كل ما يخص اللجنة التأسيسية للدستور

[se_ Elsyed]

على فكرة يا ولاد

النهاردة أبيه طنطاوي هايجتمع مع رؤوساء الاحزاب ومع الاعضاء المنسحبين من اللجنة التأسيسية في قعدة عسكر .. قصدي عرب ويصالحهم على بعض

وبالمرة إحتمال كبير يتطرق الإجتماع إلى مصير حكومة الجنزوري

مش عارف مش مصدق بوء طنطاوي ليه

يعني لو كانت المليونية اللي هايدعو لها الإخوان يوم الجمعة القادمة مشترك فيها كل عناص الشعب .. كنت إطمنت وحطيت في بطني بطيخة صيفي وعرفت إن العسكر كالمعتاد هايستجيبوا ويرضخوا للتهديد ده زي ما حصل كتير زمان طالما المليونية لا تمس مصير العسكر ولا تطالب برحيلهم وما إلى ذلك

لكن الموضوع دلوقت متشابك ومتشعب وداخل فيه لجنة الدستور على إقالة الوزارة على تهديد الاخوان بالدفع بمرشح رئاسة إخواني على أوضاع لم تشهدها مصر الأن في تاريخها من ازمات مُركبة ومعقدة عاوزه معجوة لحلها والسبب فيها جهل العسكر اللي أخرهم يتعلموا ضرب النار على البندقية رمسيس ضغط الهوا .. إما إدارة البلاد سياسياً فهم أبعد ما يكونوا عن ذلك لتركيبة دماغهم المبنية على إطاعة الامر فقط .

[se_ Elsyed]

وأدي واحد من معسكر الكفر إنحسب هو كمان

انسحاب المستشار على عوض ممثل "الدستورية العليا" من تأسيسية الدستور

أكد المتحدث الرسمى باسم المحكمة الدستورية العليا أن المحكمة تعتذر عن عدم مشاركة المستشار على عوض نائب رئيس المحكمة فى اللجنة المعنية بتشكيل الدستور، وذلك خلال الجمعية العمومية التى عقدت أمس الثلاثاء بعد مداولات بين الأعضاء.

لافتا إلى أن القرار جاء نتيجة لما تشهده الساحة السياسية فى البلاد خلال الآونة الأخيرة من اشتباك بين القوى السياسية والحزبية حول سلامة تشكيل اللجنة التأسيسية، لإعداد الدستور وصحة إجراءات انتخاب أعضائها، مما أثار شكا والتباسا، الأمر الذى دعا المحكمة أن تكون بمنأى عن الخلاف.

ودعا المتحدث الرسمى إلى ضرورة أن يترفق المجتمع ووسائل الإعلام بالقضاء، حماية لقدسيته، وحرصا على بقائه حصنا وملاذا لكل المصريين مؤكدا أن القضاء يجب أن يكون فى منأى عن التشويه والتجريح من أجل الشعب الذى يكفيه ما يعانيه

http://www3.youm7.com/News.asp?NewsID=638616

[se_ Elsyed]

من الحاجات اللي هاتجنني برضوا

لما يكون رئيس مجلس الشعب ونائبية .. ولفيف من صقور البرلمان

ورئيس مجلس الشورى ونائبية ... ولفيف من صقور الشورى

كل دول أعضاء في اللجنة اللي عندها شغل طحن في الشهور الجاية

اومال مين هايُدير الجلسات اللي تخص البلد واللي ناس كتير من البسطاء لا يهمها دستور ولا طرطور .. ومن وجهة نظرهم رغيف العيش والمواصلات والمعيشة اليومية هي الدنيا وما فيها ؟

هههههههههههههههههههههههههههههههههههههههههه

النهاردة كان وم مسخرة بصراحة

مش قولت لكم يوم تاريخي

تاريخي تاريخي من بتاع حتشبسوت

الخبير الدستوري والمصفي القضائي حلمي خزام .. لأ قصدي سعد الله الكتاتني فاز بالتزكية برئاسة اللجنة اللي هاتشرف على كتابة الدستور 71 من 72 صوت ... أصل عقبال املتكم كل الناس المحترمة إنسحبت وماجتش

