فى بيتنا"رابيت"..وربّنا ما يقطع لينا"هابّيت"

[disappointed]

و أخيراً....

تجدّدت علاقتى بالحيوانات الأليفة مرّة أخرى بعد طول إنقطاع

فعلاقتى بالحيوانات الأليفة كانت علاقة قويّة و عميقة منذ طفولتى حيث بدأت عندما وعت عيناى على الدنيا و هناك قطّة جميلة و لطيفة فى منزلنا , و أتذكّر أن تلك القطّة قد وقعت من على حافة البلكونه فأصيبت بكسر فى أحد قوائمها و فى فكّها , فقام والدى بشراء إناء دائرى كبير لها ("طشت" يعنى) و قام بوضع أسفنج مريح فيه بينما قامت والدتى بتجبير قائم القطّة المكسور بإستخدام ورق كرتون مقوّى و بلاستر , ثم أخذت تراعى القطّه و تطعمها الجبنة النستو بملاعق الآيس كريم الخشبيّة المسطّحة و أخذت تسقيها اللبن بالقطّارة نظراً لفكّها المكسور

و إزداد تعلّقى بالحيوانات الأليفة عندما إندمجت مع جدّى (لوالدتى) فى هوايته التى إنطلق فيها بعد خروجه على المعاش , وهى هواية تربية عصافير الزينه و التى إنغمس فيها لدرجة أن بيت العيله كان به أقفاص عصافير زينه فى كل مكان , بل و قام بتقفيل البلكونه الكبيرة التى كانت بمثابة "تراس" فسيح و وضع أقفاص كبيرة بفواصل تستوعب 10 أزواج من العصافير مع فواصل بين كل زوج و زوج بحيث يكون لكل زوج وحدة سكنيّة منفصلة بمعدّاتها و كوخ التبييض الخاص بها (فقد وصل ما يقتنيه فى أحد الأوقات إلى أكثر من 150 زوج)... وكم كنت أستمتع لساعات بجلستى معه و هو يقوم بتدويين بيانات العصافير فى مجلّد مخصّص لها يحوى أرقامها الكوديّة و جداول التفريخ , حيث كنّا نقضى أوقاتاً رائعة وهو يقوم بالتخطيط لتهجين ألوان مختلفة لتخريج اجيال ذات ألوان طليعيّة و متابعة مدى تطابق النتاج مع التوقّعات المسبقة لعمليّة التهجين

و نظراً للمنافسة بين فرعى أسرتى (من جهة الوالد و من جهة الوالدة) كالأهلى و الزمالك , فلم تقف الجهة الأخرى مكتوفة الأيدى , حيث تم إستقطابى لفترات طويلة بواسطة جدّتى (لوالدى) عن طريق أحواض أسماك الزينة رائعة الجمال و ديكوراتها الجميلة الملحق بها نظام إضاءة خلاّب

و إنتقلت هواية تربية عصافير و أسماك الزينة إلى منزلنا (علشان ماحدّش يزعل و يقول إشمعنى rs: ) لفترة , ثم تراجع كلاّ من الصنفين , وعاد منزلنا إلى مجال نشاطه الأصلى فى تربية القطط التى تراوحت بين السيامى (ما بأعزّهاش قوى) و الرومى ( بأموت فيها)....حتى أخذت تتكاثر فبدأنا نقدّمها كهدايا حتى ذاعت شهرة منزلنا على نطاق الأسرة و الجيران و الأصدقاء , فكان المعتاد أن يرن التليفون كل بضعة أيّام لنجد قريب أو صديق يقوم بتوصيتنا على قطّة أو بالتوسّط لأحد من معارفه للحصول على قطّة من طرفنا أو لتزويج قططنا لقطط آخرين (و..... أصل و فصل و عيلة القطّة مهمّة يا جماعه h): )

و عندما أقمت وحدى بالمنزل لفترة 5 سنوات فى أثناء دراستى الجامعيّة كان معدّل القطط التى توجد بالمنزل معى لا يقل عن 4 أو 5 قطط , و كان كل زملاء الدراسة "الغاويين" يتسابقون لتقديم طلباتهم للحصول على قطط منّى عند ظهور بشائر كل حمل جديد

ثم.....

