لكي لا نندم بعد فوات الأوان .. دعونا نلتف حول أسماء معينة للترشح لمنصب الرئيس

[se_ Elsyed]

هذه ليسة دعوة ديماجوجية .. يعني لتوجية فكر الناس لهدف معين بدون تفكير أو إقتناع ... حاشا لله

لكنه نوع من التوافق الشعبي ( ما هو التوافق هو الموضة اليومين دول ) . مش توافق لهدف أو غاية ... فنحن اصحاب البلد الحقيقيون ... ونحن من نختار من يحكمنا ... والحكم هنا نوع من انواع التكليف وليس التشريف ... كذلك نحن من يدفع ثمن السكوت أو الإختيار الخاطيء

وبالتالي لا دخل لنا فيما تتفق عليه القوى السياسية المختلف لتحقيق مصالح خاصة او سوري يعني لإنتخاب أو إختيار طرطور او خيال مآته يكون هو الواجهة ... ويكونوا هم من يحكمون من خلف الستار

بإختصار .. لو إتفقنا كلنا كمصريين موجودين في مكان معين زي محاورات المصريين على أسماء معينة قليلة طبعاً مش كتيرة عشان العملية ما تبهؤش مننا ونفترق ونختلف وتذهب ريحنا .... مثلاً حازم صلاح أبو إسماعيل ... وأبو الفتوح .. وحمدين صباحي ... بأقول مثلاً مثلاً ... وأستطعنا أن نعمل لهما ومعهماولو بشكل غير رسمي ونحاول ان نوضح لكل من حولنا كل حسب إختياره في الأخر طبعاً بعد ما ندرسهم جيداً ونرسى على إن دول هما المرشحين بتوعنا ... .. في البيت في العمل في المدينة في القرية في الجامعة في المدرسة في المسجد في الكنيسة .. ونوضح لهم اسباب إختيارنا وأقتناعنا بهؤلاء .. يعني أنا مش هاختلف او أزعل مع فلان من الزملاء هنا عشان هو في حملة حازم أبو إسماعيل وانا مع أبو الفتوح مثلاً ..... دي هاتبقى كده زي ما كنا في الميدان فعلياً ومعنوياً وكنا كل واحد له إنتماءه وفكرة وعقيدتة ... لكن كلنا كنا بنذوب في هدف واحد ومحدد وهو مصلحة مصر ...

ويكون ذلك من الأن يا جماعة هي دي النقطة المهمة ... لأن الأيام هاتجري وهاييجي يوم الإنتخابات وفجأة نلاقي فئة كبيرة جداً حوالينا رايحة اللجنة عشان خايفة من الـ 500 ج الغرامة ... ويا سلام لو فعلاً المحكمة أصدرت اليومين دول كام أحكام على الناس المسجلين في قوائم الإنتخابات وما راحوش .. انا مش بأهزر .. لان فعلاً النيابة أمامها اوراق البلاغات في الناس دي من لجنة الإنتخابات ... ساعتها هانلاقي 50 مليون مصري بيجروا جري عشان يروحوا يصوتوا في الإنتخابات ونسبة كبيرة منهم مش هايبقى فارق معاها تدي صوتها لزيد أو عبيد أو نطاط الحيط .. لأنهم ناس غلابة ....تخيلوا إن إحنا كمغتربين تقريباً فاضل شهرين على تاريخ بدء الأنتخاب .. تخيلوا ده؟

انا باتكلم الكلام ده من واقع بأعيشه .. حتى لو كنت عايش بره مصر.. لكنني باتواصل مع أهلي وعشيرتي بشكل يومي .. وعارف ناس كتير منهم بيفكروا ازاي .. ولحد دلوقت في ناس كتير بأقول لكم مش فارقه معاها .. ولو حد من الأشاوس قدام اللجنة وقبل الإنتخابات قال لهم لازم ترشح عمرو موسى عشان هو اللي حلو .. فهايعملوا كده فعلاً .. حتى هنا في السعودية .. باتكلم مع ناس كتير عايشين في مية البطيخ ولا عارفين أبو إسماعيل من أبو إبراهيم وكأن البلد دي مش بلدهم ... وأصلاً أصلاً انا شوفتهم وعايشتهم وبعد ما اتوجع قلبي معاهم .. برضوا لم يذهبوا إلى صناديق الإنتخاب في إنتخابات مجلس الشعب الاخيرة .... دول انا هاعتبرهم أُميين ولازم ناخد بإيدهم ونعلمهم .. حتى لو كان معاهم دكتوراة .. ما يهمنيش .. كلنا بنعيش لحد ما نموت وإحنا بنتعلم ...

