عالم نبيل فاروق

[yasovinas]

يا نهار ابيض ده انا عجوز قوي انا اخر حاجة قريتها كانت المغامرين الخمسة

تختخ ولوزه وعاطف ومحب والبنت التانية نوسه اظن والشاويش مش عارف اسمه ايه والظابط وكانت في المعادي

وطبعا ميكي وسمير بس سمير بطلتها بدري

تان تان بس للعلم انا لغاية دلوقت لما انزل مصر اقعد اقرا ميكي اللي بيجبوها العيال وطبعا بيبقى في رصيد كبير مخزون 3 شهور وهاتك يا قرايه

[محمد شلبى]

هو ده الكلام يا استاذ احمد محسن ys):

نبيل فاروق ظاهرة فريدة,استطاع ان يجمع قلوب الشباب العربى جميعا على حب رواياته وشخصياته الرائعة.

وفعلا ادهم صبرى شخصية اقرب الى الواقع من بوند وسوبرمان وخرافاتهم,والله العظيم رواياته دى لواتعملت افلام فى امريكا هتكسر الدنيا

[moslema salafeya]

كان فى قصة لنبيل فاروق من قصص كوكتيل 2000 كان اسمها الفارس الأخير كانت قصة جميلة جدا عن فارس من أيام الدولة العثمانية هيوصل رسالة للسلطان اتنقل لعصرنا وعرض فيها المفارقات بشكل ممتع وفى نفس الوقت محترم جدا بعدها بكام سنة لقينا عادل إمام واخد القصة وعاملها فيلم لكن طبعا مع إضافاته المعروفة من الإسفاف والإطار البعيد تماما عن الإحترام trch:

كنت بحب جداً مجلة ماجد وفضولى

يا سلام يا سى لا فى فكرتينى بماجد وفضولى اللى كان بيدوخنا وراه كل عدد وكان فيها مغامرات لبنتين اسمهم شمسة ودانة وكان فيها كمان معلومات عن عادات الشعوب كانت مفيدة جدا :blink:

تم تعديل 11 ديسمبر 2004 بواسطة moslema salafeya

[ابو يوسف]

مش معقولة يا جماعة ....

رجعتونى لأحلى سنين عمرى .... (الجملة دى حسستنى انى عندى 60 سنة .. مع انهم 59 بس rs: )

حرام عليكى يا فيروز ... موتينى من حكاية فروة راسه دى !! rs:

كانت أكتر حاجة بتجننى انه يطلع عليه 100 واحد مسلحين ... و هو أعزل و تبدأ المعركة ... و أقلب الصفحة علشان أقرأ ( نعيه ) و لكن طبعا أقرأ ان الـ 100 اتكوموا كومة رجل واحد !!! :blink:

لا أنكر أن شخصية أدهم صبرى كان ليها تأثير كبير على كل الشباب (و الشابات طبعاً ) خاصة فى سن معين ...

كل واحد شابف نفسه أدهم صبرى ... الرجل الذى لا يعرف المستحيل ...

يضرب العشرات بلكمة واحدة ...

يبدل شكله و صوته زى ما هو عاوز ...

كل البنات بيموتو فيه .... (خاصة المدعوقة سونيا جراهام )

بيعرف حوالى 50 لغة حية و ميته و بتطلع فى الروح !!! اجادة تامة بكل لهجاتها !!

بيتعامل مع كل أنواع الاسلحة ... من النبوت الى القنبلة الهيدروجينية !! me0:

بيسوق كل أنواع المركبات .... بدءً من العربية الكارو للطيارة النفاثة !! rs:

ذكائه يفوق الوصف .... بيعرف فى كل حاجة و أى حاجة !!

مين ميحبش يبقى أدهم صبرى ؟؟؟؟؟ cr((:

بجد بجد ....

كانت أيام جميلة ...

[ابو يوسف]

بس للعلم انا لغاية دلوقت لما انزل مصر اقعد اقرا ميكي اللي بيجبوها العيال وطبعا بيبقى في رصيد كبير مخزون 3 شهور وهاتك يا قرايه

أقولك على سر فى ودنك .... cr((:

أنا لغاية دلوقتى ما أشوفش مجلة ميكى الا لما أقراها ...

و لما أتقفش ...

بأعدل النضارة و أتقمص لغة العالم ... و أقول ... :blink:

أصلى بأعمل بحث عن "مدى تأثير مجلات ميكى فى عقلية الأطفال ... "

أنا باعشق بندق بطيبته و غباؤه ...

و بأموت فى بطوط و نرفزته !!

وعم دهب و بخله ... و خزنته اللى لما يزهق ... يضرب غطس وسط الفلوس !!

وعبقرينو العبقرينو !!

و الجدة بطة (طول عمرى نفسى آكل من اديها فطيرة التفاح !!!)

و زيزى و اتحاد النسوة !!

وعصابة القناع الأسود ... النموذج المجسد للص الغبى خفيف الدم !!! (عمرهم ما يئسوا من سرقة خزنة عم دهب )

ودنجل .... أبو الدناجل !!

مين تانى .........

مين تانى .........

[yasovinas]

ومين تاني :blink:

وكوكا ملكة جمال البقر

وابو طويله العامل الكادح

ومحظوظ اللي كلنا بنتمنى حظه

وابناء اخو بطوط اللي في الكشافه

وبلوتو اعبط كلب في العالم

والله احلى من اي قصص واي افلام

[METALLICA]

تختخ ولوزه وعاطف ومحب والبنت التانية نوسه اظن والشاويش مش عارف اسمه ايه

:blink: حد ينسى الشاويش فُرقع !!!

[METALLICA]

ياااااه فكرتوني بتاريخ طويل . . . .

طبعا ميكي أول المجلات التي كنت حريص على متابعتها ( وحتى الآن أحياناً cr((: ) . . وبعدين المغامرين الخمسة و الشياطين ال 13 ثم جائت سلسلة روايات مصرية التي تابعتها منذ بدايتها ولم أستمر إلا مع سلسلة ملف المستقبل ؛ لميولي العلمية rs: ولكنها أصبحت معتادة وكان آخر عدد قرأته رقم 125 تقريباً وأحتفظ بكل الأعداد بداية من العدد الأول ، أما رجل المستحيل مقرتش أتابعها خالص لأني كنت بموت من الضحك و أنا بقرأها بسبب الأشياء الخرافية التي يتمكن منها أدهم صبري ، وبالنسبة لزهور :blink: النمرة جت غلط خالص . . .

كوكتيل 2000 رائعة . . متنوعة . . . خفيفة . . .

[c'est la vie]

كنت بحب جداً مجلة ماجد وفضولى

يا سلام يا سى لا فى فكرتينى بماجد وفضولى اللى كان بيدوخنا وراه كل عدد وكان فيها مغامرات لبنتين اسمهم شمسة ودانة وكان فيها كمان معلومات عن عادات الشعوب كانت مفيدة جدا h):

وكمان كان فيه " ذكيه الذكيه " فاكراها؟ :)

ومغامرات كسلان جداً وبي بي وأمونة وشملول :)

المجله دى كنت لما أقرأها رغم انها كانت اماراتيه الا انى كنت بحس فيها بمعنى " الوحده العربيه " يعنى كانت بتجيب معلومات عن كل الدول والمشاركه من مصر والسعوديه والسودان وكل الدول العربيه تقريباً , وكان بيسعدنى جداً جملة " لكل العرب من المحيط للخليج " رغم انها متداوله لكن كنت بحس لما بقرأها انى عايشه ايام الدوله العربيه الموحدة بس في القرن العشرين.. :lol:

تم تعديل 12 ديسمبر 2004 بواسطة c'est la vie

[mwefy]

http://www.rewayat.com

لاسترجاع الذاكره

[فــيــروز]

على فكره يا جماعه "ابو يوسف خلّى بالك" ;)

فعلا اتمنى ان نقرا تحليلا علميا لشخصيات مجلة ميكى على وجه التحديد وما اذا كانت القيم التى تنشرها كلها صحيحه ام تحتاج مراجعه

اتذكر من فتره قصيره اشتريت احد الاعداد الجديده من مجلة ميكى وكان على الغلاف صورة عم دهب وهو بيتفرج على ماتش فى الاستاد من خلال تليسكوب تذكرته "25 قرش" بينما مكتوب على الاستاد من تحت التذكره ب 25 جنيه !! :D

وقتها توقفت لحظات وقلت .. زمان اما كنا بنشترى المجله كانت الرساله التى ستصل الى ذهننا اتوماتيك ان عم دهب بخيل .. مستخسر يدفع 25 جنيه فى تذكرة ماتش !! لكن دلوقت يا ترى بنفكر فى نفس الطريقه ولا هنسال نفسنا : هل يستحق الماتش ان يدفع فيه تذكره ب 25 جنيه !! وهل كل مواقف عم دهب تعبر فعلا عن البخل !! ام انها فقط تنقل وجهة النظر المضاده لوجهة نظر مجتمع استهلاكى بالدرحه الاولى !!

[مهيب]

فيروز ... فعلا انتى عندك حق فى اللى قلتيه وأنا عاجبنى قوى كلامك ... و روايات ميكى و عالم والت ديزنى بالكامل مش بالبساطة اللى احنا فاكرينه بيها ... أو على الأقل فى كتير من الأدباء بيعتبره كده ..

بصى أنا هتكلم و أمرى لله ... أنا عارف ان الموضوع أساسا فكاهى ... لكن انتى اللى طلبتى رأى علمى ... استحملى بقى .. هه .. بس

أصل الموضوع ليه أصل ... و يكفى انك تعرفى ان الصين فى فترة الحرب الباردة بين أمريكا و الاتحاد السوفيتى اعتبرت أنكل سكروج أو عم دهب من أقوى رموز الرأسمالية الأمريكية ... و منعت دخوله لأرضها كرمز .. بل انها حاربته لدرجة انها اعتبرته جاسوس مدسوس من الأمريكان ... لزرع قيم رأسمالية فى نفوس النشء..

وان جيتى للحق وبالرغم من مبالغاتهم الشديدة ... لكن مش هنلاقيهم بعيد قوى عن الحقيقة ... حتى لما تفتكرى كان ازاى والت ديزنى بيطلع العرب ... دايما العربى الجاهل البخيل البدوى الهيئة .. بعربيته الوهمية .... و استعباده لبطوط علشان يتعامل معاه .... و طبعا مكانش بينسى الغطرة و العقال و الجمل أحيانا كرمز ... و كتير من التحليلات اللى اتكتبت عن تناول والت ديزنى للجنسيات الأخرى .... و تطرقه للنقاط دى بالذات ... لو تفتكرى بعض القصص عن المكسيكيين وان معظمهم بيتسموا بالعنف و الاجرام .. وان من الأفضل لبطوط انه مايعبثش معاهم علشان ماينضربش بالنار ... و الآسيويين و أسرارهم وغموض طقوسهم و معابدهم ...

ناس كتير من المعقدين و ذوى النظارات ثقيلة الوزن اعتبروا ان عالم والت ديزنى عبارة عن اسقاط سياسى و اجتماعى ضخم .... محاولات دؤوبة لزرع قواعد المجتمع الأمريكى .. علشان يبقى من الطبيعى عندنا موضوع المواعدة أو الـDating ... زى ما بطوط دايما بيواعد زيزي أو ديزى ... وان يبقى عادى جدا قصص السعى وراء أحلام الكنوز و أوهامها بدل العمل و الشغل ... زى معظم أحداث الروايات ... متنسيش ان فى الروايات دى بتتم اظهار قيم بتمثل أمريكا قوى ... عم دهب اللى بدأ من الصفر و بقى ملياردير ... ابن أخوه اللى بيحاول ينجح بس مش عارف ... و اللى بيمثل الطبقة العظمى فى امريكا .. اللى كمان بيحاول يبقى مغامر و يتخذ طريق المكسب السريع ... شخصية بندق ... واللى تعتبر من أوضح اسقاطات والت ديزنى ... واللى هو من برة أحمق لكن لما يتناول الحبوب السوبر يتحول لشخص خارق ... متنسيش ان فى الوقت ده كانت معظم القصص الأمريكية على هذا الغرار .. سوبر مان .. بات مان .. كابتن أمريكا ... وكانت الرسالة واضحة وصريحة بعد نهاية الحرب العالمية التانية ... المواطن الأمريكى اللى يبدو من الخارج عادى ... و لكن لأنه فى أمريكا و اللى بتمثل هنا الحبوب السوبر ممكن يوصل لقمة النجاح ... و ده هو العالم الجديد....

لكن يمكن اللى مايختلفش عليه اتنين ... ان والت ديزنى قدر يصنع عالم على الرغم من سطحيته و خلوه من المواعظ و الرسالة ... الا ان الصغيرين و الكبار حبوه جدا و هاموا بيه ... قدر يعملنا المدينة الصغيرة .. مدينة البط ... يمكن ده اللى خللى كتير من الأطباء النفسيين ينصحوا الناس اللى عليها ضغوط حياتية و شغل و أعباء كتيرة انهم يقروا قصص والت ديزنى قبل النوم يوميا ... لأنهم بيعتبروها قصص خالية من الدم و الصراعات ... حتى أشرارها ظرفاء محبوبين ... و هم مش أشرار من الدرجة الأولى .. هم لذاذ ... مفيش خوف .. مفيش ترقب ... مفيش معانى انسانية دمها تقيل .... قدر يعمل عالم سطحى .. و السطحية أحيانا كتير بتبقى مطلوبة وبيبقى من الصعب اجادتها بالشكل ده ... والت ديزنى قدر فعلا يعمل العالم الحلو ... اللى الكل بيتمناه حتى واحنا عارفين انه مش حقيقى ...والسطحية بتبقى مطلوبة لتهدئة الأعصاب و رمى الهموم ... وزى ما قال الدكتور أحمد خالد توفيق فى مرة انه هو نفسه .. و هو كاتب له قدره من الثقافة و المكانة .. بيقرا روايات ميكى جيب .. ايه العيب ان الواحد يقرا حاجة ظريفة ... خالية من اى شيء يشد الأعصاب سواء فى الخير أو فى الشر ... ماتحتاجش لتفكير

أرجو أكون جاوبت تساؤلك .. وسعيد بمعرفتك بجد

مهيب

تم تعديل 15 ديسمبر 2004 بواسطة مهيب

[فــيــروز]

الزميل العزيز / مهيب

مرحبا بك فى المنتدى وشكل مشاركاتك ستكون اضافه جميله للمكان .. non::

اليس من المؤسف ان يتحول شئ جميل مثل اعمال والت ديزنى من عمل الهدف منه الامتاع البرئ و الترفيه عن الاطفال و الكبار ايضا الى لعبه سياسيه .. خساره كبيره جدا .. :P

هناك لا شك بعض المبالغه فى استنتاج ما وراء شخصيات والت ديزنى .. اتذكر انى قرات مره تساؤل حول سر تواجد الصغار "اولاد اخو بطوط" معه وانهم ليس لهم اب او ام معروفين !! وما قد يوحيه هذا للاطفال حول الشكل المفترض للاسره !! الصراحه شعرت ان هذه مبالغه قويه ربما لا تخطر على بال الاطفال الذين قد يظنوا ان آباء هؤلاء الاطفال مسافرون مثلا او حتى ماتوا فى حادث اليم :huh: .. لكن ليسوا بالضروره نتاج علاقات غير مشروعه مثلا !! :)

زى ما بطوط دايما بيواعد زيزي أو ديزى ... وان يبقى عادى جدا قصص السعى وراء أحلام الكنوز و أوهامها بدل العمل و الشغل ...

اييييييييييييوه هو ده اللى قصدته بالظبط ما قصدته بالمبالغه ys):

أما بخصوص موضوع تصوير والت ديزنى للعرب .. فى قصه حديثه من قصص ميكى كان الاطفال فى زياره لمصر و التقوا ببعض المصريين الصغار ممن يرتدون العمامه .. لكن هذه المره كان فيه سبب وجيه لارتدائهم العمامه وهو انهم فى مغامره لاستكشاف الهرم mc: .. لكن هذا لا يمنع من وجود جمل فى الخلفيه taz::

و السطحية أحيانا كتير بتبقى مطلوبة وبيبقى من الصعب اجادتها بالشكل ده ...

جمله صحيحه جدا .. لدرجة ان البعض يرون ان السطحيه او عدم عمق المضمون هو من اهم اسباب شيوع النموذج الامريكى فى الحياه بشكل عام .. انه لا يطلب من احد بذل مجهود .. مثل برامج و افلام كثيره هى الاكثر انتشارا و تفوقا على نظيرها الاوربى مثلا ..

أرجو أكون جاوبت تساؤلك .. وسعيد بمعرفتك بجد

أنا اسعد حقيقى .. استمتعت اوى بقراءة مداخلتك هذه

تحياتى :P

[مهيب]

(الزميلة) التى أصبحت بأسلوبها و ثقافتها الآسرتين (صديقة عزيزة) من الوهلة الأولى

اتفق معك فى موضوع المبالغة هذا ... ولكنه كما تعلمين ليس شيئا غريبا على كل الاتجاهات الشيوعية بصفة عامة هذه المبالغات ... كما أنى أعتقد ان والت ديزنى نفسه لم يكن يقصدها بشكل تآمرى أكثر مما كان يقصد عالم فى خياله ... لكنه من الطبيعى أن يأتى مواكبا لموروثات خاصة به ...

كنت قد قرأت من قبل دراسة عن تناول الفكرة الأدبية ومدى تأثره بالحقبة الزمنية ... بالطبع ليس التأثر مقصودا .. فمثلا يقولون أن قصص مصاصى الدماء و المذؤبين و الشر الأنيق الشيك ان جاز لى التعبير ... انتشر و ساد فى فترات ثورات العمال و البروليتاريا وذلك لاساءة صورة السيد المهذب فى نظر الناس ... وأن قصص الأبطال الخارقين كسوبر مان و بات مان و كابتن أمريكا و حتى الرجل العنكبوت انتشرت فى فترات ما بعد الحرب العالمية الثانية .. و كأن أمريكا تقول ... احم احم نحن هنا ... حتى روايات الاستحواذ و المخلوقات التى تسكن داخل الانسان دون أن تغير من هيئته انتشرت فى فترة الحرب الباردة ... و كأنهم يقولون أن الشيوعى ليس غريب الشكل منكوش الشعر غير مهندم الثياب ... انه من الممكن أن يكون جارك أو زميلك فى العمل ... طبعا لم يكونوا الكتاب يقصدون هذا بشكل مباشر ... لكنه نوع من الموروث ... الاناء الذى ينضح بما فى داخله لو صح تعبيرى

حتى لو تتبعتى السينما المصرية ستجدين هذا محققا ... انظرى لتناول السينما المصرية لشخصية اليهودى و تطورها .. منذ أن كان اليهود جزء من النسيج المصرى أيام أفلام نجيب الريحانى لما كان سليمان نجيب يهودى مش عاوز يهرب من هتلر و مش عاوز يسيب مصر ... أو استيفان روستى ... حتى الأعمال اللى زى حسن و مرقص و كوهين ... كانت شخصية اليهودى عادى ...

ثم تطورت بعد طرد اليهود لأن اليهودى فى أفلام فترة ما بعد الثورة و خصوصا الأفلام الدينية عبارة عن متآمر جبان .. متخصص فى الخمر و النساء و الهام سادة قريش بكيفية القضاء على الدين الجديد بمسكنة وبعد انصرافهم يلتفت الى أصحابه وهو يهتف .. غدا سنقضى على محمد .... بالرغم من انهم فى الفترة دى كان ليهم فرسانهم .. و أبطالهم و محاربينهم

ثم بدأت الفكرة بالنضوج مؤخرا ... من أعمال زى مسلسل رأفت الهجان .. اللى صور اليهودى صح ... منهم اليهودى الجبان و الشجاع و البطل و المؤمن بالقضية و الذكى جدا و الغبى و المليونير الشريف و هكذا ....

خلاصة القول يا فيروز -ياللى اسمك على اسم مطربتى المفضلة- ان يمكن فعلا والت ديزنى كانت ليه اسقاطاته الغير مقصودة اللى نابعة من موروثاته

عجبتنى قوى قوى كلمتك عن شيوع النموذج الأمريكى .. و بشكل ما أفهمك ... تقصدين أن الشخصية الودودة الانسانية الحميمة التى لا تدعى البطولة أو العمق أو حتى الخير المطلق أو الشر المطلق أحب للشخص العادى اللى زيى و زيك ... اللى بيعتبر ركوبه للـCTA مغامرة تستحق الدراسة ... على العموم دايما كان بيثبت ان اللى بيعرف يبسط الناس هو اللى بيلاقى القبول أكتر من اللى بيدعى الموعظة و بيفرض نفسه بشكل أو آخر ...

فى رأيى أجمل مافى عالم والت ديزنى انه عالم خالى من الادعاء ... مش شرط فى نهاية القصة ان عصابة القناع تنهزم ... أجمل ما فيه انك تحبى كل ركن صغير فيه ... كل قطعة قرميد ... كل تكشيرة على وش بطوط

طولت عليكى .. و صدعت دماغك ... بس الرد على ردك كان متعة ... لازم اعترف بده .. ..كمان المناقشة معاكى كانت حاجة حلوة قوى .. وميرسى قوى على مجاملاتك الرقيقة

أحيانا الواحد بيبقى مش مصدق نفسه انه لقى حد بيفكر زيه أو فى نفس مناطقه .... و تقوليلى مشاركتى أنا اللى كانت متعة؟؟ على العموم أشكرك بحرارة و أخشى أن تضيئى

تم تعديل 20 ديسمبر 2004 بواسطة مهيب

[Th!nk]

أنا كنت احب أقرا ملف المستقبل وأشوف التقنيات المذهلة وكنت أحس أن رجل المستحيل تهجيص... ولما كبرت وعقلت بطلت ... اللى كان يجننى جدا أنى كنت أقرأ معلومات فى هذه القصص وكان يقول عليها فى آخر الصفحة أنها حقيقة علمية لكن لما كبرت أكتشفت للأسف أنه بيستعمل خياله فى محتوى الحقيقة نفسها!!! وده يبق أسمه أستكراد للناس اللى بتقرأ... والله ساعات أتذكر حقائق قالها وبعدين أتغاظ أوى من أن الواحد كان ياخد معلومة من كتب مثل هذه... B)