تزوّجت

و منذ أن أصبح لى بيتى المستقل إنقطعت صلتى بالحيوانات الأليفة فى منزل الزوجيّة... فقد شهدت فترة الخطوبة محادثات و مشاورات و مفاوضات مكثفة بينى و بين زوجتى لتحديد ما إذا كنا سنقوم بتربية حيوان أليف بالمنزل أم لا...... و إنتهت المفاوضات بالفشل الذريع و إتخاذ قرار مشترك بعدم تربية حيوان أليف فى منزلنا...... فمن ناحية زوجتى فهى لا تخاف فى حياتها من شيئ أكثر من القطط (التى أحبّها أنا) لدرجة أنها وجدت قطّة مفعوصة أمام عمارتهم و هى عائدة من كلّيتها (قبل خطبتنا) فإرتعبت لدرجة أنها أخذت تدور حول المنزل عدّة مرّات لحين مغادرة القطّة التى قامت بالتغليس ولبدت أمام العمارة , فأضطرت زوجتى إلى عبور الشارع و قضاء نصف ساعة فى المول التجارى المواجه لعمارتها , ثم عادت فوجدت القطّة قد غادرت و هنا فقط دخلت العمارة........ أمّا من جهتى فإننى أرتعب و أصاب بحالة ذعر شديدة من الكلاب (التى تحبّها زوجتى) لدرجة أننى أتذكّر أننى ظللت أقاطع جلسات أصدقائى إذا ما أقيمت فى منزل أحدهم يقتنى كلب فى منزله رغم تأكيده لى بأنه سيقوم بحبسه أثناء تواجدى (ياسلام ياخويا.... إفرض "كوّزتك" فى الإستيميشن فإتغظت منّى وسيّبته عليّا gt: ) ... أما العصافير فطريقها مسدود نظراً لأن حمايا موسوس صحّيا و نقل وسوسته لزوجتى منذ أن قرأ عن داء رئوى يسمّى Psittacosis رغم تأكيدى له و لزوجتى أنه ينتقل عن طريق الحمام و اليمام و ليس عن طريق عصافير الزينه (على الأقل عن طريق الأنواع المتداولة كالأسترالى و الزيبرا , حيث لا ينتقل إلا عن طريق أنواع أخرى من عصافير الزينة غير متداولة فى بلادنا)... أمّا عن أسماك الزينة فقد إستسلمنا كــ"جوز عرسان" جداد للنصائح من كل حدب و صوب و التى طالبتنا بإيثار السلامة و تجنّب تربية الأسماك لأن... السمك..... بيجيب..... الفقر (ماشى... ولو إنى انا و مراتى مش مقتنعين....بس يالاّ... ماشى... خلّى الناس تطمئن علينا)

وبذلك........ قرّرنا (زوجتى و أنا) عدم تربية حيوانات أليفة فى منزلنا و إنقطعت صلتى بالحيوانات الأليفة....... حتّى...... تجدّدت صلتى بها منذ 3 أيّام

فقد عادت إبنتى من المدرسة بهلّيلة على مايبدو لدرجة أن زوجتى كلّمتنى هاتفيّاً لتخبرنى أن "ميس كارين" (مدرّسة البنت) أحضرت للتلاميذ فى الفصل الأرنب المدلّل الخاص بها فى قفص شيك ليتعرّفوا عليه و يقوموا بإطعامه و الطبطبه عليه و تحسس فروته الناعمه... وطبعاً بنتى شبطت... وركبها عفريت...إسمه...."رابّيت".... و......و.... خذ بنتك كلّمها علشان صدّعتنى .... وقد كان.... 10 دقائق طلبت فيها البنت "رابّيت" منّى فوق الــ634503459040 مرّة

طبعاً سكّنتها و خدّرتها بكلمتين على التليفون من عيّنة حاضر ...أوكى (قبل ما تخلّص لى شحن بطارية الموبايل).. وقلت فى عقل بالى على ما أرجع البيت حتكون نسيت و الموضوع راح لحال سبيله و الكريزة الــ"رابيتيّة" عدّت و خلصنا

ولكن.....

و أنا أفتح باب المنزل وجدت بنتى كالصاروخ فى حضنى وهى تمطرنى بقبلات المحلسة مع إستخدام أسلوب فرض الأمر الواقع بخباثه (ميرسى يا بابى إنك حتجيب ليّا "رابّيت") ... و.. يالاّ نروح نجيبه دلوقتى clp::

طبعاً أخذت مجهود شويّه إلى أن إستطعت تسكينها و تخديرها بمقولات من عيّنة "لازم نكلّم أنكل اللى بيبيع الرابيت الأوّل علشان يسافر الغابة عند تيمون و بومبا يجيبه" و.... إلخ إلخ من هذا الهراء

و..... نامت البنت

قلت على ما تقوم الصبح حتكون فصلت و إنمحى هاجس الــ"رابيت" من ذاكرتها... ولكننى أسقط فى يدى عندما تجمّعت عدّة شواهد لتؤكّد بما لايدع مجال للشك أن.... الرابيت.... أصبح ضرورة ملحّة.... و Emergency case ولا بد من شراؤه فوراً لأن البنت أصبحت تعانى من هلاوس "رابيتيّة" لن تشفى منها إلا بكسر "أمبولة" رابيت و حقنها لها فى الوريد بصورة عاجله... وهذه الشواهد هى :

= إستيقظت فى تلك الليلة 4 مرّات , وفى كل مرّة تتمتم و تهذى وهى نائمة على روحها خالص كمن هو بين النوم و اليقظة : رابّيت..... عايزة رابّيت... عايزة رابّييييييييت

= و نحن نوقظها لتجهيزها للمدرسة كان أول ما قالته وهى تفتح عينيها : فين الرابّيت؟؟؟

= و هى تصعد بجانب سائق الباص قالت له بدون أى مقدّمات : شفت.....بابى حيجيب لى رابّيت....... (ثم أشارت لى عبر الزجاج وهى تذكّرنى بوعدى بطريقة تقطّع القلب : إنت قلت حتجيب لى رابّيت - يعنى إوعى تحمرق-)

وهنا.....

لم أجد بدّا من العروج على محل لبيع الحيوانات الأليفة قبل عودتى للمنزل , و قمت بشراء أرنب (بصراحه شكله يجنن وعجبنى انا شخصيّا) مع مستلزماته من القفص و نوعيّة أكل معيّنة تشبه الحبوب ولونها رمادى مع بعض الأدوية و "ستوك" خص و جزر علشان الباشا

الظريف فى الموضوع أننى عندما عبرت بوّابة الكومباوند و أخذت أقترب من المنزل فوجئت بزوجتى تحمل إبنى و تمشى مع بنتى فى الحدائق المجاورة للمنزل , و ما ان رأتنى إبنتى حتى أطلقت ساقيها للريح ولا "ماريون جونز" وهى تهلل : رابّيت...رابّيت...رابّيت (علمت بعد ذلك من زوجتى أن البنت صمّمت على إنتظارى (أو فلنقل إنتظار الرابّيت) فى الخارج قبل ساعة من موعد عودتى

و اليوم.......تكون حمّى "الرابيت" قد أكملت 36 ساعة , حيث تمحورت حياتنا جميعا حول الرابّيت الذى همّش ملاحظة البنت لنا من أساسه , فلا صوت يعلو فوق صوت الرابيت

و أقول إيه .....

