مش لاقى عنوان مناسب..بس نقول فضفضة

[hakeem]

مش عارف هو كويس انى احكى ولا لا..اصله موقف بايخ وفى منتهى الدنائه..

امبارح روحت السكن وقاعد معايا واحد بلدياتى وزميل دراسه كانت ظروفه ملطشه ولسه لاقى شغل قريب..وفى واحد تانى كان ساكن معايا قبلها بس الشركة نقلتله مشروع برة الرياض الخرج تحديدا وراح هناك وسكنه هناك ونقل وكل حاجه تمام..يقوم يجى امبارح معرفش والله صدفه ولا حقنه ولا ايه بالظبط..المهم كان سايب مرتبه هنا عاديه يعنى مهش ريش نعام ولا حاجه..لقيته بيرزع ع الباب ولا مباحث مصر.فتحت بيقولى انت قافل الباب ليه معاك........(بدون تعليق).قلتله اتفضل اامر قال مرتبتى ع الارض كده زى اللى حد نايم عليها.اصل اللى معايا ده مليان شويه ومينفعش ينام على سرير احسن تدششه فحطنهاله ع الارض وبينام عليها..قلتله ده محمد اللى بينام عليها..قالى وينام على مرتبتى ليه وتدخله الغرفه ليه من اصله هو انت قاعد فى بيتكم!!..مع انه من بلدنا هو كمان وراجل كبير فى السن يمكن 40 سنه يعنى مفروض اننا هنا زى اخواته الصغيرين وبلاش اولاده..استفزنى اوى كلامه.وقلتله وانت بردوا مش فى فندق حاجز غرفه فى الرياض والتانيه فى الخرج ولو ع المرتبه خدها فى ايدك وشنطتك ومع الف سلامة..وبقوله يعنى ابن بلدك ومصرى ومعندوش سكن يعمل ايه قالى مفيش اوسع من الشوارع ولا يروح جامع..شخص فى منتدى الوقاحه وقله الذوق والله..فى تفاصيل كتير ملهاش لازمة..ومعرفش ليه اصلا كتبت الكلام ده كله بس حاسس انى عايز اتكلم ومش عارف احكى لمين..انا شفت يمنيين معانا فى الشغل معاهم نفس الموقف كده وساكنين فوق الشركة وجايله اكتر من واحد استقبلوهم وضيفوهم وشافلهم شغل كمان حتى البنجالة شفتهم بيعملوا كده..انا كنت هصبر نفسى واقول ده بنى ادم مريض وخلاص وانسى بس لقيت اصلا اللى معايا فى السكن سلبيين بطريقه عقيمة وواقفين يفرجوا وخلاص مع انهم زمايلنا بردوا ومن بلدنا بردوا..!!اناقلت لنفسى احنا ليه كمصريين بنعمل فى بعض كده..وارجع تانى اقول يمكن انا ما شفتش هنا لسه غير الوحش انما فى ناس كويسه..!!والله منا عارف ايه ليه بنعمل فى بعض كده..

انا عارف انه اكيد هيبلغ حد من الشركة بس والله العظيم ولا يهمنى حتى لو روحت اهو ابقى عملت اللى مقتنع بيه انه صح..وابقى استفدت من الفترة البسيطه اللى قعدتها هنا دى اهو عرفت ناس وشفتهم ع الحقيقه فى الغربة لان ده المكان الوحيد اللى افتكر يبان فيه معدن البنى ادم بجد..

يمكن تشوفوا الموضوع من اوله على حاجه تافهه او ان كلامى كله كده ولا ليه لازمه بس انا حكيت وارتحت احسن هفرقع من اللى جوايا ومن المواقف البايخه دى..واسف على ازعاجكم..

[شلولخ]

اهو الي انتا بتحكي عنه ده بالضبط هو اكبر سبب لكل المشاكل الي في بلدنا دلوقتي

المصريين بوجه عام في مصر او برا مصر مش طايقين بعض، و سمعتهم في الزنب في بعض معروفة للكل للأسف.

سيبك من الموقف ده. انا من فترة كنت في مصر اجازة و ركبت مني باص في مشوار. و اتفرج على الحرب و الدم الي حصل عشان خلاف بين الي بيلم الاجرة و شاب شكله ابن ناس و شايل موبايل فوق ال 3000 جنيه بيقول انه لسه ليه ربع جنيه !! و الظريف ان احنا كنا في نهار رمضان و لا حياة لمن تنادي.

بغض النظر عن فقير و لا غني، المصريين فيهم ناس دلوقتي ممكن تقتل عشان خلاف على شيئ بلا قيمة اطلاقا، كم رهيب من العدوانية بين الناس و بعضها. bsh:)

عايز اوصل ان احنا عندنا مشكة اخلاقية مرعبة مش عارف سببها ايه بالضبط بس الي يتعامل مع الاجناس التانية فترة كبيرة يلاحظ الفرق الخطير ده بين المصريين و غيرهم.

كنت شوفت فيلم اسمه عسل اسود بيتكلم على حاجات زي كده و ان كان لمس قشور الموضوع بس.

للأسف الموضوع ده بيدفن حاجات كتير بتميز المصريين عن خلق الله كلهم. و عشان كده ما تستغربش لما تلاقي خبير متألق في مجال معين شغال في الخليج، لكن رقم كده حقه ضايع لان الاجناس التانية كلها عاملة لوبي دعم مع بعضها، في حين ان المصريين عاملين لوبي زنب في بعضهم !!!!!!

معلش الصورة سوداوية شوية بس و الله عن خبرات عشتها و ادينا بنفضفض قبل النوم !! :P

[مروان]

انت عملت الصح بغض النظر عن اللي هيحصل

وان شاء الله خير

وابقى طمنا عليك

ومش عايزينك تفقد الثقة بالناس كلها

فيه مصريين زي العسل ورجالة

وفيه ارث كده بينتقل عبر الاجيال ان المصريين مبيحبوش بعض بالغربة

وده اللي بيخلي الناس حساسة لاي موقف

انا شفت جنسيات تانية بتتطاحن مع بعض وبيتشاكلوا في الشارع

بس هو ارث زي ما قلت لك يتم التواصي به عبر الاجيال

لكن ان شاء الله بالناس اللي زيك هتتغير الصورة دي

تحياتي على موقفك

وان شاء الله تيجي خير

[hakeem]

معلشى مش هعمل موضوع جديد ويارب حد يشوف الكلام ده ويلحقنا بالافادة..

الراجل اللى كان قاعد معايا ده بئا امبارح مجاش واتاخر عن معاده والساعه 2 باليل اتصل بيا من رقم غريب وقالى انه مقبوض عليه فى شرطة السويدى..لان صاحب الشغل اللى كان شغال عنده قبل كده وسابة والله اعلم ليه ليه شريك مرضهوش اللى حصل وقام مبلغ عن البيه انه اختلس فلوس وهرب وتقريبا شغال فى الداخلية او حاجه لانهم مسكوة ع الطريق وهو سايق وزى اللى رايحينله مخصوص..وكلمنى تانى من شويه وقالى انه رايح النيابة النهارده..هو فى حل اننا نخرجة على اما يتصرف فى البلوة دى..لان كفيله كمان مش راضى يجيله من الخرج..

استفساراتى بئا اولا فين شرطة السويدى بالظبط..وايه التصرف السليم فى الموقف ده..فى حد هنا قال هاتوله مش عارفه كفاله ايه كده من السفارة..حد خبيبر يلحقنا بالافادة..

[hakeem]

upppppppppppp

قبل ما نروح الزيارة..