ماهو الحل الامثل لمشكلتى هل الهجوم ام البعد .................

[pocy]

عندى مشكله ليس لها حل بجد

ابنى وابن جارتى .............بجد انا قرفت وزهقت جدا وبيصعب على ابنى جدا .......

هى ممتازه ربنا يحميها يارب واللى اقيد صوابعي العشره شمع ليهاوزوجها من أفضل الناس كرما وزوقا وأحسبه على خير بس المشكله فى ابنها مدلع وعنيف وانا ابنى مدلع برضه بس هادى جدا لعبهم هم الاتنين مختلف ابنها بيحب لعب الضرب والبوكس والزق وانانى جدا فى لعبه مش بيحب حد يمسكها ولا يلمسها غيره ....اما ابنى فالعب المحببه ليه هى تركيب المكعبات وبيعمل بجد اشكال جميله قوى بالنسبه لعمره واللعب باشكال الطين صلصال و اللعب على الكمبيوتر فشتان بين الاتنين ولما ابنى بيحاول يجاريه بيضرب ويجري على ويعيط ولو اقولكم كل خبطه وخبطه كلهم فى راسه يزقه على حيطه يزقه على السيراميك يزقه على التربيزه وكل يوم راسه وارمه أد كده وخايفه يجيله غباء من كتر الضرب على الراس تخيلوا عمر يبقي واقف وده يبقي معدى يروح التانى اخده كتف كده متعرفش السبب ايه ..............هل بيناغشه علشان يلعب معاه وهى دى طريقه لعبه ولا بيحب يضاايقه وخلاص ..............

بجد قرفت لان عمر طول اليوم بيزن ويعيط علشان ضربه لمسه والمره الوحيده اللى عمر قام فيها واتعصب عضه فى ايده عضه جامده بصراحه فرحت انه لاول مره يعرف ياخد حقه لوحده وميجريش على يقلي بقيت بفهمه كتير اللى يضربك اضربه وبالفعل بقي بيضرب بس ضربه خفيف مش عنيف زى التانى فالتالى بيرد الضربه بشكل اعنف ومش عارفه اعمل ايه

فى نقطه تانيه الولد بيزود من عنده يعنى يجي يقلي عمر شتمنى وقالى ياكلب يا وحش انا ابنى والله العظيم كلمه كلب ما يعرفها ولا بيسمعها ابدا ازاى يقولها وانا كنت موجوده فى الموقف ده وابنى كان بيعيط وقاله بنفس اللفظ انت وحش .....مش كلمك وجه ابن جارتى يقلي قلتله لا هو مش بيقول كلب وانت مش تقول كده قالى انتى كلبه وسابنى وراح لامه انا فى الطبيعي بقول لامه على كل حاجه علشان تاخد بالها بس زهقت اخاف تكون فاكرانى بشتكيه انا بقيت باخد موقف وشبه بطرده بحذره مرتين فى التالته بقوله انت معاقب وروح لماما ومش هتلعب مع عمر النهارده لانك معاقب الواد بيرخم ساعات ومش بيرضي يروح ويفضل لازق وانت مش معقول اغصبه بس بطفى انوار الشقه كلها واخد ابنى واقعد معاه فى الاوضه يروح هو يزهق لوحده ويمشي بس بجد حاسه انى خلاص .............

وطبعا الموضوع ده ليه أثار سلبيه ومشاكل مع جوزى بسبب ابنه اللى كل شويه يلقيه مضروب فى حته شكل وورمه ومزرقه واول سؤال بيقوله هو ابن جارنا جه .................

بجد تعبت وحاسه انى مش عارفه اعمل ايه ......................؟؟؟؟

افتونى ...فى امري .............

هل ابتعد بابنى واتجنب جارتى ...الا فى المناسبات وامنع لعب الاطفال مع بعض ولا اعمل ايه

فى شئ كمان (زوجها ربنا يباركله بيجيب ابنى وابنه من الحضانه وبيوديهم طبعا من غير مقابل مادى ......وانا كمان لما بيكون عندهم تصحيح او مزنقوين انا اللى بروح اجبهم عادى يعنى وبفكر الغي الموضوع ده .............واروح اجيب ابنى انا كده كده بقيت انا اللى بوديه الصبح وهو بس اللى بيجيبه )

بجد محتاجه نصايحكم لان ده مأثر على وعلى ابنى وعلى بيتى ..................مع العلم انى مش عايزه اخسر جارتى لانها نعم الاخت والله

منتظراكم ...............

[Yasser_71]

أنا شايف ان العلاقة كأسرتين تبقي زي ماهي مفيش ما يدعو للقطيعة

لكن علي قد ما تقدري تمنعي لعب الأولاد مع بعض

ماعرفش ممكن توصلوا لكده ولا لأ

لكن مش معقول تسيبي ابنك بالشكل ده لأن حتي اللعب بالضرب كده مش بس هيؤذيه جسديا ده كمان هيؤذيه نفسيا مع الوقت

كمان ابنك محتاج ينشف شوية بس من غير ما تعلميه ان اللي ضربك لازم تضربه لان طريقته في اللعب هي الصح بس لازم يكون أنشف من كده شوية علشان مايغريش الأطفال بضربه

أنا باقولك كده لان ابني 7 سنوات وفيه كتير من صفات ابنك

ربنا يعينك

[pocy]

جزاك الله اخى فى الله ياسر

بس ازاى اخليه ينشف مع العلم ابنى عنده 3 سنوات وخمس شهور ............

متضحكش بس على انا علشان اعلمه ازاى يضرب جبتله لعبه بوكس على اده كطفل وقلت اقوى دراعه علشان يعرف يرد الضرب وهنا النوادى مش بتاخد اقل من 6 سنوات فمضطره استنى لما يكمل سته علشان يخليه يتعلم كارتيه ...................

وتفكيري كله فى المدرسه هيعمل ايه ..................؟؟؟؟؟

لان العيال المؤذيه دى كتير .............وربنا يعين

[نوران]

تعرضت لموقف مشابه

مع الأسف لم أجد الراحة إلا بعد أن ابتعدت من أجل صحتي النفسية ومن أجل أطفالي

طبعا العلاقة شبه مقطوعة مع جارتي ، بينما علاقة زوجي بزوجها طبيعية

المسألة كانت عندي خسائر وفوائد يتم وضعها علي الميزان ، وعلي حسب أي الكفتين أثقل أقرر وبناءا عليه

كان القرار بالإبتعاد

أتمني إنك تقدري تحققي المعادلة الصعبة بإبعاد الأذي عن إبنك وهو أهم شىء وفي نفس الوقت عدم خسارة العلاقة الطيبة مع جارتك

تحياتي

[pocy]

نوران .....جزاكى الله خيرا على ردك

بس هبعد اروح فين انقل السكن طب ده انا ماصدقت الاقي شقه لاختى فى نفس عمارتى .....فبعدت ما عملت كده امشي واسيبها .............؟؟؟؟؟

وبرضه انا مش عايزه اخسرهم لانهم نعم الجيره والله ومش علشان اطفال ولعب ..............بس انتى عندك حق فى ان نفسيتى ونفسيه ابنى اهم من اى شئ

الاول انا هحاول انى ابعد الاطفال عن بعض وبلاش اللعب اليومي المتكرر ده ................

واخليه على أضيق الحدود ...........فى المناسبات فقط ...........او لو هى احتاجتنى انى اخد ابنها شويه لاى ظرف من الظروف وبكده اكون عملت اللى على ومش قصرت معاها بس فى نفس الوقت حافظت على ابنى ..................

انا شايفه ان ده حل مثالى انى مش اخسرههم وفى نفس الوقت مش اخسر ابنى ولا بيتى

.................واتمنى لوحد عنده تجارب ياريت يفيدنا .............

