صحف الثلاثاء: منصور حسن يقترب من الرئاسة.. ورموز نظام مبارك بلا مخالفات

[eslam elmasre]

صحف الثلاثاء: منصور حسن يقترب من الرئاسة.. ورموز نظام مبارك بلا مخالفات

كده خلصت العملية

منصور حسن هو الرئيس التوافقي وكان لازم ناخد بالنا لما عينوه رئيس المجلس الاستشارى

مبروك عليكم وعلينا

[ذهبية]

انتم متاكدين اننا عملنا ثورة

اشك؟؟

للاسف كل اللى بيحصل فىالبلد

ملناش اى راى فية

احنا مجرد رد فعل زى ما كنا زمان

هما برضة اللى لسة بيفكروا و يقرروا مكانا

حتى نواب الشعب اللى المفروض اختارنهم بمزاجنا بقى مجرد دمى فى ايديهم

يعنى نعمل اية ؟؟

[se_ Elsyed]

خليهم يتسلوا ويعجنوا

الكلام باين من بدري .... هما بيخططوا ويمكروا على أساس إن الشعب عبارة عن قطيع يعني ومالهوش رأي ، ولو أبو مين في البلد طلع قال إن منصور حسن ولا زكي جمعه هو التوافقي ويالا ننتخبوا فهانقول سمعاً وطاعة ويالا بينا ؟

لأ طبعاً

نحن قمنا بثورة للقضاء على الشيخوخة والتيبس الذي أصاب الحياة المصرية

الأخ منصور كان وزير سنة 79 .... يعني أكتر من تلت الشعب المصري ما كانش لسه إتولد ولا جه الحياة .. وهو يقترب من سن الثمانين ... وبصراحة كفاية قوي قوي لأن ده ما بيحصلش في الدنيا كلها

كل الإحترام لكبار السن اللي على راسنا من فوق

لكن السياسة لها مقاييس تانية .. والثورات بتقوم عشان ضخ دماء جديدة في العروق مش عشان نعمل عملية تباديل وتوافيق ونلاقي عمرو موسى تاني وكمال الجنزوري تاني ومنصورة حسن تاني .... حرام قوي قوي قوي اللي بيحصل ده ....

وإذا ما قومناش بثورة إنتخابية وعبرنا عن رأينا من خلال الصندوق برفضنا أي رمز من رموز النظام السابق مهما كانت .. فيبقى كده كأنك يابو زيد ما غزيت وسواء منصور حسن او عمرو موسى أو احمد شفيق حد فيهم تولى منصب ولو عضو مجلس محلي حتى .. يبقى كده إحنا بنُعيد إنتاج نظام ظالم غاشم ثورنا عليه وخلعناه

لو تشوفوا مواقف منصور حسن قبل أن يتولى رئاسة المجلس الإستشاري .. تقول عليه ده رجل ثورجي درجة أولى .. لكن مجرد ما ركب كرسي شرفي لا بيصد ولا يرد تغير موقفه تماماً 180 درجة .. لدرجة إنه هدد بالإستقالة وأمتنع عن إلقاء بيان رأي المجلس الإستشاري بضرورة إعلان المجلس العسكري فتح باب الترشح في تاريخ 11 فبراير وأعطى للمجلس مهلة عشان يردوا عليه وإلا هايستقيل وخلى سامح عاشور هو اللي يقول التوصية دي بدلاً منه

ومع ذلك المجلس العسكري قال له إضرب راسك في الحيط وخلصت المهلة وماحدش عبره وعملوا اللي في مزاجهم بإعلان فتح باب الترشح يوم 1o مارس ... ومع ذلك أخد الزبون القفا ورجع في تهديدة الصوري لأنه شغال مع المجلس العسكري بمبدأ إضرب ولاقي ... وكلها اهالي في بعضيها .

بعيداً عن كل هذا .. لازم إحنا كمثقفين نعمل حشد هائل بالملايين ... ما حدش يستهون بصوته أو بنفسه ... فالتغيير بيحصل من كده .. وما ثورة 25 يناير ببعيده .... إحنا يا جماعة لو كل واحد فينا حوالية 10 أو 20 شخص قدر يقنعهم بإن لازم يكون عندنا رئيس ثوري جديد في أفكارة وجريئ في مواقفة ولا ينتمي إلى العهد البائد ولم يتولى ولو منصب شرفي فيه .. فبكده بجد هايبقى عندنا ملايين الأصوات اللي لازم تغير الواقع إلى الأفضل ...

[وطني حر]

فتح باب الترشح في تاريخ 11 فبراير وأعطى للمجلس مهلة عشان يردوا عليه وإلا هايستقيل .......<br style="font-size: 18px; line-height: 27px; ">......وماحدش عبره وعملوا اللي في مزاجهم بإعلان فتح باب الترشح يوم 19 مارس

والله لو دا مبرره الحقيقي للاستفاله بصراحه المجلس العسكري عنده حق يخبط براسه في الميدان فرقت ايه 11 فبراير عن 10 مارس . ما كل مرشح ممكن يتقدم للخطوبه في اي وقت ووقت اعلان الخطوبه والعروس هي الي تختار

المساله اللي انا دايم بحذر منها ومتخوف منها بشكل كبير مساله نائب رئيس للجمهوريه . لان ببساطه مش عايزين سيناريو مبارك تاني

خلينا نشوف مرشح العسكر ويتقدم . . وان شاء الله ينجح ؟ ونكتب كتابه . والكرسي دوار لازم هيقلب عليهم تاني او الشعب يقلب عليه . والنائب موجود .. زي كل دول العالم .

الرقي بالمطالب مهم جدا للمرحله مهم للثوره . حرام دم مواطن ينضرب بخرطوشه عشان يوم 11 او 12

[eslam elmasre]

العملية اتحسمت فعلا

وبصرف النظر عن منصور حسن او غيره

القوى الرئيسية في البلد اتفقت على وجوب ان يكون هناك رئيس توافقي يكون موافق عليه في البداية المجلس العسكري

ويكون موافق عليه الاغلبية السياسية

وتكون موافقة عليه الاغلبية الصامتة

طب مين في دول هايكون محل توافق اكثر من منصور حسن

المجلس العسكري راضي عنه ودليل الرضا تعينه رئيس المجلس الاستشاري

الاغلبية السياسية اعلنت واكدت لنا اكثر من مرة انها ستؤيد مرشح ليس ذو مرجعية اسلامية

ودول وحدهم كفيلين بتوجيه الاغلبية الصامتة لهذا الرجل اللي صفحته نظيفة وله فكر عالى

مين بأه هايرفض الرئيس التوافقي ؟

اكيد شوية الشباب اللي مش ناويين يجيبوها البر وعايزين واحد شباب زي حالتهم

طب هاتعملو ايه يا شباب في حكومة الخناشير ؟

عملتو ثورة مافيش فايدة

يبقى تستنو بأه لما ربنا ياخدهم رغم انه مد في عمرهم اوي وله في ذلك حكمة اكيد

منصور حسن عنده 77 سنة وعمر اللي عنده 77 سنة ما هايقتنع بان الشباب ممكن يشيلو مسؤلية البلاد وان عندهم فكر شبابي ممكن ينقل البلد نقلة نوعية لانه عنده خبرة رهيبة بس خبرة في الماضي مش في الجديد والحديث

[eslam elmasre]

رسمياً.. منصور حسن يعلن ترشحه لانتخابات رئاسة الجمهورية

ما قلنا من الاول انه ده اللي بيقولو عليه التوافقي

[Abu Reem]

الترشح للرئاسة ليس معناه ضمان الفوز....وحتى لو حزب الحرية والعدالة. كحزب اعلن انه يؤيد منصور حسن فلا اتوقع ان يكون هذا معناه انا شباب الاخوان او كل من أيد حزب الحرية والعدالة انه سيعطي صوته تلقائيا لمنصور حسن ...فالحزب حر فيً تأييده ولكن الناس قد يكون له رأي اخر

- السلفيين غالبا وراء حازم ابو اسماعيل ، وهناك ايضا ابو الفتوح له مؤييدين من مختلف التوجهات

- مازلت ارى ان عمرو موسى هو الاخطر حتى. الان

- ولكن لابد من ذكر ان منصور حسن لا يوجد في تاريخه ما يعيبه ، سوى اننا كنا نرغب في وجوه لم تكن جزء من سلطة اي نظام سابق

- والاهم الان الا تتفتت الاصوات بين ابو الفتوح وحازم ابو اسماعيل لكي لا تكون المسألة سهلة في صالح موسى او منصور حسن

- وعلي اي حال منصور حسن او حازم ابو اسماعيل او ابو الفتوح. اراهم اسماء جيدة ولا بأس بها لو فاز احدهم باغلبية اصوات الشعب

وسيكون فوز احدهم افضل بالتأكيد من فوز عمرو موسى او احمد شفيق

[mamdowh]

لأ ولسه جاى لكم الطيب الغالى عمر سليمان هو والراجل اللى وراه

[mamdowh]

وعندك كمان واحد رئيس ميزه وصلحه..... أيوه جاااااااااىى

القاهرة - أ ش أ

البرلماني أبو العز الحريري يعلن ترشحه لانتخابات الرئاسة

أعلن ابو العز الحريرى عضو مجلس الشعب الأربعاء ترشحه لانتخابات الرئاسة التى ستجرى فى الثالث والعشرين والرابع والعشرين من شهر مايو المقبل .

وقال ابو العز الحريرى فى تصريحات عبر الهاتف مع برنامج "الحقيقة" الذى اذاعه الاعلامى وائل الابراشى فى قناة " دريم-2" مساء الأربعاء ان القوى الوطنية قررت اختياره ممثلا لها فى الانتخابات مشيرا الى انه يحظى بدعم 38 نائبا فى مجلس الشعب، مضيفا أنه يعتبر نفسه مرشحا للشباب والعمال والفلاحين .

يذكر أن لأبو العز الحريرى تاريخا برلمانىا طويلا يعود الى اربعين عاما حين انتخب عضوا فى مجلس الشعب عام 1974 واعيد انتخابه لاربع دورات برلمانية .

[ابراهيم عبد العزيز]

بداية مبشرة جدا للسيد منصور حسن

حيث أعلن عن إختيار العسكري سيف اليزل نائبا له في حالة فوزه بالرئاسة !

وحيثيات هذا الإختيار حسب قول منصور حسن أنه فوجىء بالشخصية القوية الجادة لسيف اليزل عندما زراه في بيته لكي يطلب منه الترشح للرئاسة !

وما أن إكتشف منصور حسن هذه المزايا في شخصية سيف اليزل خلال الجلسة التي جمعتهم قال له ( انا سأترشح للرئاسة كما تريد لكن بشرط أن تكون أنت نائبا لي )

وحول اختياره لسامح سيف اليزل كنائب له حال فوزه بانتخابات الرئاسة، أوضح حسن أنه لم يكن بينهما أى حوار مسبق وقد زارنى سيف اليزال برفقة منى مكرم عبيد فى منزلى وطالبونى بالترشح للرئاسة، وفى هذه الجلسة اكتشفت شخصيته القوية الجادة وهو خبير استراتيجى وطالبته بأن يساعدنى فى تلك المهمة وقلت له: " إذا كنت تريدنى الترشح للرئاسة فأنا أريدك نائبا لى " وقد اخترت اللواء سيف الليزل نائبًا لكونه خبرة عسكرية لا يستهان بها.

مصادفة عجيبة بالفعل أن السيد منصور حسن لم يجد صفات القوة والجدية إلا في شخصية عسكرية

تم تعديل 8 مارس 2012 بواسطة ابراهيم عبد العزيز

[ام سلمي]

ما اعتقدش ان الاخوان حيدعموا منصور حسن

لقيت الاستطلاع ده موجود علي صفحتهم

تم تعديل 8 مارس 2012 بواسطة ام سلمي

[se_ Elsyed]

منصور حسن: هناك قوى تدعمني في انتخابات الرئاسة لن أكشف عنها

أكد منصور حسن - رئيس المجلس الاستشاري والذي أعلن رسميا خوضه سباق الانتخابات الرئاسية - أن هناك قوى سياسية تدعمه في هذا السباق.

وقال حسن ، في تصريح لصحيفة "الشرق الأوسط" اللندنية نشرته في عددها الصادر، اليوم الخميس، "قررت الترشح وهناك قوى تدعمني لن أكشف عنها في الوقت الراهن.. وهي قوى داخل البرلمان وخارجه".

ورفض حسن، الذي شغل مناصب وزارية مهمة خلال حكم الرئيس الراحل أنور السادات، الإفصاح عما إذا كان ينوي جمع 30 ألف توقيع من مؤيديه أم أنه سوف يلجأ لتأييد 30 برلماني (يكفي أي من الطريقين لقبول أوراق الترشح أو تسمية حزب يملك مقعدا منتخبا واحدا على الأقل في البرلمان بغرفتيه، بحسب نص الإعلان الدستوري المعمول به حاليا).

تبدأ مصر اليوم رحلتها نحو انتخاب أول رئيس جمهورية بعد ثورة 25 يناير؛ حيث يتم رسميا الإعلان عن تلقي طلبات الترشيح للمنصب الذي خلا بتنحي الرئيس السابق حسني مبارك عنه في 11 فبراير 2010

يا ساتر يارب ...

تفتكروا ممكن تكون قوى خفية سُفلية وكدهوت

[ابراهيم عبد العزيز]

منصور حسن في لقاء مع هالة سرحان يدافع عن الرئيس السابق

http://www.youtube.com/watch?v=wTt3uA0Fveg&feature=share

تم تعديل 8 مارس 2012 بواسطة ابراهيم عبد العزيز

[se_ Elsyed]

رصد | متابعات | منصور حسن مرشح الرئاسه #RNN

الدافع وراء ترشحى ضغط الشارع الذى لم اتمكن من مواجهتة

مبارك راجع تاني يا ولاد

نفس كلام المجحوم الله لا يرجعه

انا فعلاً كنت في شارع رمسيس الأسبوع اللي فات ولقيت حالات إنتحار جماعي وناس عمالة تقول : ولا ولا يا واد يا منصور ... يا منصور يا بلاش واحد غيره ما ينفعناش

خدوا الخبر الطازة ده : الخبير السياحي سامح سيف اليزل إنسحب من حملة أبو المناصير هههههههههههههه .. اه والله وسابه في ربع الطريق

[ام سلمي]

لو منصور حسن ده فاكر نفسه الرئيس التوافقي يبقي يستاهل فيديو عطوة

[عادل أبو عمر]

بعيداً عن كل هذا .. لازم إحنا كمثقفين نعمل حشد هائل بالملايين ... ما حدش يستهون بصوته أو بنفسه ... فالتغيير بيحصل من كده .. وما ثورة 25 يناير ببعيده .... إحنا يا جماعة لو كل واحد فينا حوالية 10 أو 20 شخص قدر يقنعهم بإن لازم يكون عندنا رئيس ثوري جديد في أفكارة وجريئ في مواقفة ولا ينتمي إلى العهد البائد ولم يتولى ولو منصب شرفي فيه .. فبكده بجد هايبقى عندنا ملايين الأصوات اللي لازم تغير الواقع إلى الأفضل ...

متفق 100 %

أسوأ ما في منصور حسن شيء بعيد عن المجلس العسكري ، وهو انه مرتبط ارتباط وثيق بالنظام القديم و رجاله علاقات عائلية زي إن بنته هي زوجة وزير النقل السابق محمد لطفي منصور اللي يبقى ابن خالة أحمد المغربي ، وزوجة منصور حسن هي ابنة الدكتور محمد عبد الوهاب رئيس مجلس إدارة مستشفى دار الفؤاد الذي يشارك فيه وزير الصحة السابق الدكتور حاتم الجبلي وكان العضو المنتدب له، كما أنه والدكتور محمد عبد الوهاب شركاء في "كايرو سكان "

يعني منصور حسن هو طوق النجاة لكثير من الوزارء السابقين هاربين أو محبوسين و المتضريين من تأميم وسية أبوهم و أعتقد انه سيكون أكثر المرشحين الذين سيتلقون دعما في الاعلام الرسمي و الخاص و كله بالفلوس اللي مفيش اكتر منها مع الناس دول .. عشان كدة ده في رأيي إن منصور حسن هو أخطر مرشح يجب الوقوف ضده .

[se_ Elsyed]

مش ملاحظين إن الاخ منصور هو الوحيد اللي ما عملش لقاء جماهيري حتى مع ولاد خالته أهو يبقى عمل منظر مع الشعب ؟

وهو الوحيد اللي لحد دلوقت مافيش سيرة عن سنجل توكيل له في أي حته ؟

هو في إيه بالظبط ؟؟؟؟؟

[se_ Elsyed]

فاروق حسني: حَزنتُ لرؤية مبارك في القفص.. ومنصور حسن «رجل سياسة ومُريح»

.. يا قليل الأدب

......

مُريح إزاي يعني ؟؟؟

ما تبطلوا بقى مصطلحات رمادية عشان فكرنا ما يروحش لبعيد

قال فاروق حسني، وزير الثقافة الأسبق، إنه «لم يكن راضيًا» عن مخطط التوريث، الذي كان مزمعًا تنفيذه قبل الثورة، وأن المشير طنطاوي «كان يشاركه الموقف»، مؤكدا أنه «حزن لرؤية الرئيس السابق في قفص الاتهام».

وأضاف خلال الجزء الثاني من حديثه لبرنامج «العاصمة» مع الممثل تامر عبد المنعم، مساء الإثنين: «كان هناك مشروع واضح للتوريث، لم أكن راضيًا عنه، وقلت ذلك من قبل، وكان ذلك رأي المشير طنطاوي أيضًا، حيث ذكر لي بشكل شخصي عدم رضاه عن التوريث وبعض الممارسات الاقتصادية».

وأعرب عن أسفه لما آل إليه مبارك، قائلاً: «حَزنتُ عند رؤية رئيس الدولة داخل قفص الاتهام، ولم يكن أحد يتوقع رؤيته هكذا، وأعتقد أن هذا الشعور موجود لدى أي إنسان حتى مَن وضعوه بالقفص».

وتابع: «كنت أفضل الانتظار 9 أشهر حتى يتم تسليم السلطة سلميًّا كما طالب الرئيس السابق».

كما اعتبر حل الحزب الوطني «قرارًا خاطئًا»، لأنه «لم يكن ملكًا لمبارك بل لمصر»، وكان يجب «عزل جميع قياداته مع الإبقاء على الكيان الحزبي، فالأحزاب الجديدة مازالت تحبو»، بحسب قوله.

ورفض الوزير الأسبق المقارنة بين ثورتي 1952 و25 يناير، موضحًا أن «الأولى قام فيها الجيش بانقلاب عسكري حماه الشعب، بينما الأخيرة ثورة جماهيرية حماها الجيش».

وأضاف: «شرفٌ لي أن ينتفض المصريون بهذا الشكل، حتى ولو كان الثمن أكبر من ترك منصبي»، معتبرًا ثورة يناير جاءت لـ«الخلاص» من «حكومة نظيف» التي كان «متبرمًا منها»، بحسب قوله، مؤكدًا «شعرت أنها قامت خصيصًا لتخليصي من هذه الحكومة».

ولفت إلى أنه نبه رئيس الوزراء الأسبق إلى خطورة الوضع في الميدان، «ولكن على ما يبدو أنهم لم يكن لديهم تصور للحدث»، بحسب وصفه.

وعن مرشحي الرئاسة المحتملين، وصف «حسني» الفريق أحمد شفيق بأنه «زميل وصديق، وله إنجازات في قطاع الطيران المدني»، فيما أشاد بـ«منصور حسن» قائلاً إنه «رجل سياسة من الطراز الأول، لديه خبرة سياسية وإدارية، وهو وجه مريح للغاية، وظهر في توقيت مدروس، وأرى أنه سيثري المنافسة».

واستنكر «حسني» اتهام الفنان عادل إمام بـ«ازدراء الأديان» قائلاً: «الحكم ضده نقطة سوداء في تاريخ الفن، لأن الدين أكبر من أن يُختزل في جلباب أو لحية».

واختتم حديثه مؤكدًا أنه لو عاد به الزمن «لن يقبل أي منصب»، مضيفًا: «توليت الوزارة صدفة وتلبية لرغبة صديقي عاطف صدقي».