#رصد | عاجل | المشير حسين طنطاوى يلقى بيانا هاما بعد قليل

[se_ Elsyed]

ولا فارقه معايا

أصله عامل زي عمه مبارك .. كان كل مره يقول نفس البؤين الحمضانين اللي فضل 30 سنة يكررهم لحد ما جبنا جاز

طب مش هو لسه ما قراش فاتحه .. قصدي خطب ؟

طب خدوا عندكم البؤين أهم من دلوقت وقولوا سين سين دخل كواليس العسكري وسرق الكلمة العصماء وجابها لنا من الكنترول

- يا شعب مصر العظيم .. نحن الأن نسير في تريق الديمكراتية ... وبعد ما فورنا مجليس الشيعب ... ومجليس لا مؤخذه الشورى .. إمبارح كل العالم إتفرج علينا على القناة الثانية بعد برنامج إخطرنا لك وإحنا بنختار لجنة لا مؤخذه الداسطور ...

- وكما وعدكم جيشكم الحبيب وقواتكم الجوية ... إحنا هانسلم المصلحة على نهاية شهر 6 بعد ما نخلص شوية المرمات اللي فاضلين .. وهاتستلموها عالمفتاح .. ومعاها ضمان كمان .

- وأعدكم وعد صدق ... واحلف بشرف امي ( خالتكم الحاجه أم طنطاوي ) إني هاعمل احلى إنتخابات رئاسية فيكي يا جمهورية مصر العالمية ... ولن نتدخل ولن نتنحح وكدهوت

- أما العيال اللي نازلين عليه تريقه على الفيس بوء وبيقولوا عليه دونكي .. فبأقول لهم ... الشتيمة تلف تلف تلف تلف وتلزق في صاحبها ... وعلى فكرة انا عارفهم واحد واحد .. حتى بالامارة منهم واد إسمه تيمور المراغي ساكن في جده في حي بني مالك خلف الكرنتينة ... وواحد تاني تخين وطويل وعامل لي فيها مترب شعبي وساكن في بريتيش كولومبيا أوف كندا ورا محطة البنزيم وإسمه محمد زهيري وعنده 3 عيال ولدين وبنت زي العسل ..

والله الموفق

[se_ Elsyed]

في عيال مصريين تتسم بالخبث والدهاء بيقولوا

إن المشير هايهني الشعب المصري بعيد الام المجيد اللي كان من أسبوع ... تفتكروا ؟

[se_ Elsyed]

مين فاكر زماااااااااااااااااااااااااااااان قوي سنة 2011 لما كان المخلوع يحنس اللي جابونا وينزلوا خبر على التليفزيون المصري ويقولوا : المخلوع سيوجه كلمة للأمة بعد قليل

ونفضل ملطوعين بالخمس والست ساعات أمام شاشة التلفاز عشان في الاخر يقول لنا : لم أكن انتوي الترشح .. وأنا عاوز اندفن في تُرب الغفير .. وأنا باحبكو يا ولاد الـــ تيييييييييييت

تفتكروا مشمش هايقول إنه لم يكن ينتوي ان يكون مشير وإنه حاسس إن أجلنا .. قصدي اجله قرب وإنه عاوز يندفن في مصر اللي بقت مقابر كلها من أيام الفراعنة والكل عاوز يموت عندنا ؟

[se_ Elsyed]

نفس العيال الخبيثة - ربنا يخلصنا منهم - هههههههههههههههههههه موش اني موش أني ( وش محمود المليجي في فيلم رصيف نمره 5 في شارع زحام )

بيقولوا إن مشمش هايزف للشعب المصري نبأ القبض على الواحد سيد مازوت اللي ظبطوه بصفيحة بنزين 80 في طريق القطامية .. وأن الولا زفت الطين ده هو السبب في ازمة السورار والبنزيم اللي حاصلة في مصر ؟

--------

وناس تانية من العيال الخبيثة بتقول

إنه هايزف - ده بمناسبة الخطبة والزفاف وكدهون ويارب كتر أفراحنا وعلى أد نيتنا أدينا - للشعب المصري إنهم قبضوا على الولاد سيد منفيستو كمساري خط إمبابة - أول فيصل إن ده المُحرض الرئيسي لأزمة الكمسارية .. وإنهم قرروا ينفخوه عشان يبقى عبرة لمن يعتبر .

وناس تالتة بتقول

إنه هايزف خبر سار لفلاحي مصر إن المجلس قبض على الواد الفلاح .. عويس أبو زدحمد اللي زرع الفيروس الخبيث بتاع الحُمى الكلاعية في البهايم بتاعت الفلاحين لحد الخساير بقت بالمليات ...

إضربوا كده يا جماعة 50 الف راس * متوسط 10 الاف جنيه وقولوا لي هايطلعوا كام ؟

وناس رابعة بتقول

إنه هايزف للشعب المصري إنهم اخيراً قبضوا على أبو العربي البورسعيدي اللي نفذ الجريمة البشعة اللي على رأي مشمش بتحصل في كل ماتش وإنهم هاينفخوا الولاد أبو العربي ده عشان يحرم

[متعب]

ومين الراجل ال هيكون واقف وراه وهو بيتجوز قصدى بيخطب

[se_ Elsyed]

في تأكيدات بتؤكد خبر اكيد إن المشير هايصدر قرار باعتقال لعيبة النادي الاهلي اللي في أول مبارة رسمية أفريقية منذ مذبحة بورسعيد من شهرين راحوا لعبوا في أثيوبيا النهاردة والمباراة إنتهت منذ قليل بالتعادل السلبي

وإن المشير إتضايق من فرصتين الأنفراد اللي ضيعهم جدو وابو تريكه وإنه امر بقطع الرجلين الشمال بتوع جدو ... مع الودن اليمين لأبو تريكه

والله الموفق

على فكرة طنطاوي زملكاوي متعصب .. أنا بأتكلم جد ... ممكن يعملها ويريحنا من لعيبة الأهلي

وبكده يبقى اتخلصنا من النادي المزعج ده .. ومن الألتراس كمان

والزمالك ياخد الدوري السنة دي بقى .. اصل العملية مسخت قوي وبقى لهم ييجي 10 سنين ماخدوش غطا كازوزة

بس برضوا .. مافيش دوري السنة دي ههههههههههه . مش مكتوبه لهم طالعة القرن ده

[se_ Elsyed]

ومين الراجل ال هيكون واقف وراه وهو بيتجوز قصدى بيخطب

هو نفس الراجل اللي بيجيبوه في كل خطاب تنحي

. أنا مش باهزر ... في تأكيدات مؤكدة بتأكد إن طنطاوي هايتنحنح ويسلمة السلطانية لنائبة محمد حُسني مبارك الشهبر بمخاليعو الجن

[se_ Elsyed]

انا مش فسيبكاوي محترف وماليش فيها

لكن لفت نظري الهجوم الكاسح لدعوات بتتبعت لي للإنضمام للعبة المزرعة السعيدة .. وسبق وحذرت أي حد يبعت لي دعوة ودعيت عليهم إن ربنا يخلي المزرعة دي حُصرم عشان يبطلوا

والظاهر ربنا إستجاب لدعوتي وفعلاً في شكاوى من ناس كتيرة بتقول إن الموقع واقع بقى له كام يوم ...

فالمشير هايطلع يوضح للناس سبب العطل في المزرعة . وإن ده شيء خارج عن إرادتنا .. وإن الحمى القلاعية اللي ضربت بهايم المزرعة والمطاريد اللي نزلوا من الدبل قلعوا الزرع ... كله دي أشياء خارجه عن إرداتنا وإن وراءها أعداء الثورة والفلول .

والله الموفق

[se_ Elsyed]

أهلاً بكم مع خبيركم الإستراتيجي اللواء متقاعد في السرير سين سين اللي هايحلل لكم بالتفصيل الممل لحد ما تجيبوا جاز - طب يا ريت هو حد لاقي الجاز دلوقت يابني - خطاب السيد الرئيس المشير المرتقب اللي هايلقيه على الأمة المصرية بعد ما يناموا بالليل عشان ما عندنا خثطب تتكشف على حد صاحي

- في ناس بتأكد برضوا إن المشير هايطلع يوضح للشعب سبب تلك الحفر المنتشرة في مصر

على فكرة دي صورة حقيقية ملتقطة اليوم في الطريق المؤدي إلى مدينة الغردقة ..

