محاورات المصريين - فرع الامارات

[eastsoul]

والله نفسي اجي انا و طمطم بس مش عارفه هخلص شغل امتى النهارده بس هحاول ...

[yasovinas]

روح الشرق الغالية وطماطم هانم تنورونا وتشرفونا الاجتماع هيكون من الساعه 7 مساء ومفتوح الى ما شاء الله - لغاية الماسورة ما تقفل يعني في اي وقت تخلصوا شغل شرفونا ونورونا

ما زال موبايل المستر امير الطحال الشهير بكوكيز مغلق او خارج نطاق الخدمه - هو حر مافيش معونات :sad:

[amir]

روح الشرق الغالية وطماطم هانم تنورونا وتشرفونا الاجتماع هيكون من الساعه 7 مساء ومفتوح الى ما شاء الله - لغاية الماسورة ما تقفل يعني في اي وقت تخلصوا شغل شرفونا ونورونا

ما زال موبايل المستر امير الطحال الشهير بكوكيز مغلق او خارج نطاق الخدمه - هو حر مافيش معونات :D

اتصلت اكتر من مره بالاستاذ الفاضل المحترم السيد ياسو و الذى اعتبره فى سـن و مقـام والدى و طلبت منه بل و اترجيته انه يسمح لى بمقابله اعضاء الرابطه و لكنه للأسف قفل التليفون فى وشى و قال لى اطلع من بيتى يا .... متقمصا شخصيه عماد حمدى فى احدث افلامه

و لهذا فأنا اهيب بكل ابناء و بنات الرابطه بأن يتكاتفوا و يقوموا باستلام المعونات الخاصه بى و ارسالها بالبريد على عنوانى بالمنتدى

مع انى كان نفسى اشوف طفشان و زعلان اللى ما شفتهمش قبل كده

و صيتكم المعونات و ياريت لو كانت معونات ماديه

تم تعديل 4 مايو 2006 بواسطة amir

[yasovinas]

يحكى ان قاضي ينظر في قضية سرقة وكان المتهم قصير جداً (لا مؤاخذه يا كليو) واول سؤال كالعادة

القاضي : اسمك؟

المتهم : نخلة ابو طويلة (لا مؤاخذه يا اثينا)

القاضي : هنكذب من اولها

==============================

ما سبق استهبالاً لابد منه

المدعو امير الطحال كوكيز من عتاة المحاورات وقابل السادة طفشان وزعلان بل وهومر ايضا في اكثر من مناسبة واضيف انه يضع صوراً لهم على مكتبة في العمل وفي غرفة المسافرين في البيت

نيجي بقى للمهم

اللقاء تم بحمد الله وكان رائعاً كعادة شباب المحاورات في كل لقاء والجدير بالذكر انه اللقاء رقم (5) الذي احضرة للرابطه مع العلم ان هناك لقاء شبه اسبوعي بين عضوي الرابطة من ابناء الامارات الشماليه طفشان وزعلان - ومما يذكر ايضا ان اللقاءات تتم بصورة تبادلية يعني مره في دبي بجوار الحنفيه (امبارح كانت ليلة ) ومرة بابوظبي وهكذا

التفاصيل بعد الفاصل

تم تعديل 5 مايو 2006 بواسطة yasovinas

[ATHENA]

المتهم : نخلة ابو طويلة (لا مؤاخذه يا اثينا)

مؤاخذتك معاك يا بو قلب أبيض :wub:

تيجي بالسلامة يا شابة ... قطشيعة ... ما حدش بيأكلها بالساهل

الله يسلمك يا بو قلب أبيض :blink:

بس لما ترجعو كل واحد يحكي لنا على اللي شافهم

أوكي؟؟؟

مصرية يا جميلة داكور و هنحكي كل تنتوفة كل واحد و الي حصل في رحلته :P

و لهذا فأنا اهيب بكل ابناء و بنات الرابطه بأن يتكاتفوا و يقوموا باستلام المعونات الخاصه بى و ارسالها بالبريد على عنوانى بالمنتدى

تهيب بمين بس يا أمير..مش لما ناخدها إحنا الأول..قطتيشعة محدش بياكلها بالساهل :blink:

والله نفسي اجي انا و طمطم بس مش عارفه هخلص شغل امتى النهارده بس هحاول ...