وفي الأخير يا جماعة أنا عن نفسي متوافق وراضي تماماً لو حد من الناس اللي حاططهم في قوائم اولوياتي هو اللي فاز دوناً عن مرشحي رقم واحد مثلاً ... مش هازعل والله .. طالما ما كانش من " الفلول "

ودعونا لا نضحك على أنفسنا وندخل في جدل وسفسطة لا طائل من وراءها ... لأن على بلاطة عمرو موسى وأحمد شفيق ومنصور حسن ... أو أي مرشح عسكري حتى لو كان خالع البدلة من فترة هو فل الفلول المفلفلة

أيوه هناك ديمقراطية ...

أيوه هناك حرية رأي

لكن لما الديمقراطية دي تجيب لي شخص انا متأكد مليون المية إنه بكل تأكيد هايُعيد إنتاج نظام فاسد ديكتاتوري ... يبقى أستنى بقى وأسكت وبعدين اقول : ما الميدان موجود يا أخي ...

وكأن الخروج إلى الميدان والتظاهر والثورات دي ليس لها ثمن سواء مادي او معنوي أو إقتصادي ....

وإذا كنا بنقول إن الوقاية خير من العلاج ... يبقى الوقاية هنا هي تبقى حُسن الاختيار من الأول وبعد كده التوفيق من عند ربنا .. وبعد كده ييجي دورنا الرقابي والشعبي ..

أرجو من الجميع الألتفاف حول تلك الفكرة والتفكير فيها من كل جانب .. وبالتأكيد نرحب بجميع الأفكار والأراء طالما كانت خالصةً لوجه الله .. وفي مصلحة الوطن ..

أنا متأكد مليون المية إن مافيش حد فينا من اللجان الألكترونية للفلول .. ومتأكد كمان ان مافيش حد فينا له مصلحة شخصية مع فلان أو علان المرشح ويمكن ما نعرفهمش أصلاً معرفة شخصية ....

ربنا يوفقنا جميعاً .... وكلنا ثقة في إختيار الله اللي يأتي بعد أن نعمل جاهدين ونأخذ بالأسباب ولا نترك طريقاً صحيحاً إلا ونسلكة ...

[raouf]

تستاهل 100 نقطة خضرا يا عمنا

ده اللى قلناه قبل كده 100 مره

شخصيا بدأت بالموضوع ده الاسبوع اللى فات مع اهلى فى مصر واصحابى ومعارفى هنا

وعلشان مايبقاش الامريبدوا كانه فرض راى وبس بقيت اقول ليهم انتخبوا واحد بس من 3

وماتنتخبوش حد من اللى ذكرتهم برضوا

شخصيا افضل المرشحين هم ابو الفتوح وحازم صلاح وحمدين الصباحى

واهم شىء البعد عن موسى وشفيق ومنصور حسن

[AhMeD nOr]

للاسف انا كنت اعتقد ان شفيق و عمرو موسى ملهمش شعبيه طلع لهم شعبيه كبيره جدا

و لكن مع حهد الاخوان و السلفين فى الدعايه بعد غلق الباب شعبيه الفلول هتقل و هتتركز فى الاسلامين فقط

يعنى ممكن تلاقى اتنين اسلامين فى الاعاده

[ماستر]

موافق على الفكرة من حيث المبدأ, كمان معنديش اعتراض على الثلاثة المقترحين, اى منهم هيكون رئيس كويس ان شاء الله,

عندى اعتراض واحد بس هو كلمة توافقى, لانها اصبحت كلمه مشبوهة, يا ريت نسمية مرشح شعبى او مرشح الثورة او اى اسم يميزة عن مرشحى الفلول ومرشح العسكرى,

مش قادر اتصور ان شفيق ممكن يكون رئيس بتزوير او دعم العسكرى و الاخوان, دة سعتها احنا نولع فى نفسنا وتبقى ولعه جماعية لان الموت اشرف من ان يكون البلوفر دة رئيس بعد الثورة,

الصورة التالية بتعبر قوى عن الى ممكن يحصل نتيجة تفيت الاصوات بين الثلاث مرشحين فى حين اجتماع الاصوات سوف يضمن ان شاء الله نجاح احدهم:

