سؤال شائك!

[بنت شعنونة]

مؤخرا

وبعد احداث كثيرة حدثت لي ولزملاء لي في محتلف المجلات

اكتشفت ان موضوع التحرش اصبح منتشرا جدا

ولا يمكن حصره على سن معين ولا حتى على فئة معينة من البشر!!

ففي مهنتنا يأتينا من رجل في سن ابائنا ويمكن اكبر دا غير انه طبيييييب!!

يعني الموضوع ما بقاش فيه شغلانة احسن من شغلانة

او خافوا يابنات من الشباب اللي زيكوا!!

لآن اكتشفنا ان الكبار العن وادل سبيلا بحكم ارتقاؤه في السلم الوظيفي وتحكمه فينا وفي مصيرنا

السؤال الشائك دلوقتي

فرضا حصل المحظور

وتحرش شخص ما ب فتاة في مجال عملها

وخليني اقول العمل او الدراسة عشان تبقى حاجا طويلة المدى

لآنه لو حاجا عابرة بيبقى حلها سهل

انا اقصد حد مستدييييييم

جار

مدير

زميل

حاجا كدا كاتما على النفس

يبقى ازاي الحل؟ والبنت تتصرف ازاي في الحالة دي؟؟

هل تبلغ اهلها ويبقى فيها دم او حتى ضرب؟

تتصرف هيا لوحدها؟ وازاي؟

والا ايييييييه اللي يحصل؟

اللي خلاني افتح الموضوع دا

وياريييييييت ما يتقلبش موضوع خاااااااص عن الواقعة اللي ها اقولها بس..

ان المدير بتاعنا

عبده بيه

وصلت بيه الوقاحة انه يكلم البنات كدا عيني عييييييييييييييينك وبكلمات واضحة ومحددة وتلميحات قوية جدا

قبل كدا كان كلامه متداري

دلوقتي بقى مافيش حيا خلاص!!!

ومش مع بنت او اتنين

لا والله

دا خلالالالالالالاص ما بقاش عاتق

ماهوا الحل لمثل هذه العينة من البشر؟

لو انتي في الموقف دا تعملي ايه؟ ولو اتحطيتي فيه قبل كدا طب اتصرفتي ازاي؟

ولو بنتك في الموقف دا تعمل ايه؟ او تنصحها ب ايه؟

واليكم احدى مواقف عبده بيه..

اتصل بينا من كام يوم الساعا 9 بالليل وطلب احدى زميلاتي في نفس القسم وامرها انها تنزل "تكتب" تقرير في "غرفة" الأشعة لآنه التقرير دا رايح للبوليس الصبح وانه ها يستناها هناك..!!!

انا كنت نايمة وصحيت على صوت زميلتنا "فلانة"

الله يحرقك يا عبده؟؟

تقريييييير اييييه دلوقتي؟؟؟؟

المهم نادتها..

-في ايه يا فلانة؟

- عبده عاوزني انزله الأشعه اكتب تقرير على الكمبيوتر؟

-بتاع ايه؟

- بتاع حالة ما اعرفش عنها حاجة

- وليه ما قولتيلوش بكرا؟ هوا التقرير ها يطير؟ وبعدين هيا دي شغلتنا والا ايه؟

- ما انا واخدا زميلتي معايا ونازلين افهم في ايه.. انا مش متطمنة!

- انتي بتعرفي تكتبي على الكمبيوتر؟

-لا

- طب ما قولتيلوش كدا ليه؟؟

-!!

- تعرفي حاجا عن الحالة

- لا

- طب ليه ما قولتيلوش شانا هيا اللي عارفا الحالة

بقولك ايه

ما انتيش نازلة

يعني اييييييييييييييه مستنيكي في غرفة الأشعة؟؟

"للعلم بس.. غرفة الأشعة دي عبارة عن مبنى من اوضة واحدا منفصل عن المستشفى في حتة كدا جنب المشرحة وما فيش سريخ ابن يومين هناك يعني عشان توصل هناك رعب خصوصا انه ما فيش نور طول السكة والغرفة نفسها في معزل عن ايييييييي حاجا من المستشفى يعني اي حاجا تحصل هناك ما حدش يدرا عنها!!"

المهم ربنا الهمني وكلمت دكتور الأشعه اللي دايما قاعد في الأوضة دي وهوا راجل محترم

- ايوا يا فلان.. تقريييير ايه يا عم دا بس؟

- انا عارررررررف الراجل باينه اتهبل!! تقرير تافه كدا ومصمم انه فلانة تكتبه!!

بقولك ايه يا شانا ما تنزلي انتي تكتبيه وتخلصيني؟

- اوكي بس بشرط.. الراجل دا ما يعتبش الأوضة لحد ما اخرج والا انت عارف

راح ضاحك وقالي

ماشي بس انزلي بسرعة لآنه بيصلح "الدش" بتاعه ومشغول بيه ف تعالي بسرعة

المهم اكلت ونزلت انا و2 بنات

عبده شافني برق واتسرع واداني ضهره قال يعني ما شفنيش

وانا كنت متاكدا انه فهم مغزى نزولي

رحت خدت مفتاح اوضة الأشعه وكتبت التقرير انا والبنات

واصلا كان فاضل فيه سطريييييييين بالعدد والله لآنه الدكتور بتاع الأشعة كان كتبه اصلا!!!! htr::

ومشينا..!!

فهمتوا الرسالة؟

دي كدا اقل حاجا بتحصل

و والله في بلالالالالالالاوي اكتر من كدا

لكن مش ها اقدر اكتبها لانها صعععععععب تتكتب

يبقى ايه الحل؟

ty:)

[Farida]

و الله يا شانا الموضوع شائك فعلا بس بصى يا ستى ما فيش داعى للحيره الموضوع بسيط و فيه قوانين لأى موقف يعنى بلاش اى امرأة تجتمع مع رجل وحدهم مهما كان هذا الرجل لو قريب لو ابن خال او ابن عم لو جار كبير لو مديرك لو استاذك حتى مهما حصل ...ثانيا عدم الخضوع فى القول او مجاراة الهزار او الضحك على كلام خارج الواحد يعمل نفسه مش فاهم او حتى ان لزم الأمر يبقى دمنا تقيل و غتيت و لو لزم الأمر واى واحده رايحه تقابل عبده بيه ده ان شاالله تاخد معاها غفير او فراش و تعمل نفسها عبيطه ان هى دى الأصول و لا ايه ياعبده بيه و ممكن تلبس الوش و تعمل فيها الشيخه صباح

و تتكلم بـ قال الله و قال الرسول و الموضوع يعدى ...

تم تعديل 3 ديسمبر 2004 بواسطة Farida

[sos]

بقول ايه يا دكتورة/ شانا.....والا بلاش....

نوعية عبده ده.....منتشرة....وما به نوع من الادمان المرضى...الا ان بها ميزة رهيبة.....الجبن لابعد الحدود...وان بدا عكس ذلك....والتعامل معه من الافضل ان يكون فى اطار رسمى جدا....لا سلام ولا كلام الا فى العمل....ومن الافضل ان يكون بتكليف رسمى....(مكتوب يعنى)...

ولمكافحة هذا النوع...لابد من ان يقع فى طريقه...واحدة من منطقة شعبية...(تملك خبرة عملية فى التعامل مع النوعية ده)...ابتداءا من يا ابن كذا....مرورا بالضرب بالحذاء...الى ان تصل الى قسم الشرطة ....بشهود وقضية تمام التمام...

طبعا هو فاهم ومتأكد....ان طبيبة....صعب جدا يتوافر فيها الشروط السابقة....

التمريض ممكن....

فى النهاية اقول لك.....ان الله ليملى للظالم حتى اذا اخذه لم يفلته

[محمد شلبى]

شانا الموضوع ده له حل واحد

الراجل الحقير ده لازم يتفضح ولازم الكل يعرفه على حقيقته ,يعنى لازم تستغلوا اى فرصة ولو كلمة او تلميحه منه وتعملوله فضيحة بجلاجل وتلموا عليه كل الموظفين عشان يختشى على دمه

[بنت شعنونة]

rs:

فريدة

اللي بتقولي عليه احنا بنعمله فعلا

لكن لكي ان تتخيلي ان دفتر امضاء النبطشيات هوا مخبيه في مكتبه

واحنا كل واحدا بتخلص نبطشيتها في وقت غير التانيين وبنروح عشان نمضي ونمشي

صعب نتجمع في كل وقت

وهوا عامل زي الدبانة مش عارفين ها يطب علينا امتى او فين ولا نيته ايه!

اخي العزيز سوس

والله صدقني في موقف من المواقف اللي حصلت طلبت من البنت وهي طبيبة زميلة

طلبت منها كانت قلعت اللي في رجلها ونزلت على دماغه وماكانش ها ينطق وانا واثقا...

محمد شلبي

المصيبة انه مفضوووووووووووووووووووووووح

البشر كلها عارفا حقيقتة حتى المديرة

دا احنا سمعنا والله اعلم انه اتنقل من مستشفى راس التين في اسكندرية الى مطروح بسبب فعل فاضح ادابي

ودي مش اول مرة يتنقل بسبب افعاله

دا اللي سمعناه من الناس اللي تعرف ماضيه كويس

دا غير انه كذا مرة نسمع الأمن وهما بيتكلمه بينهم وبين نفسهم عن المنقبات اللي بيظبطوهم خارجين من اوضته اخر الليل!!

الموضوع اكبر من اننا نفضحه لآنه مفضوح

موضوع جبان ي انا اتاكدت منها فعلا لما مسكته بهدلته مع ان الموضوع كان على نبكشيات وجه زميلي وقالي انه خايف مني جدا لا اروح اشتكيه

احنا ناويين نشتكي

بس الموضوع دا تقيل على قلبنا وعلى لسانا جداااااااااا

ومش عارفين نعمل اييييييه

لدرجة فكرنا اننا نتلم كلنا ونكلم اهالينا

بس مش عارفين رد الفعل ممكن يكون ايه!

[El-Masri]

طيب ما تكتبوله جواب تهديد وتزحلقوه من تحت باب المكتب بتاعه.

[بنت شعنونة]

تهديد ب ايه يا استاذ مصري؟ rs:

[El-Masri]

يا سيدى الفاضل ..

نعم الموضوع شائك .. ولهذا يجب ان "نحسس" على كلماتنا ..

شكرا ..

الإدارة ..

إسو

تم تعديل 5 ديسمبر 2004 بواسطة esssothegreat

[Merci X]

ولمكافحة هذا النوع...لابد من ان يقع فى طريقه...واحدة من منطقة شعبية...(تملك خبرة عملية فى التعامل مع النوعية ده)...ابتداءا من يا ابن كذا....مرورا بالضرب بالحذاء...الى ان تصل الى قسم الشرطة ....بشهود وقضية تمام التمام...

فعلا كلام مظبوط .. ويا حلاوه لو كان متجوز او عنده اولاد ...

تبقي نفخه كبيره ليه لو ارسلتي محضر لحد بيته و معاه كده كام شاهده ( من زميلاتك) وعيونها باين عليهم اللوم و انهم شافوا بلاوي الدكتور .. وتبقي فضيحه و جرسه ليه في العماره و الحي و المستشفي .....

ولو لسعت في نفوخكم اكتر ممكن توصلوا الموضوع للنقابه .. و دي تبقي ترقيعه تمام لحضرته و خصوصا ان النقابه شاده حيلها اليومين دول بعد جريمه الدكتور اياه اللي اتنشرت في الجرايد و فتحت عين الصحافه علي نقابه الاطباء كأن مفيش غيرها في مصر

اتتكلي علي الله انتي ومالكيش دعوه .. بس اوعي يكون الراجل مسنود ولا تقيل .. وبدل ما تلبسوه قضيه .. يلبسلكم انتوا قضيه أداب و تهجم و قذف وسب مدني

ساعتها انا معرفكيش rs: rs: rs:

[Merci X]

تم حذف المداخلة نظرا لحذف المداخلة محل الرد

الإدارة

إسو

تم تعديل 9 ديسمبر 2004 بواسطة esssothegreat

[amir]

شعنونه

بهدوء و بدون شوشره , اكتبى شكوى رسميه منك و من البنات اللى ممكن تشهد معاكم على ان تكون الشكوى من اصل و صوره يتم التوقيع عليها بالاستلام , و سلموا الشكوى دى للمديره ( تسليم رسمى ) و تكتبوا فيها تهديد مبطن للمديره انها اذا لم تتخذ اجراء فورى فسيتم رفع الشكوى للنقابه , فى هذه الحاله و حتى تحافظ المديره على نفسها فأنها لابد أن تتخذ اجراء مع هذا الندل .

و لكن يجب التأكد تماما أن البنات سيكونون مستعدات للشهاده , لأننى فهمت من كلامك أن هناك منهن من توافقه على افعاله ..

ارجو ان تأخذى حذرك منه و من ( بناته ) .

[Sharkiah]

يبقى ازاي الحل؟ والبنت تتصرف ازاي في الحالة دي؟؟

هل تبلغ اهلها ويبقى فيها دم او حتى ضرب؟

بــــــــــــــــــــــــــــــــدون تــــــــــــــــــــــــــــــــردد

مفيش حد فى الدنيا دى كلها ياشانا ممكن يساعدك فى موضوع زى ده غير بابا

مفيش حد فى الدنيا دى كلها لن يغمض له جفن بالليل حتى يتأكد أنك فى أمان غير بابا

مفيش حد فى الدنيا دى كلها هايكون مستعد يعمل المستحيل ويضحى بالغالى والنفيس علشان يحميكى غير بابا

مفيش حد فى الدنيا دى كلها ياشانا بيحبك أكثر من نفسه وأكثر ماإنتى بتحبى نفسك غير بابا

[yasovinas]

شانا اختنا الصغيرة

مافيش حل احسن من شكوى للنقابه وعلى فكرة انا اظن انك لو رحتى ولا بلاش تروحي لو بعتى شكوى لمجلس المدينة واهل السلوم بدو ما لهمش في الهلس ممكن يتنقل من عندكم بس المشكله في هذه البلوى مش النقل لانه هيروح لمكان تاني ولبنات ناس تانيين الله يلعنه في كل كتاب

[Asat]

الأستاذة شانا

الموقف الذي وصفتيه يندرج تحت بند "التحرش الجنسي" “Sexual harassment”

أما عن ماذا يجب أن تفعلوا في هذا الموقف, أرى التالي

- إخبار رجالكم (أباء, أزواج, إخوان)

- تبليغ المسئولين في مكان عملكم

- تبليغ الشرطة

- محاولة البحث عن عمل يفصل بين الرجال و النساء

هذه وصلة لبرنامج "للنساء فقط" عن التحرش الجنسي

http://www.aljazeera.net/news/archive/arch...ArchiveId=90487

و هذه وصلة عن إحصائيات التحرش الجنسي في أمريكا لمن يحب أن يطلع

http://womensissues.about.com/cs/governorn...harassstats.htm

تم تعديل 4 ديسمبر 2004 بواسطة Asat

[ماجد]

شوفى يا دكتورة ...

الناس اللى من النوعيه دى و النوعيات المشابهه كمان لو ما اتوجهاش بتزيد فيها و بيفتكر انه الناس ياما راضيه و موافقه يا اما غلبانه ومش قادرة تعمل حاجه ....

لابد من انكوا تعيّشوه فى مشاكل بحيث يتلهى عنكوا و يحاول يحل مشاكله .

المهم ازاى تعيشوه فى مشاكل.....

اما بالأسلوب المباشر .... أو بالأسلوب غير المباشر ...

اختيار نوع الأسلوب ده انتى تقرريه حسب نوعية الشخص و أهميته و قوته و نفوذه و حاجات كثيره .

الأسلوب المباشر معروفه طرقه .

لو مقدرتوش على كده يبقى مافيش غير الأسلوب التانى :

الأسلوب الغير مباشر بقه ....... عكننه .

- يعنى تكلموا مراته و تقولولها .... اخواته ..... جيرانه لو عرفتوا .

- شكاوى من ناس مجهوله و اهالى البلد عن سلوكه وبصفه مستمره و متتاليه ولكل الجهات المعنيه و الغير معنيه سواء عن سلوكه أو عن مخالفاته الأداريه .

- شكاوى اخرى مختلقه و بها وقائع غير حقيقيه لو ماقدرتوش تمسكوا عليه حاجه .

هاتقولى انها مش بتعمل حاجه و انها بتجيله فى الآخر ....

هاقولك لا مش صحيح ..... ليه .

أولا : لأنها بتفتح عيون جهات رقابيه كتير عاوزه تعمل شغل بأى شكل و هاتلفت النظر اليه .

و ثانيا : لأنها هاتفهمه ان فيه ناس بتحفر وراه و مستنيين له غلطه فيحاول يمشى جنب الحيط .

هاتقوليلى بس دى اساليب رخيصه مثلا او غير شجاعه . هاقولك وانت عندك الشجاعه للأساليب التانيه . او هل الأساليب التانيه جابت نتيجه . انتم مضطرين لكده و الموضوع يا ابنتى شرف وكرامه مش حاجه سهله . تخيلى مثلا لو واحده زميلتك حكيت لأهلك بدون ما تقوليلهم على حاجه زى كده هايكون موقفهم منك ايه اولا ومنه ثانيا.

يتبقى سؤال : هل تخبرى اهلك ...أم لا

و الأجابه برضه عندك ... اذا كانوا من الناس العقلانيين و اللى بيتصرفوا بهدوء بس بقوة ... يبقى فورا تقولى

اما اذا كانوا من الناس الأنفعاليين و هايتخانقوا معاه و تبقى معركة يبقى مافيش داعى .

و تقدرى تعمل لهم اختبار بس يكون ذكى و تشوفى رد الفعل ايه .

هاحكيلك موقف حصل معايا شخصيا : جاءت أختى الصغيره و كانت طالبه هندسه قسم مدنى و قالت لوالدتى - رحمة الله عليها و على أموات المسلمين جميعا - ان فيه معيد من قسم الميكانيكا بالكليه بيدخلهم سكاشن بيعاكسها . والدتى قالت لى اصّرف بس بدون ماحد يلاحظ . ذهبت لرئيس قسم الهندسه المدنيه و كلمته بمنتهى الهدوء و الحسم انه اذا لم يتصرف و يعيد لأختى كرامتها و اعتبارها فأنا هاتصرف بطريقتى الخاصه و انا جيتلك علشان اشوف مدى سيطرتك على القسم اللى ترأسه و عملت حساب لمنصبك و شخصك . الراجل اتنطر من مكانه كأنه لسعته عقربه و خدنى و رحنا قسم الهندسه الميكانيكيه و حكى الموضوع لرئيس القسم و قال له نفس الكلمتين اللى قلتهم له و تم ايقاف المعيد عن التدريس و قف الرساله بتاعته لدرجة انه دخل السكشن بتاعها و اعترف للطلبه بما فعله و اعتذر منها و طلب انها تسامحه و انه مش هايعمل كده تانى مع اى طالبه و ساق علّى طوب الأرض لغاية مارحت لرئيسه و قلت له هو خلاص بقى كويس و ماشى مظبوط .

و كان الله معك يا ابنتى ...... وربنا يطمننا عليك دايما

رأى أخير : حاولوا تكسبوا منافس ليه معاكم و تخلوه يلاحظ ذلك ... على الأقل وقت المعركه . يااما المدير بتاعه يا النائب بتاعه أو واحد طمعان فى مكانه .... بس بحرص علشان ماتربوش ديب تانى .

[Farida]

Sharkiah شارك في تاريخ Dec 4 2004, 09:19 AM

 

بــــــــــــــــــــــــــــــــدون تــــــــــــــــــــــــــــــــردد

مفيش حد فى الدنيا دى كلها ياشانا ممكن يساعدك فى موضوع زى ده غير بابا

مفيش حد فى الدنيا دى كلها لن يغمض له جفن بالليل حتى يتأكد أنك فى أمان غير بابا

مفيش حد فى الدنيا دى كلها هايكون مستعد يعمل المستحيل ويضحى بالغالى والنفيس علشان يحميكى غير بابا

مفيش حد فى الدنيا دى كلها ياشانا بيحبك أكثر من نفسه وأكثر ماإنتى بتحبى نفسك غير بابا 

الأستاذ العزيز شرقيه طب و اللى ما عندوش بابا يعمل ايه ؟؟؟؟؟؟؟

[Sharkiah]

Sharkiah شارك في تاريخ Dec 4 2004, 09:19 AM

 

بــــــــــــــــــــــــــــــــدون تــــــــــــــــــــــــــــــــردد

مفيش حد فى الدنيا دى كلها ياشانا ممكن يساعدك فى موضوع زى ده غير بابا

مفيش حد فى الدنيا دى كلها لن يغمض له جفن بالليل حتى يتأكد أنك فى أمان غير بابا

مفيش حد فى الدنيا دى كلها هايكون مستعد يعمل المستحيل ويضحى بالغالى والنفيس علشان يحميكى غير بابا

مفيش حد فى الدنيا دى كلها ياشانا بيحبك أكثر من نفسه وأكثر ماإنتى بتحبى نفسك غير بابا 

الأستاذ العزيز شرقيه طب و اللى ما عندوش بابا يعمل ايه ؟؟؟؟؟؟؟

لم ألحظ مداخلتك يادكتوره فريده ، عذرا على التأخير

..............................