دي تريلا حضراتكم محملة بالسولار .. السواق كسل يروح البنزيمة فراح مفضيها في الصحرا

[se_ Elsyed]

هو ده ؟؟؟؟؟؟؟؟؟؟؟

لأ بجد اللي جه من شوية عالتليفزيون ولا إيه

http://www.youtube.com/watch?v=nSTb95rcggQ&feature=player_embedded

[hanzalah]

المجلس العسكري تقريبا مش فاضي

حتى معندوش مندوب يطلع يتصور ويقول الكلمتين

بعد ورقة للتلفزيون عشان يقراها أي مذيع على الشعب المصري العظيم المهاود

اليكم رد المجلس العسكري على تهديدات الاخوان المسلمين

ياربي

انا شفت الفيلم ده فين قبل كده

يمكن عام 1954 تقريبا

البيان من صفحة

احنا بينضحك علينا

الرابط

وهو طبعا موجود على اليوتيوب

http://www.you tube.com/watch?v=TviwoWurXa8&feature=youtu.be

اسمع زغروطه للعروسين

[متعب]

هيلبسوا امته بقى عشان نخرج

[Ahmed Anwer]

ههههههههه

و لا توقع طلع صح لسين سين :)

مش هأعتبرك محلل إستراتيجي بعد كده ،،

عموما أنا شايف إن عيب حد يخش بين الراجل و مراته

كده كده هيتصافوا ،، مصارين البطن بتتعارك

[se_ Elsyed]

و لا توقع طلع صح لسين سين

مش هأعتبرك محلل إستراتيجي بعد كده ،،

بالعكس ...

ده أنا كده خدت البكاويه من وسع يا معلم

طالما ولا توقع طلع صح يبقى أنا كده خدت لقب خبير إستراتيجي من وسع ... عقبال الحبايب

[Ahmed Anwer]

و لا توقع طلع صح لسين سين

مش هأعتبرك محلل إستراتيجي بعد كده ،،

بالعكس ...

ده أنا كده خدت البكاويه من وسع يا معلم

طالما ولا توقع طلع صح يبقى أنا كده خدت لقب خبير إستراتيجي من وسع ... عقبال الحبايب

أنا خلاص مش هأتفرج علي آي حاجة بعد كده

عشان مش فاهم ىي حاجة و مش مصدق آي حاجة

هتفرج بس علي قناة المجد للقرآن الكريم

دي الوحيدة اللي ما بتكذبشي :(

[hanzalah]

المجلس العسكري للإخوان

هتكسر .. هنكسر

هتخبط ف الحلل .. هنخبط

هتعمل بيان .. هاعمل لك مجنون و صايع و بهلوان

بعد بيانين شديدي اللهجة من الإخوان وحزب الحرية والعدالة

العسكري مُهددًا (إحدى القوى السياسية): نطالب الجميع أن يعوا دروس التاريخ

أكد المجلس الأعلى للقوات المسلحة، أن ما يتم من محاولات، بغرض التشكيك في النوايا، إزاء نزاهة الانتخابات الرئاسية القادمة والاستفتاء الشعبي على الدستور، هو محض افتراء لا أساس له من الصحة.

وذكر المجلس الأعلى للقوات المسلحة، في بيان له اليوم الأحد، أن هذا الموقف يتناسى أن القوات المسلحة ومجلسها الأعلى هما من خططا ونفذا الانتخابات التشريعية السابقة بشفافية ونزاهة، شهد بها الجميع، وأفرزت القوى السياسية الحالية بمجلسي الشعب والشورى.

وأضاف البيان، أن المجلس الأعلى للقوات المسلحة تابع ببالغ الاستياء ما تناولته وسائل الإعلام من بيانات، صدرت من إحدى القوى السياسية بما يطعن في نزاهة قصد القوات المسلحة ومجلسها الأعلى، وينال من أداء ووطنية الحكومات، ويشكك في استقلال المحكمة الدستورية العليا، والتأثير على حيادتها في أحكامها.

وأوضح المجلس الأعلى للقوات المسلحة في بيانه، أنه قد آثر في مرات سابقة، الترفع عن الرد على مثل هذه الافتراءات، ولم يشأ أن يستخدم حقه القانوني والطبيعي في التعقيب على تلك الأكاذيب والاتهامات المغرضة؛ إيمانًا منه بأن العسكرية المصرية العريقة أسمى من أن تدخل في جدل مع فئة أو جماعة، أو أن تقف فى موقف دفاع عن تاريخها الناصع أو دورها المشهود في الماضي أو الحاضر، دفاعًا عن تراب مصر وكرامة الأمة ورعاية حق هذا الشعب العظيم في غدٍ أفضل.

وأكد البيان، أن الجماهير المصرية على امتداد أرض هذا الوطن، تعلم يقينًا من يصون كرامتها، ويحفظ عزتها وكبرياءها الوطني، ويضع مصالح الشعب وحقوق الجماهير فوق أية مصلحة.