تم تعديل 3 مارس 2012 بواسطة ماستر

[ماستر]

لقيت رأى المستشار هشام البسطويسي متفق مع موضوع الحوار:

هشام البسطويسي: اذا اتفقت القوى السياسية على شخص معين يخوض المعركة الرئاسية وتعهد ان يحقق اهداف الثورة كاملة بالتأكيد سينجح، انا مستعد التنازل عن الرئاسة اذا وجدت مرشحا سيحقق الديمقراطية

[se_ Elsyed]

أرجوكم يا جماعة بصفتكم مثقفي ومتعلمي مصر في الداخل والخارج .. لازم ناخد الموضوع ده بجدية ..

مهما تحدثنا عن الطبقات الكادحة والعمال والفلاحين و و و و ... لكن في النهاية من يقود الأُمة هم المتعلمون المثقفون ... هذه حقيقة

والقيادة تختلف حسب توجه من يقود .. فإما أن يقود الاُمة إلى الهلاك لأهداف شخصية بحته ... أو إلى بر السلامة لأنه يعمل لمصلحة وطنة فقط

أنا بأقول الكلام ده ليه ؟

لأن برنامج هنا العاصمة الذي تقدمة لميس الحديدي عرض أول أمس مشاهد عن حملات الدعاية اللي بدأت بالفعل لبعض مرشحي الرئاسة في القاهرة ...

وصُعقت .. ولو إن ده كان متوقع على حجم دعاية عمرو موسى .. وأحمد شفيق

عمرو موسى أكتر واحد بيعمل نشاط وزيارات ... وردم الدنيا دعاية وملصقات

المفاجأة : احمد شفيق إتفق مع شركة طارق نور للدعاية والإعلان أشهر شركة في مصر طبعاً في هذا المجال ... وأجر منهم معظم اللوحات الضخمة الموجودة ومنتشرة في ميدان رمسيس وميدان التحرير فوق العماير السكنية اللي هناك واللي تعتبر من أكثر اماكن الدعاية في مصر شهرة وتكلفة واللي بيكلف إيجارها ملايين وأنا عارف بأقول إيه ... وكل اللوحات مكتوب عليها الان كلمة واحدة فقط وهي " الـــــرئيس " إنتظاراً ليوم 10 مارس وبعد كده هايفتحوا على الرابع ...

أكاد أبصم بالعشرة إن وراء عمرو موسى وأحمد شفيق يقف فلول الحزب الوطني من الحيتان والهوامير اللي مسيطرين على ثروات البلد ... وبالتأكيد ماحدش عنده مشكلة إنه يبعتر ويضحي بخمسين او 100 مليون جنية عشان يدعم الاتنين دول اللي لو وصلوا للحكم فأتحدى ملف واحد من ملفات الفساد يتفتح او حد ينكش فيه

في حين إني واثق مليون المية إن مرشحينا الشرفاء أبو الفتوح وأبو إسماعيل وحمدين صباحي .. كل دول مش لاقيين ياكلوا وميزانيتهم على قدهم ومحتاجين دعمنا جميعاً عند فتح باب الترشح وفتح حملة التبرعات لهم

وسلم لي طبعاً على سقف الدعاية اللي محدداه الدولة بعشرة مليون جنية ....

كلام فارغ لأن اللي عاوز يعمل دعاية صح هايصرف أضعاف المبلغ ده يكفي يكفي إن لازم يكون له 52 الف مندوب عنه بعدد اللجان الإنتخابية على مستوى الجمهورية ...

وبالتالي في حالة إقتناعنا بالمرشح اللي هايحقق أهدافنا الثورية وهايحقق مصلحة مصر يبقى لازم ندعمه مالياً .. ولو بالتبرع ببضع جنيهات لن تنقص مما لدينا شيئاً .. لكن هانبقى عملنا اللي علينا وهانبقى ما قصرناش وريحنا ضميرنا وأستنفذنا كل الطرق ...

والله العظيم أنا لو في مصر كنت لن اتردد في الإنضمام لحملة الدعاية للمرشح الذي سأختارة .. وحيث اني موجود حالياً في الخارج .. فلن أتردد في دعمه مادياً .... ولن أخجل إذا أعتبرت إني لو أخرجت جنية واحد فقط من جيبي فسأعتبرة شيء كبير .. فأول الغيث دائماً قطرة .

