حذاري من كلفتت الدستور في إسبوعين

[se_ Elsyed]

ده الواحد لو بيضرب الودع ما كانش شاف وتنبأ الامور بالشكل ده

إتكلمنا وقولنا من زممممممممممممممممممممان إن العسكر هايعدوا ويمرروا الإنتخابات البرلمانية 100 % بدون حركات وضرب تحت الحزام ... وقد كان ... وكلنا لاحظنا حتى على المستوى الأمني إن مافيش طوبه واحده إتحدفت في مصر كلها وكنا عايشين في جنة الخلد حيث الأمن والامان ... وبعدها إتقلبت جهنم الحمرا بفعل فاعل

وقولنا إن ما يهم المجلس هو الدستور ووضعه اللي لازم يكون 5 نجوم به ... وكذلك الرئيس القادم اللي هايأدوا له التحية ويقفوا مبلولين قدامه واللي لحد دلوقت هما مش بالعين إنه يبقى رئيس مدني من خارج الوسط العسكري اللي مسيطر على البلد لاكثر من 60 عاماً ومروق العسكر إمتيازات ووضع خاص وضبابية مالية تصل إلى حد العمى وماحدش عارف عنهم حاجه ... بل اللي مخليهم يتجننوا إن ممكن الرئيس ده يكون وحيد او اخد إعفا وما شافش الجيش أساساً ...

وأهو شوفنا إنتخابات الرئاسة حصل فيها إيه وجس النبض عن طريق الرمي بسليمان عشان يعموا العين عن عمرو موسى وأحمد شفيق .. رجالتهم في الصراع ده .... وأنا بأقولها لكم مليون الميه إن قانون العزل السياسي هايترفض من المجلس مليون المية ......والدليل إن إمبارح ولا واحد نطق في الإجتماع وأشار إليه من بعيد أو قريب لأن البعبع خلص مشي .. وما كانش مقصود به المجرمين اللي ماليين البلد وأعني هنا كوادر الحزب الوطني وفجأة البرلمان إكتشف إنهم موجودين بيننا كطابور خامس بعد ما نزل عمر سليمان !!!!!!! يعني كده فركش وأرجع كما كنت .. والذئب يرجع يحضن النعجة ويعمل أنه بيبوسها وهو بيمص دمها واحده واحده

وشوفنا تشكيل لجنة الدستور وإزاي الإخوان بلعوا الطعم وأفتكروا إنها بلدهم هما لوحدهم وشكلوا لجنة على مقاسهم ولم يلتفتوا لأي نصائح ودية خالص لوجه الله ... وطلع أبو الكتاتين يقول اخبطوا راسكم في الحيطة ونحن ماضون في طريقنا .. أتاريه يا عين أمه مشي يادوب 5 متر وراح لابس في حيطه سد .. وبالتالي سقطت من أول ضربة ... وكان ممكن تلافي ده من الأول بتجميع كل القوى معهم ونضع دستور لكل مصر وولا عسكر ولا قوات النيتو كانت تقدر تقف قدامنا ...

وده بإعترافهم إنه كان خطأ وأخرها تصريحات البلتاجي إمبارح على صفحته الشخصية بالفيس بوك

قال الدكتور محمد البلتاجي، عضو مجلس الشعب، إن أزمة اللجنة التأسيسية جاءت فرصة لتصحيح الأخطاء السابقة بعيدًا عن مرجعية المجلس العسكري ودون الوقوع في أخطاء جديدة يكون من شأنها تعطيل المصلحة الوطنية لمصر

--------------

من إمبارح بقى وأنا عمال أضرب كف على كف ... وأستغرب إزاي الأشاوس اللي ماليين الدنيا صراخ وتهديد ووعيد وامال واحلام واعني هنا رؤساء أكبر أحزاب مصر زي الحرية والعدالة والنور والمصريين الأحرار والوسط وباقي الشلة ... كانوا قاعدين إمبارح زي الكتاكيت المبلولة قدام طنطاوي وعنان .. وكل اللي مشمش كان بيقوله يردوا ويقولوا : حاضر يا آبية .. بس ما تزعلش نفسك عشان إنت عندك شوجر ؟؟؟؟؟

ملخص الإجتماع أيها السادة ...

- الاحزاب والقوى السياسية هاتجتمع وتيجي تاني للعسكر يوم الأحد القام ومعها تصور نهائي للجنة الدستور اللي هاتكون كلها من خارج البرلمان ...

- بعون الله ومن غير سحر ولا شعوذه .. الدستور لازم يتكلفت قبل الإنتخابات الرئاسية .. وإلا

لأ ما تخافوش مش هايمدهم على رجليهم أو يخليهم يعملوا تمرين 9 أستعد وفيهم ناس كبيرة في السن ووزنها تقيل وما تستحملش تمرين واحد من دول

وإلا المجلس العسكري هايعمل إعلان دستوري ننتخب من خلاله رئيس لفترة انتقالية سنة أو سنتين .. أو يتعمل مجلس رئاسي مدني لإدارة شؤون البلاد لحين كتابة الدستور

والله العظيم الراجل البرادعي ده مدرسة بحق وحقيق وخسارة فينا ....