هذه واحده

التانية .. رجعت من الشغل هلكان وقولت أشوف الدنيا فيها إيه .. بابص مالقتش لا الكتاتني ولا حد من اللي أعرفهم في المجلس ... بأقلب القناة التانية .. والله زي ما بأقول لكم .. لقيت إجتماع تاني برئاسة الكتاتني والناس بتوع الشورى والشعب في إجتماع لجنة الدستور

حد شاف كده في الدنيا ؟

السؤال للمرة المليون

ليه كنا بنعترض على الحزب الوطني اللي اعضاءه مكوشين على كل المناصب والواحد فيهم مقطع نفسه هنا وهنا .. عشان خاطر بلده طبعاً هههههههههههه

شوفتوا سؤالي اللي فوق خالص ... لما يكون في جلسات لمجلس الشعب .. في نفس جلسات كتابة الدستور اللي هاتكون مكثفة طبعاً .. إيه هايلغوا مجلس الشعب .. ولا الجودة هاتبقى بالموجود ولا مين هايدير الجلسات في غياب الرئيس ونائبية ؟

[se_ Elsyed]

أصمت أيها العلماني الكافر المتحزلق .. ثكلتك مامتك

عصام سلطان (عضو مجلس الشعب وعضو اللجنة التأسيسية للدستور): إنسحبت من الجلسة الأولى للحنة التأسيسية للدستور إعتراضاً على البدء فى إجراءات إختيار رئيس الجمعية التأسيسية، وكان يجب أن نبدأ أولاً فى حلّ أزمة المُنسحبين، خصوصاً أن أسباب إنسحابهم تقوم على أسباب جديّة، ومن الممكن علاجها، ولو إستمرّ الأمر فى تجاهل المنسحبين الذين يصل عددهم إلى ربع أعضاء الجمعية التأسيسية فإن عدداً آخر سوف ينسحب، وبالتالى سوف تزداد الأزمة تعقيداً، ينبغى أن نهتم بحلّ فورى للأزمة قبل أن نبدأ فى عمل الجمعية التأسيسية.

[ام سلمي]

تم تعديل 29 مارس 2012 بواسطة ام سلمي

[se_ Elsyed]

هل سيأخذ الجميع العزة بالإثم للإعتراف بالخطأ والكارثة اللي إحنا فيها ؟

المصري اليوم: الأزهر يعلن سحب ممثله "نصر فريد واصل" من الجمعية التأسيسية للدستور

إيه نصر فريد واصل وبالمناسبة ده من الناس اللي قال كلمة حق أمام سلطان جائر .. وتخيلوا ده من المفتيين القلائل بل النادرين الذين لم تجدد لهم الدولة بعد سن المعاش ومبارك لبسه الجلابية بدري بدري لأنه لم يكن رجل دين يعمل لدى السلطان ؟

[se_ Elsyed]

#رصد | #عاجل | #الأزهر يعلن سحب ممثله "نصر فريد واصل" من الجمعية التأسيسية للدستور

[ام سلمي]

ماضى : استبدال 10 من الاسلاميين فى لجنة صياغة الدستور بأخرين

[ام سلمي]

جزء من مقال لفهمي هويدي بعنوان متحمسون للثورة متعثرون فى الديمقراطية

المفاجأة في المناحة الإعلامية أن الفرضيات الأساسية التي اعتمدت عليها غير صحيحة. ذلك أن الادعاء بأن الدول "المحترمة" متفقة على أن البرلمان ليس جهة وضع أو صياغة الدستور كلام تكذبه الخبرة السياسية والتاريخية.

آية ذلك أن جامعة "برينستون" الأميركية أعدت دراسة شملت مائتي دستور ظهر في العالم خلال ثلاثين سنة .. بينت أن هناك تسع طرق لكتابة الدساتير. وكانت الوسيلة الأكثر استخداما هي أن تعهد الدول إلى البرلمان المنتخب لكى يقوم بهذه المهمة.

إذ أنه ليس من المنطق أن ينتخب الشعب ممثليه في البرلمان، ثم يتم إقصاء هؤلاء الممثلين عن وضع الدستور بحجة أنهم لا يمثلون الشعب بصورة كافية !!

