هل سيُصبح الدراع وأستعراض القوة فوق القانون والقضاء ؟

[se_ Elsyed]

كلنا شوفنا الأعداد الغفيرة اللي كانت محتشدة أمام المحكمة يوم حسم قضية جنسية والدة الشيخ أبو إسماعيل .. ويعلم الله ماذا كان سيحدث لو جاء الحُكم على غير هوا المحتشدين .. ولو إن الأمر لم يُحسم بعد ومازلنا في إنتظار إعلان أسماء المرشحين المطعون على صحة موقفهم القانوني

والأن حالاً يحدث التالي

#رصد | حشود من أعضاء جماعة #الإخوان_المسلمين أمام اللجنة العليا للإنتخابات، إعتراضاً على معلومات حصلوا عليها بأنباء عن شطب محمد خيرت الشاطر المرشح لرئاسة الجمهورية من كشوف المرشحين.

ثم ماذا بعد ؟

ده أحنا ما أتحمقناش كده يا جماعة في قضايا واضحة وضوح الشمس زي قتل المتظاهرين .. فساد 30 سنة .... تصدير الغاز .... تهريب الأمريكان ... والقائمة طويلة

أعتقد إننا بحاجة ماسة إلى رئيس ورمز للدولة يُعلي معنى القانون وقوته وسيادتة على الجميع مهما كانوا ...

[أبو محمد]

حط دى على اللى عندك يا سين سين

وانت تعرف إجابة سؤالك .. وتعرف إلى أين يريدون أن يتجهوا بالبلد

الله اكبر الله أكبر الله أكبر

يااااااااااااارب سلم ورد كيد الكائدين

أبو إسماعيل: مؤامرة تحاك حاليا لإقصائي تتورط فيها السفارة الأمريكية

حذر الشيخ حازم صلاح أبو إسماعيل من مؤامرة تحاك ضده خلال هذه الساعات بين جهات حكومية مصرية والسفارة الأمريكية بهدف توفير أي مستندات تساعد اللجنة العليا للانتخابات على إبعاده من سباق الرئاسة ، وحذر أبو إسماعيل اللجنة من التورط في هذه المؤامرة أو استخدام أي مستندات أو أوراق لا قيمة لها قانونيا بدون اطلاعه عليها .

وأضاف أبو إسماعيل: أحذر لجنة الإنتخابات الرئاسية تحذيراً شديداً من إستخدام مستندات لا قيمة لها بهذه الصورة خصوصاً بعد أن وصفها حكم المحكمة بأنها لا يؤبة بها ولا قيمة لها .. لذا فإنني أحذر من الإستناد إليها تحدياً لحكم القضاء وتحدياً لوقفة الشعب المتثوبة.

وقال المرشح الرئاسي في بيانه بثه على صفحته على الفيس بوك : قد كنت احب ألا يداخلني أي قلق تجاه لجنة الإنتخابات الرئاسية لولا رفضهم مقابلتي وإعطائي صور من المستندات التي بحوزتهم لا سيما وإنها لا تخصهم على الإطلاق.

وأضاف قائلاً: إنني ترامت إلي أنباء بعد الساعة الرابعه عصر الجمعه بأن هناك ورقة تفصيل تم طلب إصدارها من الحكومة المصرية والسفارة الأمريكية وأنها جاري إستخراجها الآن لتصل الآن إلى لجنة الإنتخابات الرئاسية .

وكرر أبو إسماعيل بشدة التحذير من الإستناد إلى مستند لا يتم إخطارة به وإطلاعه علية أولاً أو إصدار قرار في غيبتة بناء عليه.

كما صرح بأنه "مكانش حد غلب " لو أن إسرائيل أو أمريكا ترسل في اللحظات الفاصلة من يدعي عن مرشح أو عن أهله جنسية أخرى فيسهل لهما إبعاده عن الترشح دون تحقيق ولا معرفة ما إذا كان هذا المستند صحيح أو مزور أو كاذب أو خلافه وقال إنه لن يسكت في حالة محددة جداً وهي إذا ما كان الإستناد إلى تعليمات أو خطابات أمريكية كأنها إرادة مقدسة لا تُرد و لايمكن أن يكون القرار الداخلي لمصر منقاداً هكذا بالكامل لمجرد خطاب خلفي في اليوم الأخير من جهه أمريكية ولن يقبل أحد إطلاقا هذا الإنحراف الشديد الواضح

.