[الدكتور ياسر]

في الحقيقة يا أختى الكريمة تعجبت من صبرك وصبر زوجك طوال تلك الفترة ..

ربنا يجازيكم خير ..

ولكن هناك حدود للصبر وحدود للإحتمال .. فإلى متى الإنتظار ؟!

الأطفال العدوانيون يمثلون خطورة شديدة على غيرهم .. ولا داعي لذكر أمثلة ..

لا ضرر ولا ضرار .. امنعى ابنك من اللعب مع ابنه ولتكن علاقتك بأمه علاقة قائمة على تبادل التحية و السلام فقط ..

هذا هو السبيل الوحيد .. وإلا قد يتطور الأمر إلى مشادات حقيقية بين الكبار بسبب الأطفال فتحدث القطيعة التى لا نحبذها ..

[raouf]

انا بقى عندى مشكلت حضرتك بالظبط بس على اكبر وارخم

نفس اللى بتحكيه ده عندى مع الولدين

شوفى نفس الموقف مع اخين فى عرض مستمر لمدة 24 على 7 فى 365 يوم فى السنة كارثة بجد

ولد ما شاء الله زى ابن جارتك وبيعمل نفس الموضوع مع اخوه

والثانى زى ابن حضرتك بالظبط

انا عملت حاجة وحل ريح المسائل شوية وهاقولك عليه وجربيه

هاتى لابنك لعبة زوجية يعنى تتلعب ب2

انا جبت ليهم اكس بوكس بكينيكت من اكثر من سنة وجاب نتيجة مبهرة ليه ؟

لان كل واحد فيهم حس انه محتاج للتانى علشان يلعب معاه وبالتالى هايحرص عليه ويخاف يزعل منه

ممكن تشوفى العاب من النظام ده زى مضربين وكورة صغيرة وكده

ربنا يخلى ابنك ويحميه

تم تعديل 16 فبراير 2012 بواسطة raouf

[نوران]

نوران .....جزاكى الله خيرا على ردك

بس هبعد اروح فين انقل السكن طب ده انا ماصدقت الاقي شقه لاختى فى نفس عمارتى .....فبعدت ما عملت كده امشي واسيبها .............؟؟؟؟؟

لأ طبعا يا بوسي ما أقصدش إنك تسيبي السكن

أنا قصدت إني بطلت الذهاب عند جارتي وكذلك منعت أطفالي من الذهاب إليها ..

في الوقت الذى استمر فيه زوجى بالتواصل بطريقة طبيعية مع زوجها

يعني تفاديت الإختلاط الذى يأتى منه المشاكل .

[الغريب]

:lol:

أتوقع لو بعدتي عمر عنه كام يوم هيقدر قيمة صحبته وهيحس أنه لوحده ومش لاقي حده يلعب معاه

وياريت كمان تعرفيه أنك بتمنعي عمر عن اللعب معاه بسبب كذا وكذا

كلها كام يوم وبعد كدة هيعرف قيمة عمر كويس وهيلعب معاه بأدب من غير عنف

تحياتي...

[لولا]

سلامتو عمورى مين دوت بس اللى يمد ايده عليه بس :sad:

شوفى يا بوسي انا مع رايى استاذ غريب ، لازم تفهمى الولد العدائى دوت اانك مش تقدرى تخلى عمر يلعب معاه عشان هو بيضربو كده بوضوووووووووح قولى كده للطفل اللى بيضرب وان اللعب مش مفروض يبقي فيه ضرب مش تتكسفي كده تكونى صريحه ومباشره مع الطفل كبدايه و مع والدته لاحقا فى انك لاحظتى كذا وكذا فى علاقه لعب ابنها وابنك وحريصه جدا على النمو النفسي والفكرى لأبنك انه فى المرحله المهمه دى من مراحل تكوين شخصيه الطفل فى اول خمس سنين انتوا الإتنين كبار وامهات وواعين وانا مش عارفه طيب هى رغم انها حد كويس قوى مش مهمومه بمشكله ابنها العدائى ولا ملاحظاها ؟ مش بتدورلها على حل ؟ ولا عادى طالما هو اللى بيضرب مش اللى بيتضرب !

طمنينا بليز على عمروى وزى ما قلتلك لما الطفل التانى يجى يلعب معاه تقعديه كده زى الكبار ومش تستهينى بذكاءه وتبصى فى عنيه مباشره وتقوليله انا هخليك تلعب مع عمر بس متحاولش تضربه وانت بتعلب معاه لو ضربته مفيش لعب تانى وخليكى جاده جدا فى كلامك وحازمه ونبرتك واضحه وهاديه وهى بتوصل الرساله احنا مشكلتنا اننا بنتعامل مع الطفل بالتقليل من قدرتهم على الفهم والإستيعاب او ذكائهم والمثل السورى بيقول "كبرو بيكبر صغرو بيصغر !"

بوسه بقى لعمرو ومش يزعل :wub:

لولا

[Om Zayd]

السلام عليكم و رحمة الله و بركاته

وحشاني يا قمر

متفقة مع لولا و أ.غريب و أ.رءوف

فعلا .. اهم حاجة التواصل مع الاطفال.. بيفهموا .. خصوصا لما تنفذي اتفاقك معاه

يعني فعلا اذا التزم تكافئيه و اذا استمر في عدوانيته تمنعي عمر من اللعب معاه و توضحي له السبب

حاولي قدر ما تستطيعين.. لانه مكسب ان يكون لعمر صديق بجواره من أسرة تعرفينها جيدا و علاقتكم جيدة

اذا عدوانية الولد زيادة.. بهدوء مع والدته و حاولوا سوا معاه.. و ربنا يجعله في ميزان حسناتك

المهم انك تحسسيها انك خايفة على ابنها كمان.. مش بس ابنك

و بوسيلي عموري .. على فكرة .. هوا من عمر زيد ابني

[سقراط المصري]

كل اللي قاله الزملاء الأفاضل صح وحلول جيده جدا

هضيف بس شيء صغير ان الاطفال في السن ده بينمو عندهم مفهوم إثبات الذات.... يعني الولد عايز يحس بكيانه وانه مسيطر ويتحكم.

ولذا بيتخذ السلوك شكل عدواني في الاستجابات.

وأحيانا العدوانية في السن ده بتكون إنعكاس لمشاكل عند الطفل أهله مش حاسين بيها مثل: الإهمال- تركه لوحده فترات طويلة- عدم الكلام معاه- حصر نشاطه في حجرة صغيرة ضيقة......... علشان كده اول لما الولد يشم نفسه ويلعب... ينفس طاقته على الاخر الضعيف (إبنك)

كمان احيانا بيولد الاطفال وعندهم نشاط زائد (فرط نشاط)........ فبيطلعوا الطاقة في صورة عدوانية على الاخر

آخر سبب للعدوانية........................ عدم احساس الطفل بالحنان والعطف واحيانا احساسه بالرفض من الوالدين.... وكمان لما الطفل في كل نفس او حركة بيعملها ونقوله غلط.......... يتحول سلوكه إلى عدوان

انا حبيت اوضحلك وجهة نظر في تفسير لماذا يقوم الطفل الاخر بالعدوان

تحياتي

سقراط

[ام سلمي]

أختي بوسي

الزملاء ما خلوش حاجة تتقال

بس ممكن اضيف انك ما تقلقيش لان مشكلتك دي بتحصل لكتير مننا واحيانا بين الاخوات وبعضهم

فطبعا ما أقدرش أنصحك تقطعي علاقتك مع جارتك لانك غالبا حتواجهي المشكلة دي تاني مع ناس تانيين ومش معقول حتقطعي علاقتك مع الناس كلها

بس ممكن تحرصي علي تواجدك جنب ابنك اثناء اللعب بمعني تبقي عينك عليهم بحيث اي تعدي من أبنهم تمنيعه

