طار الحمام

[هشام الجنيدى]

طار الحمام اسراب و سابوكى تتالمى

مخنوقه وسط الخراب مش قادرة تتكلمى

وعمى عنيكى التراب مش شايفه تتقدمى

دول كلهم اندال ماحد منهم بقى

ياما الكلام ده اتقال وانتى ولا مصدقه

ابكى عشان الدموع تغسل عيونك بقا

وحاولى تانى الرجوع من جرحك اتعلمى

طيري وشوفى النور هناك بيندهلك

لو الجناح مكسور امشى على رجلك

ولو قدم مبتور عتّانى على مهلك

سيبى الليالى تدور وغنى و اتبسمى

دى كلها ايام و الكل هيشوفو

الى هرب فى الظلام وادارى من خوفو

وتطيرى فوق الغمام وتحطى على خوفو

ويخرس جميع الكلام وانتى اللى تتكلمى

لسه بتتالمى ليه بس تستسلمى

خايف لبكره يفوت وانتى الى راح تندمى

تم تعديل 21 مارس 2005 بواسطة هشام الجنيدى

[هشام الجنيدى]

ودى الى جرفها التيار بعيدا فاردت ان انتشلها ..........

[bentmasria]

جميل والله يا هشام

الصورة فعلا حلوة وخسارة الحاجات دى تتوه عنا

فكرة احياء الموضوعات فعلا قيمة واحييك عليها

دمت بخير

ام محمد

تم تعديل 21 مارس 2005 بواسطة bentmasria

[هشام الجنيدى]

شكرا يا بنت يا مصريه على تنبيهى لهذه الاخطاء الاملائيه

فكرتينى بايام لما كنت فى اولى ابتدائى والابله بتصححلىواجب الاملاء :lol:

بس اعمل ايه الواحد سعات بيبقا مستعجل خصوصا وانا بكتب على الكى بورد

وادينى صححتها ............... :)

[فارسة القلم]

ماتخفش يابن ترابى دايما مكانى فوق

لحد مايصحى الغبى بس ياريته يفوق

مش انا اللى مكتوفة ده انا بايديه الطوق

النصر ساكن جلدى وماشى جوه عروق

دايما عدوى معايا بغله مات مخنوق

وياما رجع قدامى مكسور او محروق

ماتخفش يابن بطنى دايما مكانى فووووق

00000000000000000

محاكاة لحرفك

حروفك اجبرتنى على الاسترسال

دمت مبدع :lol:

[هشام الجنيدى]

انا كل خوفى ليجى يوم ملاكيش جنبى

انا كل خوفى عليكى ياامى من قلبى

نفسى تكونى بخيروتبقى الحياه بمبى

ده القلب منك وليكى بالحب متعبى

حقيقى انت فارسه من فرسان القلم فى هذا المنتدى

انتظر جديدك......................

[فارسة القلم]

انا كل خوفى ليجى يوم ملاكيش جنبى

انا كل خوفى عليكى ياامى من قلبى

نفسى تكونى بخيروتبقى الحياه بمبى

ده القلب منك وليكى بالحب متعبى

00000000000000000000

ماتخفشى يابن بطنى ماهوانت نن عينى

حبك وخوفك ليه وكرمك مغطينى

دنا خيرى كله ليك ياولدى وجنينى

مالى فى الدنيا غيرك انت اللى تحمينى

الشرف والعزة وكرامتى شعار على جبينى

طول مانت جنبى ومعايا حضنك يدفينى

يانهر يجرى فى دمى دايما بيروينى

شكرا صديقى هشام على ماجملتك اللطيفة

دمت مبدع

[هشام الجنيدى]

بلدى يا امى ياوطنىياللى ولدانى

صوت انّتك دايما بيرن فى ودانى

مش قادر انسى قهرتك ولا دمعك القانى

ومش قادر امشى واسيبك للبكا تانى

قالو فى البك قساوه وقالو نسيانى

قالو ان انتى مش امى ولا انتى عايزاننى

ازاى وانا اللى اتولدت لقيتنى فى اديكى

نايم على كفوفك وانتى الى شيلانى

مين الى علمنى الحنان مين اللى ربانى

مين اللى حسسنى الامان مين اللى قوانى

ومين زرع فيه الامل والحلم والاشواق

مش انتى برده يا امى ولا مين تانى؟!

