

يا ترى العيدان دى هى المقصود بها العصا التى ياكل بها اليابانيون يعنى !!  الصينيون كمان بيستخدموها ولا ايه 

ايوه هى ... هى...

ماجد باشا انا من نصف ساعه لمحتك دخلت المنتدى وانا كنت ناوي اطلع قلت بس هيتحفنا بواحده من الحلقات الحلوة ففضلت اتمشى في المنتدى اقرا شوية مداخلات لكليو على ابو السيد على فيروز منتظرك تخلص واول نا لمحتك خلصت دخلت جري الاقيك بترد علينا بس طيب والحلقه امتى

بقيت عامل ذي الام بي سي 2 طول الاسبوع يجيبو لك اعلان عن الفيلم وبعدين تيجي يومها يا تنام يا تنشغل في مشوار حاجه تجنن

دقايق ياباشا و الحلقه تنزل بعد الأعلانات

[disappointed]

المسلسل من إنتاج التليفزيون الأردنى سنة 1975 و من بطولة عفاف شعيب و يوسف شعبان

اسم البطله غلط يا دك ...... راجع معلوماتك هاهاها

إيه ده؟؟

يعنى أنا كنت مخدوع كل السنين اللى فاتت دى؟؟؟

:lol:

مممم...

طب قول كده و أنا حأقول على طول

:lol:

(غريبة قوى... مع إنى كنت متأكّد من عفاف شعيب أكثر من يوسف شعبان)

[ماجد]

اكمل ......

(14)

الراجل قال لى تروح الأوتيل دلوقتى و تستريح علشان انا عازمك بالليل على فسحه كويسه .

قلتله اتفقنا ……

بس قبل ما تسيبنى اكتب لى الأكل اللى انا كلته بالصينى و نفس المواصفات اللى انا قلتلك عليها كده . قاللى فى التاكسى ...قلتله الله انت هاتركب معايا . قال لى لأ انا هاوصلك الأول و بعدين هاروح الأوتيل بتاعى ..... استغربت فى نفسى و قلت غريبه الواحد لسه ياما هايشوف .

المهم وقفنا فى طابور صغير علشان ناخد التاكسى اللى برضه واقف فى طابور تاكسيات صغير . و فجأه حسيت بأن الجو جميل جدا . قلتله ده الجو رائع و شوف الناس حلوه ازاى و بدأت اضحك و انا باشاور و اقوله الله هوا دا العسكرى الأزرق ……. ها ها ها …. أخو العسكرى الأخضر ….ها هاها . شوف الناس صغننين ازاى …..هاهاها. الراجل راح مكلم اللى امامه كلام ما فهمتوش و راح حاططننى فى تاكسى و قال للسواق كلام بالصينى …..هاها ها ها . و انا عمال اقوله ياراجل مستعجل ليه ده القعده باينها هاتحلو ….هاهاها . أتارى ايه بأه ….المياه بتاعة سلطة الفواكه كانت نبيت ابيض أو خمره بيضه الله يخرب بيته و انا شربتها زى الجردل فالراجل قال يوصلنى لأنه عارف هاتعمل فيا ايه خاصة و انا مابشربش .

دخلنا الأوتيل و قال للريسبشن كلام و انا مش فاهم اى حاجه لكن عرفت بعدها انه قالهم وصلوه الأوضه و هاتوه له شاى و نيموه و صحوه الساعه 9 .

بعدين لما فقت ………..هما اللى قالولى

الفتره دى بأه مش فاكر عنها اى حاجه غير انى كنت سعيد جدا .

لما صحونى الساعه 9 كنت حاسس انى حد ادانى شلوت فى دماغى. المهم غيرت و خدت دش علشان افوق و الراجل كلمنى من الريسبشن فنزلتله …. اول ما شافنى وقع من الضحك و فهمنى ايه اللى حصل .

قلتله يا راجل مش انا قايلك ما بشربش قال ايوه بس انا متوقعتش ان وجودها فى السلطه ممنوع و متوقعتش انك هاتعمل اللى انت عملته .

آدى آخرة الطفاسه …. و آدى آخره اللى مايسمعش كلام الحكومه بتاعته.

قلتلله بص بقى علشان نبقى على نور من الأول هاتودينى فين . قال الأول فيه جوله سياحيه فى نهر بيرل . قولتله تمام . و بعدين هانروح فى مكان علشان تهيص شويه قلتله ازاى يعنى .. و بعد أخذ و رد فهمت منه انه كان عاوز يودينى علبه من علب الليل . المهم اديتله محاضره فى الأخلاق الحميده . الصوره العامه عننا سكان الشرق بصفه عامه اننا مجانين جنس . المهم حاولت انى اصحح الصوره دى فى ذهنه طول الليله و كان مستغرب جدا . فاكرين الشاى اللى جابهولى هديه . طلع شاى به مقويات جنسيه برضه حاجه كدا زى حبوب الفياجرا . المهم الليله عدت على خير .

الجوله السياحيه البيرليه ( على وزن النيليه ) كانت جميله و كان التركيز فيها طبعا على الجزء الحديث من المدينه الملىء بالأضواء و الأنوار و الألوان المبهره اما الجزء القديم من المدينه فمظلم و قاتم بعض الشىء . طبعا هو كان متخيل انى هايجيلى انبهار بالنهر مقارنة بالزبائن الأوروبيين لكنى اوضحت له ان نهر النيل عندنا اكبر من نهر بيرل حوالى 3 مرات كده فالراجل بصراحه اتكبس و لو انى قلتله كنوع من المجامله ان المدينه من النهر حاجه تانيه و ان لها سحر خاص و أشياء من هذا القبيل . جابوا لنا مشروب زى الزنجبيل كده حامى شويه قلتله ها يا مستر بيل فضحك و قال لا … اشرب و متخافش . سميت و شربت .

فاكرين أكياس الفاكهه المجففه اللى كنت اشتريتها من السوبر ماركت …خدتها معايا . و فى اثناء الجوله فتحت واحد و اديت للراجل فقا لى ايه ده قلت له مش عارف انت اللى هاتقولى . المهم قاللى دى اول مره اشوفها و داق حته و بعدين سابها . انا بقه قعدت اقرقض فيها زى الفار و طعمها بلا …. بس قولت هاقرقضها يعنى هاقرقضها . هى طويله و تشبه الخروب كده فى الشكل و كله قرقضه . و كان فيه بلابيع تانيه عامله زى المشمش المجفف كدا بس بالنواه دى برضه معرفهاش بس انا قعدت امصمص فيها و مضت الجوله بين المصمصه و القرقضه و لما رجعت حاولت انقعها فى المياه ………ازدادت بشاعه .

فى الرجوع اخذت تاكسى من امام المرسى بعد ما ودعت صاحبنا و قلت للسواق على اسم الأوتيل . و الأوتيل كان اعطانا كارت به اسم الأوتيل و عنوانه بالصينى و كان معى خريطة للمدينه شايلها دايما فى جيبى . المهم قلت للسواق و طلع الراجل . كنا دفعنا واحنا رايحين 20 رمم بى . المهم لقيت المشوار بعد اوى . ببص على الخريطه مع اسماء الشوارع لقيتنا بعدنا جدا . قلت يادهيه دقى وقعت فى ايد جاكى شان …. شويه و لقيت الراجل وقف امام مطعم اسمه مطعم فيوراما فقلت له لأ و طلعت الكارت فهز رأسه و طلع تانى .

وصلنا الأوتيل و انا عمال افكر اعمل ايه ياترى ادفع الحساب من سكات و هو 40 رمم بى يعنى الضعف و لا اعمل معاه مشكله و اتفرج ايه اللى هايحصل . قررت اعمل مشكله و اتفرج و اهو كله علام . المهم الراجل وقف امام الفندق و بص للعسكرى اللى امام الفندق اللى بياخد نمرته و انا بصيت على العداد فلقيت السواق بيقول لأ هات النص بس .

كمان جوا التاكسيات مكتوب بالأنجليزى و الصينى معلومات حول السائق و السياره علشان لو حصل حاجه بعد ما تنزل من التاكسى زى اوروبا بس هنا هايجيبوه من قفاه لا مؤاخذه .

كمان عرفت من مستر بيل ان فيه لغات كثيره جدا فى الصين . صحيح اصلها واحد بس لو حد اتكلم بلغته الأصليه مستحيل واحد صينى تانى يفهمه الا لو كان عارف اللغه . و مش لهجات دى لغات مختلفه بنفس الحروف زى النوبى كده مثلا .

و انا داخل الأوتيل لقيت راجل عجوز جدا و شكله غلبان جدا معلق فى رقبته صندوق عليه اكسسوارات حريمى المهم الراجل قعد على بعد حوالى 10 متر من الأوتيل كده لقيت جوز عساكر خضر راحوا عنده و بدون كلام و بالاشاره بس شاوروا له يعنى انت …. قوم من هنا بعيد ….

لو تشوفوا نظره الرعب فى عين الراجل ……. الحقيقه اتضايقت جدا من المنظر . وكم فيك يادنيا من عذابات.

رحت الريسبشن و قلتلهم يجهزوا حسابى علشان هاسافر تانى يوم هونج كونج و هاخلى الشنط عندهم امانه لغاية ماارجع و طلبت منهم يصحونى الساعه 7 صباحا .

يتبع ….

[disappointed]

اسم البطله غلط يا دك

خلااااااص

أنا حأتجنن taz::

كرتونة بيض الكيوى راحت عليّا cbyb: :lol:

عليه العوض و منّه العوض :lol:

[فــيــروز]

عظيم عظيم :lol:

يا ترى حضرتك كنت بتاخد notes عن الرحله ام ان كل هذا من الذاكره "ما شاء الله"؟ :lol:

[KWA]

بسم الله الرحمن الرحيم

السلام عليكم ورحمة الله وبركاته

الأخ الفاضل ماجد...موضوع يومياتك في الصين موضوع شيق حصوصا فيما يتعلق بجزئيه الطعام و المطاعم و علي ما اتذكر اني قرأت لك عن موضوع الأسباجيتي و في الواقع ان ما يأكله شعوب شرق اسيا هو ما يسمي noddels ...في نفس شكل و تخانه الأسباجيتي ولكن اعرض منها قليله ....و كما ذكرت انت ان الأيطالين اخذوها من الصينين و سموها اسباجيتي.....فأرجو ان تكمل سرد باقي ايام رحلتك و لك جزيل الشكر