وممكن تقللي الزيارات شوية

انا مثلا بواجه نفس المشكلة مع ولادي بس احيانا بتبقي من اقاربنا يعني ولاد أخواتي او ولاد أخوات جوزي

فطبعا مش حينفع أني اقطع العلاقة مع الجميع

واحيانا برضه بأواجه المشكلة دي بس بيكون الولد في المدرسة وكثير الأساتذة ما بيعملوش للي ضربه حاجة

انا بانصح زيك العيال يأخذوا حقهم بنفسهم بس اعتقد تواجدك جنب ابنك حيبقي حل كويس لحد ما يتعود يدافع عن نفسه

انا نفذته مع جارتي برضه لما لاحظت ان ابنها بيضرب ابني لو سبتهم لوحدهم في الاوضة

وممكن تبحثي عن شئ مسلي يشغله عن الضرب لما يكون عندكم ممكن مثلا تشغلي كارتون اثناء وجوده اعتقد الأولاد بينشغلوا بيه

وفكرة الاستاذ رؤوف ممتازة في انك تدوري علي لعبة ثنائية يلعبوها، بس المشكلة الجديدة اللي لازم ساعتها تعملي حسابها هي رد فعلهم بعد ما حد يخرج مغلوب :)

[عبير يونس]

فعلا يا بوسي

مش حا ينفع تقطعي علاقتك بالناس كلها

طب و حا تعملي ايه لما يروح المدرسة و يواجه الناس لوحده؟!

طبعا انا واحدة من الناس ولادي اهم من معرفة الناس كلها

لا احتمل حد يبص لهم بصة

مش يضربهم

لكن الموضوع مش عشان خاطر الناس

بس عشان خاطر ابنك

مش صح انه يتعلم يواجه اللي بيضايقوه بالابتعاد

ده حا يطلع راجل

يعني لازم يتعلم ازاي يواجه

المرونة طبعا هي اللي بنسعى إليها كلنا في التعامل مع الناس

لا الواحد يكش في الناس

و لا كمان يطاطي لهم

الموضوع طبعا بياخد وقت

وكل دي تجارب بيمر بيها و مفيدة في بناء شخصيته

مش نهاية العالم انه انضرب

طبعا اغمريه بحنانك انتي

و من غير ما توبخيه

أكتر حاجة باكرهها لما الأب أو الأم يوبخوا الطفل ويحسسوه بالعجز انه تعرض لموقف مهين وماقدرش يرد

أعرف أب بيقول لابنه و هو بيضربه كنت اتشطر على فلان اللي ضربك!!! :blink:

سيبيه يختلط بالاطفال اللي زيه

ودايما خليكي جنبه

بالتشجيع و الحنان

و اوعي تعيشيه في دور الضحية

علميه ازاي ياخد حقه بأدب و حزم و قوة عند اللزوم

الموضوع طويل يا بوسي

ومايتحلش في قعدة و الا اتنين

حتفضلي ترشدي و توجهي طول العمر

انتي بتبني بني آدم

ربنا يبارك لك فيه يارب و تشوفيه أحسن واحد في الدنيا

و يبارك في ولادنا جميعا

آمين

[بركة]

والله ماشاء الله كلهم جابو الخلاصة

بس اللي بيفرق فعلا في الموضوع انتي شخصيا

لو مش عاوزة تخسريها يبقى فهميها عشان اصلا اغفالها لمسألة اذية ابنك دي حاجه تغيظ

ولو لموضوع استمر والتتغافل استمر

يبقى انا من رأيي انكم كأسرتين يجب ان تحافظو على الحدود

لي تجربة سابقه وعلى اساسها بقول رأيي

في ناس الاحساس عندهم بما يفعلوه فيمن حولهم من مضايقه تقريبا منعدم مع انهم ناس ممتازين في نواحي تانيه كتير

ربنا يسلمكم يا حبيبتي

ربنا معاكي