حفلة من غير دعاوي .. في سبوع " سيدهم " إبن عبير الشرقاوي

[se_ Elsyed]

المكان : نفس المكان السري بتاع كل مرة اللي بيجتمع فيه المشرفين الأشاوس ... إضاء خافتة ... صمت مطبق إلا من صوت وأوأة الولا " سيدهم " إبن عبير ....

انا اللي إخترت له إسم سيدهم ده بعد عذاب وبحث في معاجم ومعاني الأسماء .... ( حتى لو عبير بتدعي عليه لحد دلوقت .) لكن طالما أنا مقتنع بفكرة الأسم ومعناه .. يبقى خلاص ما يهمنيش من حاجه أبداً

وفي عز السكون والوأوأة .. يدخل الأدفيزر إلى قاعة الإجتماعات بخطوات هادئة واثقة .. مرتدياً بدلتة السوداء الداكنة .. ومرتدياً نظارتة السوداء الداكنة برضوا .. مش عارف ليه مع إن الدنيا ضلمة .. لكن عُمر ما حد فينا سألة إنت بتعمل كده ليه ... لان من حق الكبير يتدلع

الأدفايزر : عمتم مساءً أيها الأفاضل

المشرفون في نفس واحد : عمت مساءً يا مستر أدفايزر

الادفايرز : كعادة إجتماعتنا دائماً ما تكون حافلة بالأعمال والقرارات .. هذا إستهلال لازم منه زي ما أنتو عارفين .... أنا اجتمعت بكم النهاردة لمناقشة طلب أحاطة تقدمت به المشرفة الفاضلة مدام عبير ... بتلتمس فيه تعيين إبنها الوليد الرضيع مشرفاً تحت التدريب ... عفواً يا أخت عبير .. إسم الفاضل إبنك مش واضح في الورق ....

عبير : اللهي يجيلك ويحط عليك يا سين سين ... يارب يجيلك عيل وأسميهولك " جُعلص " ولا " حبلص " ولا أي حاجه تودي في داهية والسلام ...

أدفايزر : رويداً وعلى رسلك يا أختاه ... ما الخطب ؟

عبير : الخطب لا يسر عدو ولا حبيب ... يرضيك يا مستر ادفايرز .. سين سين يستغل ضعفي بعد الولادة .. ويسمي لي الواد اللي جايباه على 6 عيال .. " سيدهم " ... يعني أنا أبقى ام سيدهم ؟ .. ده أبوه لو عرف هايقطع خبري انا كان نفسي أسميه وليد أو عمار ... أو أي إسم من أسامي البني أدمين

فلانه : إنت مش هاتبطل يا جدع إنت السماجة اللي إنت فيها دي ؟ ما تخليك في عيالك وسميهم زي ما انت عاوز ... تبهدل عيال الناس معاك ليه ؟ إنت مش خايف من دعوة وليه ضعيفه بعد الولادة بتكون دعوتها مستجابة تنشك دعوة تسخط ضفدعة يتيمة ؟

سلوى وهي تتناول أطراف الحديث : لأ حقيقي إخص عليك يا سين سين .. يا إبني يا حبيبي الإسم ممكن يلزق في الولد وده بونبينو صغير حرام عليك تعقده وتخلي العيال يتريقوا عليه في الأسكولا .

محمد أوف أمريكا : عندنا في أمريكا من حق كل طفل يبلغ الثانية عشرة من عُمرة إنه يتقدم بإلتماس للمحكمة الفيدرالية يطلب فيها تغيير إسمه لو مش عاجبه .

سكوربيون : إنت قصدك إيه من الإسم ده يا سي سُخام إنت ؟ إنت عاوز تعمل فوتنه طائفية بين المشرفين ؟

ادفايرز: تُحذف كلمة سُخام من مضبطة الجلسة .. الفاضل سكوربيون .. إحترم نفسك بدل ما أطردك بره ...

أبو محمد : وكتاب الله سين سين ده لو نزل عندنا المنشيه ده أحنا نقطعوه حتت .. قال سيدهم قال ؟ انا كأسكندراني ما أقبلش طفل صغير يتسمى سيدهم .

أسد : وانا كبورسعيدي اعتبر إسم سيدهم ده إعتداء شخصي عليه .. ولو جدع أي اهلاوي يهوب ناحية إستاد المصري تاني

سين سين : إييييييييييييييييييييييييييييييييييييييييييييييييييه ... حيلكو .. هو أنا كافر ووقع في إيد مسلمين في غزوة من الغزاوت ... أنا كنت باهزر مع عبير والله العظيم .. وبعدين إسم سيدهم ده إسم جديد .. وأخر واحد إتسمى به كان جورج سيدهم بتاع ثلاثي ضوضاء المسرح

عبير وهي تبكي : منك لله .. ده هزار زبالين ده وهاتخلي لي الواد يبور كده

سين سين : يا ستي ما تروحوا السجق المدني تسموه إسم حقيقي إن شالله تسموه توتو حتى ...

عبير : بعد إيه يا خويا ؟ بعد ما الواد إسمه بقى على كل لسان وعملت له إسم حركي يا مؤذي ؟

ادفايزر : نقطة نظام ايها السادة .. إحنا هنا عشان نناقش طلب الأخت عبير بإنضمام الفاضل Their Master الشهير بسيدهم إلى فريق الإشراف ... أحب أسمع رأيكم

سكوب : إشراف مين لا مؤخذه ؟ هي هاتعيل ؟ وده هايعمل معانا إيه وإزاي وهو لسه بيرضع ؟

سلوى : يا روح قلب تيته .. ياختي إسم الله والحارس الله ... انا موافقه ... وأنا اللي هاشيله كمان وأهشتكو وأهننوا

فلانه : أنا مش موافقه .. أنا ما بقاش ليه خُلق وطولة بال للعيال .. وأي عيل هايهوب ناحية المنتدى هنا هاعض ودانه .

عبير وهي مازالت تبكي : إن شالله تسلم لي يا ماما سلوى يا أم قلب حنين ... كده يا سكوب إنت وفلانه تكسروا بخاطر الواد ؟.... والله لو شفتوه لهاتحبوه قوي .

محمد : خلينا عقلانين يا مدام عبير وبعيداً عن العواطف مش مسألة نحبه او نكرهه ... مستر سيدهم ده هايعلم معانا إيه في الفريق ؟

عبير : أنا أشرح لكم ... بقى انا طول فترة الحمل وانا كنت بأسمع سيدهم .. ييييييييه قصدي وليد .. اللهي أشوف فيك يوم يا سين سين ... كنت بأسمعه موسيقى كلاسيكية .. واغاني عربية للست نجاة الصغننه ... والست أصالة ... والأستاذ كاظم والناس ديهيت .. زائد كمان إن نفسي كانت مفتوحة في الفترة دي لتأليف الشعر والزجل وشرب القهوة .. ففي خلال 9 شهور ضربت ييجي 300 قصيدة .... كل ده والواد سيدهم عمال يسمع ويتكيف وكل قصيدة كان يسمعها وتعجبه يروح مرفص وخابطني في بطني فكنت أعرف إنها قصيدة كويسة وموزونة .. ولما كان يسكت ما يتحركش .. كنت أروح مقطعة الورق ده وأسك على الموضوع ... الواد طالع حسه مرهف وودانه موسيقية .. طب أنا امبارح سمعته أوبرا كسارة البندق .. والله العظيم كان عمال يتشقلب من الفرحة وهاين عليه يغني كمان .

سكوربيون : لا إله إلا الله .. بقى كان عمال ياكل بندق وهو بيسمع الأوبرا... شوف إزاي يا جدع ؟ ... أيوه برضوا إحنا مال اللي جابونا بمواضيع البندق والسحلب دي ؟ أنا صبري نفذ وقربت ازهق ..

عبير : حيلك وما تبقاش زي السكوربيون يا كامل ...هاكمل لك يا كامل ... فلما ولدت بالسلامة .. وسيدهم شاف النور .. قولت الظروف اللي جاية صعبه في البلد في ظل حالة عدم الإستقرار السياسي دي ... ونفسي أمن مستقبل الواد .. وأشوف له وظيفة ميري يستقر فيها ويعمل منها قرشين ينفعوه .. فقلت أستأذنكم يعني إنه يساعدني في باب الفنون والأدب والشعر .. إن شالله لو بنصف مرتب ...

سين سين : أنا معاكي يا عبير .. شوفتي بقى كنتي ظلماني إزاي ؟.. على فكرة إسم سيدهم هايبقى لايق عليه كمشرف غتيت يخوفوا به العيال الصغيرين ... يا أستاذ عادل بغض النظر عن أي شيء .. أنا راجل إدارجي وماشي على خطة في التعيين إسمها الـ Head Hunting يعني إستقطاب الكفاءات النادرة وتسكينها في مراكزها .. ومش هانلاقي أكفء ولا أجمل من إبن أختي عبير ... والأجر على الله ... وانا عن نفسي هاتبنى الواد ده .. بس يبقى حد يغير له .. أنا هاتبناه من بعيد لبعيد يعني وأعلمه شغل الحلاقين وإزاي يبقى غتيت وسقيل ...

عبير : إن شالله تسلم يا سين سين يا جابر بخاطري دايماً .. اللهي يقعد لك في عيالك وتشوفهم أدفيزرات قد الدنيا وكل واحد فاتح منتديين تلاته ومش ملاحق عالزباين .. اللهي يارب الفيس بوك أو جوجل يشتروا المنتديات دي منهم ويقبوا على وش الدنيا ويبقوا حاجه كبيرة ..

سين سين : اه ياختي .. مش إنتي اللي كنتي عماله تدعي عليه لحد ما كنتي هاتسخطيني ضفدعة مسلوخه زي فلانه ما بتقول ؟ صالحيني بقى بفرخه بلدي من اللي عمالة تضربيهم بقى لك كام يوم دول ....

فلانه : وكتاب الله بطنك دي اللي هاتوديك في داهية وإنت عندك إستعدادا تبيع ضميرك عشان سندوتش شاورما ....... يا جدعان بس صلوا بينا عالنبي ... إحنا بعد الثورة دلوقت والجو ملتهب ومليان تسلخات . وكلنا كنا شايلين أعلام ونازلين للتحرير بنقول لأ للتوريث .. نيجي بقى ونعين إبن عبير وإبن مش عارف مين مُشرف وبنبقى بنناقض نفسنا ونلاقي الناس تاكل وشنا ؟ خصوصاً وإن في ناس في المنتدى سنين سنانهم ومستعدين ينطوا في كرش أي مشرف لو عملنا كده .. وكتاب الله ده تيمور يغزك بأي مطوه في جيبه يا سين سين لو جبت سيرة الموضوع ده في المنتدى

سين سين : ما تخافيش .. أنا باعرف أروض تيمور .. كفاية إني أقول له إن الولاد سيدهم هايبقى عضور او كدر في حركة 26 إبريل - تاريخ ميلاد سيدهم بالمصادفة - .. وأجيب سيدهم لفه كده على انجي حمدي . وأسماء محفوظ .. واحمد عادل ... وأول ما يشوفوا الواد قلبهم هايحن وهايحبوه لانه آمور ما شاء الله .. ومش بعيد يعملوا له مليونية كمان في التحرير ويهتفوا له ويقولوا " أشنق راسهم .. إقطع إيدهم ... مش هايحكمنا غير الولا سيدهم "

ثم تنطلق عبير في النحيب والبكاء تأثراً برفض فلانه ...

أبو محمد : يا ست الكل الله يرضى عليكي بطلي عياط شويه ... وإنت يا عم سين سين يا بتاع إصطياد الرؤوس .. إنت هاتعمل لي فيها هندي احمر وتسلخي لي فروة شعر الناس ؟

سين سين : يا عم أبو محمد ماحدش له عندنا حاجه ... الواد هايتعين يعني هايتعين .. اومال نرمي لحمنا يا ناس ؟

سكوب : يا جدع إنت بطل شغل الجزارين ده ... نرمي لحمنا إيه وعضمنا إيه ؟ خلي الولا سيدهم يكمل تعليمه الاول وبعدين بعد الثانوية نبقى نشوف له شغلانه في أي مصلحة حكومة .. أو أنا كفيل إني أسفرة إيطاليا يغسل مواعين في أي فندق من الفنادق بتاعتي ...

عبير : ومين يعيش يا كامل ياخويا .. أنا عاوزه أمن مستقبل الواد .. مش تقول لي يغسل مواعين وكلام من ده ... اترضاه لإبنك يا أخا العرب ؟

أسد : يا ستي أمني مستقبله وأشتريله شهادة إستثمار ... أو إفتحي له حساب المستثمر الصغير بعشرين جنيه في البنك الأهلي .. لكن مش على حساب المنتدى وجودته .

ثم تنطلق عبير مرة أخرى في العياط

سلوى : حرام عليكم بقى البنت لسه والده ومش مستحمله ده كله .. أنا موافقه والله العظيم .. مش هانخسر حاجه .. إن شالله سيدهم يبقى مشرف تحت التدريب .. واهو كده كده هايبقى مع مامته ويشرب أصول الصعنه منها .

عادل : طب الموافق من السادة الأعضاء يرفع إيده .. وقبل أن يهم الأعضاء برفع أو خفض أيديهم يقول الأدفايرز

موافقه

ثم تسري همهمه وهمز ولمز بين أعضاء المنتدى بعد نزول إعلان تعيين سيدهم إبن عبير مشرفاً بالمنتدى

يُتبع

[Dreamwithme]

جميلة قوي يا سي السيد متابعة كمل بسرعة وخد الطبق ده سلي نفسك فيه هو اينعم جه متأخر بس حقك يا أفندم

[باهى الطائر الحزين]

مافضلش غير ..

ستيته ؛ وست ابوها ؛ وجعيدي

خمسه وخميسه ويحتلم المحاورات

( قل اعوذ برب الفلق )

ناس عينيها مدوره

&

[عبير يونس]

ايييييييييييه

الحمد لله

اهو الولد اتعين اهو

ميرسي يا سين سين على تعبك معايا

و مردودة لك بإذن الله

و في انتظار باقي الحكاية

:egyflag:

دريم ويذ مي

كده برضه

طب داخلة بطبق كحك على سين سين

افتكري الغلبانة الوحدانية أم سيدهم

:sad:

باهي

جعيدي اسم رائع فعلا

خلاص

حيبقى المشرف سيدهم الجعيدي

واو

ميوزيكل جدا

:wub: