رثائها... و رثائى

[آل مصريم]

يا مصر.....ء

يا أمى مالك كده... جرى إيه

الهم شالك وحطك و الضنا و الويل

زادت همومك... زادت همومنا و الأسى و الليل

عشنا عقود

و قرون و عُمر غالى مقهورين

من عصر مينا... و الحُكم و الحاكم يتكلموا بكرباج

قطعوا اللسان... حرقوا الظهور... حرقوا الهوا

سكت الكلام... نام الضمير... أَن الجميع

حتى السجون أنِت م الزحام

خيرك لغيرك

مصوا زرعك... مصوا ناسك ...مصوا أرضك

و .... مصوا غازك

و التمن ملاليم

و العيشه صعبه... و الجو نار... و الليل طويل

هف النسيم

هبت رياح.... لاح الصباح

قلنا خلاص النور رجع

قلنا خلاص الشمس رجعت للسما

واهمين

يا مصر مالك...مال ولادك ليه كده آسين

ليه داسوا ثمرك ليه حرقوا شجرك

ليه الخراب بأه كلامنا و فعلنا

فى كل مجلس و ع الأهاوى و المصاطب

ليه النيران ليه الميدان ؟... لوقف حالك!ء

و قطع رزقك

و يقولوا إيه؟.... أصلنا ثايرين

ليه بينا ناس بيسخنوا و يولعوا دم الغلابه

تيجى تحاسبهم.. يتحججوا

مهو أصلهم.. متظاهرين

فين الرجا ولا الأمل

ضاع الأمان... ضاع العمل

ضاع النشيد

ف زحمه الجمعه

و جالى يوم أكتب رثائك... وأمشى فى جنازتك

و آخد عزاكى... إنما من مين؟

يا مصر لا

يبلعنى نيلك... تطوينى أرضك

أدوب فى رملك

و أنتهى

ولا يجينى يوم أكتب رثائك

[آل مصريم]

يا ناس يا هوووه

إيه العُباره؟

هى العُباره.... مش فى الدوباره...ولا إيه؟

زى ما قالوا و زى ما قولنا

وردوا علينا بكلام كتير

ولا حقيقة ولا حتى كذبه

ولاكلمه واحده ثابتين عليها

ما هوش مبارك ولا اللى قالوا عليهم......ء

فلول

ولا عمر موسى و بديع و مرسى

ولا صباحى و شفيق يا راجل

ولا هو حتى ...... أبوسماعين

لا حد منهم و لا حد فيهم ولا حد فينا

اللعبه أكبر

أكبر و أكبر

اللعبه مصر.... بيكسروها

و بيحرقوها و يهدوا حيلها

و فى النهايه يقسموها

ستين مربع و .... أربعه

تترقى فيها بنقله و حده

من عسكرى تبقى... وزير

و التانيه فورا تبأه حصان

و فى النهايه حتكون حمار

كام مره قلنا اللعبه إحنا

اللعبه مصر.... ولا مجيب

كام مره قلنا اللعبه إحنا

و اللى بيلعب قاعد بعيد

عارفينه مين؟؟؟