حمار على المطلع

[هشام الجنيدى]

انا قمت من فرشتى عالصبح بتمطع

ببص من شرفتى عالسكه والشارع

واعمل كمان قهوتى اشربها واتمتع

بصيت لقيته عالطريق واقع

حمار

ورابطه العربجى فى كارو

ولجام بيخنق انته وصوته

حمار هزيل برزت عظام ضهره

باين عليه العربجى بيتعشا من قوته

ومحمله المفترى احمال على احمال

لو ميت حمار زيه عليها ما يقدر

يكفيه يشيل همه الى فاق الاحتمال

مهو برده روح زينا بيحس ويفكر

مطلوب عشانه حمار يشيل ولا يتعب

ويجلده الكرباج لو وقع مره

مطلوب يطاطى عشان العربجى يركب

ويصبر وياكل لقمته المره

صعبت عليه نفسه متهان ومتلجم

دمعه عنيه نزلت على وشه تتدحرج

حرج عليه الكلام مقدرش يتكلم

لكن دمع العين عمره ميتحرج

وعجبى

[بنت شعنونة]

حمار وغلبان

ولا ليه لا حيلة ولا لسان

متلجم بالف لجام ولجام

وصاحبه بيعامله كأنه سنجام

ياعيني عليك يا حمال الأسية

دايما الناس كدا..تيجي على اللي يشيل الأسية

وكلمة ورا كلمة و اذية ورا اذية

تنزل دمعة الحمار والناس زي ما هية!

[nashwa]

صورة شعرية معبره وممتلئه شجن ....

وعندى أحساس أنك مابتتكلمش عن الحمار .. وأنه مش اكثر من رمز مجازى .. وصورة مجازية !!!

بس عندى أحساس أنك قارى كتيير لصلاح جاهين .... مش علشان (عجبى) ... ولكن موسيقى الوزن .... أو بشكل عام .. قارئ جيد للشعر العامى

تحياتى

[هشام الجنيدى]

الحدق يفهم

[هشام الجنيدى]

اعيد احياء هذه القصيده للاعضاء الجدد

لانى ارى ان هناك كم جديد من الاعضاء الذين يهمنى ان يقرأو لى وينقدونى......................

وعلى فكره القصيده دى من اول المشاركات لى فى هذا المنتدى الرائع لذلك اعتز بها...........

تم تعديل 9 مارس 2005 بواسطة هشام الجنيدى

[daktara]

كلام جميل وكلام معقول بس لو عايز نقد حقيقى اصبر على شويه لما اوفر لك شوية وقت

بس ما تزعلشى وادينى الامان

[هشام الجنيدى]

مرحبا بمن ينقدنى فيعلمنى اخطائى

انقد كما :) ن عليك الامان................

[bentmasria]

هشام جنيدى

تسلم يارب

سبحان الله يا صديقى تكونش بتوصف الحمار بتاعى برضه غلبان اوى

::::ومحمله المفترى احمال على احمال

لو ميت حمار زيه عليها ما يقدر

يكفيه يشيل همه الى فاق الاحتمال

مهو برده روح زينا بيحس ويفكر

مطلوب عشانه حمار يشيل ولا يتعب

ويجلده الكرباج لو وقع مره

مطلوب يطاطى عشان العربجى يركب

ويصبر وياكل لقمته المره::::

الصورة جميله وقويه

والوصف دقيق ووافى

لكن نقف لحظه

الوزن يا غالى مكسور فى بعض الابيات والعامى موسيقاه ملزمة اكتر من الفصحى الحداثيه وانا واثقه انك فاهمنى

نتفق على حل وباذن الله تجده مساعد جدا

اكتب كما تشاء وعندما تنتهى من كتابتك اقرأها لنفسك مرة وحاول تسجيلها بالكاسيت بصوت مرتفع

واسمعها وانت صامت

لن يفلت منك الوزن ابدا ولا تتعجل

العربى مرادفاته غزيرة جدا والمناسب دايما موجود

ماتزعلش منى

انت جميل وانا نفسى الصورة الحلوة تكتمل بالاتقان الشديد

البنت المصريه

[مهيب]

حلوة قوى فكرة انك تنعش موضوع قديم يا هشام ... علشان مشترك جديد زيى يقدر يتابع الروائع اللى فاتته ...

الحقيقة ان فنك واضح جدا ... وزي ماقلتلك .. انت فعلا متحكم من اللغة العامية بشكل مخيف ... ومش عيب وضوح تأثرك بصلاح جاهين ... نقدر نقول انك مش متأثر بيه قد مانت بتلعب فى نفس مناطقه ....

الحقيقة انها عجبتنى قوى ... على الرغم ان الموضوع نفسه يمكن يكون موضوع حالم زيادة عن اللزوم فى وسط اللى احنا عايشين فيه ... و متنساش انك لو بصيت للصورة هتلاقى ان الراجل صاحب الحمار .. أغلب من الغلب ...

