الدور علي عمرو موسي

[Scorpion]

في البدء أعتقدت أن محاولة الأعتداء علي ابو الفتوح مجردمحاولة اجرامية للسرقة و السطو .. و لكن ما حدث الآن لعمرو موسي اثناء حملته الأنتخابية من مجهولين حاولوا عليه و علي فريقه الأنتخابي بالأسلحة البيضاء والشوم.. خلال تواجدهم بالزقازيق .. يجعلني أتأكد انه حادث مدبر .. و ان هناك تيار اقصاء ابتدأ في التحرك ..

و لكنني حتي الآن لا أعرف و لا أفهم ما هو الهدف المرجو من ذلك

[Scorpion]

الأخبار المتضاربة لا تجعلني أفهم هل كانت محاولة لأيذائه شخصيآ .. ام محاولة لأفساد المؤتمر الذي كان يشارك فيه من قبل بلطجية اسفرت عن اصابة 12 فرد من المشتركين ..

( نظام كرسي في الكلوب لتبويظ الفرح )

[jonathan]

و دي عايزة كلام يا استاذ كامل...عشان يمهد الطريق للمرشح "التوافقي" طبعا :) ...تحياتي

[raouf]

بصراحة مستغرب

عمرو موسى شعبيته فى الشرقية عندنا ضعيفة جدا جدا

الشعبية الكاسحة لحازم صلاح وابو الفتوح

بس ارجع واقول ان حتى الاسلوب ده كان بيحصل ايام مبارك الانتخابات عندنا كانت بتبقى مجزر وضرب نار لان بيحكمها القبلية

اتوقع ان يكون منظر لجنى التعاطف مع حملته حتى يكسب بعض الاصوات

[se_ Elsyed]

ما تاخدش في بالك يا سكوب ... إذا كان في الصوانات بتاعت مرشحي مجلس الشعب كان بيحصل ضرب نار بالرشاشات ودم للرُكب .. وده شيء غير مقبول بالمرة مهما اختلفنا مع أحد المرشحين أو غيره .. وبالتالي كل ده نتيجة خطأ وقع فيه الجميع .. وهم :

- الدولة والشرطة اللي مش موجودة أصلاً وياريت الأتنين يرجعوا لنا بالسلامة قريب .... لا مؤخذه إحنا مش عايشين في سوق سمك أي حد ممكن يعمل أي حاجه في أي وقت .. ولازم يكون هناك قواعد وتنظيمات معينة ومحددة لمثل تلك التجمعات ولازم تبقى بتصريح مُسبق وإلا يتحمل منظموها كافة العواقب ... ولكن .. ونحط تحت لكن دي 100 خط .. لكن مش تصريح وتنظيم من امن الدولة والبهدلة اللي كانت بتحصل قبل ذلك ...

- المرشحين اللي لحد دلوقت ما أتفتحش باب الترشيح والله أعلم هل منهم من سينطبق عليه شروط الترشح ام لا ولو ما انطبقتش يبقى أخد بومبة جامدة وصرف دم قلبه على حاجه وهمية لم تتم .

اللي لفت نظري في الموضوع إننا شعوب نموت ونحيا ونأكل ونشرب نظرية المؤامرة ... ومش بس كده .. لأ ده أحنا أساتذة إفتكاسات وتخمينات وكل واحد فينا ظابط ووكيل نيابة وقاضي وجلاد وكله كله في نفس الوقت ... يعني حادثة معينة تحصل تلاقي في ثواني أحلى تخمينات بل وتأكيدات طلعت في ثواني .. ومن مين ؟ من مسئولين زي المخنوع مبارك وكلبة العادلي اللي أكدوا بعد تفجير كنيسة القديسين إن اللي عملها هو جيش الأسلام الفلسطيني ، ودي تسجيلات موثقة وموجودة وأرجعوا لكلمة مبارك في عيد الشرطة او قبل عيد الشرطة بالتحديد تقريباً يوم 24 يناير وما كانش يعرف إيه اللي مستخبي له يا عين امه ... كما إن جريدة الاهرام قامت بالواجب في نفس التوقيت وعملت ريبورتاج مع العادلي على ييجي 5 صفحات عشان يتكلم عن إنجاز الشرطة في سرعة تحديد منفذي الحادث ... وكلنا عارفين الباقي وإن الموضوع طلع بطيخة ولحد دلوقت ماحدش عارف أي حاجه في أي حاجه

