هأو أو أو أو ... الحكم ببراءة السُني .. ومحاكمة كللللللللللللللللللللللل الثوار

[se_ Elsyed]

أيوه كده .... يحي العدل .. يحي العدل

الواد أمين الشرطة اللي كان واخد حكم بالإعدام مرتين وكذا مؤبد عشان قتل المتظاهرين أمام قسم الزاوية الحمرا في بدايات ورة يناير وقعد بتاع سنة الداخلية مخبياه ....

أخد براءة النهاردة زي اخواتة الظباط في باقي الأقسام

نسكت بقى ؟

لأ طبعاً .... خدوا الحته البتلو دي

بلاغات 712 شخصاً ضد أسماء محفوظ وآخرين بتهم التحريض لإسقاط الدولة

أحالت النيابة العامة، بلاغات مقدمة ضد الناشطة السياسية أسماء محفوظ وآخرين للنيابة العسكرية للاختصاص، حيث تقدم محمد صلاح محمد زغلول وآخرون وصل عددهم إلى 712 شخصا قاموا بالتوقيع على البلاغ.

وتتضمن البلاغات تهمة التحريض لإسقاط الدولة وإثارة الفتن ضد المجلس العسكرى، وهى مقدمة ضد كل من أبو العز الحريرى وبثينة كامل ونوارة نجم وسامح نجيب ووائل غنيم وممدوح حمزة وجورج إسحاق وعلاء الأسوانى ويسرى فودة وزياد العليمى وريم ماجد.

وأوضح مصدر قضائى عسكرى اليوم الأربعاء، أن النيابة العامة قامت بإحالة البلاغات للقضاء العسكرى للاختصاص، مشيراً إلى أن البلاغات مرفق معها صور لمقالات من شأنها التحريض لإسقاط الدولة.

أما ثورة جميلة بشكل

السُني المتهم بالقتل والناي إعترفت عليه والأدلة كانت كلها ضده ... خد براءة أمام محاكم عادية جداً تتوافر فيها كل انواع العدالة

أما كل من نطق بكلمة ثور على لسانة ... ففي ثواني إتحول لمحكمة عسكرية عشان يتروق ويتظبط ويتنفخ على 45

إن ما نسناكم كلمة ثورة أساساً ... ما نبقاش إحنا المجلس العسكري ..

بقى أنتوا يا شعب ما بيطمرش فيه النفخ .. تخلعوا مبارك .... ماشي ماشي

[se_ Elsyed]

وفي خلال 48 ساعة ...

واحد قدم بلاغ ضد أسماء محفوظ إنها ضربته ههههههههههههههههه - أقسم بالله ده انا أدفن نفسي قبل ما أروح وأعيط وأقول بنت أو واحده ست ضربتني يا بيه - .. تتنصب المحكمة وتتهبد سنة وغرامة كمان

أه على فكرة ... اللي بلغ عنها هو هو نفس الشخص الوحيد اللي في مصر اللي شهد ضد علاء عبد الفتاح إن شافه بيسرق مدرعة وأسلحة من الجيش وبيقتل بها الناس قدام مماسبيرو

وهو هو اللي شوفته خمسين مرة في العباسية مع توفيق عكاشة وبيقول إنه تقريباً عايش في طنطا او كفر الزيات

يعني بييجي القاهرة في كل خير بصراحة ههههههههه

الحكم على أسماء محفوظ بالسجن عاما

كتبت – رشا حمدي: منذ 2 ساعة 45 دقيقة

أعلنت الناشطة السياسية أسماء محفوظ أنه تم الحكم عليها بالسجن لمدة عام غيابيا وغرامة ٢٠٠٠جنيه بسبب اتهامها بالتعدي بالضرب علي أحد المواطنين ويدعي عبد العزيز فهمي عبد العزيز.

وقالت إن صاحب الدعوي هو الشاهد الوحيد في قضية الناشط السياسي علاء عبد الفتاح ‏وهو نفسه من قدم بلاغات ضد الناشطة السياسية نوارة نجم والشيخ مظهر شاهين إمام مسجد "عمر مكرم" , موضحة أنه بذلك يكون دليلا بأنه من مؤيدي الرئيس السابق حسني مبارك.