فى بيتنا "رابيت".. و ربّنا ما يقطع لينا "هابيت"

ملحوظه: تجرى الآن مباحثات مكثّفة حول تسمية الأرنب.... و من المنتظر حسم هذا الموضوع بالغ الأهمّية فى جلسة ختاميّة لمجلس قيادة الأسرة هذا المساء

سؤالى هو :

ما هى علاقتكم بالحيوانات الأليفة فى نطاق أسرتكم الصغيرة؟؟؟

ماهى الفوائد التى يجنيها الطفل من وجود حيوان أليف فى منزله؟؟ (أنا قلت لبنتى إنها حتكون مسئولة عن الرابيت أفندى حتى تشعر بالمسئوليّة تجاهه و يتربّى لديها حس بالإلتزام)

هل لأحد تجارب مماثلة تجعله يشعر بأن هذا الموضوع كان سينطبق عليه لو كان عنوانه مثلا :

فى بيتنا "كات"...و دوشه و "نونوات"

تم تعديل 8 ديسمبر 2004 بواسطة disappointed

[yasovinas]

محبط حبيبنا الغالي

ميروك عليك الرابت ويتربى في عزك وعز الاهل يا رب بس على فكرة الرابت لازم له رابيتايه حلوه وتكون عينيها حمرا وساعتها يا باشا هترجع لايام زمان مُصَدر معتمد للارانب او ممكن برضه انك توفر ثمن اللحوم وغيره وتتجه لاكل الارانب بس اظن ده هيبقى صعب مع البنوته الصغيرة

[ragab2]

خطوة

جميلة ومهمة أن يتربى فى المنزل حيوان يشد انتباه الأطفال ويمارسوا الحنان عبره وعن طريق الإهتمام به ويمارسوا الحياة الطبيعية بمشاهدته يوميا وهو ينمو فتتوسع مداركهم

أتذكر

أننى كنت أصطحب أولادى وهم صغارا للأرض المستصلحة أو المزرعة كما كنا نسميها

وذلك كى بشاهدوا الفواكه والخضر على أشجارها وشجيراتها على الطبيعة حتى لا ينعزلوا عن الطبيعة التى خلقها الله ويشاهدوا البقر والجاموس ذاهبة للحقول

[SilverSwan]

أد ايه أسلوبك رشيق يا محبط .. gt:

اعتقد ان تربية الحيوانات الاليفه اول حاجه بتعلمها و تنميها ف الطفل هي الحنان و الرحمه وخصوصا البنات اللي عندهم غريزة الامومه بتظهر بدري اوي من اول العروسه اللي بتسرحلها شعرها و تلبسها و احيانا تتكلم معاها ... clp::

بتعلمه زي ما انت قلت اولى خطوات الالتزام لما يعرف انه مسؤول عن اكل و حماية و نظافة هذا الحيوان ..

و كمان بيكون تربية الحيوان ف البيت فرصه علشان نعلم الاطفال ان في مخلوقات تانيه مش بشر ولكن بتحس وزينا تمام و ان ربنا خلق الانسان وجعله افضل المخلوقات و اجملها كمان ..

وكمان بتبقى فرصه كويسه علشان نعلمهم فكره التكاثر و النمو بتاع الجنين او الفرخ بطريقه عمليه و سهله و مش محرجه..

في طفولتي كان عندي بغبغان و لما مات جابولي واحد تاني و كنت بحبه اوي .. و برضه كان عندي قطتين سيامي - دول ماما وزعتهم بدري بدري علشان بيبهدلوا البيت - بس كنت بخاف منهم شويه .. و عصافير الزينه الاسترالي بالتحديد و كانوا برضه بيبهدلوا الدنيا و للاسف كنت كل مااشتري جوز جديد يموتوا :( و عمر البيض ما فقس الا مره واحده بس و البيبيهات ماتو برضه :( و اخيرا سمك الزينه .. اما السلاحف .. فدول باه موضوع طويل .. rs: كنت بقعد بالساعات اكلم الزحلفه و احكيلها حدوتة الحيوانات و المزرعه وانا بأكلها الخيار

مبروك عليكم الرابيت يا محبط .. بس ربنا يكون في عونك و عون العائله من الروائح الفظيعه اللي بيسببها الارنب .. بصراحه دي اسوأ حاجه فيه.. h):

تم تعديل 8 ديسمبر 2004 بواسطة SilverSwan

[disappointed]

أد ايه أسلوبك رشيق يا محبط ..  :)

الــ"رابّيت" أرشق و حياتك

rs: :D

بس ربنا يكون في عونك و عون العائله من الروائح الفظيعه اللي بيسببها الارنب .. بصراحه دي اسوأ حاجه فيه.. 

:D :D

إيه ده..... بجد؟؟؟!!!

أصله لسّه ماكمّلش معانا يومين و الجدع "ما بانش منّه حاجه وحشه" لغاية دلوقتى.... و أنا و مراتى محدثين "رابّيتات" وماحدّش قال لنا حاجه زى كده

روائح؟؟؟

gt:

فظيعه؟؟

:P

لألألألألألألألألأااااااااااااااااااااااااا

clp:: h):

[SilverSwan]

روائح؟؟؟

فظيعه؟؟

mfb:

لألألألألألألألألأااااااااااااااااااااااااا

stnd::  stnd::

اسوأ الروائح ...مع الاسف ... bag):

كان عند جدتي الله يرحمها مجموعة ارانب .. و كنت بحب اوي اطلع العب معاهم بس كنت بفضل حاطه كلينكسه على مناخيري بايد .. و ماسكه اللي باكله للارنوب بالايد التانيه .. و لما سالت ماما .. قالتلي ان الارنب كده ريحته مش حلوه .. بس هيه مش مش حلوه دي ...............mfb:

[فــيــروز]

انا ايضا سمعت موضوع الروائح المزعجه المتعلقه بالرابيتس stnd:: طيب تنفع تجارب مع كتاكيت؟ stnd::

[أنـفـــال]

طبعاً ميروك الرابيت..

بس ليه رابيت؟

مش كنت تحاول تقنعها بالعصافير؟

بجد و الله.. اصل الرابيت دة مشكلة و الله يا محبط..

كنت قولها العصافير حلوة و ملونة..

و حاجات كدة..

بس برضه..

شكراً لأسلوبك الرشيق الممتع

الا قولي يا محبط..

هي بنتك متعرفش ان الشعب المصري عنده اكلة حلوة و مشهورة اسمها:

روابيت بالملوخية؟؟

روابيت جمع رابيت.

دة كدة متهيألي نبقى بالنسبة للبنت وحوش كاسرة بقى.. و كوابيس..stnd::

ربنا معاك.

أنفـال

[فــيــروز]

ايه اخبار "الرابيت" يا محبط؟ :D

[mwefy]

روابيت بالملوخية؟؟

ملوخية بالروابيت ((الاسم الاصلي)) :D

[se_ Elsyed]

ظريف قوي الموضوع ده ...

انا عدو الحيوانات الأليفة اللدود ... وبصراحة أي حيوان يظهر في طريقي ممكن اعضه ...

اول زيارة قام بها هاندي كرافت لمنزلنا فتح علينا فتوحه الله يسامحه ...

مبدئياً هاندي كرافت إسمه احمد ...- خليكوا فاكرين الإسم ده كويس - بس الولا عمر راسه وألف شوز كل ما يشوفه أو يكلمه في التليفون يقول له يا عمو صالح .. بس قولت لنفسي الواد عنده حق شكل هاندي كرافت مدي على صالح ومافيهوش شكل من احمد خالص .. وده عيل صغير بريء وما بيعرفش الكذب او النفاق الإجتماعي

المهم عمو صالح .. قصدي احمد جاب له في اول زيارة حوض سمك بلاستيكي صغير وفيه سمكتين ملونين زي العسل - فضلت أتاملهم واتأمل معهم قدرة الخالق سبحانه وتعالى وتناسق ألوانهم واتخيلهم مشويين او في صينية وعليها زيت زيتون وليمون أو على الأقل معمولين بالطريقة السنجاري بتاعت كفايه الشهير بأبو احمد الإسكندراني - المهم صاحبنا بقى أكل دماغي وكل شوية عايز يلعب معاهم ويأكلهم بتاع كده هاندي جايبه في علبة عامل زي الشيبسي بس مفتفت ...