إيست سول العزيزة كان مفروض أقابلها في رحلة إمبارح بس الواحد كان ماشي مع جماعة ما يعلم بيها إلا ربنا B)

لازم يا سول نشوفك إنتيو طمطم بجد المرة الجاية و نحدد الللقاء و موعده بشكل أدق شوية :o

بعد الفاصل تفاصيل رحلة دبي و ماسورة المية :wub:

[وليد صفوت]

اهئ............. :wub: .....اهئ اهئ اهئ

أنا مش هاقدر أجي. :wub: ........اهئ.....اهئ

أصلي ساكنة بعيد شوية.......

في الدار البيضاء :blink:

بس لما ترجعو كل واحد يحكي لنا على اللي شافهم

أوكي؟؟؟

على فكرة يا مصرية .. انا كنت عندكوا من سنتين ....

كازابلانكا مدينة جميييييييييلة ...

و مراكش أجمل ....

حقيقى انتوا فى نعمة ....

[yasovinas]

اجتماع الرابطة امس كان اجتماعاً تاريخياً - وحتى لا تفقدوا تفاصيل الراحلة سوف اقصها عليكم من البداية - والبداية كانت الساعه 5ونصف عصراً بمكالمة هاتفية من زعلان :wub: للتاكيد على الحضور وبيني وبينكم انا تشائمت من بعد المكالمه لكن نكمل - بدأت رحلتي الى الاجتماع من ابو ظبي العاصمة بسيارتي متوجها الى دبي في تمام الساعه السادسه مساء وخلال الطريق قفلت الزجاج وفتحت الكاسيت مع صديقي الوحيد على الطريق المستر محمد منير ولان ابو قلب ابيض لازم يفضل طول عمرة بقلب ابيض اثناء الطريق اتصلت ببنتي الكبيرة اثينا للاطمئنان عليها - بس بجد والله اتشائمت - وكل من عاصر احداث الهايد بارك هيفهمني طبعا ً - ما علينا - وصلت الى الهدف في تمام السابعة وخمس دقائق ولكن (وآآآه من لكن) ربنا ما يقطع لنا عادة ابدا يارب,,,, بدل ما الف من فوق الجسر دخلت النفق مما ادى الى نصف ساعه زيادة داخل دبي ولانها خربت خلاص اتصلت بطفشان واخبرته بسبب التاخير ؛؛؛؛؛ وصلت الى المكان ولاقيت طفشان كالعادة مستقوي على الغلبان زعلان ومقعده في الهواء الطلق في الخرابة اللي جنب الكافيه علشان يضرب كرسي معسل في الحر والرطوبه دي :blink: شايفين الافترا - المهم دخلنا قعدنا جوه 0ايوه قبل ما انسى دفعت درهم في عداد الموقف بتاع السيارة 0 جلسنا نحن الثلاثة ولسه هنطلب ،،، هل علينا بطلته البهيه الغالي قوي رفيق الكفاح ودفعة مواليد 63 وخريج 85 هومر باشا قلب الاسد جلسنا نحن الاربعه وجاء اول دور طلبات ايس كريم علشاني وموكا تشينو لطفشان والاورانجوس لزعلان (الجدع دا ما بيشربش غيرة) وهومر طلب حاجه اخضرة مش عارف ايه هي - المهو تحدثنا في الدنيا واحوالها والمدارس والمحاورات وقطعنا فروة خلق الله جميعا ؛؛ وبعد قليل هل علينا كل من روح الشرق والباشمهندسة طمطم شرفونا جدا طبعا وللذكرى والتاريخ طمطم جابو لها سلطانية كابتشينو ايوة سلطانيه!!!!!!!

خلال الجلسه الظريفة اتصل العضو الفاسد في الرابطة المدعو امير الطحال فقط لاثبات وجوده وعلشان يأمن على نصيبة من المعونه (افففف مليتو البلد :wub: )

وبعد ان استاذنت بنات الرابطه ورحلوا جبنا تاني طلب ودا بقى كان كارثة لان الاحداث كانت مثيرة بداية من محاولة معرفة نوع الموبايل اللي شايلة زعلان وهو ما ادعى بعدم معرفته وفتحته علشان اعرف ولكن الظاهر انه كان بيتلكك ما اشتغلش تاني يا سادة - وهنا تحول زعلان الطيب الوديع المهذب الى زعلان الجبار الغضبان وخرج عن وقارة وادبه وقام بطلب شاي وكيك تصوروا زعلان بيشرب شاي :blink: المهم طفطف صديقي وصاحبى حط ايدة الخضرا على الموبايل اشتغل وساعتها وبقلب جامد اعلن طفشان انه هيطلب تاني وانا كمان الطلبات بقى لها حكاية تانية وموضوع كبير نحكيه بعدين وفي النهاية اخذنا المعونه اللي كانت عبارة عن

معلش مش قادر اقول ادوني شوية وقت لما اجمع شجاعتي واسأل المشرفين اذا مسموح بكنابة مثل هذه الالفاظ في المنتدى ولا لاء

[Tafshan]

مش ح ابوظ عليكم السرد الشيق للمدعو ياسو ابن فينس - ربنا بفك سجنه - الاجتماع كان رائع كالعادة ... اكتشفت اننا نعرف بعض بقالنا اكثر من سنه و بقى الموضوع مش بس صداقة نت بل تجاوز ذلك الى صداقة حقيقية بيننا و ربنا يديمها يا رب .. طبعاً بحكم المسافات بقابل زعلان و هومر اكثر شوية من ياسو لكن دائماً بنسال على بعض بالتليفون ..

ما علينا ..

المهم بعد ما استلم الجميع المعونات لا حس و لا خبر ... تفتكروا ليه :closedeyes:

[amir]

انا شايف عمليه تمويه و تتويه على المعونات ... و مفيش حد جاب سيرتها !!

مع ان زعلان اتصل بيا و قالى انه بعت لى ماسوره ونص

فيـــــــــــــــن ماسورتى ؟؟

ياسو

انا مافهمتش المثال بتاع القاضى

يكونش قصدك ان القاضى طلع كذاب ؟؟!!

[فنكوش]

مش ح ابوظ عليكم السرد الشيق للمدعو ياسو ابن فينس - ربنا بفك سجنه - الاجتماع كان رائع كالعادة ... اكتشفت اننا نعرف بعض بقالنا اكثر من سنه و بقى الموضوع مش بس صداقة نت بل تجاوز ذلك الى صداقة حقيقية بيننا و ربنا يديمها يا رب .. طبعاً بحكم المسافات بقابل زعلان و هومر اكثر شوية من ياسو لكن دائماً بنسال على بعض بالتليفون ..

ما علينا ..

المهم بعد ما استلم الجميع المعونات لا حس و لا خبر ... تفتكروا ليه <_<

dh يارتني كنت معاهم :blink: :rolleyes: (من فيلم الطريق الى ايلات)

ان شاء الله تتعوض في المرات القادم ولكن المشكله انى اتاخرت في الشغل

بردوا مش هاسيب منابي :unsure: :huh: :huh:

[ATHENA]

افتح المحضر يا بني

تمت رحلتي لدبي مع مجموعة أصدقاء في نفس يوم اللقاء و كان في إحتمال %%% إني أشوف جماعة اللقاء لكن حينما كنت في الوندرلاند امارس طفولتي البريئة التي إنتهت نهاية مأساوية تلقيت إتصال من الأخ فيناس ( الحق يعني إتشائمت و كده ) و كان ليا حق لأن أخينا فيناس إتصل في وقت مثالي..حيث أنه قبل المكالمة بدقائق كان قد تم عمل مقلب محترم و متوضب في حظرتنا فأدى إلى إغراق كامل حقيقي المرة دي ( مش ماسورة أي كلام يعني )في احد الألعاب المائية التي تم إيهامي بأنها مش بتطلع الواحد باكتر من طراطيش مية :rolleyes: فإنعدمت فرصة اللقاء من %%% إلى %%%%%%%

طلبت الوكالة قصدي الرابطه و طلبت معونة عاجلة لشراء داوء و كساء تحسبا لنزلة البرد التي سوف أصاب بها فرد عليا احد المسؤوليين هناك بأنه لا توجد معونات يوم الخميس و تحجج بنقص الموارد و كلام كتير كده فإضطررت إلى التحمل و دمعتي على خدي :blink:

تم تعديل 6 مايو 2006 بواسطة ATHENA

[Tafshan]

طلبت الوكالة قصدي الرابطه و طلبت معونة عاجلة لشراء داوء و كساء تحسبا لنزلة البرد التي سوف أصاب بها فرد عليا احد المسؤوليين هناك بأنه لا توجد معونات يوم الخميس و تحجج بنقص الموارد و كلام كتير كده فإضطررت إلى التحمل و دمعتي على خدي :closedeyes:

هذا كلام غير صحيح :blink:

لقد تم صرف عدد 2 كيلو برتقال بصرة و عدد 1 كيلو برتقال بلدى و شريط ريفو و علبة كلينيكس ثم قمنا بحساب تكلفتهم و تم خصمهم من المتأخرات عليكم من قيمة الاشتراكات بعد خصم نصف المبلغ لسداد ديون مصر :o

طفشان الحمش

امين صندوق

[nancy]

واضح انها كانت رحلة حلو اوى

عموما انا حاعمل رابطة للبنات ونتقابل فى الاسكندرية مرة والقاهرة مرة الى ناوية تبعتلى على الخاص ونرتب

لان مفيش احلة من ان الصداقات دى تكون مش بس فى النت لا برة كمان

وانا معرفش اى حد من البنات فى السعودية غير جيجي ومعاها موبيلى لو فية حد تانى يبعتلى على الخاص برضة

وحنعمل حتة رابطة جنان :closedeyes:

[yasovinas]

يا سبحان الله :huh:

نانسي :ph34r: الباشمهندسه نانسي :P رافعة رايه المساواه :closedeyes: وقائدة لواء البنت زي الولد -_- ومن ترفض ان يقول الرجل (المدام او الست بتاعتي او ام العيال) عادت الى قواعدها سالمه وطالبت برابطه للبنات فقط

وعلى راي الاسطى حسنين تباع عربية عم شلاطه الاشرم (كلكس له يرجع لاصله ) امال فين المساواه وتحقيق الذات والافكار التقدميه والملوخيه بالتقليه يا باشمهندزه :o - بنات حوا صحيح-

ما علينا نرجع لموضوعنا :P

ذكرنا في ما سبق ان الغالي طفطف بعد ان قام باعادة الروح لموبايل المدعو زعلان والذي كان قد فقد اعصابه لما حدث وطلب شاي - وهي للذكرى والتاريخ اول مرة اشوفه بيشرب شاي - اعلن طفطف انه ومكافأة له على اعادة الروح للموبايل سوف يطلب طلب اخر - وهنا اعود بكم مرة اخرى لاول اللقاء (حتى تتكون لكم خلفيه ثقلفيه لما سوف يحدث) عندما كنا نجلس في الخارج لكي يكركر طفشان :huh: ساعتها زعلان احضر المنيو وقال لي "شوف العصير دا !!!" والعصير دا يا ساده كان عبارة عن كوكتيل محترم يتكون من عصير الخيار وعصير الكرنب وعصير الجزر والجرجير كل هذا مع ثلج مجروش :o

ما علينا نكمل ما حدث في نهاية اللقاء عمنا طفطف قال انا هشرب {بلبربرب$$###@@@!) وطبعا انا مش بفهم في الحاجات دي فقلت لهم انا عايز (هاف أ نيس تايم ) اللي في اخر المنيو فقالوا لي دي مش للشرب فقلت خلاص هاخد زي طفشان {الواد بصراحه صحته حلوة وما عندوش اي مشاكل لا نفسية ولا عصبية ولا يبان عليه اي تخلف عقلي} فيعني يمكن الوثوق في اختيارة ؛؛؛؛ نكمل بعد الفاصل

تم تعديل 7 مايو 2006 بواسطة yasovinas

[eastsoul]

والله كان نفسنا تبقي معانا يا أثينا ... ده حتى فتتك سلطانية الكابتشينو اللي طلبتها طمطم وطبعا المعونات من طفطف باشا...‏ :ph34r:

انا و طمطم كنا سعدا بالاجتماع و خصوصا المعونات ... شكرا يا طفشان ... ده في ناس كتيرة بتدعيلك عليها...‏

كمل يا ياسو بقيه تفاصيل الاجتماع‏... :closedeyes:

[nancy]

ياسر انت لية قارش ملحتى وستقصدنى

انا قلت البنات وقايلة كدة من شهر فات

ومعنديش مشكلة ان حد يجى يعنى انت اسكندرانى واحنا حنبقى فى الاسكندرية

تعالى قول لية متخلوش الاجتماع لكل الاعضاء عادى

وسعتها نرتب على الاساس دة انا لعلمك دماغى متفتحة جدا

بس انا مش بحب ابادر بافكار قد يعتبرها البعض غريبة

وبطل تستقصدنى احنا اسكندرنين زى بعض :closedeyes:

وبعدين ان محققا زاتى وافكارى تقدمية غصبن عن الرفيع والتخين وحياتك :ph34r:

بس مبحبش اتكلم على نفسى كتير

[tmtm]

ازيكم ياأحلى اعضاء واحشتوني.... :huh:

معلش تغيبت يومين كدة....مشغوليات بقى...... :closedeyes:

وبعدين كنت سعيدة قوي بالاجتماع دة الي كان فريد من نوعه خصوصا المعونات كانت فووووووووووووووووووق الفظيييييييييييع... :P

وطبعا زي ماقال ياسو باشا انهم في الكافيه كانوا متوصيين بية قوي فجابولي حلة الكابتشينو بس نسي يقولكم انهم جابو معاها عينة بسكوتة اغمس بيها.... :o

ومش عايزة اقولكم اني فضلت صاحية يومين ورا بعض بسبب جرعة الكابتشينو الي كانت فوووووووووووووووق الفظيييييع بجد..... :ph34r:

وكان نفسنا نشوفك يا اثينا بس اكيد هتتعوض ان شاء الله.... :huh:

[Tafshan]

هو ياسو فين :wub:

ايه يا عم ... ما تيجي تكمل الحكاية :wub:

زعلان اتصل بيا تليفونياً محذراً من عمايل المدعو ياسو ابن فينس ذلك بعد ان ظهرت نواياه الشريرة في مدينة دبي للمواسير و قد حاول ان يدمر تليفون زعلان المحمول ... و بعد احباط المحاولة على يد شخصى الضعيف mfb: سولت له نفسه ان يرسل رسائل مصابة بفيرس الفنونزا الطيور الى زعلان لتدمير الموبيل و نتف ريشه من المنتدى .. و ما كان من زعلان و الشهير بطيبة قلبه و في مقولة اخرى " على نياته " الا ان اشترك في خدمة ال MMS ليتأكد من استقبال الرسالة ... و يا ريته ما استقبلها mfb:

جدير بالذكر ان زعلان لم يشتري هذا الموبيل و انما كان هدية من شخص عزيز

كان معكم :

طفشان ابو شمّالة

قناة الجزيرة

بنها

________________________________________________________________________________

_________

و بعد النجاح الساحق الماحق للمقابلة ... و بعد ان تشرفنا بالاعضاء الجدد ... و بعد توزيع المعونات و الذى منه ... و بعد شرب العصير الخطير و التخلص من ذكرياته المؤلمة :wub: ... نود ان نذكر الاعضاء بميعاد القسط السنوى المستحق و بهذه المناسبة اعلن من موقعى هذا بدأ التبرعات لسداد المتأخرات على المدعوه ايزيس الشهيرة باثينا و لا تغدينا و ذلك لفك رهنية البسكلاته

امضاء : سفروت :wub:

[زعلان]

نصيحة لأعضاء المحاورات من سكان الامارات ما ستقبلوش مسجات من ياسو ولا تردوا على اتصالاته ويا ريت تقاطعوه في المنتدى حتى

[yasovinas]

نكمل الحكاية وبعدين نرد على الشعب في النهاية

قلت لكم اني ولان قلبي ابيض ومش واخد خوانه قلت للبنت الويترايه "مي تو" يعني انا كمان علشان اللي مش بيعرف انجليزي يعني وكده امثال نانسي وكليو وس س واسو ما علينا

المهم طفطف قال لي طيب ما تاخد حاجه تانيه علشان نجرب ونشوف قلت برضه الواد بيثبت كل شويه انه محل ثقة والواحد مش غلطان لما وثق فيه فقلت له "اذ يو لايك" فقلنا للوترايه هاتي عصير كيوي يالبرتقال :wub: تخيلوا كيوي بالبرتقال وانا من طيبة قلبي وسلامه نيتي وافقت على هذا الاختيار

بغعد شوية بضرب بعيني ناحية الكافيتير لاقيت عدد اتنين شوب كبيييير واحد لونه احمر فرايحي اللي بيسموه عندنا في زنقة الستات احمر سنترافيش والتاني لونه اخضر مصفر (عارفينه) وطبعا كل شوب من دول على حرفه طرطور ملون قلت شكلهم يفرح ويشرح القلب الحزين

وجت البنيه ومعاها الشوبين الاحمر هليه طرطور عبارة عن رجل عيل صغير ايوه قدم عيل صغير وبخمس اصابع كمان وباللون الاحمر اياه ودي كانت من نصيب اخونا طفطف

اما العبد لله فكان من نصيبة الشوب الاخضر المصفر (عارفينه) ودا بقى له حكاية تانيه لوصف المشاعر والافكار والاحاسيس التى انتابتني خلال قيامي بمحاولات بلع المذكور

اما لموضوع مشروب طفشان الاحمر فاترك له حرية التعبير عما شعر به

وللحديث بقية ,,,,,,, اذا كان في العمر بقية