وتعجبت "محفوظ" في تغريداتها علي صفحتها الشخصية علي الموقع الاجتماعي "تويتر" من سرعة القضاء في الحكم عليها رغم أن القضية رفعت عليها منذ يومين فقط.

ولفتت الي أن كل المتهمين بالقتل والسرقة وتخريب البلاد لم يصدر ضدهم أي حكم طوال سنة ماضية في حين صدر حكم ضدها فورا.

وكانت محكمة جنح عين شمس، قد قضت بسجن محفوظ وتغريمها ألفين جنيه بتهمة الاعتداء على أحد المواطنين، ويدعى عبد العزيز فهمى.

اقرأ المقال الأصلي علي بوابة الوفد الاليكترونية الوفد - الحكم على أسماء محفوظ بالسجن عاما

[Abu Reem]

الامريكان .... براءة ........ضباط الشرطة.....براءة....ومبارك .... براءة

احنا اللي شعب خرسيس.....مش عارف يتحكم زي الناس

كل شوية عاملين دوشة علشان الفقر والبطالة وازمة الغاز ،،

وكل شوية نعمل دوشة علشان كام الف اتقتلوا او غرقوا او اتحرقوا

وكمان نتجرأ ونعمل ثورة ..وامتى ...يوم عيد الشرطة....عيد اسيادنا ...

وكمان عاوزين نسجن الضابط اللي قتل عشرة او عشرين واحد...ايه الهيافة دي....هي السجون اتعملت علشان يتسجن فيها ضباط الشرطة ياولاد ...التييييت...يا شعب خرسيس

تم تعديل 7 مارس 2012 بواسطة Abu Reem

[أحمد محمد]

هههههههههههههه

السني خد برأة و أخواتة الظباط أخدو برأة

علي كدة المفروض يقبضو علي الشهداء و يحكمهم بتهمة البلاغ الكاذب

ممفيش حد قتلهم أهو و كلهم برأة أمال لية الشهداء دي بتستهبل بقا و يموتو

[Abu Reem]

هههههههههههههه

السني خد برأة و أخواتة الظباط أخدو برأة

علي كدة المفروض يقبضو علي الشهداء و يحكمهم بتهمة البلاغ الكاذب

ممفيش حد قتلهم أهو و كلهم برأة أمال لية الشهداء دي بتستهبل بقا و يموتو

ههههه. ....

وانا اول مرة اشوف شهداء كذابين.....

هيروحوا من ربنا فين.... الشهداء دول لازم يتقبض عليهم ويرحوا امن الدولة يتضربوا لحد ما يعترفوا مين اللي قتلهم ...او يعترفوا مين اللي. بيمولهم.

[Alshiekh]

ياترى المشكلة فين؟

في القاضي اللي حكم بالبراءة؟

في النيابة اللي قدمت ادلة خايبة وناقصة او لم تقدم ادلة على الاطلاق؟

في خيبة او تواطؤالمحامين عن الضحايا؟

في شطارة محاميي القتلة؟

ام في الشهداء انفسهم؟

والا فينا احنا علشان مش عارفين الدنيا ماشية ازاي في مصر؟

[Abu Reem]

وبما ان عنوان الموضوع به كلمة " هأو" وبمناسبة هذا الحكم التاريخي

وحتى يكتمل المشهد المضحك....اتمنى ان ارى تعليق الفاضل " زعبلة" وهو يقول

هأو ....طبعا لازم " السني" ياخذ براءة....مش البلد بقى يحكمها " الاخوان" .. ازاي يسمحوا ان " سني" يتسجن..يا حلولي

.....معلش يا زعبلة اصل القافية تحكم

تم تعديل 7 مارس 2012 بواسطة Abu Reem

[hanzalah]

ايه يا جماعه الدوشه الجامده والهيصه و الزومبليطه اللي عاملينها في الصالون دي

كل ده عشان القتله بيطلعوا براءه والثوار بيتحاكموا

يعني أقول لشعب مصر يلبس عشان خارجين

طيب .. حاضر

بس أرجوكم

بهدوووووووء

[محمد عبدالعزيز]

أفوتلك كل حاجة تقولها يا سى السيد, إلا إنك تقول ثورة...