والظاهر إن هاندي كان جايب لي سمك متاكل قبل كده وماقعدش يومين وفيص وعمر أفندي فضل يعيط وعايز سمك تاني .. روحت إشتريت له إتنين تاني وحطيناهم في الحوض .. ومافيش يومين وإتكلوا على الله هما كمان .. قولت لأ بقى ده احنا كده علينا ندر ولازم نوافيه عشان سمكنا يعيش ... اتاري هاندي اللئيم ماقاليش إن لازم للسمك لهم جهاز أكسجين عشان يعرفوا يتنفسوا وحيث غن الجهاز بحوالي 90 ريال .. فصاحبنا قالك قشطة لحد كده وإقلب الزبون وإشتغل له في أبو تعريفه ... .. فقلت لأ يا عم لا أكسجين ولا ثاني اكسيد المنجنيز .... ده البلطي أسهل واطعم .. أي نعم بيبقى فيه شوك إنما طعمه حلو .. fsh::

وانا صغير كان عندي زلحفه صغيرة وفي منتهى الجمال المتزحلف ... ودلوقت نفسي اجيب شوية زلاحف للواد عمر وعلي ... بس هل حد عنده فكرة إذا كانت بتسبب امراض للاطفال ولا لأ ؟ ...

على فكره يا محبط لو ربيت الرابيتات دي عندك في الجنينة مش هايعملوا لك أي مشاكل .. وممكن حد ياخد باله منهم بمنتهى السهولة ... ولو ربنا فتحها عليك وتناسلوا .. يبقى هاتعدي يا عم وتبقى من أصحاب الأرانب وتركب الشبح وماحدش هايعرف يكلمك ...

وممكن أبعت مصر أستشير خالتك ام س س .. أصلها من أصحاب الأرانب ومربيه شوية فوق السطح .. بس أنا علاقتي بهم لا تتعدى طبق الملوخية ...

[disappointed]

ايه اخبار "الرابيت" يا محبط؟

تم التخلّص منه مساء أمس بحمد الله

البنت عندى بقالها من يوم الخميس متبهدلة و عندها إرتفاع غير طبيعى فى الحرارة غير مستجيب للعلاج و المضادات الحيوية مع إلتهاب فظيييييع فى الحلق و اللوزتين و الشعب الهوائيّة , وطبعاً عمر أفندى إتعدى من كثر ما بتبوسه , فجاله مع الإلتهاب تشنّج فى الحنجره و إضطرينا نديّله حقن كورتيزون و جلسات أوكسوجين فى يومين متتاليين

المهم... ما أطوّلشى عليكى....مراتى أقنعت البنت و أنا فى الشغل إن الأرنب هوّه سبب البلاء الأزرق اللى هيّه فيه و هوّه اللى جايب ليها و لأخوها المرض و الحرارة و وجع الزور و الكحّه...... فراحت البنت قالبه على الأرنب المسكين ياعينى و قعدت إمبارح طول النهار تقطّم و تبستف فيه فى الرايحه و الجايّة و...و....و..... إسكت خالص يا وحش....إنت "رابّيت نوتى" و "فيرى فيرى باد"....... إزّاى تعمل كده فى أخويا (عجبتنى قوى إنها محموقه على مرض أخوها مش على مرضها هيّه)

بس.... فعلى الظهر كده جالى تليفون من مراتى : سيربراااايز... تخيّل..... البنت رأسها و ألف سيف الأرنب يمشى الليلة (الليله يا عمده)

أنا طبعاً عملت فيها متأثّر مع إنى ما صدّقت (مش عارف ليه إفتكرت ردود فعل الرهبان البوذيين فى معبد "التبت" فى فيام "إيه سى فينتورا" بتاع جيم كارّى لمّا قرّر يسيب المعبد فعملوا نفسهم متأثرين و أول ما خرج من باب المعبد فقدوا وقارهم تماماً و قعدوا يتشقلبوا :P و يتنطّطوا :D و يرقصوا فى هستيريا lo:: مع ألعاب ناريّة إحتفاليّة من كثر فرحتهم إنه حيمشى و يسيبهم)

ما علينا....

أنا قلت خير البر عاجله.....

فأنا أوّل مادخلت من بوّابة الكومباوند و أنا راجع من الشغل بالليل لمحت الجناينى اللى بيراعى جنينة البيت , فندهت له :

- ممممم.... أنا عندى رابيت "سوا سوا" قفص و أكل ...ممكن إنت فيه شيل ؟؟؟!! إنت فيه معلوم"رابيت" ؟؟؟

- ما فى معلوم

- معلوم أرنب؟؟

- مافى معلوم

- معلوم هذا "وايت" سوا سوا "رات" بس كبير و أكل جزر

- مافى معلوم..... انا جيبو واحد صديق

(طلب الإستعانه بصديق :P )

راح.... و فضلت مستنّيه فى العربية ييجى دقيقه كده .. رجع لى مع واحد زميله من بتوع الصيانه

و...

و.....

- إنت فيه معلوم"رابيت" ؟؟؟

- ما فى معلوم

- معلوم أرنب؟؟

- مافى معلوم

- معلوم هذا "وايت" سوا سوا "رات" بس كبير و أكل جزر

- مافى معلوم

و بعدين بقىىىىىىىى :angry:

رحت قايل لهم :

- هذا ....هذا.... سوّى كده (يعنى بيعمل كده)

ورحت عامل مناخيرى الحركة الشهيرة اللى بيعملها الأرنب

راحوا همّه الإثنين فى نفس واحد :

- آآآآآآه...... معلووووووووم رابّيت

:P :P

قلت أحمدك يا رب.... تخطّينا حاجز اللغة و أصبحنا نتحدّث نفس اللغة الرابيتيّة.....و....و... تعالوا ورايا على البيت......و فرّيره على البيت... فتحت الباب و دخلت جرى و من غير ولا سلام و لاكلام جرى على أوضة السيرفيس مطلّع أكل الأرنب و طالع واخد القفص بالأرنب فى وشّى و.....و.....يالاّ قولى له باى باى...و...و... باى باى رابّيت... باى باى رابّيت(من تحت الضرس...ماهى زعلانه منه بقى).. وطلعت أنا بقى على باب البيت بالقفص لقيتهم على بعد 100 متر من الجنينه الخلفيّه رحت واخد الــ100 متر عدو بالقفص ولا بن جونسون وهوّه واخد منشّطات مع قفز فوق الحواجز (سور الجنينه) ولا كارل لويس....حتى وصلت إلى خط النهاية و قمت بتسليم القفص (كان سباق 4 فى 100 متر تتابع) ;)

و دى كانت نهاية فرقة "رابّيت" المسرحيّة

:P

الأخوه الأعزاء....

دعونى أهتف من الأعماق :

لا رابّيت بعد اليوم

;)

[nashwa]

[

و دى كانت نهاية فرقة "رابّيت" المسرحيّة

:angry:

الأخوه الأعزاء....

دعونى أهتف من الأعماق :

لا رابّيت بعد اليوم

:D

دكتور محبط

ألف سلامه على بنوتك وأبنك ... :P

والحمد لله انه زار وخف ..قصدى الرابيت lo::

[yasovinas]

الف سلامه على الكتاكيت يا محبط وربنا يبعد عنهم كل وحش يارب

[disappointed]

بس هل حد عنده فكرة إذا كانت بتسبب امراض للاطفال ولا لأ ؟ ...

لا تقلق يا معلّم.... لاتسبب أى أمراض

بس مش حرام عليك تقطع نفس الأولاد فى الجرى وراء الزحاليف المتزحلفه (إنت عارف طبعاً سرعتها الجنونيّة , وممكن تخبط عيّل والاّ حاجه و هيّه كاسرة الإشارة اللى بين الصالة و الطرقه)

lo:: :P

على فكره يا محبط لو ربيت الرابيتات دي عندك في الجنينة مش هايعملوا لك أي مشاكل ..... وممكن حد ياخد باله منهم بمنتهى السهولة ... ولو ربنا فتحها عليك وتناسلوا .. يبقى هاتعدي يا عم وتبقى من أصحاب الأرانب وتركب الشبح وماحدش هايعرف يكلمك ...

لا ياعم الله الغنى......بلا شبح بلا عفاريت.... أنا ناقص قرقضة فى الورد اللى تعبانين عليه؟؟!!!

بس أنا علاقتي بهم لا تتعدى طبق الملوخية ...

و من سمعك يا معلّم

:angry: :D

[se_ Elsyed]

بس هازعل منك يا محبط لو لزقت تهمة العدوى في الأرنب ... أيوه إنت دكتور وعارف غن ده ممكن يكون بسبب إلتهاب اللوزتين ... وعمرنا ما سمعنا عن مرض إسمه إلتهاب الأرانب ... او جنون الروابت ...

[disappointed]

ألف سلامه على بنوتك وأبنك ...  :P

الله يسلّمك يا رب

:P

والحمد لله انه زار وخف ..قصدى الرابيت  lo::

مش كده برضه؟؟؟

و على رأى المثل : يا بخت من زار و خفف

:angry: :D

[disappointed]

الف سلامه على الكتاكيت يا محبط وربنا يبعد عنهم كل وحش يارب

الله يسلّمك يا "ياسّو"

:P

بينى و بينك أنا أصلى علشان بأعيش فى فترة نقاهة من موضوع الحيوانات الأليفة...مرووش يعنى من الحيوانات الأليفة بعد تجربة الأرنب دى...فأول ما قريت كلمة الكتاكيت اللى إنت كاتبها دى ما جاش فى بالى الولاد و مخّى راح للكتاكيت العاديّة , وقلت فى عقل بالى :

هوّه انا حأخلص من الأرنب أدخل فى الكتاكيت و الاّ إيه lo:: :P :angry: ؟؟

:D :P

تم تعديل 12 ديسمبر 2004 بواسطة disappointed

[disappointed]

بس هازعل منك يا محبط لو لزقت تهمة العدوى في الأرنب ... أيوه إنت دكتور وعارف غن ده ممكن يكون بسبب إلتهاب اللوزتين ... وعمرنا ما سمعنا عن مرض إسمه إلتهاب الأرانب ... او جنون الروابت ...

يا عم إنت إيش عرّفك

دى حالة جديدة و نادره إسمها "آكوايرد رابيتيزم كومبليكس"

:D lo:: :P

مشّى حالك يا عمّنا..... الواحد كان عايز يخلص من الداهية دى بأى طريقة (مع الإعتذار لأبوقراط و قسم شرف المهنة بقى)

:angry:

تم تعديل 12 ديسمبر 2004 بواسطة disappointed

[فــيــروز]

كل ده حصل mf(

ده انا قلت خلاص الرابيت بقى جزء لا يتجزأ من الاسره وانك هتعانى جامد لحظة الفراق الحتميه بينه وبين البنت لو قررتوا تعملوا الرابيت على الملوخيه ولا حاجه !! ولم اتخيل ان تاتى النهايه بهذه السرعه و السلاسه ..

الف سلامه على الاولاد و ربنا يتم شفاءهم على خير ngh: .. بس صعب علىّ الارنب الغلبان ده شال الليله خصوصا وانا متخيله بنتك وهى نازله بستفه و تقطيم فيه وهو مش فاهم هى ليه اتغيرت كده و بيبص لها ببراءه وعشم ولا كأنه بيقول لها : بعد الحب وبعد العشره "على راى كاظم الساهر" mfb: