مش بحب نظام الكفيل .. دلوني فيزة حرة ولا مرافق زوجة ؟

[إسلام علي]

السلام عليكم ورحمة الله

أولا أنا بشكركم جدا جدا خاصة الأخوة المتواجدين باستمرار واللي مش بيبخلوا بمعلوماتهم على إخوانهم وجعله الله في ميزان حسناتكم

وضعي كالتالي

أنا مهندس مدني خريج 2007 م

زوجتي مدرسة فيزياء وكيمياء

الوضع هنا في مصر صعب شوية خاصة في طنطا بلدي ومفيش شغل كويس وكده

فعاوز أطلع على السعودية ولكن نظام الكفيل (العبودية) مش لادد عليه خالص خاصة أنا دمي حامي ومش بحب المشاكل وخايف يطلع كفيلي راجل سخيف ولا حاجة

فأخوية مهندس مدني برده 2008 م في جدة دلوقت قالي هحوش وأرسل لك فيزا حرة وتيجي تشتغل على كيفيك يا زعيم

فأنا بصراحة مش عاوز أتعب الراجل معايا فقلت طيب ما أنا ممكن أجيب عقد مدرسة لزوجتي وأطلع معاها مرافق وبعدين أعمل شغل خاص

يعني أبارت تايم في المكاتب الاستشارية

أو أدرس برامج AutoCAD , SAP , Excel

هناك وأكون حر نفسي ؟

ومش عارف فكرتي دي كويسة ولا إيه فيا ريت إخواني يفيدوني

[Abdallah Gamil]

اطلع حره افضل بس اخوك يشوفلك كفيل محترم وضامنه

انا زى حالاتك وبجهز ورق والحمد لله طالع قريب

بالتوفيق ان شاء الله

[إسلام علي]

جزاك الله خير بس ما قلتش ليه أحسن ؟

وربنا يوفقك

[عنبو]

بص يا باشا اولا مافيش حاجه اسمها فيزا حره لانك فى جميع الاخوال هتبقى مع كفيل واسوء شىء ان يكون كفيلك شخص ( ودى موجوده فى الكفاله الحره وموجوده فى انك لو شغال فى مؤسسه صغيره ) واحسن حاجه لو كفيلك شركه كبيره مش بتحس بنظام الكفيل خالص لانك اساسا مش بتتعامل معاه ولا بتشوفه اى حاجه بتحتاجها بتتطلبها من الشركه وهى بتخلصلها لك .

الكفاله الفرديه مش مضمونه لازم يبقى اليى بعتها لك عارفه كويس لانه لو طلع مش كويس هتشوف ايام سوده اسود مما تتخيل

اما بخصوص مرافق الزوجه فلا يحق لك العمل بشكل قانونى الا لما تنقل كفاله من على مراتك على الشركه اليى عاوز تشتغل فيها

نصيحتى لما انك مهندس مدنى فحاول تدور وتشوف عقد فى شركه كبيره وصدقنى مش هتحس بنظام الكفيل خالص لان زى ما قولت تعاملك كله يبكون مع مديرك او الاتش ار فى الشركه

تحياتى

عنبو

[hakeem]

امممممممم مش بتحب نظام الكفيل..يبقى مش تسافر..

او اطلع بعقد على شركة محترمة ومش هتحس ان فى كفيل ..الحرة غالبا كفيلك شخص ودة زى اى حد ممكن تطق فى راسه يعملك اى حاجه..ممكن مثلا يهزر معاك ويكلمك الصبح يقولك "انا بلغت عنك هروب"والله حصلت مع واحد اعرفه هنا..