أهى دى اللى مش ممكن أفوتهالك خالص

[ابوهنا]

المشكله ليست فى الثوره

ولكن مشكلة البعض فى فهم معنى الثوره

لو كان امين الشرطه واقفا دفاعا عن قسم الشرطه اللى بيعمل فيه

يبقى الف تحيه ليه

حتى لو قتل الف من مايسمى الثوار

اما ان كان قتل لمجرد القتل فهو مجرم يستحق الحرق

واعتقد ان القاضى اللى حكم ببراته لم ياخد تعليمات من المجلس العسكرى لبراءة امين شرطه

ثوره ثوره

ثوره على القضاء

ثوره على الشعب

ارجوكم ثوروا على انفسكم وراجعوا انفسكم مره واحده من ضمن تلك الثورات

[raouf]

قلتها من يوم 12 فبراير 2011

يجب ان نبدأ بتطهير القضاء اولا

وساظل اقولها بدون قضاء عادل فلوسنا ضايعة حقنا ضايع هيبتنا وثورتنا ضايعة

كيف نثق بقاضى تعين بالرشوة او الواسطة وليس عن استحقاق

فى الثلاثين سنة الماضية التعيين فى سلك النيابة اللى بتنتج القضاة يجب ان يكون ابوك قاضيا

او تدفع المعلوم اللى وصل ل150 الف جنيه

يجب ان تثبت ولاءك للحزب الواطى والنظام

وحسبى الله ونعم الوكيل فالقاضى الظالم ضمن السبعة الذين لا يظلهم الله فى يوم لا ظل الا ظله

بس ارجع واقول ده نصف الحقيقة

لان النصف الاخر هو ضعف النيابة التى تتهاون ولا تقدم ادلة كافية لادانة المتهمين

والضعف ده قد يكون عن قصد او جهل لانهم اتعينوا بالرشوة والواسطة

يجب ان نبدأ حملة تطهير القضاء والان وليس بعدين

يحب ان يتم اقرار قانون السلطة القضائية واعادة النظر فى القضاء ونظامه ككل

[أحمد محمد]

ألاعدام لقتلة العسكري و البرأة لقتلة الثوار

المحكمة العسكرية تقرر إعدام اثنين والمؤبد لـ3 وبراءة 9 فى قضية ذبح ضابط جيش

أنا مش بنتقد الحكم دا

بس لما علشان ظابط واحد أتقتل يتم أعدام أتنين و حبس 13 واحد ما بين مؤبد و 15 و 10 سنين

في حين أن أكتر من 800 شهيد ماتو في الثورة و لغاية دلوقتي مفيش أي متهم واحد أتحكم علية و الكل أخد برأة يبقا أحنا مكناش في ثورة

[se_ Elsyed]

تفتكروا إنها صدفة إن كل ده يحصل في نفس اليوم ؟

ولا دي حملة تنضيف وإزالة إشغالات من الطريق الرئاسي

بتهمة إثارة الفتنة واستغلال الأطفال القصّر

بدء التحقيق فى بلاغ ضد البرادعى و6 أبريل

د. محمد البرادعيكتب - رنا يسري وسعيد حجازي: منذ 2 ساعة 41 دقيقة

أكد المحامى محمد عبد الرازق والمحامى يسرى عبد الرازق انه تم إحالة البلاغ رقم 2035 لسنة 2012 عرائض النائب العام لنيابة جنوب الجيزة ضد كل من الاعلامي يسري فودة, وحركة شباب 6 أبريل، وحركة كفاية، والجمعية الوطنية للتغيير ويرأسها د. محمد البرادعي.

وقد تم اليوم الاربعاء فى بداية التحقيقات استدعاء الإعلامى يسرى فودة لسؤاله عن الاتهامات المنسوبة إليه والتى تتمثل فى العمل على إشاعة الفوضى في البلاد وإثارة الفتنة وتعريض الأمن والسلم الاجتماعي للخطر واستغلال أطفال قصّر وتعريض حياتهم للخطر.

اقرأ المقال الأصلي علي بوابة الوفد الاليكترونية الوفد - الوفد

[raouf]

دى ناس تستحق الاعدام فى ميدان عام

كلاب النظام السابق وديوله

وعلى فكره تقريبا دول نحجوا فى انتخابات نقابة المحاميين على فكره زى ما قريت

[أبو محمد]

ياترى المشكلة فين؟

في القاضي اللي حكم بالبراءة؟

في النيابة اللي قدمت ادلة خايبة وناقصة او لم تقدم ادلة على الاطلاق؟

في خيبة او تواطؤالمحامين عن الضحايا؟

في شطارة محاميي القتلة؟

ام في الشهداء انفسهم؟

والا فينا احنا علشان مش عارفين الدنيا ماشية ازاي في مصر؟

أنا شايف إن المشكلة فى "نمرة 6" .. فاكر "نمرة 6"يا أستاذ محمد ؟ .. طبعا مش قصدى تمرين نمرة 6 (الضغط) بتاع طوابير الذنب هو واخوه تمرين "نمرة 9" ;) .. أنا بس بافكرك ب"نمرة 6" اللى كان الطيران الاسرائيلى رايح جاى عليها أيام حرب الاستنزاف .. "نمرة 6" اللى راح فيها شهداء بجد ماتوا فى المواقع .. مش ناس ماتت وهى بتهاجم أقسام الشرطة .. معلش بافكرك بأيام راحت لحالها قبل استهلاك كلمة "شهداء"

أنا قصدى إن المشكلة فى "نمرة 6" من أسئلتك

والا فينا احنا علشان مش عارفين الدنيا ماشية ازاي في مصر؟

لما السادة اللى انتخبناهم يملوا الجرايد والفضائيات بكلام عن تشكيلهم لحكومة إئتلافية من الأحزاب الفائزة فى البرلمان ، متجاهلين إن الحكومة بيعينها المجلس العسكرى .. يبقى المشكلة فى "نمرة 6"

لما يبرروا كلامهم بإن الحكومة الحالية لم يكن لها أى إنجازات ، ومتوقعين مننا إننا نصدق كلامهم علشان الحكومة الائتلافية اللى هم عاوزينها حتجيب الديب من ديله فى التلات شهور اللى فاضلين .. يبقى المشكلة فى "نمرة 6"

لما نقوِّم الدنيا ونبقى مش عاوزينها تقعد على حكم غيابى على أسماء محفوظ أو عادل إمام أو السنى ، ونبقى مش عارفين إن الحكم الغيابى بيصدر بأقصى عقوبة للتهمة اللى المتهم لم يحضر للمجكمة لدفعها ، وإنه بحضوره بعد ذلك بتتعاد المحاكمة من البداية دون النظر إلى الحكم الغيابى .. يبقى المشكلة فى "نمرة 6"

لما نهاجم القضاء "الفاسد" وبعدين نرجع ويبقى "القضاء الفاسد ده" صعبان علينا ونبكى عليه يا ولداه بسبب الضربة الموجعة التى وجهت إليه بإلغاء قرار حظر سفر الأمريكان ، وبعدين علشان الست نوارة والست أسماء نرجع تانى نبهدل اللى كان صعبان علينا وكنا بنبكى عليه .. يبقى المشكلة فى "نمرة 6"

لما تقوم ثورة تنادى بدولة الحق والقانون وبعدها على طول نبقى عاوزين الشارع هو اللى يحكم وطز فى الحق والقانون يبقى المشكلة فى "نمرة 6"

لما يكون فى محاكمة وزير داخلية وكبار قادة الداخلية نقوِّم الدنيا ونبقى مش عاوزينها تقعد لأن وزارة الداخلية لم تقدم "أدلة إدانتها" يبقى المشكلة فى "نمرة 6" .. ولما النيابة تقوم بدور مش دورها فى جمع الأدلة (لأنه دور المتهم اللى بيتحاكم فى القفص وبيتلعن سلسفيل أبوه بره القفص) ونقول إن النيابة خايبة ، ولما القاضى يحكم بالأدلة اللى قدامه دون أى التفات لرأى أو ثورة الشارع ، تبقى المشكلة فى "نمرة 6"

لما نائب يعمل عملية تجميل مع إنها حرام حسب عقيدته ، ويكدب ويقول إنه اتهاجم ، والمستشفى تقول لأ ما اتهاجمش ولكن عمل عملية تجميل ، ويكدب مرة تانية ويقول أنا عمرى ما رحت المستشفى دى ولا عملت عملية تجميل ، ويطلع أنصاره يقولوا إن أخلاقه تقترب من أخلاق الصحابة ، وبعدين لما المستشفى تقدم الأدلة يرجع الباشا ويقول آآآآآآه .. أصلى كنت تحت تأثير البنج .. وتطلع ناس تمدح "شجاعته الأدبية" لأنه وضع نفسه موضع المرفوع عنهم القلم ، وناس "تدعو له بالمغفرة" ، وبعدها يتكلموا عن الكيل بمكيالين وعن إنهم مستهدفين من أعداء الإسلام ، واخد بالك يا أستاذ محمد الإسلام مش هُمَّ .. تبقى المشكلة فى "نمرة 6"

وجعت قلبى ب "نمرة 6" يا أستاذ محمد .. وآسف إنى وجعت دماغك ب "نمرة 6"

[se_ Elsyed]

لما تقوم ثورة تنادى بدولة الحق والقانون وبعدها على طول نبقى عاوزين الشارع هو اللى يحكم وطز فى الحق والقانون يبقى المشكلة فى "نمرة 6"

يبقى حضرتك بتتكلم في حاجة تانية خالص يا عم أبو محمد

أصل هو لحد دلوقت ما فيش غلطة واحده غلطها نمرة 6 وحكم على حد من القتلة والسفاحين اللي قتلونا وسرقونا وبهدلونا

حد واحد بس .. إيه كتير ؟

وأظن حضرتك شوفت معانا ولاد مصر وهما بيتدبحوا في ميدان التحرير في بداية الثورة .. إيه هايقنعونا إنهم ماتوا بالأنفلونزا ؟ والقضية هاتُقيد ضد مجهول

اتحدى حد فيكي يا مصر يعتبر إن اللي هجم على قسم شرطة وكان عاوز يسرقة يكون شهيد أو يستحق الشفقة

لكن نرجع ونقول .. إن الدولة اللي تعتبر أربع جدران مهما كانوا حتى لو كان الكعبة - ده مش كلامي .. ده كلام سيد الخلق اجمعين - أعز من الأنسان وأغلى منهم ... يبقى على الدنيا السلامة

كتبتها وهاكتبها .. وده على لسان إخواتي في مصر اللي لا منهم بلطجية ولا منهم حتى حد دخل قسم شرطة طول حياته اللي بيحلفوا لي بأيمانات المسلمين إنهم كانوا امام قسم الشرطة في جمعة الغضب للتظاهر فقط وما كانش قسم إتحرق فيكي يا مصر .. وفجأة حدث ضرب نار هستيري من داخل وفوق الأقسام وسقط الشباب ما بين قتلى وجرحى ...

تفتكر ده من هيبة الدولة برضوا ؟

وموضوع اليونان وقبلها إنجلترا .. تفتكر دي دول لا عندها هيبة .. فعايشة في ستين خيبة .. وما فيش متظاهر من اللي حرقوا البرلمان .. واخد بالك حضرتك البرلمان اليوناني حرقوه المحتجون .. ناهيك عن البنوك والمنشأت الاخرى وماحدش إنضرب عليه طلقة .. بل بالعكس ده الشرطة كلت ضرب لما عميت ...

تفتكر الناس دي كانوا بيقرأوا أحاديث نبوية يا عم ابو محمد مع إنهم مش مسلمين فعارفين يعني إيه إنسان ويعني إيه دم ؟

[Abu Reem]

بصراحة أنا متفق مع سي السيد في كلامه ... يعني حماية قسم الشرطة ممكن تتم بطرق كتير غير اطلاق النار المباشر وبطريقة عشوائية على من يتظاهرون او يهاجمون قسم الشرطة

يعني فيه بوابات بتتقفل وفيه قنابل غاز مثلا او فيه اطلاق نار في الهواء وهذا كافي بابتعاد المتظاهرين

او فيه الابتعاد من اي باب خلفي ومغادرة المكان نهائيا اذا شعر الضابط انه لن يستطيع ان يواجه المهاجمون....اما اطلاق النار باستسهال هكذا ... فلا يمكن نقبله حيث ان حرق القسم او الاستيلاء على ما فيه ليس اغلى من قتل بريء واحد وسط المهاجمين

- على العموم مثل هذه القضايا عادة يصعب فيها التأكد من الحقيقة وقد يكون الضابط فعلا اضطر لاستخدام اطلاق النار دفاعا على حياته نظرا لكثرة المهاجمين ولذلك انا دائما كنت اعارض اعمال العنف التي تمت في مخمد محمود او القصر العيني لان القتيل فيها ليس له دية وفي نفس الوقت لن تستطيع ادانه القاتل

على العموم احنا املنا في النظام الجديد الذي سيأتي في يوليو ان نتخلص في عهده من كل سلبيات العهد البائد

[moamana]

عارفين بعد كل ما اسمع خبر مستفز زى ده الحاجة الوحيدة اللى بلاقيها فى فكرى مشهد من فيلم انجليزى قديم اسمه قصة مدينتان )tale of two cities)

تاليف تشارلز ديكنز و كان بيحكى عن الثورة الفرنسية ازاى قامت و لما قامت عملت ايه

المشهد بقى عبارة عن سيدة من الثوار المتخفيين االى كان لسه محدش يعرف عنهم حاجة شافت عربية مركيز بتدوس و تموت طفل صغير و حراس المركيز و هو لاموا الطفل و اهله فالست الفقيرة بكل نظرات الحقد اللى فى الدنيا كلها بتكتب اسم المركيز على خيوط التريكو اللى بتنسجها عشان لما تقوم الثورة يقتلوا المركيز و اى شخص من اسلافه

المشهد تحفة و اعتقد انه هيعبر عن اللى هيحصل فى مصر بعد كم سنة و ربنا يستر

[متعب]

هههههههههه

هأو دى بتعتى ياسى سيد . امال بتزعلوا منها ليه

المهم . محدش خد باله يعنى من الحكم وحته كده تحتها خط . ورفض الدعوة المدنيه . يعنى كمان مفيش ولا مليم ولاديه ولا دياتى

فأكاد أشك فى أنفى وأنته بلكيمى

المنظومه ال عملها كمال الشاذلى للقضاء وسلك النيابه اتظبطت صح الصح ومشيت على نفس النهج الى وقتنا هذا ناس بتاخد جزء هايل من دخل مصر ورواتبهم ومكافأتهم بتعد اهدار اصلا للمال العام بالشكل البشع ال بنشوفه .

السيناريوا طبعا معروف هيطلع واحد من القضاء يقول على الفضائيات كاعاده ان الحكم سياسى بحت وانه لايصح الا الصحيح ويغنوا بقه عن ان نزاهه القضاء لسه موجوده وده قاضى اهو رافض ال بيحصل . وكل دى اشتغالات للشعب ال هيطالبوا برحيله فى ميدان التحرير بتنظيم مظاهرة من قاده الجيش والشرطه . ويرفعوا الشعارات .

الجيش والشرطه والقضاء يريدوا اسقاط الشعب

ارحل ارحل ياشعب

لاشعب بعد اليوم

ويسموها تصحيح الثورة

بمناسبه تعيين ابن القاضى قاضى . اقسم بالله الكلام مش تهريج

قاضى عنده بنت مش ولد طلعوله قرار بتعين ابنته قاضيه

بلاش هأو

لما امين شرطه بتلاته مليم يطلع براءة . ممبارك حاله ايه !!!!!!!!!!!!!

أدمن المجلس العسكرى بيجاوب على السؤال ده

[متعب]

مصر داخله على نفق مظلم مفيش كلام

والنفق ده منظم ومدروس صح فى كل الاتجاهات . ونفس القضاء ده ال هيشرف على انتخابات الرياسه

مصر داخله على هاويه السقوط لامحاله . والسقوط منظم وساعتها هيخصر المؤيد قبل المعارض

الكل هيخصروا . سقوط دوله القانون بيعنى ده

وبعد ما تسقط الدوله الناس دى هتمشى منها وكل واحد هيفتحله كام دوله بره قطاع خاص

ويتركوا المؤيد والمعارض يكلوا فى بعض

والاتهامات دوما بسقوط الدوله ده مؤشر على اساس ان سقوط الدوله آتى وعاوزين يلبسوه سقوط الدوله للنشطاء والشعب

وأشربوا بقه رئيس توافقى لسقوط الدوله .