وقال البيان: "وقد حرصت القوات المسلحة ومجلسها الأعلى على الالتزام بهذا النهج وعدم الانجراف وراء محاولات الاستفزاز، وجرها إلى معارك صغيرة، غير أن ما صدر أخيرًا قد فاق الحد في ليِّ عنق الحقائق، وقلب الوقائع، والافتراء على مكانة القوات المسلحة التي هي في قلب كل مصري."

وأضاف: "لقد توهم البعض أن بمقدورهم الضغط على القوات المسلحة ومجلسها الأعلى، بغرض إثنائه عن المضي في مهمته الوطنية، في إدارة شؤون البلاد خلال المرحلة الانتقالية، والسعي إلى تقويض سلطاته الدستورية دون النظر إلى مصالح الجماهير".

وجاء في بيان المجلس الأعلى للقوات المسلحة: "إننا نقدر صعوبة المناخ العام الذي تعمل فيه جميع الحكومات التي تولت المسؤولية، منذ اندلاع ثورتنا العظيمة، ونحن نتفهم أن الأداء الحكومي قد لا يرضي طموحات الجماهير في هذه المرحلة الحرجة، إلا أننا نؤكد أن مصلحة الوطن هي شاغلنا الأول، وأننا لن ندَّخر جهدًا، ولن نتوانى في اتخاذ ما يلزم من إجرءات وقرارات في صالح الوطن والمواطن، حتى نجتاز جميعًا هذه المرحلة الصعبة من تاريخ أمتنا".

وأضاف البيان أن "الحديث عن تهديدات بوجود طعن في دستورية مجلس الشعب أمام المحكمة الدستورية العليا، والإيحاء بخضوع هذه المحكمة الجليلة للسلطة التنفيذية، إنما هو أسلوب غير مقبول يستهدف الإساءة إلى القضاء المصري العريق، واستباق أحكامه، والسعي إلى تحقيق مصالح حزبية ضيقة على حساب قدسية القضاء".

وأوضح البيان أن "القوات المسلحة المصرية ومجلسها الأعلى لم يدخرا جهدًا في حماية الثورة، وتبني مطالبها ورعاية مسيرتها، وحافظت على استقرار الدولة في أدق اللحظات وأصعب المنعطفات، وباشرت بكل شرف وتجرد وإخلاص مسؤوليتها في إدارة شؤون البلاد، خلال هذه المرحلة الحاسمة من عمر الوطن".

وقال: "إن القوات المسلحة وقيادتها العليا تدعو أبناء الوطن وكل فئات الشعب وقواه السياسية ومفكريه وإعلامه الحر إلى الاحتشاد والتكاتف، حتى نستطيع أن نواصل مسيرتنا نحو الانتقال الديمقراطي الآمن للسلطة، في ظل مناخ يحترم القواعد والأعراف الدستورية، ويحافظ على الفصل بين السلطات، ويلتزم باحترام القضاء وينصاع لقدسية أحكامه، وأن نعمل جميعًا لكي يكون الدستور القادم معبرًا عن آمال وطموحات جميع فئات الشعب المصري العظيم ".

واختتم البيان: "إننا نطالب الجميع أن يعوا دروس التاريخ، لتجنب تكرار أخطاء ماضٍ لانريد له أن يعود، والنظر إلى المستقبل بروح من التعاون والتآزر، وأن المصلحة العليا للوطن فوق كل اعتبار

خدت بالك من حكاية القضاء المصري العريق

:closedeyes:

المصدر : جريدة الشروق على النت

[mamdowh]

http://www.youtube.com/watch?v=-CYq5XXMjqc

حاجه تخلى الواحد يرجع لأيام الطفوله أحسن بلا وجع دماغ بلا سياسة خلينا فى المصاصة أحسن ( لسانى أحمريكا يا كابتن :Icecream: )

تم تعديل 25 مارس 2012 بواسطة mamdowh

[ابراهيم عبد العزيز]

د محمد يسري سلامة المتحدث الرسمي السابق بإسم حزب النور السلفي تعقيبا على بيان المجلس العسكري :

انا متهيئلي الدكتور الكتاتني ضرب كرتونة هولز بحالها بعد ما سمع بيان العسكري

تم تعديل 25 مارس 2012 بواسطة ابراهيم عبد العزيز

[hanzalah]