My link

[ذهبية]

من حقة ان يطلع على اى مستندات ممكن تكون ضدة فى الوقت الحرج دة

لكن مش بالاسلوب دة التحذير و التهديد و الوعيد

دة مش اسلوب يصدر من شخص هيتحكم فى مصير امة بحالها

تهديد و ووعيد وانت لم تملك بعد السلطة

ماذا بعد ان تملك السلطة فى يدك و تكون صاحب سلطة و قرار واختلف معك الاخرون فى الراى

و كانت الراى ضد مصلحة شخصية معك

ماذا اتوقع كرد فعل وقتها ؟؟؟؟؟

[engmido]

انا كنت داخل اقول كده.... الناس اللى ورا حازم ابو اسماعيل متعصبين اكتر من مشجعين الاسماعيلى والمصرى والالتراس

حقيقى مشكلة.... انا لا اختلف على شخص ابو اسماعيل

وانما اختلف على الدقون الطويلة اللى وراه ( مع عظيم احترامى للحى والدقون)...ايه ده مش ممكن كمية التعصب دى دول شوية شوية داخلين فى مرحلة تقديس

ولا حول ولا قوة الا بالله .......ابو اسماعيل لازم ياخد حقه وهو اخده فعلا بالقانون

بس مع احترامى .. الدين مش بالدقن ولا بالمتر

وشكرا

[ام سلمي]

ده أحنا ما أتحمقناش كده يا جماعة في قضايا واضحة وضوح الشمس زي قتل المتظاهرين .. فساد 30 سنة .... تصدير الغاز .... تهريب الأمريكان ... والقائمة طويلة

والله يا استاذ سي السيد انا اعذر انصار ابو اسماعيل ، ده انا مستغربة من الناس العاديين اللي مش نازلين معاهم ، حتي اللي مش بيأيدوا حازم ولا الشاطر

عارف حضرتك احنا ليه سكتنا علي برائة اللي قتلوا المتظاهرين واللا تهريب الامريكان واللا اي حاجة حصلت طول السنة اللي فاتت دي

كنا مستنيين الوقت ده اللي حننتخب اللي احنا عايزينه و نمشي العسكر ، و ساعتها كل المحاكمات حتتعاد و حنحاسب اللي غلط ونطهر القضاء

انما ما طلعش كدة ، اخر حلم عندنا اهم بيضيعوه ،اخر حلم لتسليم السلطة بنزاهة من غير غش وتزوير بيضيع

لما القضاء يقول كلمته بعد الاطلاع علي المستندات ويبرأ حازم وهما يصروا يخرجوه ويخالفوا القضاء

و لما ابراهيم عيسي يقول ان الفنجري قال علي جثتي اننا نسلم البلد للاخوان

يبقي ما فيش انتخابات نزيهة حتتم ، يبقوا حيزوروا ، يبقي حيسلموا البلد لواحد منهم

و ما تفتكروش ان مثلا ابو الفتوح حيكسب ، ابو الفتوح ضد العسكر وقال انه حيقيل المشير لو كسب

و اللي طلعوا حازم النهاردة حيزوروا و يطلعوا ابو الفتوح واللا حمدين صباحي واللا اي حد شريف بكرة

المسألة دلوقتي اكبر من حازم ، و اكبر من الشاطر ، واللي حيسكت علي التجاوزات دلوقتي ما يزعلش لما عمر سليمان يبقي رئيس

تم تعديل 14 أبريل 2012 بواسطة ام سلمي

[نوران]

كلامك مضبوط يا أم سلمي

لما كنا بنقول نستني لشهر 6 كان عندنا أمل انهم يسلموا السلطة وان الإنتخابات تتم بنزاهة

وده قلناه قبل كده لما كنا معارضين ثورة تانية

لكن لما ظهرت نواياهم دلوقتي ، المفروض الكل يبقي إيد واحدة من تاني ..لإنها دلوقتي

مسألة حياة أو موت .... يا إما ننقذ الثورة يا مع السلامة وكل سنة واحنا طيبين

لكن ازاي ؟؟ لازم يعاقبونا عشان ماوقفناش معاهم في الأحداث اللي فاتت

فلا هينزلوا في مليونيات ولا هيوافقوا علي استبعاد الفلول بل ومرحبين بترشح سليمان

هو احنا بنكيد في بعض ؟؟

إذا احنا كان لينا عذر قبل كده لما قلنا نستني تسليم السلطة

أيه العذر دلوقتي للي بيرحب بعودة النظام اللي قامت عليه الثورة بل وفي صورة أسوأ من الأول

لمجرد النكاية في الإسلاميين

عموما هي لو خربت فعلي الكل مش علي الإسلاميين لوحدهم

[se_ Elsyed]

فلا هينزلوا في مليونيات ولا هيوافقوا علي استبعاد الفلول بل ومرحبين بترشح سليمان

قصدك العسكر ولا مين يا نوران ؟

[se_ Elsyed]

أعضاء العليا لانتخابات الرئاسة يغادرون المقر خوفا من أنصار أبو إسماعيل

أنصار أبو إسماعيل يفضون وقفتهم أمام العليا للرئاسة استجابة للمرشح

السبت، 14 أبريل 2012 - 08:12

فض أنصار الشيخ حازم صلاح أبو إسماعيل المرشح المحتمل للرئاسة وقفتهم الاحتجاجية أمام اللجنة العليا للانتخابات والتى استمرت طوال الليل، بعد أن طالبهم الشيخ بالانصراف فى بيان مقتضب قرأه عليهم أحد أعوان المرشح المحتمل.

وهتف أنصار الشيخ بهتافات "سمعا وطاعة، السمع والطاعة لرئيس الجمهورية"، وانطلقوا حاملين لافتاتهم وأعلامهم، على وعد بالتجمع عندما يطلب منهم الشيخ ذلك.

مولد سيدي أبو إسماعيل

إحنا دخلنا فعلاً في الأيام السودا مش يعني لسه هانشوفها

[doctor ayman]

="6"]

هيه دس المشكله اللي كنت خايف منها

لفد رفعوا الشيخ حازم الي منزله القديسين والصحابه

اذن كيف سنختلف معه عندما يصبح رئيس للجمهوريه

لن يسمحوا لاحد ان يخرج في مظاهره ضد الشيخ ولن يسمحوا بنقده

يعني لو طلع كاريكاتير في اي جريده عن رئيس الجمهوريه سيعتبروه سخريه وسب للشيخ

وممكن يولعوا في الصحفي والجريده يعني خرجنا من ديكتاتوريه مبارك الي ديكتاتوريه الشيخ

احنا كنا عاوزين رئيس عادي قابل للنقد والاعتراض وليس قديس

اذا كنتم هاتتعملوا معاه بمنطق سمعا وطاعه فماذا انتم فاعلون بمعارضيه

ربنا يستر علي البلد

[abaomar]

أعضاء العليا لانتخابات الرئاسة يغادرون المقر خوفا من أنصار أبو إسماعيل

انصار أبو إسماعيل يفضون وقفتهم أمام العليا للرئاسة استجابة للمرشح

السبت، 14 أبريل 2012 - 08:12

فض أنصار الشيخ حازم صلاح أبو إسماعيل المرشح المحتمل للرئاسة وقفتهم الاحتجاجية أمام اللجنة العليا للانتخابات والتى استمرت طوال الليل، بعد أن طالبهم الشيخ بالانصراف فى بيان مقتضب قرأه عليهم أحد أعوان المرشح المحتمل.

وهتف أنصار الشيخ بهتافات "سمعا وطاعة، السمع والطاعة لرئيس الجمهورية"، وانطلقوا حاملين لافتاتهم وأعلامهم، على وعد بالتجمع عندما يطلب منهم الشيخ ذلك.

مولد سيدي أبو إسماعيل

إحنا دخلنا فعلاً في الأيام السودا مش يعني لسه هانشوفها

السلام عليكم

هى ايام سودا فعلا لما نغمض عنينا و عقولنا كمان لهذه الدرجه

طيب مش تقول لنا يا كابتن مصدر الخبر المرعب ده

..

اوعى يكون من الجريده المشمومه الكذابه ...اليوم السابع

http://www3.youm7.com/News.asp?NewsID=652648

طيب مش كنت تحط صوره انصار ابواسماعيل المتوحشين اللي ناصبين المولد و يتحدثون بالفصحى

و ما عندهمش خشا و في اختلاط مفضوح ..حتى شوف الراجل الوحيد وسط مجموعه من النساء و تظهر عليه ملامح الاجرام

أل..سمعا و طاعه ...أل

يا عم رووووح :P

تم تعديل 14 أبريل 2012 بواسطة abaomar

[نوران]

فلا هينزلوا في مليونيات ولا هيوافقوا علي استبعاد الفلول بل ومرحبين بترشح سليمان

قصدك العسكر ولا مين يا نوران ؟

لا يا أستاذ احمد مش بتكلم علي العسكر

شوف حضرتك مين اللي رفض المشاركة في مليونية امبارح وغير اسمها من مليونية انقاذ الثورة لمليونية

انقاذ المصالح - يقصدوا الإخوان - وسخر من المليونية

ومين اللي معترض علي قانون عزل الفلول وبيرحب بحاكم عسكري وبيدافع عن سليمان وبيقول ان سليمان

من حقه الترشح هو وشفيق وموسي

ومين اللي بيستنكر احتشاد مؤيدي ابو اسماعيل عند مقر اللجنة وبيقول ان ده ارهاب

حتي شوف حضرتك الرابط ده كده

http://www.egyptiantalks.org/invb/index.php?showtopic=134396

تم تعديل 14 أبريل 2012 بواسطة نوران