إنك إذا دققت النظر في المشهد، ستلاحظ أن أحزاب الأقلية هي التي ما برحت تثير الضجيج وتؤلب الرأي العام .. منذ طرحت التعديلات الدستورية للاستفتاء .. حيث لم تكن مستعدة للقبول بنتائج الممارسة الديمقراطية في أي مرحلة

http://shorouknews.com/columns/view.aspx?cdate=26032012&id=a4ce433c-cedf-44c0-a134-7cd60147c059

[ام سلمي]

مفاوضات مع الازهر للرجوع في قرار الانسحاب من التاسيسية

الطيب يرحب بعرض مشاركة الأزهر بالتأسيسية على مجمع البحوث الإسلامية

وافق فضيلة الإمام الأكبر الدكتور أحمد الطيب شيخ الجامع الأزهر على إعادة عرض مشاركة الأزهر الشريف فى الجمعية التأسيسية للدستور على مجمع البحوث الإسلامية لإعادة دراسة قرار الانسحاب من الجمعية التأسيسية.

جاءت موافقة الطيب عقب استقباله الدكتور محمد مرسى رئيس حزب الحرية والعدالة، والدكتور محمد البلتاجى أمين الحزب بالقاهرة وعضو مجلس الشعب لإطلاع شيخ الأزهر على حقيقة وتفاصيل ما دار بشأن تشكيل لجنة صياغة الدستور.

وعقب اللقاء صرح الدكتور البلتاجى بأنه تم التأكيد مع الإمام الأكبر على التزام الحزب بوثيقة الازهر وماجاء فيها من مبادىء أساسية . كما تم استعراض المحاولات الجارية لاستعادة حالة التوافق بين الاطراف المختلفة داخل الهيئة التأسيسية بما فى ذلك محاولة استبدال بعض أعضاء الحزب داخل الهيئة بأعضاء من القائمة الاحتياطية من غيرهم .

وأشار البلتاجى إلى أنه تم استعراض الاتفاق الذي تم التوصل إليه مع القوى السياسية بشأن تشكيل لجان نوعية تكون بمثابة هيئة استشارية تعود إليها الجمعية التأسيسية فى المجالات المتخصصة ومنها ما يتعلق برسالة ومؤسسة الأزهر الشريف.

[Alshiekh]

واحــدة من الخبرات النادرة

لكتابة دستور الثورة

الثورة المخطوفة

إفرحوا يابتوع نعـــم

زقططوا ياللي انتخبتوا السلف والتلف

وصوتي ياللي قدمتي الشهداء

[الغريب]

[se_ Elsyed]

ومازالت المهزلة مستمرة

إنسحاب ممثل نقابة الصحفيين من اللجنة التأسيسية للدستور

وخلي الكتاتني وصبيانة يعاندوا مصر كلها ويقول ماضون في طريقنا ....

تخيلوا .... هما 50 دلوقت من الشعب والشورى .. وما بقاش فاضل إلا 18 واحد فقط من اللي تم إنتخابهم في المسرحية الهزلية اللي حصلت ....

وكأنهم من الغباء إنهم ما اتعلموش إن سكوت الشعب ليس معناه الرضا بالموجود او الحاصل .... لكن هو سكوت الصبور المراقب اللي لما بيغضب .. بيحط التخين تحت رجلية

و إذا أستمروا في هذا الطريق المظلم فامامهم حل من إتنين لا تالت لهما :

1- غضبة شعبية تقتلعهم من جذورهم

2- إنقلاب عسكري يرجعهم السجون تاني .. وأوعوا تفتكروا العسكر عبط أو سذج .. لأنهم سايبين لهم الحبل على الغارب عشان يلفوه حوالين رقبتهم كويس ... ولما يكملوا اللف هايقوم شده شده .. هاتبقى الأولى والاخيرة .. وساعتها الشعب اللي كل يوم ورا يوم بينفصلوا عنه ويقولوا ماضون في طريقنا لوحدنا هايتخلي عنهم لأنهم لعبوا نفس لعبة مبارك في إن هو وبس وإن أنا لوحدي كفاية وكل الكراسي دي كسبتها من كدي وعرق جبيني

على فكرة وبمنتهى الامانة ... كل ما اكلم حد في مصر دلوقت يعبر لي عن مدى سخطة وغضبة على السذاجة السياسية وحالة الشره والشرب حتى الثمالة من كراسي السلطة اللي فيها الاخوان .. وبالمناسبة كلهم اعطوا أصواتهم للاخوان إما عن إقتناع او إن ما كانش في أمامهم بديل ... لكن لما تكتمل حلقة الغضب .. لازم هايبقى فيه بديل ..

