أكونش مش شايف ؟؟؟!!!

[أشرف محمد شلقامي]

(( اكونش مش شايف؟؟؟!!! ))

ــــــــــــــــــــــــــ

زي ما هُمّا علي كراسيهم

وف مناصبهم وبأساميهم

زي الأوّل يمكن أكتر

كأن الثورة دي قامت ليهم !!!

***

بنفس العزم ونفس الهمّة

هُمّا بعينهم زي ما هُمّا

نفس الشلّة ونفس اللمّة

الحراميه ويّا قاضيهم !!!

***

كأن ماجاش ع المصريين

يناير ... يوم خمسة وعشرين

ولا فيه شهدا وخلع عنين !؟

ولا فيه يُتمي الحزن مليهم !؟

***

كأن ما متش الألف شهيد !

كأن مفيش ف بلدنا جديد !

مهما نقول ف كلام ونعيد

مش سامعين ولا شايفه عنيهم

***

يعني الثورة وحكم الشعب ؟

كان حدوته وكدب ف كدب

يعني يناير أكبر ذنب ؟!

يعني المفروض نسترضيهم !!!

***

ثورة إيه ؟..... هوّ بيستعبط ؟!

شعب يهب شويه ويسكت

شعب ياخد له يومين يتنطط

أهي حدوته وبتسليهم

***

شعب باينّه دا صدق نفسه !؟

صدق إنه طلع من حبسه

قال وهايحكم نفسه بنفسه

قال والظلمة راح يقاضيهم !!!

***

هوّ الحلم دا كان بفلوس ؟!

بكره الحلم هايبقي كابوس

بكره هايجي جمال هايدوس

بكره العادلي هايوّريهم

***

هُمّا حداهم خبرا بتعرف

هٌمّا حداهم بنك بيصرف!!!

ولمّا الميّه حداكو هاتنشف !!!

هاترجعوا تاني تبوسوا إيديهم

***

اصحي ياشعب وصح النوم

فوق من وهمك لو موهوم !

فض المولد خلص اليوم

القصر بحرسه مستنيهم !!!

***

ياشعب ياخايب خف وفوق

تحاكم مين وترد حقوق

هُمّا الـــ (....... ) تحت وفوق !!!

يالله ياشاطر قوم حمّيهم !!!!!!!

***

مش فزورة وعقدة حرير

الثورة دي حلم ملوش تفسير

غير الهدم....... مع التغيير!!!

هدم حاضرهم ويّا ماضيهم

***

والإّ هايرجع لعنب ديبه

تاني ( جمال ) هايلاقي (حبيبه)

تاني الــ ( عز) يهز ف جيبه

تاني ( الست ) تستّف فيهم !!!!

!!!!!!!!!!!!!!!!!!!!!!!!!

***

زي ما هُمّا علي كراسيهم

زي ما هُمّا علي كراسيهم

ــــــــــــــــــــــــــــــــــــــــ

ـــــــــــــــــــــــــــــــــــــــــ

ـــــــــــــــــــــــــــــ

[ابا فاطمة]

السلام عليكم ورحمة الله وبركاته

الاستاذ الفاضل اشرف

قصيدة جامدة جدا بتفكرنا بالحاجات المحترمة بس من شعر احمد فواد نجم اللى عملها زمان مع الشيخ امام

تحياتى

[عبير يونس]

بكل أسف... كله حقيقة

صرخة و غُمة وقهرة و ضيقة

نار في الصدر وقايدة حريقة

واللي فينا يا سيدنا كافينا

روعة أستاذ أشرف

[محمد عبدالعزيز]

مش فزورة وعقدة حرير

الثورة دي حلم ملوش تفسير

غير الهدم....... مع التغيير!!!

هدم حاضرهم ويّا ماضيهم

الكلمتين دول من الآخر

الثورة غير الإصلاح التدريجى و ابدأ بنفسك أولاً

جميلة جداً يا أستاذ أشرف