وعلى الرغم من انى ملاحظتش حتة الوزن المكسور دى قوى .. العتب عى الودان بقى .. الا ان البنت المصرية دى مش معقولة أبدا ... ايه ده بجد ؟؟ دانتى فعلا مشاركتك فى أى عمل أدبى اثراء ليه والله ... و نصايحك لهشام شيء يثير الغبطة ... ونصيحة على نصايحك لهشام .... اسمع كلامها ... البنت دى واضح قوى انها عارفة بتقول ايه ...

[رعد الاسكندرانى]

انا بسال سؤال يا ترى كل الى قرا القصيده فهم الى انا فهمته ولا انا فاهم غلط؟؟؟؟؟

حقيقى برافو عليك يا هشام انتا بتعبر عن مشاكلنا من غير تجريح ولا دخول فى سين وجيم ولا مفيش...........

[هشام الجنيدى]

شكرا للبنت المصريه على هذه النصيحه وان شاء الله انفذها

وشكرا للاخ مهيب البحار الادبى الرائع وانا معاك ان البنت المصريه دى بسم الله ما شاء الله مرهفه الاحساس باى نقص حتى لو مش ملموس

وهوه ده مثال جميل جدا للنقد الادبى الذى يرمى الى الكمال

بس هنعمل ايه مفيش كمال مطلق على الارض هنا .........

وشكرا للاخ رعد على هذا الاطراء وبقلو بلاش فضايح خليه فى سرك :blink:

[shahd]

سلمت اناملك اخي الفاضل

[الطيار المصرى]

و الله انا اول ما قرأت القصيدة حسيت ان في معني ورا الكلام ده...........

الي جانب انك بتصور تحمل الحمار.......الا ان المعني اكبر و اعمق من كده بكتير....حاسس انك قاصد وضعنا الحالي.............و الله اعلم...........

لكن طبعا اسلوبك معبر ..........مؤلم......... و اكيييييييييييد مميز.......

استمر....بارك الله فيك..........

الطيار المصري.......15 سنة

[ebnelganoup]

من منا لم يتأثر بأبانا الروحى صلاح جاهين لكن لكل مبدع عالمه الخاص

اولا صلاح جاهين لم تكن له منطقه محدده صلاح جاهين هو كل مفردات العاميه

صلاح جاهين هو حديقة الشعر... متنوع وشامل وقوى ورقيق وعنيف وجاد ومرح

اما هشام فهو أفضل من يكتب رباعيات بعد صلاح جاهين لكن لسه الخط السياسى

لم يتضح بعد عند هشام لان ده هيكون بفعل السنين وعلى قدرنضاله واحتماله وصبره

وأرجوا الرجوع لاشعار ورباعيات هشام ...... لانه حاله وجدانيه خاصه جدا جدا جدا

دمت لنا يا هشام فارسا ومبدعا

دمت بكل خير

ابـن الجـنـوب

[مى محمد]

كالمعتاد يا هشام.....كلام غاية فى البساطة....غاية فى التعبير....و دايما فى الصميم

ربنا يبارك فيك و فى موهبتك.... و يارب اشوفلك ديوان قبل ما اموت :ninja:

[شاعرالرومانسية]

كلمات سلسة ،،، صادقة ،،، معبرة

كما عودتنا فى كتاباتك أخى الكريم

شكرا لك هذا الكم من الاحاسيس الصادقة ،،،

وشكرا لمن اعاد تنشيط تلك الخاطرة فسمه لنا بقراءتها ثانية

[هشام الجنيدى]

شكرا يا اخت شهد على احياءك لقصائد حقيقى انا بعتز بيها جدا لانها اول ما كتبت فى العاميه

وبقولللطيار المصرى انت فعلا فهمت انا قصدى ايه ......... :o

وبقول لابن الجنوب مفيش حد كتب رباعيات تستطيع ان تنافس رباعيات جاهين ولكن شكرا على مجاملتك الرقيقه :blush:

مى محمد انا كمان نفسى اشوف ليا ديوان قبل ما اموت ويدينا ويديكى طوله العمر.... :lol:

شاعر الرومانسيه الف شكر على مرورك الكريم وياريت اكون عند حسن ظن الجميع باذن الله................

:wub: :sad: :o

[soooo]

انا قمت من فرشتى عالصبح بتمطع

ببص من شرفتى عالسكه والشارع

تصدق بالله يا استاذي ..

انا استمخييييييت قوي من الدخلة دي

فرشتي ===> شرفتي

اللعب ده من بعد جاهين مافيش حد عمله

وكمان كلمة (اتمطع) ..

يا راااااااجل

طب وكتاب الله ..

وكتاب الله ..

انت زي ما قال عنك بلدياتي ابن الجنوب ..

احسن واحد جه من بعد جاهين يكتب رباعيات

على فكره ..

انا مخنوووووووووووووووووق موووووووووووووووت

فين الوش اللي بيسقف او الوش اللي بينحنييييييييييييييييييييييييييي