[se_ Elsyed]

فكرة الدعم المادي والتبرعات لمرشحي الرئاسة فكرة قديمة في دول العالم المتحضر .. وفكرة جديدة علينا لأن عمر ما كان عندنا إنتخابات رئاسية .. وكان دايماً الرئيس بيغرف ويعبي من ميزانية الدولة على أساس إنها اهالي مع بعضيها واللي في جيبنا في جيبه وكده يعني

وبالتالي بيبقى لها قواعد وسياسات واضحة وبنوك معتمدة من لجنة الرئاسة ومراقبة على الاموال التي يتلقاها المرشح عشان ما يبقاش فيه لعب أو دعم من جهات مشبوهة ...

يا ريت كلنا نفكر في في الموضوع ده ويبقى لنا هدف ودور واضح في دعم مرشحينا ....

أنا أتعلمت درس في حياتي من أيام ما كنت في ثانوي حتى سنواتي الاولى في الجامعة .. وهو إنك اوعى تستهون أو تقلل من شأن نفسك أو مجهودك او حتى فكرة معينة توؤمن بها ... فساعتها كنت لسه بأخد مصروفي من والدي .. وساعتها لو نفتكر كانت حرب الإبادة الشرسة على مسلمي البوسنة والهرسك ... ونقابة الأطباء كانت عاملة مجهود هايل في جمع التبرعات لهم ... وأبتديت اكلم أصحابي وخصوصاً اللي بيدخنوا واللي لو كان أقتطعوا بس ثمن علبتين ثلاية سجاير من اللي بيشتروها يومياً وأتبرعوا بها كانت تفرق كتير معاهم ومع نفسيتهم وفكرهم لإنهم بيعملوا حاجه تنفع .. وكمان جنيه من هنا على جنية من هناك هاتبقى ملايين تنفع الناس دي في ضيقتهم وحربهم ضد الكفر .... وأخدت تريقة للصبح : يا عم يعني الكام ملطوش بتوعك هما اللي يهزموا الصرب وينصروا البوسنيين ؟ ... يا عم المشوار بعيد والبنك في ميدان المساحة بالدقي .. لسه هانروووووح ونصرف تكاسي قد التبرعات ؟

وماحدش رضي ييجي معايا وروحت لوحدي ووقفت طابور طويل في البنك عشان أتبرع بكل مصروفي .. اللي لسه فاكر كويس المبلغ وهو 30 ج أول عن أخر ... وحسيت والله العظيم إني باتبرع بمليون جنية

[طارق مصرى]

كلام ممتاز يا أ-سى السيد لو اتفقنا على اتنين تلاتة من المحترمين و اللى ينجح فيهم ينجح اهم حاجة أذناب النظام القديم مترجعش تانى

[se_ Elsyed]

كلام ممتاز يا أ-سى السيد لو اتفقنا على اتنين تلاتة من المحترمين و اللى ينجح فيهم ينجح اهم حاجة أذناب النظام القديم مترجعش تانى

المشكلة يا طارق إننا المرة دي لازم نكون الفعل .. مش رد الفعل

يتفقوا هما على رئيس توافقي .. على طقم كنب مع الستاير .. مالناش دعوة .... دي إتفاقات خبيثة ما انزل الله بها من سلطان ... لكن تظل إرادة الشعب اللي هو أحنا هي الأساس

[rewsha]

انا معاكوا يا جماعه

بس انا جوه مصر يعني ان شاء الله اقدر اقنع عدد كويس من الناس اللي حوليه

[se_ Elsyed]

انا معاكوا يا جماعه

بس انا جوه مصر يعني ان شاء الله اقدر اقنع عدد كويس من الناس اللي حوليه

ربنا يبارك لك يا مدام روشه

عاوزين المرة دي نُثبت كشعب إننا قادرون على تطبيق فلسفة العمل الجماعي ...

يعني عاوزين حشد هائل في الفترة المتبقية دي .. عاوزين نوعي كل اللي حوالينا .... عاوزين نفهم الناس إن إنتخابات الرئاسة مختلفة 180 درجة عن إنتخابات مجلس الشعب

إنتخابات مجلس الشعب فيها الاف بيترشحوا عشان يطلع منهم 500 تقريباً يوصلوا للبرلمان .. فلو طلع نصفهم حتى فاسدين .. فالنصف التاني هايكون كويس

لكن إنتخابات الرئاسة مختلفة ... وهو واحد بس اللي هايفوز ما فيهاش هزار ...

وهو واحد بس هايُمثل الدولة ..

وهو واحد بس الجميع منتظرة وكل الدول حاطه إيدها على الزناد عشان عاوزه تتعاون مع مصر وتستغل الاف الفرص الأستثمارية في مصر لكن منتظرة يكون في كبير تكلمه

[se_ Elsyed]

أتمنى إن كلنا نكون إتعلمنا الدرس

والدرس هو إني ما انتظرش لحد ما تحصل أو تحدث المشكلة وبعدين أدور لها على حل

لأ أنا أبدأ من دلوقت في التخطيط والإجتهاد .. والنتيجة النهائية تكون عند ربنا

والدرس هنا هو إن كل واحد فينا لازم يكون له دور في إختيار من يحكمنا ... لأن قديماً قالوا " إن الشعوب تستحق من يحكمها "

ولو رجعنا شوية للخلف هانتكسف لما كل واحد يتكلم عن دوره في الفترة السوداء التي حكمنا فيها مبارك لمدة 30 سنة .....

وبالتالي لن يفيد الحديث عن تخاذلنا في تلك الفترة الان ... لكن دعونا ننظر للامام ونختار رجلاً منا .. نؤمن به وبأفكارة .. وكما قلت ندعمه ونحسسه إننا في ضهرة

وحتى بعد الرئيس لما يُنتخب ويبقى على هوانا ... فلو كلنا ما تعاوناش معاه ... وكلنا موتنا نفسنا عشان بلدنا .. يبقى لا نتوقع المعجزات من شخص بمفرده

ولو نلاحظ إن سورة الكهف اللي بنقرأها كل يوم جمعة فيها الأية اللي لازم نطبقها كل يوم وكل ساعة وهي تقول " فأعينوني بقوة "

فذو القرنين كان ممكن بمساعدة ربنا يشيل الليلة لوحده ... ويبني السد والناس اللي كانت لا حول لها ولا قوة ومنتظرة قوم يأجوج ومأجوج المفسدين يدخلوا عليهم وياكلوهم في أي لحظة وهما عاملين زي الفلاح اللي غرق غيطه ومش عارف يتصرف وواقف يعيط ويلطم بس كان ممكن يفضلوا مرتاحين ونايمين وبيتفرجوا عليه وهو بيبني ويعلي السد

لكن ذو القرنين ضرب لنا مثل في العمل الجماعي .. لإن نٍتاج العمل الجماعي بيحسس الناس كلها إن العمل ده والنتيجة دي بتاعتهم كلهم ...

وعشان كده عُمرك مثلاً ما تسمع ياباني بيقول : يا عم دي البلد بلدهم ... او يتريق على مقولة " ما تقولش إيه أدتنا اليابان وقول هاندي إيه لليابان " او إن مال الحكومة مباح أو يا عم على قد فلوسهم ودي فلوس حلال يا عم عبي منها وكيل هو حد شايف حاجه ...

وأدي إحنا شايفين كل يوم بيظهر لنا نمر من النمور بعد ما كنا خلاص ممكن نقول إن اليابان ركبت أخر قطارات التقدم ... وإن اللي هاييجي بعد كده هاينحت في الصخر ويادوب هايمشي حاله

لكن خاب ظننا وأخطاءنا في تخيلنا وأفتراضنا

ولقينا كل يوم بيظهر من حوالينا نمر كان لحد أول إمبارح أرنب او أقل كمان

وشوفنا

ماليزيا

وتايلند

وتايوان

وأندونيسيا

وكوريا الجنوبية اللي لحد وقت قريب كنا بنتريق على السيارات الكيا الكورية ... وأديها مكتسحة العالم هي والهيونداي وأزاحت العربيات اليابانية والأمريكية من عرش الصدارة

وأخيراً تركيا اللي في أقل من 8 سنوات بقت تناطح دول الإتحاد الأوروبي اللي فيها دول دلوقت بتشحت اللقمة وحالتها تصعب عالكافر ...

هل كل ده حصل عشان عنده رئيس كويس فقط ؟

او شعب كويس فقط ؟

ولا الإتنين لازم يبقوا بيكملوا بعض وبيشتغلوا على نفس الخط وبيحققوا نفس الهدف ؟.

[ssmaly]

انا متفق معاكم فى هذه الدعوة ولكن اذا تفرقت اصواتنا بين ثلاثة اسماء ستكون غير مؤثرة لذا اقترح ان نرشح ثلاث اسماء ثم يكتب كل منا رأيه فى الثلاثة او من يرشحه ونحاول ان نتفق بعد ذلك على أسم واحد منهم

[se_ Elsyed]

انا متفق معاكم فى هذه الدعوة ولكن اذا تفرقت اصواتنا بين ثلاثة اسماء ستكون غير مؤثرة لذا اقترح ان نرشح ثلاث اسماء ثم يكتب كل منا رأيه فى الثلاثة او من يرشحه ونحاول ان نتفق بعد ذلك على أسم واحد منهم

دي فكرة صعبة قوي يا دكتور وحاجه في منتهى الرومانسية ....

يعني لن أُخفي عليكم إني صعب أتنازل عن ترشيح أبو الفتوح ... هذا حقي وهذا إقتناعي بالرجل وكفاءته

لكن لا أُخفي إحترامي الكامل لمرشح أخر زي حازم ابو إسماعيل .. أو حمدين صباحي ....

وبالتالي مجرد إقتناعنا الشعبي بعدد من الشخصيات .. نفلترهم وندرسهم ونصفيهم .. ونستبعد منهم الشواءب والفلول أو أصحاب الحظوظ القليلة زي عفواً المستشار هشام البسطويسي .. او الأخ العوا اللي عُمري ما أقتنعت به ولا بمواقفه ... فهذا شيء جيد

أنا باحلم تكون الإعادة بين أبو الفتوح وأبو إسماعيل ... وساعتها لو روحت لصندوق الإنتخاب هابقى عاوز أعمل إستنساخ لصوتي عشان أرشحهم هما الإثنين

لكن لا قدر الله لو العملية في الأخر صفيت على الشفيق احمد فريق ... أو أبو الفلول الكلمانجي عمرو موسى ...

يبقي ساعتها هاشوف لي أي مصطبة أقعد عليها بشوية سميط وبيض وجبنة .. وإن مالقتش زباين تشتري يبقى اكل البضاعة .. وأتعشت على كده ...

[se_ Elsyed]

في المداخلة دي أنا بأوجه كلامي لأخوتي في الوطن المسيحيين

كامل إيه نظامك إنت معانا ولا مع الناس التانيين ؟

وعاوز اناشد فيهم مصلحة البلد .... والبُعد عن السلبية . أو الإستسلام للفكرة الغير صحيحة تماماً إن خلاص البلد إستولى عليها الإسلاميين وما بقاش لنا عيش فيها بعد كده .. وأديكو شايفين البرلمان ومجلس الشورى والنقابات و و و و

وهذه فكرة غير صحيحة ... لان مقارنة بالماضي فإحنا ما كناش عايشين في قصور عشان نندم على اللي فات ونخاف من اللي جاي

أيوه من حق كل واحد يتخوف من المجهول ... لكن التخوف ده ما يبقاش لدرجة رسم سيناريوهات في الخيال مالهاش وجود او على الأقل ما حصلتش

واهو على إيدكم .. إن البهدلة اللي حصلت من حرق كنائس وفتن قذرة ومدبرة لم يكن للإسلام السياسي او قواه اللي لها حق في المشاركة في الحياة السياسية أي دور من قريب أو بعيد .. بالعكس دول والشهادة لله في أوقات كثير كانوا هما اللي بيتدخلوا لإزالة أي إحتقان

المصري المسيحي ليس مطالباً بالضرورة بدعم أي مرشح إسلامي او يعني ذو توجه إسلامي .. لكنه مطالب بترك السلبية .. وكلهم مطالبون بالنزول بقوة وبدعم الإصلح .....

وبأحذر هنا من مبدأ إن عدو عدوي صديقي

يعني مثلاً لو أنا مسيحي ومش هارشح حازم أبو إسماعيل ... انا حر في كده .. لكن مش عنداً فيه وعشان ما يوصلش هو يبقى أروح أدي صوتي لواحد من الفلول زي عمرو موسى أو شفيق

ده هايىقى شيء في منتهى السوء بل وكارثي ... لأن على إيدكم اهو ... الكل أيام مبارك كان بيتبهدل .. بدون تفرقة بين مسلم أو مسيحي والكل كان بينوبة من البهدلة جانب .

[أحمد محمد]

هي فكرة كويسة بس فعلاً لكن هما تلاتة و ممكن أصواتنا تتفتت بينهم و دا هيكون في مصلحة مرشحي النظام السابق

صباحي يرحب بتولي منصب نائب الرئيس "أبو الفتوح"

و ياريت يكون الخبر دا صحيح

لأن بكدة هيكون التركيز علي أبو الفتوح و أبو أسماعيل

[hanzalah]

ارشح ابو الفتوح واتمنى انه ياخد حمدين معاه نائب

وادعو الله ان حازم بتنازل لصالح عبد المنعم ابو الفتوح ويخرجوا في مسيرة او مؤتمر صحفي يعلنوا للناس انها حرب قذرة لازم فيها نوحد جهودنا

ياريت الناس تاخد الفكره على محمل الجد

نبدأ في التواصل مع حملة المرشحين الثلاثة لبلورة الفكرة وتحويلها لواقع

نحن نخوض حرب مع عدوة قذر

وحدتنا سر قوتنا

شكرا س س باشا على الفكرة والمجهود

[hanzalah]

من النهاردة وطول التلت شهور الجايين ما تستغربوش لو لقيتوا تكثيف لعمليات إلهاء وانهاك قانوني للنشطاء.. أو عمليات حط من السمعة وتشويه اخلاقي.. أو عمليات كونترول علي الاقارب والاصدقاء لتوريطهم في مشكلات.. أو عمليات ترهيب واستهداف للأمن الشخصي.. أو حتى تلفيق قضايا مخلة بالشرف والأمانة.. وافتعال فضايح إعلامية...

صفوت الشريف ماكانش شخص.. ده كان مدرسة وطريقة في تكريس الاستبداد السياسي..

معركة الرئاسة هي هدف كبير لأفاعي عصر مبارك التي لم تدهسها الثورة بعد.. وتستحق عندهم اخراج كل السموم.. انها معركة النفس الأخير

المصدر

[ابراهيم عبد العزيز]

بمناسبة دعوتك الرائعة أخي سي السيد للإلتفاف حول أسماء معينة من مرشحي الرئاسة منعا لتشتت الأصوات

تقريبا غالبية المنتمين للثورة مجتمعين الأن على ثلاثة مرشحين ويروجون لهم بقوة

هذه الصورة مثلا منتشرة على صفحات الفيسبوك الأن :

تم تعديل 8 مارس 2012 بواسطة ابراهيم عبد العزيز

[se_ Elsyed]

إمبارح بأقلب كده في التليفزيون فلقيت مؤتمر جماهيري حاشد على الجزيرة مباشر ... عاملينه شوية ناس ما أعرفش جنس ملة اللي جابوهم إيه بيناشدوا فيه عمر سليمان إنه يرجع عن قرار الإنسحاب وعدم ترشيح نفسه للرئاسة

أقسم بالله العظيم تحس إنهم بيتكلموا إله يُعبد من دون الله ... وكمية أيات قرأنية واحاديث نبوية مفصلينها عليه وكأن الوحي نزل على عُمر سليمان من دون الرسول الكريم

بجد هي الناس دي بني ادمين برضوا من لحم ودم .. ولا قوم أدمنوا الذلة والمهانة والضرب بالجزم القديمة وما يقدروش يعيشوا إلا كده ؟

في اللقاء الجماهيري اللي تم في الرياض وحضره عبد المنعم أبو الفتوح .. واحد إتطوع كده من نفسه وقام قال بؤين حمضانين من عينة " انت لها وهي لك .. ويا أيها الراجل الشاني أنت الرئيس وليس شخص تاني " .. مالحقش يكمل وإلا أنصبت عليه اللعنات وكان هاينضرب علقة موت

لا نريد رئيس يُعبد من دون الله

لا نريد صناعة فرعون جديد

نريد رئيس خادم للشعب ... وموظف عند الشعب ...

لن نسمح تحت أي ظرف من الظروف أن نرى صور للرئيس تُعلق في كل مكان حتى في دورات المياة

ولن نسمح بوجود سيدة مصر الاولى . وعيال مصر الأولانيين

ولن نسمح بتخصيص 90 % من نشرات الاخبار عشان الرئيس اللي بيقوم من نوم يدخل الحمام وبعدين يفطر وفي الأخر يروح يفتتح محطة مجاري في كفر أبو حمص .