أنا بأقول كده ليه ؟ عشان الأخ عمرو موسى أفتكس نفس الأفتكاسات ولطعها في 6 إبريل . مع شوية تحابيش وتلزيق في أحد مرشحي الرئاسة

موسى:6أبريل وأحد مرشحى الرئاسة وراء الإعتداء ..وأتوقع الإغتيال قريباً

February 27th, 2012 11:48 pm » التحرير» أحداث ووقائع

قال عمرو موسى ،المرشح المحتمل للرئاسة ،بعد تعرضه للإعتداء في الشرقية ، أنه لم يعترض أحد طريقه خلال جولته الإنتخابية فى الشرقية،وأنه كان هناك بعض السيارات المحملة بالبلطجية مستعدة للهجوم على أعضاء حملته الانتخابية، لكن المؤتمر تم استكماله رغم تهديدات البلطجية والاعتداء علي أفراد حملته .

وتوقع موسى أن يتعرض للإغتيال متسائلاً «ماذا بعد السنج والمطاوى؟» ،مشيراً إلى أن حركة 6 أبريل ربما تكون هى التي رتبت لذلك الهجوم والتكسير، بجانب أحد مرشحى الرئاسة ، لافتاً أنه سيتقدم ببلاغ رسمي ضد أى جهة تظهر التحقيقات أنها شاركت فى هذه الجريمة .

وأضاف أن المهاجمين استخدموا الشوم والطوب وحطموا زجاج السيارات والمقاعد في المكان ،ونفذ ذلك ما يقرب من 15 بلطجى بشكل مرتب ومنظم ..

وقال موسى إن أهالي الشرقية قبلوا رأسه بعد الهجوم ،وأكدوا له أن من هاجم الحملة ليسوا من بينهم وهم غاضبون بشدة لما حدث .

الرباط الخاص بي

[ام سلمي]

بمناسبة الاعتداءات المتتالية علي مرشحي الرئاسة لقيت التعليق ده

انا قررت أنتخب مرشح الرئاسة اللى حيفضل عايش لغاية ميعاد الإنتخابات

[طارق مصرى]

قال عمرو موسى ،المرشح المحتمل للرئاسة ،بعد تعرضه للإعتداء في الشرقية ، أنه لم يعترض أحد طريقه خلال جولته الإنتخابية فى الشرقية،وأنه كان هناك بعض السيارات المحملة بالبلطجية مستعدة للهجوم على أعضاء حملته الانتخابية، لكن المؤتمر تم استكماله رغم تهديدات البلطجية والاعتداء علي أفراد حملته .

إحساسى إنه فيلم من عمرو موسى ليظهر فى صورة البطل اللى الاعداء بيحاولوا يقتلوه

[se_ Elsyed]

قال عمرو موسى ،المرشح المحتمل للرئاسة ،بعد تعرضه للإعتداء في الشرقية ، أنه لم يعترض أحد طريقه خلال جولته الإنتخابية فى الشرقية،وأنه كان هناك بعض السيارات المحملة بالبلطجية مستعدة للهجوم على أعضاء حملته الانتخابية، لكن المؤتمر تم استكماله رغم تهديدات البلطجية والاعتداء علي أفراد حملته .

إحساسى إنه فيلم من عمرو موسى ليظهر فى صورة البطل اللى الاعداء بيحاولوا يقتلوه

إمبارح أنا سامعه بودني في كذا قناة وبيقول إن حصل إعتداء فعلي على مؤيدية وأعضاء حملتة وفي ناس إنضرب بأسلحة بيضاء وأتنقلت للمستشفى