مهنة السيد الرئيس .. والطبع غالب

[se_ Elsyed]

بما إن قصر الرئاسة مفتوح على المشاع دلوقت وأي مواطن مصري محترم ممكن يتقدم يسحب ورقة ترشيح على أساس إننا هنعمل قُرعة علانية لإختيار السيد الرئيس

فبقت العملية سلطة وتقدم لسحب الورقة كل أنواع المهن وأخرها واحد طباخ النهاردة وأمبارح واحد حانوتي

فتعالوا كل واحد يتخيل نفسة في مهنة بيحبها ويكلمنا عن برنامجه الرئاسي

انا هابدأ

-------------

أحب اعرفكم بنفسي الأول :

الإسم : المعلم سين سين الشهير بالمعلم " توكُل "

المهنة : حانوتي .... و أصحابي الاناتيم المجاورين لي من الحانوتية بيسموني " اندر تيكر "

العنوان : المجاورة التانية .. تُرب الغفير

برنامجي الإنتخابي

- أنا مش باحب اتكلم كتير ومؤمن بالمثل اللي بيقول " اقوال لا أفعال " وحدووووووووووووووووووووووووووه .. انا ناوي بعون الله أغسل البلد دي من كل القاذورات اللي فها .. وأشيع كل انواع الفساد .. واكفن أي حد شايف نفسه او يبلطج عالشعب ... وبإذن الله حاسس إن أيامي هاتبقى فاتحة خير عالشعب اللي إتعذب وعمره ما حس إنه مرحوم من حد .... وهايبقى شعاري دايماً البقاء للأفضل .... وبعون الله بعد سنتين هايكون الكل شاهد على إنجازاتي .. اللي هاتحول التراب لدهب .. واحب أقول لمنافسيني على الكرُسي إن ماحدش واخد منها حاجه .... والبدلة الرئاسية زي الكفن مالهاش جيوب واللي خدته القرعة - المخلوع يعني - يبقى ياخده أبو الشعور - حمدين صباحي رمز السشوار ...

وأثناء إلقاء خطابه الرئاسي الحماسي .. تنطلق أصوات الكورس في الخلفية لتُردد " سين سين يا سادة ... هايشربهالكو سادة "

واحب أشكر كل المؤيدين اللي إشتركوا في خرجتي .. قصدي في حملتي وأقول لهم .. لا أراكم الله مكروهاً في رئيس لديكم ....

اخوكم سين سين .. رمز القطنة .. وعلى رأي المثل " القطنة ما بتكدبش "