منتخب كورة للبيع ... آلا اونا آلا دوي .. آلا تراي

[se_ Elsyed]

كتبت الموضوع ده مخصوص رداً على إستفسار الدكتور محبط حينما قال " هل ما حدث في مبارة مصر وبلغاريا صح أم خطأ .. حينما هتفت بعض الجماهير بإسم الاهلي .. وبإسم لاعبيه ..

ولقد وعدته بذلك وها أنانذ أوفي بوعدي .. ككل أهلاوي شريف :unsure: ...

- بص يا محبط ويا كل زملكاوي ويا كل غاوي رياضة ... ما حدث يعتبر خطأ طبعاً بكل المقاييس ... ولكن ليس من باب السفسطة او المجادلة إني قلت إن ده صح قبل ذلك وما فيهوش حاجة ... وللموضوع شقين :

- اولاً هو خطأ لو قولنا إن اللي رايح في مناسبة زي دي يشجع المفروض يبقى إنتماءه للمنتخب الذي يُمثل مصر .

- وصح زي ما انا قولت .. لما أجي وأشوف الواقع المرير الذي يقول بالفُم المليان إن إحنا حالياً ماعندناش حاجة إسمها مُنتخب ولا مدرب للمنتخب ولا اتحاد كوره للمنتخب ... واللي عنده رأي غير ده يقنعني به وهاكون سعيد ..

- فما حدث يا سادة ان بعد البعيد تارديللي ما أنكشح وكان لهف القرشينات وعملهم على قلبه .. لقينا حاجات غريبة بتحصل عندنا بس في مصر ومش ممكن تلاقيها في دولة تانية ...

- لقيناهم إستعاروا حسن شحاته من نادي المقاولين العرب لمدة شهرين إلى نهاية ديسمبر 2004 !!!!! طب هاتعملوا إيه يا جماعة بعد ديسمبر ؟ ماحدش عارف

طب حد يفهمنا ماتش ليبيا المهم اللي هايبقى في مارس .. مين اللي هايلعب ومين اللي هايبقى مدرب ؟ برضوا ماحدش عارف ...

طب إيه اللي وزير الشباب المعلم أنس الفقي بيعجنوا ده وليه آجل إنتخابات إتحاد الكورة اللي المفروض كانت هاتتعمل في ديسمبر تقريباً وكان عايز يلغيها وبعث للفيفا يقولهم أصل إحنا هاننظم كاس الأمم الأفريقية سنة 2006 فمش فاضيين لإنتخابات وكلام فارغ من ده .. راحوا رادين عليه ومبهدلينه وبعثوا له إنذار بإنهم هايشطبوا إسم مصر خالص ويخلونا نلعب في وداننا بدل الكورة لو ما تمتش الإنتخابات في موعد أقصاه إبريل 2005 !!!!!!!!

ولإن منتخب مصر أصبح نكرة على أيدي هؤلاء الفاسدين فلقينا معظم دول العالم حتى الثالث منها بتلعب مباريات ودية وإحنا ماحدش معبرنا ..

فقالوا إيه تعالى نضحك على الجماعة الكويركات اللي إسمهم المصريين ونقولهم هانجيب لكم منتخب بلغاريا بكامل نجومه - كل الصحف قالت كده على فكرة قبل الماتش - وهاتبقى تجربة مفيدة والامور هاتبقى تمام ...

كل الكلام ده الجماهير عرفاه وحفظاه .. وفوجئت لما راحت الماتش تشجع إن منتخب بلغاريا عبارة عن شوية عيال صغيرة لمينهم من حضانات زغرب وجايين يتشمسوا عندنا عشان عندهم هناك ثلج دلوقت وأهو منها يطلعوا لهم بقرشين حلويين من الميغة اللي في مصر ...

فهل يا سادة بعد ده كله عايزين الجماهير تهتف لإسم مصر ومنتخب مصر ومدربين مصر ؟!!!!!

في حين إن الأندية وخاصة الكبيرة منها إستطاعت ان تُرضي طموح مشجعيها وتقدم لهم المُتعة المطلوبة من لعبة كورة القدم .. وهو عكس ما يفعلة التخبط الحاصل في إدارة المنتخب والإحباط تلو الآخر الذي يسببوه للجماهير ..

فأصبح المنتخب كالطفل اللقيط الذي يتبرأ منه الجميع ويبتعدون عنه مخافة المعره ...

ولأول مره نرى لاعبين يعتذرون عن إرتداء فانلة المنتخب وتمثيل مصر بحجج واهية وبتشجيع في بعض الأحيان من أنديتهم ...

فبإختصار لما يبقى عندنا منتخب وإدارة للمنتخب ممكن ساعتها نقول للناس عيب وكخ إنكم تهتفوا بإسم ناديكم أثناء مباريات إسمه إيه ده المنتخب .

