اللى فاهم حاجه يفهمنى ....زياره المشير لجنود ملتحين ازاى

[nana]

انتشرت الصوره على موقع بوابه الاهرام وبعد شويه شالوهاوكانت بتقول ان المشىر زار المجندين المصابين

[se_ Elsyed]

يا نانا يا عزيزتي .. الإعلام لسه متبرمج على زيارات السيد الرئيس حفظه الله .. فمافيش مانع تلاقي بواقي زبالة إعلامية بعد الثورة بيقعوا في بديهيات مضحكة زي ما خفضوا رتبة عنان من فريق الى لواء

لكن بصراحة التليفزيون كل شوية يقرفنا ويذيع اللقطات دي لزيارة طنطاوي للمصابين .. اللي أنا عارف مصيرهم هايكون إيه النهاردة أو بكره وهابصحلوا إخواتهم في طُره

لكن أقسم بالله إن سجن هؤلاء هو وسام شرف على صدورهم ... والسجان هنا هو المسجون زي اعضاء عصابة المجلس العسكري اللي السجن مستنيهم لا محالة

[nana]

انتو مش ملاحظين الدقون للمجندين

[mamdowh]

ده على أساس ان دقنهم طولت من امبارح للنهارد من اللى شافوه ياعينى

[se_ Elsyed]

يا جماعة دي مجموعة من المتظاهرين المعتصمين اللي إتنقلوا للمستشفيات .. وأونكل طنطاوي عامل فيها الصدر اللي لا مؤخذه حنين وبيزورهم .. لكن يمين بعظيم الناس دي هاتتشقط أول ما يقفوا على رجليهم ....

[mamdowh]

يا جماعة دي مجموعة من المتظاهرين المعتصمين اللي إتنقلوا للمستشفيات .. وأونكل طنطاوي عامل فيها الصدر اللي لا مؤخذه حنين وبيزورهم .. لكن يمين بعظيم الناس دي هاتتشقط أول ما يقفوا على رجليهم ....

عندك حق دا بس لزوم الدعاية والإعلام شو يعنى

[nana]

بس التلفزيون بيقول زيارته للمجندين والظباط المصابين مش انصار ابو اسماعيلوبعدين كلهم سنهم صغير يعنى ينفعو قوى مجندين

[se_ Elsyed]

بس التلفزيون بيقول زيارته للمجندين والظباط المصابين مش انصار ابو اسماعيلوبعدين كلهم سنهم صغير يعنى ينفعو قوى مجندين

دي ناس حافظة مش فاهمه يا نانا

منى الشاذلي أذاعت تقرير ..وقالوا فيه برضوا إن دول جنود وضباط مصابين

انا فاهم قصدك على فكرة .. عاوزه تقولي إنهم متنكرين يعني ؟

أستبعد ذلك

من ناحية سنهم ... فمعظم اللي كانوا موجودين هما شباب جامعي محترم يا ست الكل مش البلطجية اللي عارفين مين وراهم

[nana]

استحاله المشير يزور مصابى المعتصمين اذا كانو بيقولو انهم حجزو الدكاتره اللى بتعالجهم فى الميدان

تم تعديل 5 مايو 2012 بواسطة nana

[nana]

وبعدين كان زمانهم قالو عشان يبينو مدى حنيته زى مانت بتقول

[se_ Elsyed]

لأ عادي

أصل مستشفى كوبري القبة العسكري هناك قريبة قوي من الأحداث .. وممكن جداً يكونوا نقلوا مصابين من المعتصمين فيها ... وطنطاوي زارهم عشان يطمن عليهم ويقول لهم " وحياة امك إنت وهو لانفخكم "

منتهى الأبوة والتحفيز والدفع للامام - شلاليت يعني -

[nana]

يعنى بعد مايضربوهم خدوهم المستشفى العسكرى يعالجوهم جاىز بردو

[nana]

وبعدين تانى يرجعو يضربوهم مش كده

[se_ Elsyed]

وبعدين تانى يرجعو يضربوهم مش كده

أكيد .. دي السجون المدنية مقارنة بالسجون الحربية تعتبر جنينة الميريلاند .... ربنا ما يوريكي

وبعدين العسكر بيتبرمجوا أسهل من برمجة عسكور الامن المركزي

لأن طول عمره عايش في الصحرا والمعسكرات وما بيختطلتش ببني ادمين غير في الاجازات الخاطفة

عشان كده المجلس رماهم في النار وشحنهم ضد الثورة والثوار وقال لهم إتعاملوا بقى

[ابو محمود]

كده تقريبآ اللعبه بقت على المكشوف

http://www.youtube.com/watch?v=LDmDwHIzvd4

[لماضة مصرية جدا]

السلام عليكم و رحمة الله و بركاته

أنا داخلة التوبيك علشان استأذن بس صاحبته ان احنا نخلي عنوان المرحلة الانتقالية تحت رعاية مجلس العسكر طويل طويل التيلة و طويل البال و طويل الحيلة الصراحة

هو هذا الشعار

الشعب بيستسمحكم و بيقول..."اللي فاهم حاجة يفهمني"

مافيش موقف يمر علينا من ساعة ما الناس سابت التحرير يوم 11 فبراير الا و لازم ينتهي بهذه الجملة اللي لازم تتكتب في تاريخ مصر المعاصر

طب ده علي اساس ان احنا فهمنا ايه اللي حصل في احداث محمد محمود

و اللي حصل في ماسبيرو

و اللي حصل في قضية التمويل

و اللي حصل في العباسية

الهدف الوحيد من كل المتاهة دي

ان احنا نفضل نلف بالاسئلة جوالين نفسنا لغاية ما نتهد و نقع

و نقبل بالامر الواقع...اللي هو ايه بقي؟؟؟؟

كان زمان بلال فضل في اول الثورة دايما يقول فيه سيناريو لاجهاض الثورة...مش اجهادها

و الحقيقة ده طلع الاجهاد اللي يؤدي الي الاجهاض و الموت العمد و بسبق الاصرار الترصد...و الشاهد الرصاص الحي

و برضه

اللي فاهم حاجة يفهمنا

و لا ميفهمناش

المهم حد يطمنا علي عجلة الانتاج

و يطمنا ان ابو عيلاء صحته حديد و لسه لمؤاخذة بيلعب في مناخيره

و احنا مع اننا بره طره و كدهوت بس دوخينا يا لمونة

كل ثورة و احنا بخير

نجيلكم في ثورة تانية ان شاء الله

[nana]

أخبار > محليات >

14

المشير طنطاوى يزور مصابى العباسية بمستشفى كوبرى القبة ويتفقد مواقع الأحداث

أ ش أ

5-5-2012 | 12:59

14

7247

المشير طنطاوي

الصور كانت نازله مع الخبر ده قام المشير حسين طنطاوى القائد العام رئيس المجلس الأعلى للقوات المسلحة بزيارة مصابى القوات المسلحة بمستشفى كوبرى القبة الذين أصيبوا فى أحداث العباسية التى قام بها مثيرو الشغب ونتج عنها إصابة ضابط وسبعة ضباط صف و140 مجندا، وأوصى المشير بتوفير أقصى درجات الرعاية للمصابين.

كما قام المشير طنطاوى بتفقد مواقع الأحداث التى جرت أمس فى منطقة العباسية ومحيط وزارة الدفاع حيث قامت القوات المسلحة بفتح الطرق الرئيسية والفرعية وتأمين حركة المواطنين.

وقدم المشير حسين طنطاوي القائد العام رئيس المجلس الأعلى للقوات المسلحة العزاء لاسرة شهيد مصر والقوات المسلحة، وأكد أن رجال القوات المسلحة لا يبخلون بأرواحهم فى سبيل الوطن وأنهم يقومون بواجبهم تحت أى ظروف.

وشارك فى الجنازة أهالى الشهيد وزملاؤه وأصدقاؤه من الشباب وضباط وصف وجنود القوات المسلحة لتوديع جثمانه إلى مثواه الاخير فى مشهد مؤثر، حيث تعالت أصوات الأهالى للدعاء له بالرحمة والنقمة على أعداء الوطن ومن تسببوا فى هذه الاحداث.

والشهيد سمير أنور اسماعيل من مواليد 29 مارس 1986 وهو من قرية الوفاقية الدلنجات بمحافظة البحيرة، وكان محبوبا وسط أهله وأصدقائه الذين أصيبوا بالصدمة من فراقه واستشهاده على أيدى الخارجين عن القانون. .

[nana]

غيرى ياحبيبتى براحتك

تم تعديل 6 مايو 2012 بواسطة nana

[se_ Elsyed]

غيرى ياحبيبتى براحتك

برافو عليكي يا نانا ...

الفضيحة ريحتها فاحت قوي .. خصوصاً بعد صورة الأسلحة المظبوطة وبعد تصوير البلطجية مع الشرطة وهما بيضعوا الرتوش الاخيرة على الخطة

لكن الفاجر ما بيهموش على فكره ... وعايشين عادي جداً وكأن شيء لم يكن

[nana]

مش ملاحظين ان الملتحيي فى الصوره اللى فى النص هوه اللى فى اول الفيديو ده على اليوتيوب

اسفه لانى مش عارفه ارفعه بس شوفوه عاليوتيوب ويا ريت حد ير فعه فيديو ملتحين مجهولين يشعلوا اشتباكات العباسية

تم تعديل 6 مايو 2012 بواسطة nana