مظاهرات فى القاهرة ضد التجديد و التوريث

[disappointed]

[

أخيرا نطقنا ؟؟!!!!!!

حقيقى.....

يحيى العظام و هى رميم

[amostafa]

فرحانين بمظاهرة..

طب ما بعد أي مباراة يهزم فيها أحد سبعي البرمبة السبع الآخر نجد أنصاره وقد ملأوا الشوارع يتظاهرون تهليلاً للسبع المنتصر وسباباً للسبع المهزوم..

يا شريف ,بس دى اول مظاهره ضد الرئيس !!! دى معجزه يا جماعه :D ,,, انا مش عارف انتو مش متخيلينها ازاى !!!!! انا من ساعت ما وعييت على الدنيا و انا باسمع " :lol: نعم , نعم , نعم نعم بنقلها بجد ...cr((: " ,و كنت فاقد اى امل فى مصر و المصريين ... بس الحمد لله انى عشت و شفت اليوم اللى فيه مصريين بيقولو الكلام المسجون فى قلوب الناس " كفايــــــــــــــه " ....

انتا مش متخيل قد ايه انا فرحان علشان المظاهره دى ,لأن اقل تأثير لها إنها هاتدى الجرأه لناس تانيه انهم يتكلمو و يفضفضو بدون خوف و ده المطلوب .....

ويا سلام لو المظاهره دى جابت نتيجه و حركت الناس فعلا للترشيح للرئاسه او رفض مبايعه الرئيس لفتره اخرى و رفض توريث السلطه ..... هاتشوف مصر و شعب مصر بموديل جديد تماما ,و لطول العمر , المصرى الحر , إللى كلمته يخاف منها الرئيس مهما كان و يعملها الف حساب ,و هاتعيش الديمقراطيه بجد .....

دى عينة مظاهرة

من ثلاثمائة فرد

من بلد خمسة وسبعين مليون

يا عم رجب .اول الغيث قطرة , و بكره انشاء الله ,ربنا يزيدهم.

تم تعديل 13 ديسمبر 2004 بواسطة amostafa

[ابو يوسف]

سعدت جداً و أنا أتابع المظاهرة على الجزيرة (و طبعا الجزيرة و مش قنواتنا المحلية العظيمة !!!)

و رغم أننى لست من هواة نظرية المؤامرة ...

الا أننى أرى تزامن مريب بين (ثورة) الشعب الذى فاض الكيل به و الذى لم يعد خافيا على أحد ضيقه و قرفه من الكبار (سناً و مركزاً و ليس مقاماً !!) و بين أحداث الكاتدرائية !!! التى برزت فجأة على السطح ...

فى حين أنه يومياً يتحول مسيحيون الى الاسلام و العكس !!! فى السر و العلن !! و هذا منذ أن دخل عمرو بن العاص مصر و حتى الآن !!

ماذا يفيد الآن أن تتجه أنظار الناس نحو صراع طائفى وهمى ؟؟؟ لأن مسيحية أسلمت ؟؟؟

و يخرج علينا مصطفى بكرى (الذى لا أفهمه جيداً ) بمانشيتات و موضوعات مثيرة ... مثلاً ... احتوت آخر أعداد الاسبوع الموضوعات التالية ....

الفرقان الحق ....

سباب كاتب كويتى للسيدة عائشة ..

وقائع تنصير فتاة مسلمة ...

لصالح من ؟؟؟

أى خير سيعود على هذا الوطن من هذه الموضوعات و فى هذا الوقت تحديداً !!!

هل هى اللعبة القديمة لشغل الناس و جذب انتباههم ؟؟

و لكن لا أريد أن أفسد المناسبة السعيدة التى أشعرتنى أن المواطن المصرى الشريف مازال موجوداً ...

المهم الا يكون موجوداً الآن عن اخواننا البعدا !!!

[egyptforever]

مع اني مش عايز اضرب كرسي في كلوب الفرحه بس على فكره دي مش اول مظاهره مصريه

دي المظاهره بتاعه سليمان خاطر كانت اكبر من كده

اي مظاهره جامعيه و خصوصا من جامع الازهر بتكون اكبر من كده

بس كل ده مش مهم

المهم هو

كان في كام واحد من عامه الشعب في المظاهره دي ؟؟؟؟؟

سيبنا من المثقفين و بتوع الاحزاب و الهتيفه و غيرهم

كام واحد في الشارع اتحرك مع المظاهره و راح من نفسه مشي فيها

للاسف من شكل المظاهره ولا واحد

و على أي السيد ابو يوسف انا كمان محبش نظريه المؤامره

بس مظاهره بالحجم ده و بالتاثير ده ده اكبر تأييد للاكسلانس مش ضده

لما من سبعين مليون يطلع 300 فرد يبقى ده معناه ايه ؟؟؟؟

لما تكون المظاهره عباره عن 300 فرد في شارع من شوارع القاهره ذات ال 1000 شارع و التي هي عباره عن مدينه من مصر و التي بها مئات المدن ده معناه ايه؟؟؟

بصراحه انا لو باعبر عن رأي نابع من المظاهره دي

يبقى الاكسلانس الديمقراطي يسمح بمظاهرات ضده

و نظرا لشعبيته لم يخرج فيها اكثر من 300 متظاهر

رغم ان كل هذا ضد الحقيقه

[amostafa]

و على أي السيد ابو يوسف انا كمان محبش نظريه المؤامره

بس طلعت بتحب نظريه "مفيش فايده" :lol: ,ممكن يكون الامن المركزى (اللى باين ان كاثفتهم عاليه) حاوطو المكان و منعو اى حد انو يقرب ,دايما عدد الامن المركزى بيفوق عدد المتظاهرين !!! متعرفش ازاى ,,,,

[egyptforever]

و الله مش موضوع مافيش فايده

ياريت المظاهرات يكون فيها 100 الف او مليون او حتى 10 مليون

يا عم مصطفى احنا مش اقل من رومانيا و صربيا و اوكرانيا و التشيك

الناس دي عاشت تحت اسوأ حكم ممكن يتحكم في التاريخ

الحكم الشيوعي

بس الناس دي خرجت بالملايين و لا همها لا امن مركزي ولا مخابرات روسيه ولا غيره

مش معقوله مصر اللي عدد سكانها 70 مليون نفرح بمظاهره عددها 300

على رأي السيد شريف ده اي فريق كوره ممكن يعمل مظاهره اكبر من كده

سؤالي كان فين الناس اللي شاركت ؟؟؟؟

فين الشعب اللي شارك ؟؟؟؟

اما المثقفين و رجال الاحزاب فالموضوع كده هيطول و هيفضل يتناقش لغايه ما يخرجوا احتجاجا على الولايه الخامسه لاحمد جمال حسني مبارك

و ربنا يجعله بفايده

الله يمسيك بالخير يا محمد يا صبحي

شعبنا جميل يموت في الهيصه

[ابو يوسف]

و الله مش قضية مافيش فايدة !!!

طبعاً فيه فايدة ...

اليس أول الغيث قطرة !!

و بعدين مين كان يصدق ان ممكن تحصل حاجة زى دى فى مصر ؟؟؟؟ (بلد الديمقراطية !!)

أما عن النسبة و التناسب ...

ما ننساش ان الخوف معشش فى قلب كل المصريين و سنين القمع و القهر مش ممكن يتمحوا فى لحظة !

الكل نفسه يخرج فى مظاهرة زى دى ...

بس الكل خايفين ؟؟؟

ما يضمنوش العواقب ...

ما احنا عمالين نتظاهر على المنتدى ده من سنين !!!! والناس بتتظاهر فى القهوة و فى البيت و فى أى اجتماع عائلى !!!

و تقريبا فيه اتفاق شبه عام

و لو اتقفش حد ...

الكل ح يدخل حجوره و يقول خلينى عايش آكل عيش و اربى العيال !! أنا مش حمل قلم أو اهانة !!

فيه 300 قدروا يعملوها ...

و فيه 70 مليون نفسهم بس خايفين !!!

[amostafa]

فيه 300 قدروا يعملوها ...

و فيه 70 مليون نفسهم بس خايفين !!!

صح ... هو ده الواقع اللى احنا فيه ...

بس خوف المصريين دايما بينكسر بعد ما واحد يتجرأ و يعمل اول محاوله و يتأكده ان ده ممكن يحصل ...

انا من حوالى سنه, كنت اعرف ناس كانو خلاص هايطبعو منشورات ضد الحكومه و الرئيس ,,,بس خافو,ولكن دلوقتى اعتقد ان اللى حصل ده هايديهم جرأه.

الناس خلاص فاض بيها ,,,

[Ahmed Mohsen]

بصراحة كده لو ال300 دول طلعوا من المثقفين والأحزاب المعارضة، يبقي مفيش فايدة ...

في رأيي ده هايبقي نتيجته تأييد مبارك مش العكس ... لأنها فعلا هاتتصور علي إنها ديموقراطية منه وإن لو كان فعلا الشعب مش عايزه ماكنش طلع 300 بس خاصة إن المظاهرة كانت في وسط القاهرة وفي شارع من الشوارع التي تضم كثافة مرورية عالية جدا.

إنما لو كان ال 300 دول نصهم من عامة الشعب، يبقي فعلا في أمل

لكن عندي سؤال أوجهه للجميع وأتمني من الجميع إجابته بأمانة وصراحة ......

تخيل أنك كنت ماشي في الشارع في وقت المظاهرة ... هل كنت ستنضم لها أم لا ؟؟؟؟؟

[bibo]

فى حين أنه يومياً يتحول مسيحيون الى الاسلام و العكس !!! فى السر و العلن !! و هذا منذ أن دخل عمرو بن العاص مصر و حتى الآن !!

معلش يمكن نكون خرجنا بره الموضوع

بس سؤالى لأبو يوسف:منين جبت الكلام ده

تم تعديل 13 ديسمبر 2004 بواسطة bibo

[amostafa]

تخيل أنك كنت ماشي في الشارع في وقت المظاهرة ... هل كنت ستنضم لها أم لا ؟؟؟؟؟

دانا من زمااااااااااااااااااااااااان و انا مستنى اليوم ده ... هانضم طبعا

[Farida]

بعد مقتل الثلاثة شهداء زاد الحنق و الغضب و الأفراج عن عزام عزام زاد اكتر و اكتر و بعدين مبررات اتفاقيه الكويزمع اسرائيل و اخيرا المظاهرات كل ده مش يخلى الواحد يتوغوش ....

واضح ان أمريكا خلاص خدت كفايتها و حاتعمل زى ما عملت مع شاه ايران و صدام حاتسيب ايدها ...بس ياترى حطت عينها على مين

[Shams100]

ربناعلى المفتري وان شاء الله لكل ظالم يوم ولكن لابد من وقفتنا جميعا يدا واحده ضد هؤلاء القوم الظالمين الذين ظنوا انهم ملكوا خيرات هذا البلد وعاشوا مثل العائله المالكه وتركوا مصر مثل حقل تجارب للسيد جمال مبارك لكي يقرر سياسات الامه رغم عدم خبرته اللهم على القوم الظالمين

[3okal]

صور أخري للمظاهرة

[فــيــروز]

سئل الشيخ عبد ربه التائه: متى ينصلح حال البلد؟

فأجاب: عندما يؤمن أهلها بأن عاقبة الجبن أوخم من عاقبة السلامة.

[ابو يوسف]

فى حين أنه يومياً يتحول مسيحيون الى الاسلام و العكس !!! فى السر و العلن !! و هذا منذ أن دخل عمرو بن العاص مصر و حتى الآن !!

معلش يمكن نكون خرجنا بره الموضوع

بس سؤالى لأبو يوسف:منين جبت الكلام ده

أخى العزيز بيبو ...

لا أفهم ما وجه اعتراضك ؟؟؟

هل لتحول المسيحى الى مسلم ...

أم تحول المسلم الى مسيحى ... ؟؟

على أيه حال أنا أعتقد أن هذ أمور لا تخفى على أحد ...

ولا أعتقد أنه سر – أتفرد بعلمه ..

فقصص اسلام المسيحين كثيرة ... منهم المشاهيرو رجال الدين ، أتذكر منهم القس – سابقاً - مجدى مرجان و الذى له العديد من المؤلفات الاسلامية عن مقارنة الاديان ... و طبعاً غيره كثيرون مما لا يتسع المجال لسردهم ...

و من غير المشاهير ... أعرف على الأقل ثلاثة منهم، معرفة شخصية .. كانوا مسيحيون وهداهم الله للاسلام و تركوا اسرهم وحياتهم ...

(يمكن مراجعة الأزهر لمعرفة عدد حالات الاشهار )

هذا ناهيك – بالطبع - عن آلاف ، بل ملايين الأقباط القدامى الذين أسلموا مع الفتح الاسلامى و بعده ... (و الذى قد تكون أو أكون أحد أحفادهم !! )

نأتى للاحتمال المعاكس و هو تحول بعض المسلمين الى مسيحيون ...

هل صدمت ؟؟

هل هذا درب من الخيال ؟؟

هذا يحدث كثيراً .. سواءً عن اقتناع أم عن اغراءات بالمال أو بالسفر للخارج ... و بالطبع يحدث سراً ..

أحدث الحالات نشرت اليوم فقط فى جريدة الاسبوع فى الصفحة الاولى والمانشيت الرئيسى كان "وقائع تنصير فتاة مسلمة " و المقال يحوى كل التفاصيل .. و يمكن الرجوع اليه ..

ويمكنك مراسلتى لمعرفة المزيد عن حملات التبشير داخل مصر ...

و أنا- بالمناسبة - أحيى القائمين عليها لنشاطهم و ايمانهم العميق بالرسالة التى يؤدونها !!!

[emmyyy]

عارفين الفئه القليله المندسه بين افراد الشعب الي 300طلعوا في المظاهره منهم وكلها كام يوم وتطلع ظاهره من 100000مواطن بتقول نعم نعم من جوه القلب وعلي راي المثل يا جبل ما يهزك ريح

(وش احد هيترشق من الغيظ وجيب صوره مبارك و عمال ......)

[ragab2]

عارفين الفئه القليله المندسه بين افراد الشعب الي 300طلعوا في المظاهره منهم وكلها كام يوم وتطلع ظاهره من 100000مواطن بتقول نعم نعم من جوه القلب وعلي راي المثل يا جبل ما يهزك ريح

كلام سليم

ويحدث فى البلاد الديكتاتورية

على نظام بالروح بالدم واخترناك

[mb14]

يا خوفى جهابذة الحزب الوطنى يخرجوا بكرة بمظاهرة فيها 30000 او 300000 نفر ينددوا بمظاهرة ال1000 بتوع امبارح ويقولوا بالروح بالدم نفديك يا زعيم

وساعتها حاتبقى مظاهرة بمظاهرة والبادى اظلم

وابقى سلملى على بتوع "كفاية"

وطبعا اخبار بمظاهرة التنديد والتأيد حاتتغطى بوسائل الاعلام من اول الصبح لغاية اخر الليل .

وعقبال المظاهرة الجاية

[مصرى]

- أرجو عدم التشكيك فى نوايا المطالبين بالإصلاح .. لأنه لا إصلاح ولا حركة للشعب بدون شخصيات تقود .. وهو ما يسمى الكاريزما .. الضرورية لأى حركة شعبية .. بدون كاريزما لا تغيير ولا إصلاح .. فإذا كنا نهدم أى قيادة تظهر على السطح ونشكك فى نواياها فمن الذى سيقوم حركة المطالبة بالإصلاح ؟!

- ثم أن النوايا لا يعلمها إلا الله وحسابها عليه .. وليس لنا إلا ظاهر الأفعال

- أما حكاية المئات الذى تظاهروا وطالبوا .. فقد كانت تحاصرهم الآلاف من حشود النظام وجنوده

- مظاهر المبايعة بفترة ولاية خامسة بدأت بالفعل على صورة لافتات قماش من الدوائر الحكومية وممثلة النقابات العمالية .. وصور بأضعاف الحجم الطبيعى صنعها على السجاد "النساجون الشرقيون" للزعيم !!! لكن لا أعتقد أن النظام يجرؤ على تنظيم مسيرات تخرج للشارع لمبايعة الرئيس <_<