سؤال حقيقى مش هزلى

[raouf]

جاء فى بالى سيناريو مرعب واكده خبر ساذكره لاحقا

ماذا لو رشح حسنى ميارك نفسه لانتخابات الرئاسة القادمة فى ظل عدم وجود شرط يوقفه عن الترشح حيث لم تثبت ادانته فى اى قضية حتى الان ولم يسبق ان حكم عليه فى قضايا مسيسة بالشرف

طبعا البعض مننا قد يضحك ويقول ده تخريف لكن فعلا ما المانع ؟

هل تعتقدون ان مبارك والقلول ما يقدروش يجمعوا 30 الف توقيع لترشيحه ؟

انتظر اراءكم وادى الخبر من مصراوى

تب - صهيب ياسين ومحمد العراقي:شهد الشهر العقاري بمنطقة المساحة بالدقي، كثافة غير معهودة على أثر قيام نحو مائتي شخص، من أبناء مبارك بإشهار توكيلات للرئيس السابق للترشح للرئاسة .

وقال محمد عبد الرازق، المحامي في تصريحات خاصه لـ" لمصراوي " واحد أبناء مبارك البارزين أنه؛ تم إشهار عددا، من التوكيلات للرئيس السابق صباح اليوم، في محافظات الفيوم والشرقية وجاري التنسيق مع أبناء مبارك في باقي المحافظات.

وشّدد عبد الرازق، أن أبناء مبارك، يعلمون علم اليقين أن الرئيس السابق، لن يقوم بترشيح نفسه والغرض من التوكيلات هو إيصال رسالة مفادها، أن أبناء مبارك، مخلصيين لوالدهم،

وكان محمد عبد الرازق، المحامي، وأحد مؤيدي الرئيس السابق حسني مبارك، بإشهار توكيل فى الشهر العقاري لترشيح الرئيس السابق لرئاسة الجمهورية .

وأكد عبد الرازق أنه وفى نفس التوقيت يتم الآن وعلى مستوى الجمهورية إشهار توكيلات مؤيدة للرئيس السابق .

وأشار عبد الرازق إلى أن ''ابناء مبارك'' يعلمون علم اليقين أن مبارك لن يقوم بترشيح نفسه، ولكن الأمر بالنسبة اليهم هو إيصال رسالة للرأي العام مفادها ان الرئيس السابق لا يزال لديه مؤيديه ومحبييه .

واضاف أن اختيارهم هذا التوقيت بالتحديد من أجل إعطاء فرصة لبقية المؤيدين لإشهار التوكيلات لأحمد شفيق، المرشح المحتمل وعمر سليمان، الذى يرفض الترشيح الى الان .

[أسد]

هذا سيناريو مستحيل

وأعتقد إرهاق أنفسنا في بحثه قد يهدر وقتنا

المصريون قد يكون ردهم عاصفاً إذا ما ظهر قدر للفلول ...

لا أعتقد أن للنظام السابق وفلوله قدرة تذكر على مواجهة المصريين

قد تكون بجاحات (جمع بجاحة) ... ليس إلا

[مروان]

حلم مبارك الان واقصى امانيه ان يحكم من وراء ستار

بمعنى ان تاتي الانتخابات بشفيق او حتى عمرو موسى او اى صديق موال له

ليحكم له بالبراءة ومن ثم يحكم من خلاله

اما ان يعود بشحمه ولحمه اعتقد ان ده هيكون مدعاة لثورة تاكل الاخضر واليابس يتم فيها اعدامه في التحرير على اثر محاكمة شعبية

وهو اجبن من كده

المهم الان الا نعطي اصواتنا لاي مرشح له صلة بمبارك ونظامه

[se_ Elsyed]

ما

ذا لو رشح حسنى ميارك نفسه لانتخابات الرئاسة القادمة

ده مستحيل

مبارك مات وشبع موت

ده شخص عنده 84 سنة دلوقت يعني اللي زيه ماتوا من زمان

لكن السؤال الهزلي الحقيقي اللي تحدثت فيه مع أحد أصدقائي من يومين وقولت له عشان ما أبقاش متشاءم مش هافكر فيه او هاكتبه في موضوع

ماذا لو إنطبخت الطبخة وأستوت وإتقدمت على طبق ميري لإحدى الفلين : شفيق او عمرو موسى ؟

تفتكروا هانعمل إيه إحنا كشعب ثار وضحى وعمل ثورة عظيمة .. وبعدين سوري ... إتلزق على قفاه ؟

أنا شخصياً بامانة مش عارف هايبقى رد فعلي إيه

هل ألبس بيجاما مخططة من المقطعين اللي عندي وأنزل ميدان التحرير انظم المرور وأصرخ اقول :إوعى الجاززززززززز؟

أم انضم لخلية سرية محظورة لمحاربة الفلول ؟

أم أتحجب وأقعد في البيت زي الولايا وأبطل ثورة وكلام فاضي من ده ؟

أم انضم لحزب الحرية والعدالة وأهو ممكن بالكرنية أخد لي صابونة او قزازة زيت من حملة " الحرية والعدالة .. نحمل الزيت لمصر " ؟

أم أنضم لحزب النور بس اعمل عملية تجميل الأول وانفخ شفايفي ؟

[عادل أبو عمر]

ماذا لو رشح حسنى مبارك نفسه لانتخابات الرئاسة القادمة ؟؟!!!