تحكى لأخوها الكبير أو أخوها الصغير أو عمها أوخالها

المهم أن هذا النوع من المشاكل أعتقد أنه أولى مهام الولى الشرعى

والذين فى قلوبهم مرض كما ذكرهم القرآن يلزمهم رجل يردعهم ويحمى من قذاراتهم لحمه ودمه وعرضه

والله أسأل أن يحافظ على كل بناتنا ، فهو خير حافظا وهو أرحم الراحمين

[Farida]

معلش و الله بس مش قصدى اضيق عليك فى الكلام بس انا مثلا والدى متوفى و اعمامى كبار فى السن و ما عنديش اخوات ولاد (طبعا زوجى ربنا يخليه لى )بس لو انا مش متزوجه مش معقول كل مرة تحصل مشكله مهما كانت اشحت راجل من العيله علشان يقف معايا ....المقصود انى انا باشتغل فى مكان يبقى اتحمل تبعات المكان اللى باشتغل فيه و اخد كل الأجراءات اللى تكفل لى حمايه من الجهه اللى باعمل فيها و ربنا معايا و لو ما أقدرتش اواجه لوحدى و زمايلى اسيب المكان و ادور على غيره بس دخول العائله فى العمل مع اى مشكله اعتقد يعنى مش الحل الأمثل من وجهة نظرى....

[Sharkiah]

دكتوره فريده

أنا عندما كتبت كلامى الأول لشانا كنت أوجه كلامى لحالتها هى بالدرجه الأولى وكلنا نعلم أن والدها الكريم ـ حفظه الله لها ـ موجود بجانبها ويرعى كل خطوه من خطوات حياتها ، ودعينى الآن أضيف أنى لو وضعت نفسى مكانه وعرفت يوما ما أن إبنتى وفلذه كبدى ونور عينى كانت فى ضائقه ما ولم تشركنى فيها فوحده الله يعلم ـ وأظن أن لاأحد سيمكنه تخيل ـ مدى الحزن الذى سيجتاحنى ، يكفى فقط أن أشعر بينى وبين نفسى أن إبنتى لم يسعفها تفكيرها اللحظى إلى أن تأتى مهروله لترتمى فى صدرى لتحكى لى كملاذ لها ، هذا فضلا عن أنى سأقيم الدنيا ولن أقعدها معها على ذلك عندما أعلمه ، دى بنتى ياناس ، لحمى ودمى وقلبى وعيونى فى صوره إنسان يمشى على الأرض

أما الوضع الذى تتكلمى عنه حضرتك فطبعا سواء كان والدك الكريم ـ رحمه الله رحمه واسعه وجعل مثواه الجنه بجوار الرسول عليه الصلاه والسلام ـ أو غير موجودا فلزوجك عليكى حقا ويجب إبلاغه فى التو واللحظه وإشراكه فى الأمر ، فهمك همه ومشاكلك مشاكله وكل ماينغص عليكى حياتك هو منغصه له قبل منك ، وأنا طبعا لا أتكلم عن سخافات أو سماجات أو تفاهات بسيطه أثق تمام الثقه أن حضرتك وشانا ومعظم بنات وسيدات المنتدى ستتعاملن معها بحكمه وعندكن القدره على ردها فى كيد من تسول له نفسه الإتيان بها ، لا ياأختى العزيزه أنا لاأقصد هذا وإلا كانت الدنيا وقفت ، أنا أقصد الفظاعات الأخرى التى نسمع عنها وأحيانا نعايشها من ذئاب آدميه تأتى بتصرفات فيها من السعار ما يجعل تدخل ولى البنت أو زوج المرأه أمرا لابد منه لدرء خطر كارثه قبل أن تقع

وللمره المليون لن أمل من تكرار أهميه أن نضطلع كمجتمع مسلم بتحرى وتطبيق ضوابط الإختلاط كما أتى بها ديننا الحنيف (مثلا أنا أثلج صدرى بشده أن أسمع أن مترو الأنفاق يخصص عربات للسيدات فقط ، وأتمنى أن نراجع ظاهره المدارس المختلطه فى الإعدادى والثانوى)

تم تعديل 10 ديسمبر 2004 بواسطة Sharkiah

[Farida]

الأستاذ الفاضل شرقيه حضرتك صح فيه مواقف نادرة تتطلب تكاتف الأسره فى مواجهتها ....