[se_ Elsyed]

بصوا كده يستبعدوا واحد زي ده فاز باللقب ده من كام يوم ويضموا شوية كفتجية لا عارفين لهم اصل ولا فصل ولا أنجازات

إعلان فوز الطبيب المصري ” مجدى يعقوب ” بلقب أسطورة الطب في العالم

اختارت جمعية القلب الأمريكية بشيكاغو الدكتور»مجدي يعقوب» جراح القلب المصري العالمي ليفوز بلقب اسطورة الطب في العالم ضمن أكبر خمس شخصيات طبية اثرت في تاريخ الطب

[se_ Elsyed]

يارب نكون إتعلمنا من أخطاءنا ونبطل العنجهية والغرور الغير مبني على أي أساس

فى لقاء الحرية والعدالة بوفد السياحيين.. مرسى: تأسيسية الدستور خلقت شرخاً بين السياحيين والبرلمان.. والمستثمرون فوق رؤوسنا طالما يدفعون الضرائب ويفتحون مجال العمل.. والسياحة أساس مشروع النهضة

والله يا جماعة كنت اتحدث الأسبوع الماضي مع أصدقاء قريبين مني هنا ينتمون لجماعة الأخوان المسلمين ... وإحنا أصدقاء من زمان لكن شكلهم كانوا بيكتموا إيمانهم لان ما كانتش دي أفكارهم ولا أيديلوجيتهم بالمرة .. وفجأة طفحت بعد ما مجرد إن الاخوان بقوا اغلبية بالبرلمان وهانقل هنا حديثي معهم وهما 3 .. واحد مدير مشتريات والتاني محاسب .. ودول يعرفوا بعض .. والثالث طبيب بعيد عنهم

- والله يا سين سين لو توافرت النية الصادقة والثقة .. فاعتقد إن 15 واحد من الاخوان كفيلين بكتابة الدستور .. بس الناس تثق فيهم ؟

فقولت لهم : إزاي يا جماعة ده مش قانون ده دستور هايقعد 100 سنة لكل الأجيال ولكل مصر

- وليكن ... برضوا الناس لازم تثق في بعض

- لعلمك - الكلام ده للدكتور - عندي معلومات مؤكدة مليون المية من خلال إتصالي بالاخوة في مصر غن الاخوان فعلاً مجهزين الدستور وعلى العرض على الشعب فقط يعني العملية بغذن الله مش هاتاخد وقت

لحد هنا وكنت هاقوم أضربة فعلاً لولا إنه أكبر مني سناً

دي نماذج فقط ...

والحمد لله كلامنا وتخوفنا هو اللي طلع صح في الأخر

[مروان]

مع احترامي لشخصك الكريم

واصدقاءك الكرام

بس -وبحكم معرفتي انا ببعض الافراد من الاخوان- اقول ان ده غير صحيح

والاخوان احرص الناس على ان يكتب الدستور كل الطوائف والمدارس والاتجاهات

وقصة الدستور الجاهز دي مبالغة هم فقط عندهم خطوط عريضة بحكم توجههم الاسلامي وعلمهم بالاعيب العلمانيين ومحاةلاتهم المستمرة لعلمنة مصر وتجريدها من ثوبها الاسلامي الجميل

لكن دستور كامل مكتوب ومصاغ فاعتقد ان ده مستحيل

اطيب تمنياتي لك ولصحبك

[se_ Elsyed]

والاخوان احرص الناس على ان يكتب الدستور كل الطوائف والمدارس والاتجاهات

المسألة مش شعارات بس يا عم مروان

لكن الحكم عنوان الحقيقة

والحقيقة أثبتت غير ذلك ولم يكن هناك أي حرص من الاخوان على اللي إنت بتقوله

[Abu Reem]

بصوا كده يستبعدوا واحد زي ده فاز باللقب ده من كام يوم ويضموا شوية كفتجية لا عارفين لهم اصل ولا فصل ولا أنجازات

إعلان فوز الطبيب المصري ” مجدى يعقوب ” بلقب أسطورة الطب في العالم

اختارت جمعية القلب الأمريكية بشيكاغو الدكتور»مجدي يعقوب» جراح القلب المصري العالمي ليفوز بلقب اسطورة الطب في العالم ضمن أكبر خمس شخصيات طبية اثرت في تاريخ الطب

انا مش فاهم ايه علاقة واحد زي مجدي يعقوب بكتابة الدستور..هو احنا حنكتب دستور ولا...روشتة طبية

الراجل جراح عالمي ماله هو ومال الدستور وعباراته وصياغته واهمية كل حرف من حروف مواده

لا عنده خبرة قانونية ولا عنده خبرة سياسية....هيروح يعمل ايه في كتابة الدستور

هو لو اشترك في اللجنة فلن يستطيع ان يكتب الا كلمتين ثلاثة حول حقوق المواطنة للجميع والحريات...ومثل هذا الكلام الذي اي واحد فينا ممكن يكتبه

غير كده هناك عشرات المواد التي ليس له علاقة بها..

وبعدين مش فاهم حكاية اشتراك كل طوائف الشعب في كتابة الدستور..دي..وكأن في العديد من دول العالم بيحصل كده

ورغم اني جبت تقرير قبل كده ان مسألة كتابة الدستور دي في العديد من الدول بتتم بعدة طرق وليس شرط ابدا ان يكون كل الطوائف ممثلة فعلا..لان من سيقومون بصياغة الدستور مفروض انهم بيعبروا عن رأي كل هؤلاء

-اللجنةعددها مائة ولو كل واحد طلع وقال ان عاوز مجدي يعقوب يشترك في اللجنة او عاوز فاروق الباز يشترك..او عم محمد المأذون ممثلا عن المأذونين يشترك هو كمان..وعم برعي الفران ممثلا عن الفرانين..وعم حمكشة بياع الطرشي ، ممثلا لبائعي الطرشي..ويطلع لنا شعبان عبد الرحيم ممثلا عن الفنانين الشعبيين...لو مشيت المسألة كده مش هنخلص وسنحتاج الى لجنة مكونة من مليون مصري

- يبدو ان اعضاء مجلس الشعب خاصة حزب الحرية والعدالة طلعوا دبلوماسيين اكثر من اللازم..وبتنازلوا عن حقوقهم وبالتالي طمعوا فيهم اصحاب الصوت العالي...

- على العموم من المفروض ان الـ 100 الذين سيشكلوا اللجنة من المفروض انهم ينوبون عن كل فئات الشعب وطوائفه في كتابة الدستور وبالتالي يجب ان يكون الدستور معبر عن كل هؤلاء فمثلا قد يكون احد اعضاء اللجنة طبيبا فمن المفروض انه سيكون معبرا عن رأي الاطباء وهكذا...والا لو فتحنا المجال لكل فئة ان يمثلها شخص في اللجنة فان معنى ذلك انها لن تصبح لجنة بل ستصبح سبيل...وليس لجنة..وسنحتاج الى مليون مفتي يقومون بصياغة الدستور

تم تعديل 14 أبريل 2012 بواسطة Abu Reem

[ام سلمي]

الاتفاقات اللي اتفق عليها الاحزاب و المجلس العسكر امبارح بخصوص تأسيسية الدستور

إجتماع "العسكري" مع "الأحزاب" ينتهى بالتوافق على معايير تشكيل "التأسيسية"

صرح السعيد كامل رئيس حزب الجبهة الديمقراطية؛ أنه تم التوافق خلال الإجتماع الذي جمع بين رؤساء الأحزاب وقادة المجلس الأعلى للقوات المسلحة؛ والذي عقد اليوم بمقر وزارة الدفاع؛ على معايير تشكيل الجمعية التأسيسية للدستور؛ وآلية التصويت على مواد الدستور .

وقال رئيس حزب الجبهة الديمقراطية أن الإجتماع شهد إختلافا كبيراً وواضحاً على آلية التصويت في الجمعية التأسيسية حيث أصر ممثلي حزب الحرية والعدالة الذراع السياسي لجماعة الإخوان المسلمين أن يكون التصويت بأغلبية ( 50 + 1 ) وأصرت الاحزاب المشاركة على ان تكون الأغلبية في التصويت بالثلثين ؛ مما أدى إلى توقف الحوار أكثر من مرة.

