أرض الله الواسعة أين أذهب ( أمريكا - كندا - فرنسا - أستراليا - .....)

[melhamy]

السلام عليكم

أنا بحاجة إلى التوجيه من الله (عز و جل ) أولاً ثم من أخواتى بالمنتدى ، أنا عايز أسافر لأى بلد فى شكل تأشيرة دارسة و محتاج التوجيهة فى الأتى :

1- البلد الأفضل من بين ( أمريكا - كندا - فرنسا - ... من حيث المعيشة ، أمكانية الحصول على تأشيرة أقامة دائمة - جواز سفر

2- الجامعة الأفضل و الأسهل التى تتناسب معها مؤهلى بكالوريوس تجارة - جامعة أسكندرية 2001 مع العلم انى التكمله فى مجال المحاسبة أو دراسة اللغة مش هيغير من تفكيري كتير

3- التكلفة و المدة الزمنية و العائد بمعنى أن كل ما أملك من المال هو 250 ألف و عايز اقعد أطول وقت ممكن لا يقل عن 3 سنوات على الأقل و أتمنى اخد اقامة دائمة أو جواز سفر أخر

جزاكم الله خيراً و شكراً

[magna]

السلام عليكم

انا ممكن افيدك فى معلومات عن دولتين كان ليا فيهم تجارب فرنسا واستراليا

1

قبل كل شىء هافهم حضرتك حاجة اكتر المصريين بيسافروا علشان الشغل ويحسن دخله فموضوع الدراسة خارج مصر مكلف جدا جدا واغلب الدول مبتتعترفش بالشهادات بتاعة مصر

2

محتاج كشف حساب بمبلغ محترم ويكون عدى عليه اكثر من ست شهور

كورس لغة بعض الدول بتطلب ايلتس وبعضهم بيطلب توفل وفرنسا لازم كورس فرنسى على الاقل ليفل 5 ---اللغة هاتنفعك ثانية داخل البلد اللى انت هاتسافرها

اولا فرنسا

مميزات بلد جميلة قريبة من مصر فيها مصريين كتير وعرب فيها شغل بس اكتر الشغل فى المعمار

العيوب اقامة او جنسية انسى اكتر الموجودين هناك مفيش معاهم ورق -اكتر العرب هناك بيشتغلوا فى اعمال غير مشروعة-البلد مفيش فيها امان فى اماكن مينفعش تخرج فيها بليل

ثانيا استراليا

مميزات =الشغل كتير وفرص فى كل مكان- سهل تاخد اقامة -الدراسة سهلة -امان تقدر تخرج فى اى وقت

عيوب= محتاج تدخل امتحان ايلتس تجيب مش ققل من6 -بعيد عن مصر 16 ساعة طيران - فيها مصريين لايعتمد عليهم فى شىء-الدراسة مكلفة جدا -المعيشة غالية بس كل الناس بتعمل فلوس -السكن غالى وقليل الايجار بالاسبوع

انت حدد الاول عاوز تروح فين وبعد كده ققول لحضرتك بالتفصيل عن كل شىء

[Alrefaey]

اذا كنت تجيد الفرنسية قدم كيبك (كندا) الهجرة افضل واذا كنت غير مطابق لشروط الهجرة قدم على ماستر فى كيبك سنتين ولما توصل قدم على دراسة لغة فرنسية لمدة سنة وبعدها ابدأ فى الماستر ومن هناك قدم على الاقامة

ميزة كيبك عن فرنسا انها فيها فرص لقبولك كمقيم شرعى سواء مهاجر او دارس

وبالتوفيق ,,,

تم تعديل 13 أبريل 2012 بواسطة Alrefaey

[لماضة مصرية جدا]

السلام عليكم و رحمة الله و بركاته

استاذي الفاضل انا مش هقدر افيد حضرتك في اي بلد من اللي حضرتك كتبتهم بين الاقواس

لاني لما قريت سؤال حضرتك لقتني بسال نفسي

هو حضرتك عايز تسافر ليه؟؟؟

يعني ايه الهدف من السفر و بناء عليه تحدد وجهتك؟

يعني حضرتك عايز تكمل مثلا دراسات عليا في مجال تخصصك يبقي اللي اعرفه انك بتعرف مجال حضرتك واصل لحد فين و الجامعات المعترف بيها في المجال ده و بتراسلها

و بكده يكون الهدف علشان الدراسة و بتتحدد عليه الخطوات اللاحقة؟

هل الهدف علشان الجنسية؟؟ يبقي برضه حضرتك تسال نفسك انت عايز انهي جنسية و تتبع الخطوات اللي بتنطلب؟

هل الهدف انك تكمل رحلة الاغتراب من مصر لجدة...(زي ما هو مكتوب تحت الصورة الرمزية لحضرتك)...و بالتالي يكون المجتمع الاوربي اللي سمعنا عنه بس معشنهاوش؟؟؟

وجهة نظري الشخصية

حدد الهدف....و كل ما يكون واضح كل ما هتقدر تحط ايدك علي المكان الصح في الخريطة بتوفيق رب العالمين

تقبل مروري

و تقبل تواضع مشاركتي

بس حبيت افكر مع حضرتك

و بالتوفيق منين ما تكون

[melhamy]

السلام عليكم

أشكركم جميعاً على الرد الأكثر من ممتاز ، أخوكم من ضحايا الخليج لمدة 25 سنة مع أنى عندى 33 سنة و من ضحايا ملفات الهجرة التى أترفضت لأنها قبل 27 فبراير 2008 يا خسارة الفلوس اللى راحت عند المحامى (( حسبى الله ونعم الوكيل ))

أنا لقيت أن أفضل بلد هى كندا ، و أشكر الأستاذ manga لكن كلامه صادق ومن القلب أنا كنت فى فرنسا من 9 شهور و لقيت الوضع فعلاً زى ما هو بيوصفة لكن اللى خلانى مش اكمل أنى كنت تدريب تبع الشركة و كان عندى عملى و أسرتى و شقتى و عربيتى فى السعودية علشان كده معرفتش أزوغ و أعملها لكن الأن الوضع أتغير و الواحد بقى مش عارف يعيش فى مصر من كتر بوسترات ( حازم أبو اسماعيل ) اللى فى كل حته هههههههههههههه :P

أنا نويت والنيه لله إن شاء الله على كندا ماهى مدام مش هتيجى هجرة عصب عن عين أبوهم إن شاء الله هتيجى دارسة بس أنا واقفه معايا فى أسم الجامعة أو المعهد و نوع الدراسة يكون من النوع الطويل من 2 -3 سنوات على الأقل

و أشكركم جميعاً على ردكم وفقكم الله لما يحب و يرضى ،،، شكراً ميرسي :wub:

[melhamy]

السلام عليكم

أستاذالرفاعى Alrefaey

أنا نويت و النيه لله على كندا و اتمنى أنك توجهنى و أشكرك كل الشكر