معلومات عن "مدينه الرحاب" ....

[amostafa]

يا ريت ,اذا حد عنده معلومات عن "مدينه الرحاب" , يكون ساكن هناك او حاجز شقه او فيلا ...

ممكن يضيف المعلومات اللى عنده او نصايحه فى الموضوع ده؟ , اى معلومه ولو كانت بسيطه ,هاتنفع ...

جعلها الله فى ميزان حسناتكم ...

و انشاء الله يكون فى موضوع منفصل لكل مدينه جديده , بحيث يكون قدام كل واحد عايز شقه او ارض او فلا ... معلومات كافيه عن كل المدن الجديده علشان يقدر يقارن بينهم...و جزالكم الله خيرا

زى :

كيف نزهب؟

كام مرحله؟

كام المتر فى كل مرحله ؟

ايه الخدمات الموجوده ؟

وسائل الترفيه ؟

الهدوء!!!

النظافه!!!

الامن!!!

البعد عن وسط القاهره؟

ازاى استعلم او احجز؟

ترشح مكتب غقارات؟

او اى تفاصيل تانيا ,هاتنفع انشاء الله ....

تم تعديل 30 نوفمبر 2004 بواسطة amostafa

[amostafa]

ايه يا جماعه ,شدو حلكم معانا شويه :lol:, عايزين نقفل الموضوع دا و ندخل على المدينه اللى بعد كدا ..

انا دورت على النت ,و لقتلهم سيت :

مدينه الرحاب

بس طبعا كله كلام دعايه و نظرى ,عايزين الكلام الواقعى ,الحقيقى و العملى اللى على ارض الواقع .... همتكو معانا اومال :P .....

تم تعديل 30 نوفمبر 2004 بواسطة amostafa

[وليد صفوت]

شوف يا سيدى ....

أقدر أقولك عن مستوى النظافة و الكثافة السكانية mfb: و كيفية الوصول اليها و الطرق المؤدية اليها .... و الخدمات اللى فيها ....

إنما أسعار الشقق و الفيلات ......... مافتيش فيها دى ...

.......

أولا هناك اتوبيسات الرحاب موجودة فى عدة أماكن أذكر منها ( إشارة روكسى , آخر شارع النزهة ( عند مطعم آخر ساعة بجانب الجامعة العمالية ) , و عندك رمسيس , و التحرير كمان ,... و الله أعلم ببقية الاماكن )

و الاتوبيس بيتحرك كل نص ساعة .... إبتداءً من الساعة 6:30 صباحاً ... حتى الساعة 11:30 مساءً ....

الطريق المؤدى اليها واسع لكنه كالعادة مظلم ليلاً و به العديد من المطبات و الحفر .... أبقى خد بالك لو انت ناوى تروح بعربيتك !

نظام الامن و الدخول الى المدينة شديد الإحكام ... فأنت إذا قررت الدخول كزائر ... فتدفع تقريباً 3 أو أربعة جنيهات و تاخد تذكرة دخول ( التذكرة دى تحافظ عليها زى عنيك لانها تعتبر بطاقتك الشخصية داخل المدينة ,.. إذ أن أى زائر بلا تذكرة يعامل معاملة مجهول الهوية :P ) ....و مستوى الامن بشكل عام جيد جداً ......... لانى كنت أحياناً بتضطرنى الظروف للبيات فى المدينة حتى اليوم التالى ..... و الحقيقة طول ما انا بتمشى فى المدينة الساعة 3 الفجر ..... كل مكان الاقى فيه فرد أمن ... وورا كل شجرة ... و فى كل منحنى ... و تحت كل حجر تلاقى فرد أمن بسم الله ماشاء الله ممكن يتفصل منه دولابين و سرير كبير بيسالك على تذكرتك .... و يمكن ده لان أغلب أفراد الامن عارفين السكان نفر نفر و عارفين بالتالى الزائرين من السكان الاصليين ...

المدينة بها نادى جميل و سينيما و مول تجارى فى منتهى الجمال ..... نظافة فوق الوصف .... الليل فى تلك المدينة ساحر ... هواء نظيف .... أنا فعلا كنت بتلكك عشان أبات هناك ... و أشم البتاع اللى أسمه هوا ده !

و سمعت ( لكنى لم أجرب ) انه هناك خدمة التاكسى .... و هى انك ممكن تطلب التاكسى بتاع المدينة بالتليفون يجيلك الساعة كذا بالضبط ...... تلاقيه فى معاده قدام بيتك ..و المفاجأة انك حتلاقيه عربية فى منتهى الفخامة ( تقريباً البتاعة اللى أسمها ليموزين دى :lol: ) ... كأنك وزير رايح الوزارة ! و بالنسبة للسعر فهو رخيص بالمقارنة بأسعار إيجار الليموزين .... و السبب أنه تاكسى !

بالنسبة للكثافة السكانية ... فهى معقولة جدا بالنسبة لمن يبحث عن جيران هادئين و المستوى الاجتماعى معقول و مش مرتفع أوى بالنسبة لساكنى العمارات .... لانى قريت مرة فى الجرنال أن سعر المتر 850 ( الكلام ده من حوالى 4 سنين ... أوعى تصدق حاجة زى دى النهارده ) mc:

دى المعلومات اللى أعرفها ..... لو نفسك فى سؤال متعلق بالكلام ده ... قول ماتتكسفش ...

سلام

[amostafa]

اولا , كل سنه و انت طيب يا راجل يا طيب :) ...

ثانيا ,شاكرين حسن تعاونكم معنا ys): , و عندى كام سؤال :

الطريق المؤدى اليها واسع لكنه كالعادة مظلم ليلاً و به العديد من المطبات و الحفر .... أبقى خد بالك لو انت ناوى تروح بعربيتك !

هو الطريق ازاى للرحاب لو رايح بعربيه؟ هل فى اكتر من طريق للذهاب الى هناك؟ و بياخد و قت قد ايه من وسط البلد ؟

و لو باتوبيس كام الوقت اللى بياخده؟

طيب ايه نظام العمارات السكنيه ,هل لازقه فى بعض ؟ الشقق مجروحه ؟

و كمان ,هل تعرف الساكنين هناك بيدفعو كام فى الشهر نظير الامن و النظافه؟

[شيرين]

مدينة الرحاب مدينة جميلة. الذهاب إليها عن طريق طريق النصر أو الدائري كأنك تذهب إلى مدينة نصر ثم يمينا بطريق السويس أمتداد شارع الثورة بمصر الجديدة. المدينة مدينة سكنية و بها خدمات عديدة و نادي رياضي.

[abaomar]

السلام عليكم

الاخوه الكرام جزاكم الله خيرا

تكمله لكل ما ذكره الاخوه و بحكم كونى من قاطنى الرحاب و لى شقه هناك اشتريتها منذ بدايه المشروع منذ عشر سنوات تقريبا .

المدينه تقع تقريبا على بعد حوالى عشرون كيلو متر من وسط مدينه نصر على طريق السويس الصحراوى يعنى حوالى ربع ساعه بالسياره من عند النادى الاهلى مدينه نصر و الطريق غالبا فاضى باستثناء عند عزبه الهجانه و نقطه مرور الطريق التابعه لقياده مرور الطريق و غالبا لا تقف فيها و الطريق مضاء كله و حتى مدخل الرحاب و تم عمل مدخل مختصر بعد الطريق الدائرى بحوالى اتنين كيلو مخصوص للقاهره الجديده و تحديدا للرحاب مضاء ايضا و مشجر.

الفكره عموما ممتازه و حتى الان بالنسبه لمستوى الخدمات المقدمه و بالمقارنه مع اعلى مستويات المعيشه فى مصر فيوجد الان فروع للبنك الاهلى و مصر و فرع لشركه الاتصالات و الكهرباء يعنى انت لا تحتاج تقريبا للخروج لقضاء المصالح الا القليل .

منطقه السوق التجارى ممتازه و منطقه مجمع المطاعم رائعه و اظن لا يوجد مثلها بهذه الفخامه و التنوع (الشبراوى و كنتاكى و بيتزا هت و مطعم ارجنتيتى و اخر لبنانى ) و كلها موجوده على نظام مفتوح وسط الخضره و الاشجار و بالطبع كله بتمنه فمستوى المعيشه داخل الرحاب يزيد بالنسبه للخدمات عن الخارج ما لايقل عن 25 % بحكم بعد المسافه النسبى عن القاهره مما يؤدى لزياد التكلفه و ارتفاع الايجارات و اسعار الوحدات الرهيب داخل الرحاب و ايضا مستوى قاطنى الرحاب و التى يوجد بها خليجيين و خصوصا من السعوديه و التى عاصرت مدى اقبالهم يوم فتح باب الحجز فى الرياض فى اواخر 1997 و كان المتر 950 جنيه تقريبا ة تقسيط على 7 سنوات اما اليوم ففى منطقه المطاعم مثلا و ما حولها اخبرنى صديق و جار لى ان المتر وصل 5000 جنيه و كاش ....طبعا جنوووون

يوجد خطين اوتوبيس دائمين تابع لاداره الرحاب واحد الى محطه سراى القبه بجوار مترو الانفاق و المسافه فى المتوسط تاخذ حوالى 40 دقيقه باستثاء فتره الزحام المسائى بسبب المرور بميان روكسى ثم الى شارع الحجاو فشارع الثوره عند سنترال الماظه ثم ايديال و م.الماظه و هكذا الى طريق السويس.

الخط الاخر الى مدينه نصر و شارع رابعه و العوده و مسافته اقل يعنى تقريبا ممكن نصف ساه و احيانا مساءا بسبب زحمه اول عباس العقاد تزيد انما الشئ الايجابى هو انتظامه و فى الصيف يزيد المعدل الى ثلاث مواعيد فى الساعه اى كل عشرين دقيقه و شتاء اثنين اى كل نصف ساعه و الان يوجد بعض الباصات المكيفه لديهم.

نظام البناء رائع و غير مكشوف بالمره و المساحات متفاوته و طبعا مساحه الشقه شامله البروز و المناور يعنى انا شقتى فى العقد 160 متر تصفصف على 140بس مستفيد من كل سنتى و الview عندى رائع و اعتقد ان كل شقه معمول حسابه فى كده لتساوى الجميع بقدر الاستطاعه .

حسب العقد يتم احتساب نسبه مئويه من قيمه الشقه كمصاريف صيانه سنويه يخصم منها عائد وديعه يؤخذ عند التعاقد و الباقى تدفعه كفرق بشكل سنوى و عموما انا ادفع تقريبا حوالى 1200 جنيه سنويا كخدمات و صيانه و النظافه و الامن .

الشئ الطيب ايضا وجود مدارس متنوعه فى مصاريفها و نوعيه التعليم من اجنبى الى محلى لغات و الطيب ايضا هو امتداد خمات التوصيل من و الى الرحاب للاولاد لو عاوز توديهم مدارس فى التجمع الخامس مثلا .ايضا المساجد هناك ممتازه سواء فى المواقع و التجهيز و الصيانه و الاجمل ان المساجد تقريبا كلها مكيفه .

خدمه التوصيل داخل الرحاب الى الشقه ممتازه و تكلفتها بسيطه جدا تقريبا جنيه واحد لكل طلب بالتليفون سواء من الصيدليات او المطاعم او السوبر ماركت .

الفكره بشكل مبدئئ ممتازه و لكن مكلفه و لكن هناك امتداد تدريجى بطئ للوضع الخارجى الى هناك من تراخى تدريجى فى تقديم الخدمات مثل انقطاع المياه او الكهرباء و هذا ليس بيد احد و انا بحكم كونى من الحاجزين المبكرين فقد عانينا من سوء التشطيب من الشركه المسئوله عن ذلك وقتها و هذا ما تم تلافيه فى المراحل التاليه و الاخطر هو انتشار الايجار المحدد المده من خارج المدينه لاناس لا تعرفهم و خصوصا من بعض العرب و لا تعرف اغراضهم للقدوم الى تلك المنطقه البعيد نسبيا و لا يعرف احد فيها الاخر و يمكنك ملاحظه ذلك من اوجه و سلوك هؤلاء .

تحياتى و تقديرى و لو فى اى استفسار يسعدنى الرد عليه باذن الله .

تم تعديل 29 يوليو 2008 بواسطة abaomar