كيف كان عقابك المدرسى؟

[yasovinas]

أنا عايز أفهم بقى ...

لما محبط كان متفوق ..

وسي س س كان عبقري زمانه ...

ومحمد شلبي كان من الأوائل ..

وفيروز كانت النابغة الذبياني

اومال مين كان بيسقط ويجيب ملاحق ؟

انا يا عمو سيد اتوكست من ثانوي :P

اولى ملحق فرنساوي :angry:

تانيه ملحق كيمياء :P

اولى جامعه عدت السنة :D

تالته جامعه عدت السنة lo::

بس ايه سيبك من كل ده لما نويتها طلعت من رابعه من اول سنة بتقدير جيد جداً :P :P

[Sharkiah]

يمكن حكيت لكم قبل كده .. إن في أثناء وجودي في مصر من سنتين لقيت واحدة جاية ناحيتي ومبتسمة وشكلها زي بائعات الهوى .. ماكياج وفانلة مبينة نص بطنها وميني جيب وأخر بهرجة .. أنا قولت يمكن غلطانة في العنوان ولقيتها بتسلم عليه بحرارة ويمكن كان ناقص تاخدني بالحضن .. إيه يا ست إنت مين ؟ قالتلي إنت مش فاكرني يا أستاذ حماده ؟ والله زي مابقولكم كده .. قولت وكمان بتدلعني ؟  ده ام عمر مابتعملهاش !!!! - طب إحنا ليلتنا بيضا ولا حاجة ؟!!!- فقولتلها لأ بصراحة مش فاكرك  لإني كبرت في السن والظاهر إني خرفت  .. فقالت لي انا فلانه اللي كنت بتديني درس في إبتدائي انا واخواتي ... يخرب عقلك .. وإيه اللي عمل فيكي كده .. فقالت لي الحمد لله انا دلوقت في معهد تجاري وإتجوزت كمان ... طب إيه اللي إنتي عاملاه في نفسك ده يابنتي ؟ فقالت لي إنها عدت دلوقت وبقت حاجة تانية وأشتغلت فتاحة في كبارية هي واختها .... :D ... يا نهار مش فايت ... أيوه أيوه أنا بأشوفكم في الأفلام ... طب مامتك فين ؟.... فقالت لي إن مامتها شغالها معاهم كمان  ... فتاحة برضوا  :angry:

قلت قشطة عليك يا س س يا مُربي الاجيال يا مدرسة .. كويس إني إعتزلت في السن المبكر ده وإلا كان زمان شارع الهرم مليان طالبات من اللي بوردهم ...

بس يا خسارة نسيت اخد منها كارت يمكن احب أقدم للواد عمر في كلية الشرطة ولا حاجة ....

يعني العقاب المدرسي ساعات بيجيب نتيجة اهو ..... بطلوابقى إشاعات على المدرسي  ....  lo::

أنا تقريبا مفاصلى سابت من الضحك

:P :P :P :P :P

[فــيــروز]

أنا عايز أفهم بقى ...

لما محبط كان متفوق ..

وسي س س كان عبقري زمانه ...

ومحمد شلبي كان من الأوائل ..

وفيروز كانت النابغة الذبياني

اومال مين كان بيسقط ويجيب ملاحق ؟

نابغه مين يا عم الله يكرمك ..

يعنى انا كنت متفوقه فى ابتدائى بس .. كان ممكن افكر فى اهمية المنافسه على المراكز الاولى فى الفصل والحاجات الهلاميه دى ..

وبعد كده بقيت فى سنوات النقل اوفّر مجهوداتى وانجح من غير تفوق ..

وطبعا اشد جامد فى سنوات الشهادات العامه .. mf(

لحد ما ربنا كرمنى و دخلت الجامعه .. هنا بقى نقطة التحول .. طلعت اول سنه بمادة الرسم الهندسى :)

بجد كانت صدمه قويه جدا بالنسبه لى mfb: و بعدها اتعلمت الادب ..

بس فيه موقف غريب جدا حصل لى فى المدرسه لا استطيع نسيانه اطلاقا .. عارفين قصة التعلب اللى كان كل شويه يكدب و يستنجد بالناس عشان تنقذه لحد ما فقدوا الثقه فيه و اتاكل فعلا !! ngh: اهو انا عشت دور التعلب ده فى ابتدائى .. "ياه اخلاقى كانت سيئه جدا" :D

كان فيه مدرسه بتدينا واجبات سخيفه كده .. وانا بصفتى متفوقه كنت باشوف ان الواجبات دى مالهاش لازمه وماعملهاش pp: .. و كذا مره تسالنى على الواجب اقول لها نسيت "زى فيلم اللمبى نسيتى تاكلى نسيتى تاخدى الدرينك؟" .. والغريبه انها ماكانتش بتصدق العذر ده من اى حد غيرى .. لغاية ما فى يوم كنت عامله الواجب فعلا ويشاء ربنا انساه فى البيت .. دى المره الوحيده اللى ماصدقتنيش فيها

[bibo]

ياه مين اللى فتح السيرة دى بس؟

دا احنا أكلنا ضررررررررررررب fsh:: fsh::

trch: trch:

[SilverSwan]

اقصى عقاب اخدته فالمدرسه كان .. اربع عصيان على ايدي بمسطرة تيتشر وفاء بتاعة العربي في تانيه ابتدائي كانت مسطره عرضها تقريا 5 سم و لونها ال 3/4 بني - لون الخسب - والربع ابيض و كان ليها حافه نحاسيه بطول المسطره ده كان بسبب اني جيبت 9/15 ف الاملاء .. مع ان يكنت دايما بجيب 13-14 يومها قالتلي .. الضرب ده علشان انتي اتغريتي و اهملتي المذاكره .. :lol:

كرهتها .. و فضلت في نفس المدرسه لحد نص المرحله المتوسطه و كنت كل ما اشوفها ماارضاش اسلم عليها .. و قعدت فتره كبيره من حياتي مش بحب اسم وفاء بسببها...

اقسى عقاب باه - من غير تريقه - ...

اني كنت اقف و التيتشر تديني كلمتين تأنيب ... زي اللمهملين اللي بينسوا الهوم وورك .. و الانسان الفاشل هوه اللي بيتدي حياته باهمال واجباته المدرسيه و بعدين يهمل شغله و بيته لحد ما يفشل ..

بجد الكلام ده كان بيوجعني اوي اكتر من اي حاجه ف الدنيا

[R.M.G.]

حادث مش ممكن أنساه

وانا في تانية اعدادي كان بيدينا الرياضه مؤلف الأغاني الشهير نجيب نجم ( ماهو مدرس رياضيات أصلا)وكان انسان لا يكاد يفيق مما يحتسيه طوال الليل ومره دخل وأمرنا اننا نطلع كتب الجبر وكانت حصه هندسه وطبعا لأنه كان جبار ومفتري فالكل خاف ....أوووووووووم اخوكم عمل فيها عنتر ورفعت ايدي وقلت له النهارده هندسه فقالي نعم وحياة.....انت يعني الأرن طبعا الكلمة تعبتني جدا نفسيا فقلت له لأ أنت اللي داخل ومش فايق والدليل ان 6 طلبه بس اللي معاهم كتاب الجبر وطبعا كانت النتيجة انه وقفني وقعد هوع المكتب وظل يضربني بالخرزانه لمدة 10 دقائق تقريبا وكنت متعمدا غيظه بألا أبكي أو أعتذر أو حتى أتألم بل كنت افتح اليد تلو الأخرى إمعانا في غيظه ولم أسترح الا بعما كسرت له زجاج سيارته ال128 الحمراء أمام المدرسه بظلته من العيار الثقيل بعدها بكام يوم وسترها ربنا إن محدش شافني مع ان المدرس متاخمة لمبنى مباحث أمن الدولة في ميدان التحرير

تم تعديل 13 ديسمبر 2004 بواسطة R.M.G.

[أنـفـــال]

كان في مدرسة موسيقى سخيفة و باكرهها جداً.. ;)

كان اسمها عايدة..

كانت شيك و بنت ناس بس كانت قاسية جداً على الاطفال مش عارفة ليه..

و مرة من المرات..

نسيت اجيب كراسة الموسيقى..

قامت ضارباني على وشي في الفصل !!

طبعاً طفلة زيي عندها 6 سنوات وشي ورم من القلم اللي اخدته

و بعد الحصة ماخلصت قامت مهدداني قدام العيال و قالت لي عارفة لو قولتي لبابا... انتي حرة!! :lol:

انا كنت طفلة بريئة جداً و كنت شطورة كمان و الله بجد مش زي مابعض الناس بيقول و بس!! B)

المهم انا اتغاظت منها و كمان انا وشي كان احمر من الضربة!!

لما دخلت البيت ماما سألتني: ايه الاحمر دة؟

مين عمل فيكي كدة؟

قلت لها.. و حكيت لها على كل حاجة..

اتصلنا ببابا في الشغل..

و بابا رجع البيت بدري.. و قعدوا يعملولي كمادات على وشي عشان الاحمر يروح شوية..

بعدين بابا قرر انه يوقف الكمادات.. و قال خلاص خليها كدة! cr((:

تاني يوم..

اخدني بابا من ايدي على ادارة المنطقة التعليمية.

و خدنا من هناك مفتش و رحنا على المدرسة

و جبنا المدرسة

و قعدت تقول اني باكذب!!

لندفعت و قلت لها:

لأ انتي كذابة و هتروحي النار انا مش باكذب عشان مش عاوزة اروح النار.

راحت الناظرة جابت 3 اطفال من الفصل و سألتهم اذا كانت مس عايدة ضربتني و هددتني..

العيال طلعوا شاطرين و قالوا ايوة ضربتها .

المهم المدرسة نتيجة لسوء تعاملها معايا و نتيجة للوسايط..

فصلناها من المدرسة!!

عشان الشكاوى المتكررة ضدها!!

و دة كان اصعب عقاب حصل معايا!!

ليه فكرتوني...!

طيب و الله صعبت عليا نفسي اوي..! :D :o

أنفال

[محمد شلبى]

ليه بس يا استاذ س س ؟

ليه حذفت كلام من مداخلتى؟

انا فعلا ما كنتش عايز اقول الكلام ده ,بس انا كنت عايز اعرف الناس ازاى الاسلوب الخاطئ بيجيب نتائج عكسية تماما

[se_ Elsyed]

ليه بس يا استاذ س س  ؟

ليه حذفت كلام من مداخلتى؟

انا فعلا ما كنتش عايز اقول الكلام ده ,بس انا كنت عايز اعرف الناس ازاى الاسلوب الخاطئ بيجيب نتائج عكسية تماما

ساعات الواحد يا محمد بيكتب كلام او ردود وهو منفعل .. وانا اوقات كتير باعمل كده وبأرجع أحذفه او اعدله ..

واعتقد إنك لو قرأت الكلام ده تاني إنت من نفسك هاتعدله ..

س س مدرس اول تربية قومية وكيميا على المعاش

[yasovinas]

قامت ضارباني على وشي في الفصل !!

طبعاً طفلة زيي عندها 6 سنوات وشي ورم من القلم اللي اخدته

في ايه بس هو ده اللي تعبك  :)

اقصى عقاب اخدته فالمدرسه كان .. اربع عصيان على ايدي بمسطرة تيتشر وفاء بتاعة العربي في تانيه ابتدائي كانت مسطره عرضها تقريا 5 سم و لونها ال 3/4 بني - لون الخسب - والربع ابيض و كان ليها حافه نحاسيه بطول المسطره ده كان بسبب اني جيبت 9/15 ف الاملاء

لا وبالتفصيل الممل للون وشكل المسطرة والله عال mf)

[se_ Elsyed]

تعلن عيادات الدكتور س س النفسية لعلاج الأمراض المدرسية عن توافر كافة انواع العلاجات النفسية لأبناءنا ضحايا الجرائم التعليمية :

1- عندنا علاج بالكهرباء من فئة 100 ميجا فولت وإنت طالع ...

2- علاج بالصدمة ... والموضوع يتخلص في إننا بنعمل لك تمثال من القطن للأستاذ اللي كان مبهدلك ونخليك تفضل تعج فيه لحد ما تنجده وتلاقي نفسك فشيت غليلك ورجعت أحسن من الأول وعلى سنجت عشرة ...

3- كما يوجد لدينا أحدث الغرفة العازلة للبكاء الحار مع توافر مناديل كلينكس ( أوبن بوفيه ) .

4- كما توجد دُمي لطلبة صغيرين ومفاعيص .. يمكنك إنك تعمل عليهم أستاذ وتطيح فيهم ضرب تخليصاً للعقد والكلاكيع اللي عندك ....

إبننا الطالب المكلوم ... إطمئن ... مع سين سين هاتبقى قوي ومتين ...

لا تقولي السرايا الصفرا ولا أبو العزايم ... مع سين سين هاتتعالج وإنت مطمئن ونايم ..

[mwefy]

أنا عايز أفهم بقى ...

لما محبط كان متفوق ..

وسي س س كان عبقري زمانه ...

ومحمد شلبي كان من الأوائل ..

وفيروز كانت النابغة الذبياني

اومال مين كان بيسقط ويجيب ملاحق ؟

انا بعون الله 10 سنين في كليه تجاره جامعه العظماء القاهره pp: :) gsm:: mf)

[محمد شلبى]

بجد يا استاذ س س؟ mf)

طب ايه علاقة التربية القومية بالكيمياء؟ :)

[Katamando]

بجد يا استاذ س س؟ mf)

طب ايه علاقة التربية القومية بالكيمياء؟ :)

مين ده؟؟؟

انت ايه اللي جابك هنا؟

انت جديد يا حبيبي في الفصل؟

[فــيــروز]

من ضمن العقوبات المدرسيه كان تنظيف الحوش

ياللا لموا الورق من الحوش

حتى الآن لا استطيع ان احدد سببا لاشمئزازى من هذا النوع من العقوبات رغم انه يعتبر خدمه عامه

ربما لانى كنت اقتنع انه ليس عقابا فى الحقيقه وانما تعويضا عن تقاعس الفرّاشين المسئولين عن هذه المهمه و كذلك لعدم وجود سلال مهملات كافيه بالاضافه طبعا لضعف الوعى البيئى و اهمية النظافه لدى الاطفال :)

مش معقول الواحد يبقى رايح المدرسه الصبح و المريله حلوه و نضيفه و مكويه و يرجع لاهله آخر اليوم شبه عمال مرفق نظافة القاهره الكبرى mf) "ولهم كل الاحترام طبعا"

[محمد شلبى]

ys):

معلش يا اونكل

انا فعلا لسه جديد

جديدآه بس مش اهبل وعبيط :)

الاستاذ س س عايز يترسم عليا ويقوللى انه على المعاش واروح اشوف الملف بتاعه الاقيه مواليد 72

على العموم ولا يهمك يا استاذ س س فالاحترام ليس بالسن عموما

[mwefy]

ايوه والله يا فيروز فاكر انا موضوع نلم الورق من الحوش كان ناقص يقولولنا كل واحد يجر معاه عربيه للزباله هشان يرميها وهو مروح

[فــيــروز]

ايوه والله يا فيروز  فاكر انا موضوع  نلم الورق من الحوش كان ناقص يقولولنا كل واحد يجر معاه  عربيه للزباله  هشان يرميها وهو مروح

كل كوم وموضوع الحكم الذاتى ده كان كوم تانى :)

اينعم كان لطيف جدا ان الواحد يطلع حكم ذاتى فيزوّغ من يوم دراسى كامل و يتنطط على زملائه الطلبه pp: gsm::

لكن كان من ضمن مهامه ايضا كنس الفصل pp: ودى مهمه تنوء بها العصبه من الرجال :D فازاى يلزموا بيها التلاميذ mf)

[mwefy]

يا سلاااااااااااام علي الحكم الذاتي دي كانت ايام كنا مثلا الفصل بتعانا عشان يستريحه منه ويخلوه يزوغ بطريقه شيك كانو يدونا في الاسبوع الواحد مرتين حكم ذاتي وطبعا كان كل الفصل بيتصارع علي الخمه الوطنيه في الكانتين لما فيه فائده غير طبيعيه واكل بلوشي وطنطيط علي العيال في الفسحه اي حد يضايقنا نروح قايلين يلا يلا انتا وهوو مافيش اكل وادي الشباك اهو و طاااااااااااخ في وش الغلابه بس طبعا لما كنا مش بنكون حكم ذاتي كنا بنحاول نبعد 1 كيلو متر عن منطقي الكانتين ممكن يفرومونا mf) :) gsm::

[se_ Elsyed]

شوية جد بقى ...

أهو إحنا عينة من أجيال مختلفة وكلنا اجمعنا على إن اللي عندنا دي إسمها معتقلات للتعذيب مش مدارس ..

يبقى بالله عليكم هل تتوقعوا إن المعتقلات دي تخرج جيل قادر على تحمل المسئولية ويتحدث عن الديمقراطية ويُساهم في رُقي بلده ...

أنا بأسمع عن المدارس في الدول الآخرى حاجه تشرح القلب العليل .. وهانروح بعيد ليه في مدينة زي دبي ... الواحد بيتوهم من الشيا كة والنظافة بتاعت المدارس ( انا بأتمنى أرجع عيل تاني عشان اعيش لي يومين هناك ) ...

وتصوروا بقى إكتشفت حاجة غريبة قوي .. إن حتى بعض

المدارس الاجنبية لما بيفتحوا فروع في بلادنا هنا بيتطبعوا بطباعنا الإستبدادية ...

واحد صديقي قدم لبنته اللي عمرها 3 سنوات ونص في مدارس المستقبل العالمية وهي مشهورة جداً ومصاريفها نارررررررر في السعودية ... ويوفاجأ بالبنت راجعة في يوم في حالة من الرعب والهلع ولما سألها في إيه ؟ قالت له إن الميس الأجنبية المحترمة حبستها في الحمام طول اليوم عقاباً لها عشان كانت بتعمل شقاوة !!!!!! راح طبعاً الراجل وبهدلهم وسحب ملف البنت ونقلها مدرسة تانية أدمية ...

وانا في رأيي الشخصي إن أشد عقاب مدرسي كنا نعاني منه ونحن طلاب هو ذلك الشيء الهُلامي المُسمى الكتاب المدرسي اللي بيألفه ناس الزمن توقف بهم عند القرون الوسطى والدولة بس فالحة تذل فينا وتقول إنهم بيدعموه وبيصرفوا عليه مليارات .. وبصراحة احسن مكان للكتاب المدرسي هو قراطيس الطعمية أو اللب السوري اللي بيجيب ديدان في البطن ( ماما كانت بتقول لي كده )

من ضمن العقوبات التي قضينها الحمد لله وطلعنا منها في ثلاثة أرباع المدة عقوبة الشنطة المدرسية التي لا يستطيع حملها الحمار الحصاوي نفسه .. لكننا كنا رجالة ووقفنا وقفة رجالة وبعون الله هزمنا خضر التوني وسليمان أوغلو أبطال العالم في حمل الأثقال ... وبتهيألي لو عملوا مسح وعينة من الطلاب المصريين وخصوصاً الصغار هايلاقوا إن 90 % منهم عندهم إصابات وتشوهات في العمود الفقري نتيجة البلاوي اللي بيشيلوها على ضهرهم والأشبه بالمخلة العسكرية بتاعت حشيش في قصتة الخالدة " المنتوف "

وزي ما يكونوا المُدرسين دول من قبيةل تانية وجايين ينتقموا مننا وتلاقي كثير منهم ماكانش يقولك إحنا علينا إيه الحصة الجاية .. يعني قصة ولا إنشاء ولا إملاء مثلاً وكأن دي كانت أسرارا عسكرية عشان يضطر الطفل المسكين إنه يجيب كل الكُتب وكل الكراريس والإستاذ المُبجل يحدد بقى في الوقت المناسب والمكان المناسب هو هايشرح إيه .. ربنا يشرح دماغتهم الجبس البُعده .. قولوا آمين ...