---------------------------------

إذن أيها السادة

نحن امام خياران .. احلاهما مُر

يعني بالورقة والقلم وفهموني لو كنت غلطان ....

إحنا المغتربين خلاص فاضل بالظبط 25 يوم ونروح صناديق الإنتخابات وهانستمر لمدة إسبوع شغالين يعني من 11 مايو لحد 17 مايو وبعدها بإسبوع يبدأ المصريين داخل مصر 23 مايو وهايقعدوا يومين للتصويت

وبعدين نبدأ الإعادة وتنتهي يوم 17-6 ... ويُعلن الفائز يوم 21

ويستلم الرئيس عدة الشغل يوم 1-7

بالله عليكم .. لجان الإنتخاب في الداخل والخارج هاتكون جاهزة او فاضية إمتي لأستقبال 40 مليون مصري في خلال تلك الفترة المليئة بالاحداث الدرامية عشان نصوت على الدستور ؟؟؟؟؟؟؟؟؟؟؟؟؟؟

وكمان ده دستور بيقعد 100 سنة لأن تغييره كل شوية مش في مصلحة إستقرار البلد ولا صورتها أمام العالم .. وبالتالي لازم يُقتل بحثاً ويتناقش على جميع المستويات

لكن الظاهر إن العسكر مش عاوزين يرجعوا للمخله بتاعتهم إلا أما يعرفوا راسهم من رجليهم .. وفيها يا أخفيها او أهد المعبد على الجميع ...

على فكرة ده كان رأيينا من الاول .. الدستور قبل الرئيس زمان لما قولنا لا للتعديلات ... لكن مش معنى ذلك إن يا تحلبي .. يا أكسر قرنك ..

يعني لا نقعد نايمين سنة ونص ... يا نيجي نُسلق الدستور في إسبوعين وأقلب يا عم الحج

إذا كان قانون تعديلات الإيجارات القديمة بقى له ييجي 30 سنة ومش عارفين يناقشوه

أما موضوع إنتخاب رئيس مؤقت لمدة سنة أو إتنين ... بعد كل الدعاية والمعجنة اللي حصلت دي .. فهاتبقى مدابح والجثث هاتملى الشوارع طبعاً

وحتى مجلس رئاسي مدني بعد فوات الأوان .. وفي الوقت ده .. مش هايفرق كتير عن حلمنا بوجود رئيس وزراء قوي له سلطت معتبرة ومحترمة

--------------------

يبقى الامل الوحيد من وجهة نظري إن يتم إختيار لجنة دستورية بإذن الله يتوافق عليها الشعب كله وتكون من ناس ثقات يمثلوا كل الوان طيف المجتمع المصري .. مغلفين بخبراء القانون الدستوري المصريين الغير منتمين لأي تيار ..

وبإذن الله يوفقوا في وضع دستور يعبر عنا جميعاً .. وأعتقد إن دستور 71 هو دستور محترم مع تعديل سلطات الرئيس .. وشكل الحكم في الدولة اللي يُفضل في المرحلة دي يكون برلماني مختلط ... يعني رئيس وبرلمان وحكومة .. لكن الرئيس مش في إيدة كل السلطات ويكون رئيس الوزراء حر في التصرف في بعض القرارات دون الرجوع في كل ثانية للسيد الرئيس القائد .. ويكون البرلمان مراقباً لأداء الحكومة ويستطيع سحب الثقة منها في حالة تقاعسها عن تنفيذ برامجها الواضحة ....

وإمبارح محمد المرسي رمى حته كده تُبشر بالخير وهي إن أول 4 مواد في الدستور ما عليهمش خلاف بما فيهم المادة الثانية عن دين الدولة ومصدر تشريعها ودي خط أحمر للجميع وغير قابلة للنقاش مع إضافة إن غير المسلمين هايحتكموا لدينهم في الامور الشخصية .... وكل الخلاف دلوقت او مش خلاف لكنه يحتاج إلى تعديل يتعلق بسلطات المعلم الجديد اللي هاييجي .

وبكده لازم نفوت الفرصة لللعسكر إنهم يعكوا تاني في تعديلات دستورية ما أنزل الله بها من سلطان .. أو يكون عندنا رئيس ييجي سنة وهو عارف إنه ماشي فما يوقعش حتى على ورقة زي ما بيحصل دلوقت من كل المسئولين ... ونخلص بقى على 1-7 احسن الناس أستوت وقالت جاي من البهدلة اللي بهدلها لنا العسكر وازمات من كل حته ...