الحقيقة المرة

[لماضة مصرية جدا]

السلام عليكم و رحمة الله و بركاته

الحقيقة انا آديلي فترة بمر بمواقف و دايما نهايتها الاقي الكلمتين دولم "الحقيقة المرة"

الم شنطة هدومي بكتبي بغبائي و انزل مصر و اقول بحبها....(وش عبد الحليم و هو راكب العجلة و تقريبا مش عارف يسوق)....و بعدين بلدنا قامت فيها ثورة و كدهوت و انا نازلة ابني الاقي حد يبصلي من فوق لتحت....و يوقلي....اصلك انتي متعرفيش الحقيقة المرة

انزل الجامعة و اخش في نقاش مع اساتذتي اللي هم اتعلموا اصلا في كندا و الولايات المتحدة و اقولهم ازاي احنا نبني المحاضرة علي افكارتخلي الطلبة نفسها تفكرو تخش المكتبة و تبحث...الاقيهم بيقولوا يبقي انتي متعرفيش الحقيقة المرة بتاعت التعليم الجامعي في مصر

اقعد مع شاب حيلة ابوه و امه علشان نبتدي نتفاهم عن الزواج و عن ازاي يبقي لينا حلم مشترك و حياة مشتركة و نخطط بدماغنا.....الاقيه برضه بيضحك ضحكة هبلة باين و لا عبيط و يقولي...اصلك متعرفيش الحقيقة المرة

اخش علي الفيس بوك اهيس و اكتب عن حق البني آدم في الحلم و في الحياة و في انه يحب.....الاقي الستات بيقولولي انتي متعرفيش الحقيقة المرة

و الرجالة برضه بيزقوني و يقولولي...فوقي...هي الحقيقة المرة معدتشي عليكي و لا ايه

و حيث اني وصلت من العمر ارذله....(قربت اقفل ال 87 موقف من الحقائق المرة)

انا بقي فكرت اني اسالك

ايه هي الحقيقة المرة

زمان كنت قريت كتاب حلو اوي اسمه lessons of life

كان واحد كتب لابنه مجموعة من الدروس اللي هو شخصيا اتعلمها في حياته و اختزلها في عبارات

هل ممكن نكتب في الحتة الفاضية هنا هوت

كل حاجة بتشوفها...بتتعلمها

طب ممكن نعمل book of facts

يعني رصولي ايه هي الحقيقة المرة...في الشغل....في البيت....في المواصلات....في الثورة.... في الحياة...فيا انا شخصيا

علشان كل يوم الصبح آجي و اشرب ممنها معلقة و بعدين بوق ميه

انا خايفة اموت....من غير ما اعرف ايه هي الحقيقة اللي مش مرة

و ليه اصلا الحقيقة المفروض تبقي مرة؟؟؟؟

كان معكم

من امام كورنيش النيل

علي بعد خطوات من السور...متخافوش انا مش هحدف نفسي...(وش حد جبان و اصلا مبيحبش يبل هدومه و كدهوت)

لماضة

الباحث عن الحقيقة

شكرا الف شكر مقدما....(وش حد بيسلم عليكو نفر نفر)

[ابراهيم عبد العزيز]

السلام عليكم ورحمة الله وبركاته الأخت الفاضلة لماضة

جملة وردت في موضوعك توقفت عندها مليا , وأثارت تفكيري كثيرا

انا خايفة اموت....من غير ما اعرف ايه هي الحقيقة اللي مش مرة

و ليه اصلا الحقيقة المفروض تبقي مرة؟؟؟؟

لأول مرة أنتبه لهذه النقطة بالفعل

لماذا دائما نصف الحقيقة بالمرة !؟ صراحة لا أجد إجابة لهذا السؤال

بالإشارة لبعض المواقف التي تفضلتي بسردها والتي إنتهت بجملة ( اصلك انتي متعرفيش الحقيقة المرة )

السؤال هو : هل ينطبق عليها وصف حقائق ؟

لا أراها حقائق

لكني أراها وجهات نظر لأنها أمور نسبية تختلف من شخص إلى شخص

وطالما أنها تختلف من شخص إلى أخر فأعتقد أنه لا يمكننا أن نوصفها بالحقائق

على سبيل المثال :

اقعد مع شاب حيلة ابوه و امه علشان نبتدي نتفاهم عن الزواج و عن ازاي يبقي لينا حلم مشترك و حياة مشتركة و نخطط بدماغنا.....الاقيه برضه بيضحك ضحكة هبلة باين و لا عبيط و يقولي...اصلك متعرفيش الحقيقة المرة

في مقابل هذا الشاب

نجد أن هناك شابا أخر يرى أن وجود حلم مشترك بينه وبين زوجة المستقبل هو شىء يُمثل قوة الدفع الأساسية للأمام

بالتالي ولوجود هذا التفاوت لا يمكننا التسليم أن ما حدث في هذا الموقف مثلا هو حقيقة

عذرا على الإطالة في هذه النقطة لكنها مهمة جدا

لأن هناك بعض الأمور السلبية في حياتنا وُصفت أنها ( حقيقة ) وبالتالي أصبحنا نفسيا مُستسلمين لها( فمن ذا الذي يستطيع تغير حقيقة ؟ )

لذلك أنصحك وأنصح نفسي بالتدقيق جيدا قبل أن نُوصف أمر ما أنه ( حقيقة )

تحياتي

تم تعديل 19 أبريل 2012 بواسطة ابراهيم عبد العزيز

[justme]

اصل الحقية المرة انك مش عارفة ايه هي الحقيقة المرة : lo::

كان هذا الموجز واليكم التفاصيل

القصة باختصار احتمال هي فقدان الامل

في التغيير

في الوصول الى نتائج

في التحسن

في اي حاجة حلوة

وبناء عليه

كبر

نفض

انسى (مصطلحات دارجة لمحاولة تجاهل المشكلة كأنها غير موجودة من خلال الاستمرار في وضع قائم بدلا من محاولة فعلية للحل)

في رأيي الشخصي ده نقص ايمان لأن اللي جواه ايمان قوي مش هايهمه ومش هيوقفه شيء عن المحاولة وده اللي فقده بعض الناس بسبب ظروف متفاوتة

اعتقد عليكي ان تبدأي بزرع الامل قبل ان تحاولي التغيير بس زي ما بيقولوا

baby steps

بسويس

والاهم والطاقة اللي ممكن تهد الجبال هي الايمان بالله والاخلاص في النية بمعنى ان تكون النية لله لان ساعتها بتتحول النفس من مثبط داخلي الى الرقيب على التنفيذ ولو النفس اشتغلت رقيب صعب الانسان يقف مهما كانت الاسباب

تم تعديل 19 أبريل 2012 بواسطة justme

[Dreamwithme]

بصي يا بنتي يا لماضة أنا شخصيا أعتقد إن كلمة الحقيقة المرة دي كلمة بنلبسها لوجهة نظرنا الشخصية للأشياء وليست حقيقة الأشياء وكلمة مرة بنحاول نوضح بها رفضنا السلبي لوجهة النظر دي لكن هي ليست الحقيقة لكن محاولة خايبة لأننا نقنع نفسنا إننا عاجزين عن تغيير واقع إحنا رافضينه يعني باختصار اللي يقولك انتي ماتعرفيش الحقيقة المرة بعد كده ابقي قولي له انت اللي ماتعرفش الحقيقة المرة إنت انسان قوي بيقنع نفسه إنه ضعيف عشان مكسل إنه يؤمن ويغير ويستغل قدراته اللي ربنا اداه له مساكي قوة وايمان بإن مفيش مستحيل

[عبير يونس]

بصي يا بنتي يا لماضة أنا شخصيا أعتقد إن كلمة الحقيقة المرة دي كلمة بنلبسها لوجهة نظرنا الشخصية للأشياء وليست حقيقة الأشياء وكلمة مرة بنحاول نوضح بها رفضنا السلبي لوجهة النظر دي لكن هي ليست الحقيقة لكن محاولة خايبة لأننا نقنع نفسنا إننا عاجزين عن تغيير واقع إحنا رافضينه يعني باختصار اللي يقولك انتي ماتعرفيش الحقيقة المرة بعد كده ابقي قولي له انت اللي ماتعرفش الحقيقة المرة إنت انسان قوي بيقنع نفسه إنه ضعيف عشان مكسل إنه يؤمن ويغير ويستغل قدراته اللي ربنا اداه له مساكي قوة وايمان بإن مفيش مستحيل

مش معقووووووووووووووووووووول

درييييييييييييييييييييييييييم

ازيك يا مودام

انا مبسوطة اوي اني شفتك

[ريمون]

و ليه اصلا الحقيقة المفروض تبقي مرة؟؟؟؟

اه الحقيقه مره :)

فيه كتاب جامد جدا اخر حاجه اسمه

The Road Less Traveled, Scott Peck

الكتاب قديم حبتين, يمكن من السبعينيات, لكنه من افضل الكتب اللى قراتها فى حياتى و الراجل اللى كتبه دكتور نفسى مشهور, بيخلط فيه بين افكار و مبادئ فى الحياه و قصص و مواقف قابلته. و كل ما الاقى صديق حيران او مكتئب, باشترى نسخه و اديهاله. يمكن اشتريت 10 نسخ من الكتاب ده لحد دلوقتى :)

المهم: اول جمله فى الكتاب دى بتقول " الحياه صعبه"

Life is Hard

و الدكتور سكوت بيقول ان مشكله اغلب الناس انها بتتوقع ان الحياه المفروض تكون سهله. لكن فى الحقيقه انها صعبه باستمرار. لكن لما الواحد يدرك ان الحياه صعبه هيلاقى الحياه بقت اسهل :)

اقرى الكتاب يا لماضه هيفيدك كتير

تم تعديل 19 أبريل 2012 بواسطة ريمون

[عبير يونس]

نرجع للموضوع

الحقيقة اللي مش على مزاجنا هي بس اللي مرة

ليا وجهة نظر في كلمة حقيقة

أصلا في رأيي لا حقيقة ثابتة إلا وجود الله سبحانه و تعالى

و كل ما دونه قابل للشك في نظري

كل ما نعتبره حقائق

طبعا ده غير تصنيف

حقيقة وراي

الحقيقة مثلا -بحسب المتعارف عليه- ان الشمس تشرق من المشرق و تغرب في المغرب

و الرأي اللي هو بيبقى حقيقة عند صاحبه او معتنقيه و غير ذلك عند الآخرين

زي ما أقول على شخص انه غلس و دمه يلطش

و هو بالنسبة لغيري ظريف و دمه خفيف و اوي كماان

تهتوا مني صح؟

أي خدمة

[نورالعين]

عزيزتى لماضة

كم يعجبنى عبثك الطفولى داخل النفس البشرية لنجد انفسنا معك امام معضلة نواجهها كثيرا ولا نحاول التحدث عنها

الاحباط ربما هي مفتاح سر هذه الحقيقة المرة

قد نفشل في تحقيق احلامنا برغم اجتهادنا في تحقيقها

فنصاب بهذا الاحباط و ينتابنا هذا الشعور انها الحقيقة المرة

لا تعطيك الحياة ما تطلب ربما لظروف خارجة عن ارادتك

وهذا ما يصيبنا بمرارتها

فكرة التحول لحلم جديد قد تكون الحل

ولكن اغلبنا يستمر بحياته على ما هي ايمانا بقدره في الحياة وان طموحه وحلمه لم يكن مكتوبا له

فعلا ما اقصى هذا الشعور حتى ان وصف المرارة له غير كافي بالمرة

[التونسى]

طب ممكن نعمل book of facts

يعني رصولي ايه هي الحقيقة المرة...في الشغل....في البيت....في المواصلات....في الثورة.... في الحياة...فيا انا شخصيا

علشان كل يوم الصبح آجي و اشرب ممنها معلقة و بعدين بوق ميه

انا خايفة اموت....من غير ما اعرف ايه هي الحقيقة اللي مش مرة

شكرا الف شكر مقدما....(وش حد بيسلم عليكو نفر نفر)

يعنى كل المداخلات دى .. ومحدش جاوب البنيه على اهم سؤال طرحته :closedeyes:

الحقيقه المره فى الشغل مثلا .. لو شغاله تبع مؤسسه او جهه او شركه ما .. عشان تنجحى وتوصلى لاعلى المراتب والمناصب .. مش لازم تكونى اكثر الموظفين اجتهادا وشطاره فى تخصصك .. لازم تكونى فى الغالب من اهل الثقه والقرابه والمحسوبيه والتزلف والتحزلق والنفاق احيانا للاسف .. او عندك مهارات اخرى ملهاش علاقه بطبيعة عملك .. واخر شئ ممكن تتقيمى عليه هو كفاءتك

الحقيقه المره بعد الدراسه مثلا .. بتلاقى معظم اللى اتعلمتيه بعيد تماما عن التطبيق فى الحياه العمليه الخاصه بيكى ..حتى لو شغلك فى نفس مجال دراستك .. وممكن تشتغلى فى مجال بعيد جدا عن دراستك .. وتلاقى احلى سنين عمرك ضاعت فى سنوات دراسه مكنش لها اى لازمه .. اللهم الا العلاقات الانسانيه اللى بتعمليها اثناء فترة الدراسه

الحقيقه المره بعدالجواز عن حب مثلا .. بتلاقى شخص تانى غير اللى انتى حبتيه.. او رسمتى فى خيالك صوره مثاليه لشكل الحياه معه بعد ما يجمعكوا سقف واحد ... بتحسى بالخدعه الكبرى ..ومن اول ليله يا عمده .. ويمكن هو كمان بيكون عنده نفس الاحساس هههههههههههههه .. وتلاقى نفسكم انتم الاتنين متقمصين دور عبد المنعم مدبولى .. وهو بيخبط بايديه على راسه وبيقول ((انا اللى جبت دا كله لنفسى )) هههههههههههههههههههههههههههه .. طبعا بعد الصدمه دى والحقيقه المره .. الحياه ممكن تستمر وممكن تبقى لذيذه وحلوه .. وممكن بيحصل توافق وتقارب لوجهات النظر وتقبل من الطرفين للعادات المختلفه ..والحب بيكون الدافع والمحث للتوافق والتقارب ده

الحقيقه المره بعد السفر بره مصر مثلا ... اننا بنكتشف فى احيان كتير ان احنا هربنا من الرمضاء الى نار اشد بأس .. رغم ان الواحد من كتر قرفه فى الاول من مصر بيقعد يصرخ بينه وبين نفسه ويقول ((خرجووووووووووونى من هنااااااااااااااااااااا)) لحد ما يسافر .. ويكتشف الحقيقه المره .. وهى ان التمن اللى بيدفعه مقابل السفر والغربه تمن غالى اووووووووووووووى

وحقايق كتيره مره .. دا كان بس مسح زور .. اسيب بقى بقية الناس تثرينا

تم تعديل 20 أبريل 2012 بواسطة محمود البصيلى

[احمد رضوان]

الحقيقة المره هو وصف للفجوة بين ثلاث أشياء

الحلم والأمل - المتوقع - الحقيقة على الأرض

حيث أن الأحلام غير محدودة بسقف والامال العريضة هي ما تدفع الإنسان منذ أنزل إلى الأرض الى التحرك في اتجاهات جديدة ، ولكن دائما الإنسان عقله يعي ما يمكن تحقيقه بقدراته الحالية وهذا يسمى المتوقع ، ولكن غالبا ما يتحقق بالفعل يكون اقل من المتوقع وهنا ... تكون بالفعل الحقيقة مره

[أبو محمد]

فى كثير من الأحيان

نعرف الحقيقة المرة

عندما نضع أنفسنا

مكان المختلف معنا

[Salwa]

الحقيقة دائما .....مرة.

هل الحقيقة دائما مرة ؟؟

لو تم تغيير الاجابة فهذا معناه ......تقدم ملحوظ نحو الأفضل ..

أما لو تم تغيير السؤال .........فهذا معناه ثورة أكيدة . :clappingrose:

[ماستر]

الحقيقة المرة شئ نسبى ما هو بالنسبة لك مر ممكن ميكنش مر بالنسبة لى بالعكس ممكن يكون كويس جدا

نفدر نقول الحقيقة المرة هى ما يخالف هوانا او ما هو عكس رغباتنا

يعنى ممكن لو واحد مش عايز ينجح السنة دى فى الامتحان و يسقط ودى رغبتة فى الحالة دى يبقى سقوطة حقيقة حلوة

ولو مثلا رايح مشوار ومش عايز اوصل بدرى ومحتاج اتأخر ساعتين او ثلاثة فى الحالة دى حقيقة زحمة الشوارع وعدم وجود مواصلات حقيقة ليست مرة بالعكس حقيقة كويس وحلوة

ما اقصدة ان المرارة او الحلوة شئ نسبى تماما ومتغير يعنى ممكن يكون مرة دلوقتى وبعد سنة يتغير وهاكذا.

اما عن طلب لماضة

طب ممكن نعمل book of facts

يعني رصولي ايه هي الحقيقة المرة...في الشغل....في البيت....في المواصلات....في الثورة.... في الحياة...فيا انا شخصيا

فى الشغل:

مفيش شغل اساسا ودة اكتر حقيقة مرة، يعنى نفضل نتعلم وننحج فى امتحانات وبعدين منلاقيش شغل او نشتغل حاجة غير تخصصنا مناسب

فى البيت:

ان مفيش اصلا بيت يعنى مع ازمة السكن والغلاء الفاحش فى اسعار الاراضى والشقق ازى الشباب يقدر يكون عندة بيت

فى الثورة:

ان لسة مفيش ثورة، بعد ثورة يناير استولى عليها الشويش والدرويش وفرغوها من كل شئ يمت للثورة فلم تصل الى رجل الشارع العادى ولم يحس بيها

فى الحياة:

مش عارف

فى لماضة:

انك تغيبى وترجعى بموضوع يستحق التفكير

[se_ Elsyed]

بصي يا بنتي يا لماضة أنا شخصيا أعتقد إن كلمة الحقيقة المرة دي كلمة بنلبسها لوجهة نظرنا الشخصية للأشياء وليست حقيقة الأشياء وكلمة مرة بنحاول نوضح بها رفضنا السلبي لوجهة النظر دي لكن هي ليست الحقيقة لكن محاولة خايبة لأننا نقنع نفسنا إننا عاجزين عن تغيير واقع إحنا رافضينه يعني باختصار اللي يقولك انتي ماتعرفيش الحقيقة المرة بعد كده ابقي قولي له انت اللي ماتعرفش الحقيقة المرة إنت انسان قوي بيقنع نفسه إنه ضعيف عشان مكسل إنه يؤمن ويغير ويستغل قدراته اللي ربنا اداه له مساكي قوة وايمان بإن مفيش مستحيل

الحقيقة المُرة من وجهة نظري إن

العروسة تغيب فترة وترجع لنا إيد ورا وإيد قدام

لا فطير مشلتت من بتاع الصباحية

ولا كحك .. من بتاع الصباحية

مش هانطمع ونتكلم في زفر ولحوم متحركة ..

لكن أي حاجه يعني تعملي بها منظر يا دريم مش كده يعني

صحيح يا ولاد .. الجواز الثوري مختلف شكلاً وموضوعاً وفطيراً عن جواز قبل الثورة

ماشي يا دريم ... خليكي فاكراها

[لماضة مصرية جدا]

السلام عليكم و رحمة الله و بركاته

بشكر حضراتكم...نفر نفر و نفراية نفراية

كل مداخلة قعدت اقراها مرة و اتنين و تلاتة

بشكر علي كل زاوية انارة بتحاولوا تنوروها

بس انا هقف عند المدخلة دي

الحقيقة دائما .....مرة.

هل الحقيقة دائما مرة ؟؟

لو تم تغيير الاجابة فهذا معناه ......تقدم ملحوظ نحو الأفضل ..

أما لو تم تغيير السؤال .........فهذا معناه ثورة أكيدة . :clappingrose:

ماما سلوي قالت لم تم تغيير السؤال....فده معناه ثورة اكيدة

في البداية انا فهمتها كده

يعني نغير السؤال بدل ما نقول هي ليه الحقيقة مرة...نسال و نقول....هي الحقيقة لازم تكون مرة...و لا ممكن يبقي ليها خيارات تانية؟؟

و مشيت في السكة دي شوية

و بعد كده لقيت اني وصلت لسؤال تاني

يعني ايه اصلا حقيقة؟؟؟

هو ايه اصلا ثابت

و ايه متغير؟؟؟

طب مش احنا في اوقات بيبقي عندنا "قناعات" بنفتكر انها ثابتة...و شوية كده بتتغير

طب هو فيه حقيقة اصلا؟؟؟

ع فكرة

ده مش احباط اطلاقا...و لا هلوسة....و لا فذلكة مدهونة بفلسفة

ده سؤال...ميحرني من فترة

يعني ايه حقيقة؟؟؟

و اللي محيرني اكتر

هل ممكن نكتشف بعد فترة ما....(مش مهم العمر الزمني اوي علشان محدش تصعب عليه نفسه)...ممكن نكتشف ان احنا عقلنا كان مليان هلاوس و خرافات...تحت مسميات كتير....يا مجتمعية....يا دينية!!!

و ده السؤال اللي قبلهم او موازي ليهم

يعني ايه خرافة اصلا؟؟؟

طب امتي نكون احرار.....امتي العقل يتحرر....لما نقدر نوصل للحظة تنوير نميز فيها بين....الحقيقة و الخرافة

حتي لو عرفنا انها "خرافة" طب نقدر نتعامل معاها بحجمها الخرافي...و بلاش نحطها في خانة الحقيقة اللي احنا اصلا بنحاول نوصل ليها

انا معنديش اجابة

و مش عارفة اوصل لاجابة دلوقتي

و بقيت مقتنعة ان مهمتي في الحياة مش اني اوصل لاجابة و اقدمها جاهزة لناس تانية...يهزوا راسهم ورا مني و يقولولي ايون هو ده

بقيت مقتنعة ان مهتمي في الحياة اني أسال السؤال الصح

و مهمة كل واحد فينا انه يشيل الجمجمة اللي فوق كتافه و يحاول....يبقي "حر"

هيجري في اتجاهات كتير

و هيتوه....كتير اوي

بس اكيد بعد التوهة....هيلاقي بر...يلاقي "حقيقته"

و دي وجهة نظر