اعجبنى جدا مبادلتك المساجلات الشعريه يا فارسه القلم

وشكراااااااااااااا

[فارسة القلم]

قالو فى البك قساوه وقالو نسيانى

قالو ان انتى مش امى ولا انتى عايزاننى

ازاى وانا اللى اتولدت لقيتنى فى اديكى

نايم على كفوفك وانتى الى شيلانى

مين الى علمنى الحنان مين اللى ربانى

مين اللى حسسنى الامان مين اللى قوانى

ومين زرع فيه الامل والحلم والاشواق

مش انتى برده يا امى ولا مين تانى؟!

00000000000000000000

قطع لسان اللى قالك انى انا نسيتك

ده انا امك ياواد وانا اللى ربيتك

انا جنسيتك ووطنك وامنك وبيتك

وانا فى القلب شيلتك وف ننى حطيتك

قطع لسان اللى قالك انى انا نسيتك

00000000000000

ياخسارة يابن بطنى تصدق انى قاسية

دنا مركب خير على شطك انت راسية

آه لو نسيت نفسى انا عمرى ليك مانسه

وارضى يابنى بفاسك مايوم بخيرها عاصية

ياخسارة يابن بطنى تصدق انى قاسية

اتمتع وانا ارد عليك

ومتعتى اكثر وانا امثل مصر الغالية

ساكمل وحذارى من ؟؟ :D

[مهيب]

رائعة تلك السيمفونية .. رائعة تلك المناظرة الشعرية المتقنة ...

الحقيقية ان هشام و فارسة القلم الاتنين محصلوش ... بجد بجد ... انتو أكتر من رائعين

[هشام الجنيدى]

متزعليش ماللى قلته دانا قلته من دقتى

دانا فيكى كان مولدى وزرعتى ونبتى

لكن عمانى الالم ماللى انا سمعته

سامحينى يا امّه وبلاش تزودى حيرتى

بيقولو عنك كلام من ورى ضهرك

بيقولو راحت عليكى وجه زمان قهرك

سبينى يامّه عليهم وشوفى ايه هعمله

دانا جدىزيد الهلالى راكب على مهرك

اطاطى يامّه وشيلك ولا اشوفك مطاطيه

واحفر صحارى البلاد وأجيبلك الميّه

لو عايزه صخر الجبال على ضهرى لو هحمله

ولحد عندك اجيبه لو تقبليه هديه

تم تعديل 3 أبريل 2005 بواسطة هشام الجنيدى

[فارسة القلم]

ابدا زمان القهر ماعمره دنس توبى

ولاتعابين العدو سكنت دفا دروبى

فتش بيبان التاريخ واقرا فى حروبى

تحلف لك الاوراق بشروق بلا غروبى

طول عمرى عالية فوق ماعرف مطاطية

دنا بحرى هادر وقاسى والعدو مراكبيه

واللى يرضالى الهوان تدوسه رجليه

وبقطنى افصل له كفنه وادفنه بايديه

ده نا مصر، ام المصرى وبنتى مصرية

ارتجال على الهواء مباشرة :P

[مهيب]

ولا أجمل ولا أروع ... بجد ...

ايه التناغم و التناسق المخيف ده .... فيه كده ؟؟؟ لأ بجد .. فيه كده ؟؟؟

أنا حاولت أخرس و أسيبكم من غير مقاطعة بس مقدرتش ...

تصفيق حاد

ورجاء للادارة .. ياريت ده الموضوع ده يبقى من المواضيع المثبتة ... و يقتصر بس على هشام و فارسة القلم ... و يمتعونا كده فى عرض مستمر على طول ...

انتو رائعييييييييييييييييييييييييييييين

[فارسة القلم]

اخى مهيب

اشكر لك تصفيقك الذى هز وجدانى

البركة فى هشام هو اللى يستفز حرفى

فأقووووووووول

دمت صديق جميل

اسفة هشام لكن عندى شعور ان الموضوع

اصبح مشترك بينا

زى مصرنا ماهى ملكنا

[هشام الجنيدى]

انا نفسى اقولك كلمه بس واجعانى

ومطيره منى المنام ومشقلبه كيانى

مش انتى برده امنا اللى بتحضنّا

طب اسمعينى واتحملينى بس لثوانى

اخواتى يامّه مطحونين والدنيا دايساهم

بينامو يامّه مجروحين ويقومو فى اساهم

غضبانه يامّه عليهم ولا ايه قولى

دى اللى يشوفهم ويشفوكى يقولو نسياهم

طب عملو ايه يا امنّا علشان تجافيهم

ياللى انتى حضنك لمنّا طب ليه بعدتيهم

ده بدل يامى ماتشوفيهم هما فين

وتمسحى دموع قلبهم وتطبطبى عليهم؟

يمكن اكون غلطان او حتى مش عارف

يمكن يكون نظرى ضعيف او اعمى مش شايف

لكنى يامّه مش جليد بارد مبيحسش

انا خوفى ده مش مالطليق انا مالسجين خايف

خايف لفجأه يثور ويكسر الزنازين

خايف يكون مظلوم والظلم ده سكاكين

بيديندبح بيها الامل والحب لو عارفه

ويخلى نار الغضب والكره كالبراكين

اخواتى يامّه شغالين فى السمش كالنحله

اخواتى يامّه بيحلمو ان اللى جاى احلى

بلاش يا أمى وامهم تدوسى على الاحلام

وتكسريها وتدفنى اشلائها فى الوحله

[soooo]

ماعاش ولا قال اني انا نسيتكم

انا يابني عايشه فيكم وبينكم

انا وقت ما الظلم جالي دافعت انا عنكم

دافعت بروحي وعمري عن جيلكم

ماعاش ولا قال اني في يوم راح اروح

دانا قلبي من الظلم اللي فيك مجروح

من كتر مانا شايفه ابني مـ الألم مدبوح

حاسه بروحي باموت مـ النوح

انا يا ابني بيكو باقوم وباغني

على جرحكو اللي صايبكم عني

بس يا ابني جرحكم ده قاتلني

شايفاه منكم وانتو تقولو منني

احلف بشمس الحق اللي هاتيجي في يوم

ان الهوان والظلم ليكم ماراح يدوم

وان الخاين مسيره يرحل فـ يوم ويقوم

ساعتها بس يابني تقوم مـ النوم

تلقاني كيف ما انا دلوقت واقفه

بولادي رافعه راسي وشامخه

واني عليكم كنت دايما خايفه

وعمري ما كنت مـ الظلم مره شايخه

[هشام الجنيدى]

امتى يا ام البشر الشمس راح تسطع

امتى والليل الحزين نجومه لم تطلع

والقمر رافض يضوى والغيوم كترت

وانا اللى قلبى جوه منى عمال بيتقطع

راح اللى راح يا امّه والدمع مش بيفيد

والصبر تاه منى والشمع مش بيقيد

ازاى انور دنيتك وانا عشت فى الظلمات

معرفش معنى النور ماشى بحس الايد

[هشام الجنيدى]

ايه يا فارسه القلم انتى تعبتى ولا ايه ........... :D

[فارسة القلم]

ماتعبتش ياهشام

بس قلت sooooo

ياخد مساحة للرد عليك

فكم يسعدنى تمثيلى للعظيمة ام الدنيا وام قلبى

تحياتى لك سأعود

ان شاء الرحمن :D

[فارسة القلم]

الشمس انا زرعتها فى سمايا بايديه

وخيوطها يابن بطنى فرحانة ملالية

القمر فص فى طرحتى بيضوى ليالية

نجومه ضوئها ينور خلخال فى رجلية

مين اللى قال غابواأو فاتوا مراسية

ولو غابوا انا اللى بأمرى يتأخروا شوية

0000000000000000000000

ابدا ياضى عينى ماتسكن الظلمات

الا لو صرخوا وقالوا مصر قلبها مات

ادعى لربى معايا فى خشوع الصلوات

تفضل شمعتنا قايدة ماتعرف يوم ممات

واللى يعلى صوته يسكن بيوت الاموات

واللى يجرح امك بايدك ترد له طعنات

يرجع بخزيه وعاره وحاصد الدمعات