كدة هتبقى حرب انتخابات فعلا

لأن مبارك كدة هيكون فعلا تهديد كبير لمسار الانتخابات

محدش يستهون فرص مبارك كبيرة فعلا في الفوز أمام منافسه الرئيسي .... " اللص التائب "

يارب محدش يسألني " تائب " عن إيه

" اللص التائب " في لقائه المتميز مع معتز الدمرداش منذ أيام أعلنها صراحة أنه ضد مبارك الذي صدر الغاز للعدو الصهيوني

اللص التائب ... أعطى عصارة خبرته على الهوا للشعب ... في نصيحة ستظل تذكرها له الأجيال حين قال ...

لما تخرجوا من البيت سيبوا " لنضة " الصالة مولعة

ومبارك برده خرج من البيت و ساب لنا تلات " لنض " في الصالة " موسى و شفيق و سليمان"

بس طبعا " لنض " محروقة

تم تعديل 20 مارس 2012 بواسطة عادل أبو عمر

[se_ Elsyed]

لما تخرجوا من البيت سيبوا " لنضة " الصالة مولعة

والله لو سيبت كل انوار الشارع منوره .. مش لمبه واحده

إحنا في القرن الواحد والعشرين وأحدث الأساليب هي إن الحرامية بيعملوا فيها مندوبين مبيعات وبيرنوا جرس الشقة أو يخبطوا كتير .. وبالتالي لو ماحدش فتح فبيعرفوا إن مافيش حد في الشقة .. وبيفوروا الكالون ويدخلوا يعيشوا .

مع تحياتي ...

سين سين .. هجام قديم ... وتائب برضوا

[عادل أبو عمر]

لما تخرجوا من البيت سيبوا " لنضة " الصالة مولعة

والله لو سيبت كل انوار الشارع منوره .. مش لمبه واحده

إحنا في القرن الواحد والعشرين وأحدث الأساليب هي إن الحرامية بيعملوا فيها مندوبين مبيعات وبيرنوا جرس الشقة أو يخبطوا كتير .. وبالتالي لو ماحدش فتح فبيعرفوا إن مافيش حد في الشقة .. وبيفوروا الكالون ويدخلوا يعيشوا .

مع تحياتي ...

سين سين .. هجام قديم ... وتائب برضوا

مناديب مين يا سين سين

فيه حرامية تائبين برضو ا ندهوا للجيران يساعدوهم في نقل عفش شقة الساعة واحدة الضهر و الجيران ساعدوهم .... كان عريس جاب العفش كله فرشه في الشقة في مدينته اللي فيها شغله وعمل الفرح في بلدهم .... الحرامية الديجيتال مراقبين كل حاجة .. جم قالوا للجيران مفيش نصيب ... هنرجع العفش ياريت تنزلوا معانا .. عشان ننجز بسرعة

دي من ضمن أغرب القضايا الحقيقية اللي سمعتها ...

بس فقط هذه الأيام تم حل اللغز و سبب السرقة ...

الراجل نسي يولع اللنضة .. يا سين سين ...

يعني اللص التائب كان عنده حق .. اوعوا تقولوا له لأ

[raouf]

والله يا جماعة اللى قلتوه ده على عينى وراسى

وده راينا كلنا

راى كل الشباب

راى معظم مستخدمى الانترنت

راى كل المتغربين

لكن للاسف مش راى

اى واحد ساب شغله بعد الثورة

اى واحد اتسرقت سيارته ولا شقته

راى ناس كتير من الغلابة اللى مضحوك عليهم

وطبعا مش راى الفلول

للاسف المجلس العسكرى بينجح فى مخططه هو والفلول بامتياز والسبب اختلافنا مع بعضنا فالفلول شغالين فى صب البنزين اللى ينور

شوية ضد الاسلاميين

شوية ضد الليبراليين

شوية ضد العلمانيين

وطبعا كله فاضى يقطع فى كله وناسيين اللى بيحصل

المهم نهاية المسلسل للى حابب يعرفها

- الطعن فى انتخابات مجلس الشعب

بالتالى الطعن فى دستورية لجنة المائة لان اللى وضعها المجلسين

يليها تاجيل او الغاء انتخابات الرئاسة

طبعا ده سيناريو معد فى حالة جه رئيس غصب عنهم باكتساح وده مش واضح لحد الان

او

تحصل فى الامور امور ويزيد مجلس الشعب فى تحدى المجلس قبل انتخابات الرئاسة وطبعا يكون مسنود من الشارع

طيب دورنا وواجبنا الان نبذ اى خلافات بيننا كلنا والالتفاف حول مجلس الشعب وحول مرشح او اثنين فقط بصرف النظر عن اتفاقنا او اختلافنا معهم

لان اى منهم لن يكون اسوء من شفيق ولا عمر سليمان ولا عمرو موسى