وأضاف رئيس حزب الجبهة الديمقراطية أن عدد من الحضور طرحوا عدة بدائل منها العودة إلى العمل بدستور 71؛ أو صدور إعلان دستوري تكميلي من المجلس الأعلى للقوات المسلحة بمعايير تشكيل الجمعية . وفي النهاية تنازل الإخوان أمام ضغط الأغلبية وتمت الموافقة على الطرح الذي قدمه الدكتور أيمن نور ؛ رئيس حزب الغد الجديد ؛ والذي يقضي بأن يكون التصويت بالتوافق أولا ً ؛ وإن تعذر هذا الطرح يكون التصويت بأغلبية الثلثين ؛ وإن لم يتم حسم التصوت بالثلثين ؛ يتم تأجيل الإجتماع مدة 48 ساعة ؛ ويتم التصويت بأغلبية 57 %.

وقال كامل أن الإجتماع شهد ايضاً خلافا حول معايير تشكيل الجميعة التأسيسية ؛ حيث أصر الإخوان على أن يمثل حزب الحرية والعدالة وحزب النور بعدد 23 عضواً من إجمالي 37 عضو هم ممثلي جميع الأحزاب الممثلة في البرلمان ؛ ولم يتنازل الإخوان عن موقفهم مما أضطر الحضور إلى تقليل الاعضاء من الشخصيات العامة لإستكمال الاحزاب الممثلة في البرلمان .

وقال كامل أنه تم الإتفاق النهائي فيما يخص تشكيل الجمعية التأسيسية على إختيار 15 عضوا من خبراء القانون الدستوري يمثلون كالأتي: 9أعضاء من فقهاء القانون والدستور؛ عضو من القضاء العادي؛ عضو من القضاء الإداري ؛ عضو من القضاء العسكري، عضو من المحكمة الدستورية؛ عضو من هيئة قضايا الدولة ؛ عضو من هيئة النيابة الإدارية .

كذلك تم الإتفاق على إختيار عدد 9 أعضاء يمثلون المؤسات الدينية على أن يكون منهم 5 من الازهر الشريف ؛ وعدد 2 من الكنيسة الأرثوذكسية ؛ وعد 1 من الكنيسة الأنجيلية ؛ وعدد1 من الكنيسة الكاثولكية.

وتم الإتفاق على إختيار عدد 7 أعضاء يمثلون إتحاد العمال والفلاحين والإتحادات النوعية وتمثليهم كالآتي: عدد 2 عضو من نقابة الفلاحين ؛ وعدد 2 عضو من اتحاد عمال مصر ؛ عضو من اتحاد الغرف الصناعية ؛ وعضو من اتحاد الغرف التجارية؛ وعضو من اتحاد متحدي الإعاقة ؛ و عدد 7أعضاء من النقابات المهنية " المحامين - الصحفيين- التجاريين -المهندسين - الأطباء – الصيادلة- اتحاد النقابات الطبية- المعلمين"؛ هذا بالإضافة إلى عضو واحد من الجيش والشرطة والعدل.

هذا بالإضافة إلى ممثلي الأحزاب السياسية في البرلمان؛ وعدد من الشخصيات العامة والأكاديمية و شخصيات عامة من المرأة والطلبة.

http://www.moheet.com/2012/04/28/%D9%83%D8%A7%D9%85%D9%84-%D8%A5%D8%AC%D8%AA%D9%85%D8%A7%D8%B9-%D8%A7%D9%84%D8%B9%D8%B3%D9%83%D8%B1%D9%8A-%D9%85%D8%B9-%D8%A7%D9%84%D8%A7%D8%AD%D8%B2%D8%A7%D8%A8-%D8%A5%D9%86%D8%AA%D9%87%D9%89-%D8%A8/

تم تعديل 29 أبريل 2012 بواسطة ام سلمي

[se_ Elsyed]

البهوات بتوع مجلس الشعب فضلوا يتمرقعوا في تشكيل اللجنة التأسيسية

والبيه الكتاتني دماغه مخرومه وأنشغل في محاربة طواحين الهوا وسحب الثقة من الحكومة على مدار أكثر من شهرين و20 جلسة برلمان وفي الأخر ما قدرش حتى يخلع ضرسه .. وشوية ويقوم عامل الأرنب الغضبان ومعلق الجلسات أسبوع .. وبرضوا ما اتخلعتش ... شويه ويعلق جلسات مجلس الشعب لمدة اٍبوع واكتر النهاردة

كل ده ولا كأن في حاجه إسمها دستور ولا لجنة دستورية ..

لحد ما طنطاوي بخ فيهم النهاردة من شويه كده وأعطاهم برضة يومين فقط لتشكيل اللجنة التأسيسية .. وإلا

أشربوا يا معلمين يا فاهمين سياسة