[theblackpirate2005]

.زغرب فى كرواتيا مش فى بلغاريا

وشكرا me0:

[se_ Elsyed]

.زغرب فى كرواتيا مش فى بلغاريا

وشكرا me0:

شكراً للإيضاح .... تنفع نمشيها صوفيا .. :D

[yasovinas]

والله لو انس الفقي ده شارب لبن امه صحيح يعمل جدع ويعند مع الفيفا وما يعملش انتخابات

اووم ايه اووم الناس بتوع الفيفا يزعلوا مننا

اووم ايه عمنا بلاتر وتابعه همام يشطبوا اسم مصر من الفيفا

اووم ايه نبطل نلعب كورة

اووم نشوف حالنا بقى ونشتغل يمكن ساعتها يبقى فيه امل فينا

[se_ Elsyed]

للأسف يا جماعة .. انا خلاص قررت اعتزل الكورة وهاشجع الرجبي بعد اللي قرأته النهاردة في الجرايد ... والله يرحمه عمنا الكبير سعد أبو الزغاليل .. رمى الكلمتين ومات وقال وهو بيطلع في الروح " مافيش فايدة يا صافي "

الجمهورية

الجوهري.."تاني"!!

يعود للقاهرة خلال أيام.. ولجنة الاختيار ترشحه لقيادة المنتخب

كتب رضوان الزياتي :

علمت "الجمهورية" ان معظم أعضاء لجنة الخبراء المكلفة باختيار المدير الفني الجديد للمنتخب الوطني لكرة القدم استقروا علي اختيار الكابتن محمود الجوهري باعتباره الأنسب لقيادة المنتخب في الفترة القادمة في تصفيات كأس العالم ونهائيات كأس الأمم الأفريقية التي تنظمها مصر في يناير .2006

رجح غالبية أعضاء اللجنة التي تضم عصام عبدالمنعم رئيس اتحاد الكرة والكابتن عبده صالح الوحش والدكتور طه إسماعيل وزكي عثمان كفة الجوهري علي حساب المرشحين الآخرين وهم فاروق جعفر وطه بصري وحسن شحاتة وأنور سلامة.

استبعدت اللجنة فكرة التعاقد مع مدير فني أجنبي في الوقت الحالي لعدة أسباب أهمها ان التجربة لن تحقق أية نجاح نظراً لقصر الفترة القادمة إذ لن يتمكن المدير الفني الأجنبي مهما كان اسمه من التأقلم مع الفريق واعداده بالصورة الجيدة فضلا عن أن الدولة والرأي العام لن يقبلا دفع مبالغ باهظة وتكرار تجربة ماركو تارديللي.

وتفضل الغالبية المدرب الوطني وخاصة الكابتن الوحش والدكتور طه إسماعيل وزكي عثمان وهناك أصوات في الأوساط الرسمية سواء داخل اتحاد الكرة أو خارجه تطالب بعودة الجوهري.. حتي ان المهندس هاني أبو ريدة رئيس اللجنة المنظمة لكأس العالم طالب رسميا بعودته لقيادة المنتخب.

علمت "الجمهورية" أيضا ان الكابتن محمود الجوهري لن يمانع في قبول المهمة في حالة مفاتحته رسميا خاصة وأن عقده مع منتخب الأردن ينتهي 31 ديسمبر الجاري وأنه سيعود إلي القاهرة خلال الأيام الثلاثة القادمة.

[yasovinas]

والله ممكن تمشي معاه ويوصلنا كاس العالم بس بصراحه مين في اللي مترشحين ينفع لا فاروق ولا انور سلامه ولا حسن شحاته يمكن طه بصري

[theblackpirate2005]

طب الجوهرى ومش عاجبك يا سى السيد

انا عايز اعرف انت ترشح مين بقى للمنتخب فى الفتره دى اللى متسرش العدو قبل الحبيب f((:

me0:

[yasovinas]

اجمل ما في الموضوع ان انس الفقي وزير الرياضه شكل اللجنة

وقال لهم عايزين مدرب مصري (بلاش خواجه علشانمافيش وقت يعرف اللعيبة ويجرب فيهم)

وعايزينه يكون درب الفريق القومي قبل كده (يعني خبرة)

ويكون كمان احرز مع المنتخب بطولات من قبل (علشان يبقى جاهز)

ويكون اول حرف من اسمة(محمود الجوهري)

وفي الاخر ترك لهم حرية الاختيار واكد على ان لاهو ولا ابو ريده ولا الاتحاد المؤقت هيتدخلوا في اختيار اللجنة

هي دي الديمقراطية

وهي دي الشفافية

وهو ده اللي باين من تحت الجلابية

[theblackpirate2005]

انت برده مقلتش مين غير الجوهرى يمسك me0:

[yasovinas]

انت برده مقلتش مين  غير الجوهرى يمسك me0:

انا ما عنديش اعتراض على الجوهري

وبصراحه ياريت يقفلوا المنتخب ده ويبطلوا كورة احسنmf&()

انا بتكلم على لجنة الطراطير اللي عملوها بس علشان لما نتوكس ذي كل مرة وكما هو متوقع ماحدش يلومه يقول انا مالي لجنة من الخبراء هم اللي اختاروا

[theblackpirate2005]

على فكره لجنه الطراطير دى

هى برده اللجنه اللى جابت سينيور تارديللى دى اسبكتى

وهما دول اللى كل مره اللى تجيب المدرب

وصدق سعد زغلول لما مفيش فايده me0: