المظاهرات المتحدة للثوار و الاسلاميين...هل سيعيد العسكر لعبته مع الإخوان؟

[MZohairy]

يوم الجمعه مظاهرة جديده لكنها من اطياف الشعب كله تقريبا

الكل يهدف الى اسقاط العسكر و انتخابات رئاسيه بدونهم

حلو

عندما اتحد الشعب وقت الثورة و بعد نجاحها... قام العسكر بإلقاء طعم مغري للإخوان خصوصا و من وراءهم السلفيين لتحييدهم لكي ينفرد العسكر و اعلامه بالثوار و تتشتت القوى و يصبح التغلب عليهم و اطفاء ثورتهم امرا يسيرا

بل ان الكثير من الاخوان قاموا ردا لجميل العسكر معهم بتمجيده و التهليل له و الاساءة البالغة للثوار و مهاجمتهم في كل المناحي ( ماعدا حازم ابو سماعيل حقيقة)

لو افترضنا اننا سنتحد مرة اخرى لكي نتغلب على سطوة العسكر

ما هو الضمان لكي لا يتكرر ما حدث؟

هدايا اخرى و طعم آخر و سناره تانيه و تحييد جديد ثم تشتييت ثم ثم ثم ثم ؟؟؟؟؟؟

[أبو محمد]

إسقاطه قبل أم بعد 30 يونية ؟

أصلها تفرق يا مايسترو

قبل 30 يونية المجلس أمام الستار

بعد 30 يونية مفيش حد حيشوفه

لن يحكم .. ولكنه سيتحكم

[ريمون]

يوم الجمعه مظاهرة جديده لكنها من اطياف الشعب كله تقريبا

الكل يهدف الى اسقاط العسكر و انتخابات رئاسيه بدونهم

حلو

عندما اتحد الشعب وقت الثورة و بعد نجاحها... قام العسكر بإلقاء طعم مغري للإخوان خصوصا و من وراءهم السلفيين لتحييدهم لكي ينفرد العسكر و اعلامه بالثوار و تتشتت القوى و يصبح التغلب عليهم و اطفاء ثورتهم امرا يسيرا

بل ان الكثير من الاخوان قاموا ردا لجميل العسكر معهم بتمجيده و التهليل له و الاساءة البالغة للثوار و مهاجمتهم في كل المناحي ( ماعدا حازم ابو سماعيل حقيقة)

لو افترضنا اننا سنتحد مرة اخرى لكي نتغلب على سطوة العسكر

ما هو الضمان لكي لا يتكرر ما حدث؟

هدايا اخرى و طعم آخر و سناره تانيه و تحييد جديد ثم تشتييت ثم ثم ثم ثم ؟؟؟؟؟؟

بصراحه انا مش متفائل من بكره خالص

الثوار حاسيين انهم اتخانوا من الاسلاميين, خصوصا الاخوان (السلفيين منزلوش الثوره اصلا)

و الناس نازله باهداف مختلفه

الثوار عاوزين يبعتوا رساله قويه للمجلس العسكرى انه مش هيسمح بتزوير الانتخابات لصالح الفلول و ان الانتخابات لازم تتم فى معادها و ان العسكرى ينسى التدخل فى كتابه الدستور.

مؤيدى ابو اسماعيل نازلين يقلبوها ظلمه

و الفريقيين مش طايقين بعض اصلا خصوصا بعد اللى حصل الاسبوع اللى فات عندما دمر مؤيدى ابو اسماعيل منصه لبعض الثوار.

الاخوان نازلين فى الزحمه علشان لو الموضوع قلب جد يقولوا احنا كنا هناك من اول يوم و بعدها ينزلوا بتقلهم (زى ما حصل يوم 28 يناير). بس هم مش هيقودوا حاجه هم عاوزين بس يحافظوا على وجودهم فى الميدان.

للاسف خوفى اكبر من التناحر بين الفرقاء اكتر من خوفى من العسكر. و المشكله ان النفوس مش صافيه.

اقرأ المقال ده عن رأى نواره نجم فى ابو اسماعيل هتعرف كميه عدم الثقه اللى موجوده

حبيبة ماما

نواره نجم

أقر وأعترف أن الشيخ حازم صلاح أبو إسماعيل كان قد باع لى التروماى وأنا كنت قد اشتريته. ملحوظة: «باع التروماى وأنا اشتريته» هذه عبارة مجازية تعنى أنه أوهمنى بما ليس من حقيقته، أحسن أنصاره ربنا فاتح عليهم ويا قلبى فهمهم مغاير تماما لما تعارفت عليه البشرية من فهم اللغة والإشارات. كنا فى وقت نشعر فيه بالعزلة، حيث تهتف قلة قليلة: يسقط يسقط حكم العسكر، بينما يتهمنا الجميع بأننا نريد خراب البلاد، وكسر الجيش، وهدم الدين، حين خرج الشيخ حازم أبو إسماعيل يقول إننا محقون فى هتافنا ضد المجلس العسكرى، وكان الإسلامى الوحيد الذى قال ذلك، فما صدقت، وشبطت فيه، واستبشرت خيرا، حتى جاء يوم 18 نوفمبر 2011، حين فاجأنا بأنه لن يعتصم، وسحب مجموعته الكاملة، ولم يبق إلا القلة القليلة التى ضُربت ودفعت ثمن غدر الشيخ من أرواحها وأعينها.

وقال على رأى المثل: تعرف فلان؟ أيوه… شفت باسبور أمه؟ لا.. يبقى ماتعرفوش.

ها نحن نتعرف إلى الشيخ حازم أبو إسماعيل من قُرب، حيث نرى أمامنا طفلا مدلَّلًا، تَعوَّد على إجابة مطالبه، وعدم تحمُّل نتيجة أفعاله، والامتناع عن الاعتراف بخطئه، الأمر الذى يفسر كثيرا من تصرفات الشيخ حازم أبو إسماعيل السابقة.

يعنى مثلا، طفق الشيخ حازم يضرب أبقاق ضد المجلس العسكرى، لكن حين استلزم الأمر موقفا حقيقيًّا على الأرض بدأ فى المراوغة والتلاعب، بل وعدم تحمل مسؤولية ما يدعو إليه أو يطلبه من الناس، فقد دعا إلى يوم 28 أكتوبر 2011، وكان الناس على أتم الاستعداد للاعتصام، وكنت فى منزلى وقتها، وشرعت فى حقب متاعى استعدادا للنزول إلى الميدان والاعتصام حين قال الشيخ حازم إنه سيذهب للحديث مع شخصيات مهمة جدا، وسيساعدونه فى الأمر، وسيكون فتحا بإذن الله، وحنكسَّر الدنيا، بعدين الظاهر راح اتعشى وريَّح له ساعة، ثم عاد ليدعو ليوم 18 نوفمبر، الذى سيكون نهاية حكم العسكر، خصوصا أنه اجتمع بجهات مهمة جدا جدا جدا يعنى، ويوم 18 ده بقى، يوم الخلاص إن شاء الله… والمجلس حيبقى فى الدمار الشامل، الصبر بس، الأمر الذى دفع مصابى الثورة إلى الاستمرار فى الاعتصام منذ يوم 28 أكتوبر انتظارا ليوم 18 نوفمبر اللى حنكسَّر فيه الدنيا. جاء كل امرئ وعلى ظهره مستلزمات اعتصامه، انتظارا لتكسير الدنيا، أين الشيخ حازم يا ولاد؟ زمانه جاى.. زمانه جاى.. زمانه جاى.. حتى أتى وأخبرنا بأنه كلّم ذات الجهات المهمة جدا، وارتأوا أن يؤجلوا الاعتصام إلى ما بعد انتخابات مجلس الشعب! فانفجرت القلة المرابطة هاتفة: «قول لى يا حازم يا صلاح.. ليه بتخرَّب الكفاح». فارتبك وقال بملء حنجرته إنه يمهل المشير طنطاوى 24 ساعة، كما أنه يُعِدُّ لنا مفاجأة مدوّية الجمعة المقبلة، والتى كان من المفترض أن تكون 25 نوفمبر… لحد دلوقت ما نعرفش إيه المفاجأة، كما أن المهلة التى أعطاها للمشير لم تنتهِ بعد. انسحب جُلُّ أنصاره كالخراف التابعين، ولم يبق منهم إلا قلة تُعَدُّ على أصابع اليد الواحدة، ثم أخذنا العلقة التى يعلمها الجميع، بينما شعر شباب حملته، الذين بقوا فى الميدان، بالحرج، وطلبوا منه النزول، فنزل لمدة خمس دقائق محاطا بسياج من أنصاره وقال: «همممم.. برافو برافو.. استمروا استمروا»، وخلع.

الآن، حبيبة ماما شبطانة فى الرئاسة.

- يا ابنى أمك أمريكانية.

- مس أمليكانية.

- يا ابنى اسمها متسجل فى قوائم الناخبين الأمريكيين.

- مس مستجل.

- يا ابنى أمك معاها باسبور أمريكى وآدى رقمه.

- مس معاها…. إيييييييييييييى وأنا مالى أنا عايز اللئاااااااااسسسسسةةةةةةةةةة.

ثم ألقى بجسده على الأرض وهاتك يا ترفيس. بينما أنصاره يقولون: انتو حتعقَّدوا لى الواد؟ اللى نفسه فيه جيبوهوله ما دام ربنا فاتح عليكم بدل ما ينام دمعته على خده… يا ضنايا يا ابنى. وقال الشيخ حازم لأنصاره: من كان يؤمن بالله واليوم الآخر فلا يغادر مكانه. ثم غادر على الفور. طب دى ناس لا نزلت عشان عيل جتته اترمت فى الزبالة، ولا عشان بنية اتعرّت، ولا عشان حرة اتكشف على عذريتها، ولا عشان برىء دُهس بمدرعة مرتبكة، لكنهم رابطوا فى الطريق تصديقا لك، آنسهم ساعة واحدة بس… طب يا حبيبة ماما، انتى مش متعودة تباتى برّه البيت؟ تعالى بص عليهم تانى يوم طاه… أبدا. أصل الجو تراب وممكن يوسّخ الهدوم.

يا اختى كميلة يا اختى… طب احنا مش فاضيين لك يا شيخ حازم، شوف حد غيرنا يدلّعك إحنا فينا اللى مكفّينا.

تم تعديل 19 أبريل 2012 بواسطة ريمون

[MZohairy]

إسقاطه قبل أم بعد 30 يونية ؟

أصلها تفرق يا مايسترو

قبل 30 يونية المجلس أمام الستار

بعد 30 يونية مفيش حد حيشوفه

لن يحكم .. ولكنه سيتحكم

و الله ماعرف يابو محمد

بس طبعا الاهداف مش مشتركه بالكامل

بتوع الاخوان نازلين علشان حسوا انهم كلوا هوا و ماخدوش حاجه فعليه بمجلس الشعب

السلفيين و خصوصا بتوع ابو اسماعيل نازلين علشان رافضين استبعاده

الثوار نازلين علشان رافضين حكم العسكر منذ 12 فبراير 2011 و حتى الآن

التلاته ضد العسكر لكن لأسباب مختلفه

و اظن ده اهم ما سيجعل من نصيب هذه المظاهرات الفشل ...الا اذا اتحدوا في الهدف و الفكر