مطلوب افكار لفرح بسيط و شيك

[Farida]

قريبتى حا تتجوز قريب و نفسها تعمل فرح شيك و بسيط عايزة اعرف ممكن يتكلف كام و عايزة افكار حلوة يعنى انا سمعت ان فيه ناس فى فرح جابت فرقه موسيقى عربيه و مغنى بيغنى اغانى قديمه و طبعا مافيش رقص و لا دياولوه...و ايه الرأى ....ممكن المساعده

تم تعديل 10 ديسمبر 2004 بواسطة Farida

[Cleo]

فيه مركب الفلندرة بتاعت القوات البحرية ودى مكانها جنب كوبرى قصر النيل... أعتقد البوفيه فيها رخيص. ممكن تتفق معاها. المركب شيك وحكاية غن الفرح يكون فى مركب فى النيل جديدة. مع دى جى كويس وشوية ورد بسيط أو شمع ملون على الترابيزات ممكن الفرح يبقى شيك و بسيط.

عيبه إن المركب متحركة يعنى مقيدين بمواعيد محددة.

[yasovinas]

فكرة زفة الحناطير عجباني جداً

وربنا يتمم لها بخير يارب

[Farida]

كليو شكرا على مساهمتك فكرة المركب فكرة حلوة بس المشكله انه مش حا يساع ناس كتير ...قولى لى على الدور بتاعه القوات المسلحه اخبارها ايه .

ياسو شكرا على مداخالتك بس الحناطير دى تنفع فى اسكندريه اكتر متهيألى ,,,,

[yasovinas]

هي تنفع في اسكندرية وانا اصلاً عملتها في اسكندرية وكانت جميله جداً

بس اضحكك على موقف حصل بعدها

كنت واقف انا والمدام في اشارة محطة الرمل ومرت زفة حناطير كبيييييرة وكانت جميله جداً فلسه هنقول احنا عملنا زيها لاقيت اللي واقف جنبي بيقول لزوجته تلاقي ابو العروسه عربجي طبعا لميت الدور ولا كاني هنا

[disappointed]

أنا حأقول لك على اللى كنت ناوى أعمله فى فرحى و تراجعت عنّه ( حأقول لك فى الآخر سبب تراجعى)

الفكرة هى فى أن يتم عمل الفرح فى شكل Reception فى مكان مفتوح و مبهج و فى توقيت مبكّر لا يستدعى السهر لساعات متأخّرة إلى الفجر( وهى فكرة مناسبة تماماً للأفراح التى تقام فى غير شهور الصيف الحارّة)

انا كنت عايز أعمل كده فى فرحى , وفعلاً سألت فى الشيراتون , و عرفت إنه ممكن يتعمل فرح لـــ100 إلى 200 فرد فى حديقة مجهّزة بالفندق و ملحق بها حمّام سباحة , بحيث يتم تزيين المكان بما يتناسب مع المناسبة , و يكون البوفيه فى شكل "باربيكيو" يتم الشواء فيه فى الهواء الطلق , مع قيام الفندق بتوفير التالى :

- زفّة فرقة كمنجات و آلات وتريّة على الطريقة البافاريّة

- دى جى يقوم بتشغيل موسيقى ناعمة و هادئة

و يكون الحفل من منتصف النهار وحتى غروب الشمس

وبذلك فإننا نتحدّث عن فرح يتم فى جو ناعم و رومانسى و بسيط و هادئ و شيك دون تكلّف أو سواريهات ملعلطة ألماظ و ترتر , ودون رقص و زيطة و وجع دماغ و صوت عالى

مميّزات الفكرة من وجهة نظرى كانت :

1- إستثمار فترة مابعد الفرح بالنسبة للعروسين بحيث يمكنهم الخروج خروجة لذيذه خاصة بهم من المغرب إلى منتصف الليل قبل الذهاب لمنزل الزوجيّة (فموضوع إن العروسين يدخلوا منزل الزوجيّه الساعة 4 الفجر و همّه بيجرجروا فى رجليهم من التعب و أمّة لا إله إلا الله واقفه ليهم فى الشارع و تيييت تييييت .. و بيييييب بيييييب... ويقلقوا راحة الجيران , و يفضل العروسين فى البلكونه يشاروروا للناس لغاية مايمشوا... كل ده شيئ مزعج جدّاً)

2- مريح جدّا للمعازيم الذين لديهم أطفال صغار و يمثل السهر مشكلة بالنسبة لهم

3- يمكن إقامة الفرح فى وسط الأسبوع دون التفكير فى كيفيّة الذهاب إلى المدارس أو العمل فى صباح اليوم التالى

4- فكره جديده بعيدة عن التكرار الممل فى سيناريوهات الأفراح التى أصبحت محفوظة (زفة مليانه زيطة لمدة ساعة لغاية مع رجلين العروسين ييجى ليها كرامبات... الكوشة المعتادة.... الرقص و التنطيط و الزيطة و الزمبليطة و إختلاط الحابل بالنابل.. ثم..... إتفضلوا البوفيه.... ثم..... العروسة تغنى تقول إيه للعريس و العريس يرد عليها و يغنى ليها إيه.... ثم....طوابير السلام و إلتقاط الصور فى الكوشة... وفى النهاية...فيلم فيديو للفرح لو تم طمس وجوه العروسين و المعازيم لما إستطاع من يشاهد الفيلم التفريق بين فرح و آخر)

5- جو ناعم و شيك ورقيق و رومانسى

أما عن مساوئ الفكرة (وهى الأسباب التى لم تمكّننى من تنفيذها) فهى :

1- لا تصلح فى الجو الحار و الصيف (فرحى كان فى بدايات شهر سبتمبر ذو الرطوبة العالية- كان يوم 9/9/1999)

2- لن يفهمها كثير من المعازيم و العروسين حيتهروا تريقه و ودودة و نميمة...و....و.....فرح إيه ياختى ده اللى فى ساعة العصارى....و...و.... إنتم جايبينا علشان تأكلونا كباب و كفته و تسمّعونا البرنامج الموسيقى.....إلخ إلخ

(و مع ذلك فقد كنت انا و زوجتى على أتم الإستعداد لخوض التجربة لولا أن الجو كان فعلا حر جدا و كنا حنعذّب نفسنا قبل ما نعذّب الناس معانا فى الحر و الرطوبة)

تم تعديل 11 ديسمبر 2004 بواسطة disappointed

[SilverSwan]

انا برضه من انصار فكرة الريسبشن ..

و بدل ما تتفقوا مع الشيراتون او غيره من الفنادق ممكن تأجروا فيلا لمدة يوم واحد تكون فيها جنينه كويسه و بيسين .. صحيح هتفتقدوا عنصر الخدمه اللي هيوفره الاوتيل لكن هيوفر كتير وممكن تجينوا البوفيه و ستاف خدمه من اوتيل معقول او محل محترم ..

والف مبروك مقدما .. و عقبال كل البنات :blink:

[yasovinas]

على فكرة انا مرة حضرت فرح في حديقة فيلا على ترعة المريوطية بي حاجه فوق العقل المكان جميل جدا وشيك جداً

[Cleo]

كليو شكرا على مساهمتك فكرة المركب فكرة حلوة بس المشكله انه مش حا يساع ناس كتير ...قولى لى على الدور بتاعه القوات المسلحه اخبارها ايه .

ياسو شكرا على مداخالتك بس الحناطير دى تنفع فى اسكندريه اكتر متهيألى ,,,,

الدور العسكرية مافيش فرق كبير بينها وبين الفناق ال5 نجوم فيما عدا الجودة... يعنى تقريبا نفس مستوى الأسعار بس جودة أقل.

المركب بتاع القوات البحرية دى كبيرة جربى تشوفيها... أظن ممكن تشيل لغاية 100 فرد. أنا مش متأكدة، لكن ك1ا مرة أشوف فيها أفراح.

على فكرة، أكتر حاجة تنطق الفرح غير القاعة، هو الدى جى الكويس. و أكتر حاجة تشيك الفرح، فستان العروسة و مكياجها..

ألف مبروك مقدما...

بارك الله لهما وبارك عليهما و جمع بينهما فى خير...

[se_ Elsyed]

ما أنت محجمانا كده يا دكتورة ...

يعني الميزانية كام ؟ عشان نشوف نتكلم عن دور عسكرية ولا فنادق .. ولا فوق السطح وساندوتشات بسطرمة وجبنة رومية وعدي يا ليلة ؟

[Farida]

محبط فكرة الفرح بالنهار فكرة عبقريه بس ما حدش موافق عليها ....و بعدين الشيراتون ده غالى علينا

سى السيد عندك حق انى لازم احدد السعر يعنى تقدر تقول كده 4 او 5 يبقى حلو و رضا قوى ....يالالا انا قلت شدوا حيلكم معايا

[amostafa]

بالمبلغ ده .. ممكن تعملى فى نادى نقابه المهندسين ,اللى قدام فندق ام كلثوم ,بالمهندسين ,مكان ممكن ياخد 100 او 150 واحد ,ويمكن اكتر ,على النيل طبعا ,النادى بيهتم بكل حاجه : البوفيه و الفيديو (و الفيديو بيطلع تحفه ,مونتاج و اخراج و حركات) ,وكمان فرقه تبع النادى DJ وفقرات (زى حسن و نعيمه و شهريار و شهرزاد ) و حجان كده لزيزه .... ممكن تعملي زياره ليهم ,بس طبعا لازم يكون فى العيله مهندس و مشترك فى النقابه..

انا واحد زميلى عمل فرحه هناك ,والفرح طلع تحفه

[mwefy]

علي فكره انا عندي نفس المشكله انا ان شاء الله فرحي في شهر 6 والدعوه عاااامه ، انا والمدام مقررين ان شاء الله ان احنا نعمل ريسيبشن طبعا ولا بني ادم في العيلتين موافق بس مش مشكله دي حاجه عاديه متعودين علي كده بس السؤال المهم حد يعرف الفيله ايجارها كام او ازاي اعرف اجيب فله اصلا في المريوطيه او المنصوريه ؟؟؟

تم تعديل 12 ديسمبر 2004 بواسطة mwefy

[se_ Elsyed]

4 او 5 يعملوا إيه يابنتي في عصر أحمد نظيف اللي نظف جيوبنا ؟!!!!

مش هاقدر أقول إلا فكرة amostafa إن عليكي وعلى نادي أي نقابة وأهي حاجة تقضي الغرض والسلام ...

[Farida]

كده تكسر بنفسى يا سى السيد نلحلحهم شويه و نخليهم 7 بس هه ما نقدرش اكتر من كده ........بس و النبى بلاش نادى النقابه انا اخر مرة روحته من 3 سنين و كان يعنى مش نضيف قوى الا اذا اااا صلحوه شويه .....

[Mohammad Abouzied]

على فكرة يا فريدة فيه نوادي زي نادي المعلمين عبارة عن شقة كبيرة واسعة جدا او اي نادي شركة مثل نادي امبي او نادي النصر في مصر الجديدة في صالات كويسه وفيه كمان فرق كويسه ومميزه جدا زي الفرق النوبية ممكن تقدم غربي وعربي ايضا وافضل شئ تروحي كلية التربية الموسيقية فيه مواهب هناك كويسه ومحترمة جدا وفيه فرقة في مركز شباب الجزيرة شفت لهم بعض البروفات كويسه ايضا ومستواهاهه راقي فعلا

وأذا قدرتي تتفقي لوحدك مع الفرقة لوحدها والبوفيه لوحده والنادي لوحده او الصالة هتلاقيها رخيصة قوي وافضل

وعلى فكرة دار الدفاع الجوي او المدرعات مش ضروري يكون فيه ظابط يحجزها وممكن اي واحد من الجمهور بشرط يكون حاصل على مؤهل عالي ممكن يحجز الصالة

وربنا يوفقك