التزوير لصالح شفيق !!!

[الدكتور ياسر]

أثناء تصفحى على الفيس بوك وجدت تلك القصة التى كتبها دكتور صيدلى ..

هل نحن فعلا مقبلون على أكبر عملية تزوير انتخابي رئاسي في التاريخ لصالح شفيق ؟؟

هل يتركنا المجلس العسكري نعيش الوهم ثم يضرب ضربته القاضية في آخر يونيو وربما قبل ذلك ؟؟

العهدة على الراوى ولنقرأ ما قاله ..

اقسم بالله العظيم ان هذا حدث معى اليوم الاثنين ليلة الثلاثاء 22 مايو 2012 والله على ما اقول شهيد وانا لا ادرى نتيجة ما كتبته ولا ما قد يحدث لى الا ان دماء الشهداء تحاصرنى ولم استطع الصمت ........اللهم انى قد بلغت اللهم فاشهد وانا لله وانا اليه راجعون .

كلام خطير جدا ........... لازم تقراه للآخر :

كنت قاعد في صيدليتي في أمان الله ودخل عليا صديقي أمين شرطة اسما لله فلان الفلاني ولما لقاني مغرق صيدليتي صور أبو الفتوح وكمان كانت صورته على عربيتي قاللى والله يا دكتور انتم صعبانين عليا قوى قولتله ليه ؟ قاللى يعنى تاعبين نفسكم على الفاضى والموضوع محسوم لصالح واحد ومنتهى من زمان قولتله مين؟ قاللى ماعلينا على العموم اللي هتجيبه الصناديق هنصقفله كلنا قولتله ماعدا شفيق وعمرو موسى قاللى هتعمل إيه يعنى قلتله أنا أول واحد هكون في ميادين التحرير ده حتى الغاز المسيل للدموع وحشني قاللى اطمن يوم 17 أو 18 يونيو قرار إعلان النتيجة هيكون مصاحب ليه قرار حزر تجول في الجمهورية كلها لاى حد خارج من بيته والضرب في المليان طبعا أنا ضحكت وسخرت من امكانية حدوث ذلك ولان الضحكة استفزته قاللى انت مش مصدق طيب اقسملك بالله ان تم حشد ضعفين عدد الامن المركزى القديم لحد ما وصلوا دلوقتى 8 مليون وكمان طوروا انواع الاسلحة سخرت اكتر منه وقولتله الشعوب ما بتخلصش وزى ما قال عمر المختار قبل كده ننتصر أو نموت لكننا لا نستسلم قاللى ماهى المعركة المرة دى مش هتبقى الشرعية معاكم لانكم ببساطة ساعتها اللي هتبقوا ضد الديموقراطية ده غير ان الناس زهقت منكم على الاخر ولا انت فاكر يا دكتور ان احنا لما سيبنا الاخوان ينجحوا في الانتخابات التشريعية (خلى بالك بقه من الحتة دى) ولما سكتنا عن توجيههم للناس ومخالفاتهم لفترة الصمت الانتخابى واللى كان بيحصل قدام اللجان من استغلال للدين واللى كان كفيل بان مرشحين الاخوان كلهم يستبعدوا وكل ده متصور عندنا وسايبينه بمزاجنا علشان الاوامر كده علشان مايبقاش ليهم عين يتكلموا يوم انتخابات الرئاسة .

حبيت استفزه اكتر وقولتله اطمن احنا مستقتلين قدام صناديق الانتخابات ومش هنسمح بالتزوير وان شاء الله الفلول مش هينجحوا لقيته ضحك على الاخر وقالى ده نجح خلاص ومش بعيد من أول مرحلة كمان قولتله هو مين ده؟ قالى احمد شفيق قولتله استحالة على جثتى لو قولت عمرو موسى ممكن اصدقك انما الاهبل بتاع قتلت واتقتلت ده لا قاللى انت مش مصدقنى طيب وراح حاطط ايده في جيبه ومطلع محفزته وطلع منها بطاقته وقاللى اتفضل قولتله إيه قاللى اقرا خانة الوظيفة كده قريتها لاقيت مكتوب فيها حاصل على دبلوم فنى صناعى فقولتله مش فاهم قاللى مش الجيش والشرطة مالهومش تصويت قولتله ايوة قاللى تم تغيير الوظيفة لاكتر من 8 مليون جندى ام مركزى وفرد شرطة وامرهم بالتصويت لشفيق وانت لو حبيت تبحث عن اسمى كمان مش هتلاقى اى علاقة ليا بالشرطة في يوم من الايام قولتله انت بتتكلم جد قاللى ماهى البطاقة بين ايديك اهيه فضلت باصص للبطاقى وانا مذهول لحد ما اخدها منى وقاللى فوق يا دكتور المهم هاتلى الفوار بتاع البلغم للحج روحت جيبتله ومشى وانا مذهول وبفكر اللي أنا فيه ده حلم ولا علم.

كلام عجيب وغريب ..

وان كان حقا ,فلم يفضح ذلك الضابط نفسه ومن خلفه بتلك السذاجة ؟؟

الله أعلم ..

وربنا يستر على مصر

[Alshiekh]

يعني يادكتور انت مصدق قصة الـ 8000000 ثمانية ملايين جندي دي؟

ولزمته ايه لو في نية في التزوير انهم يشتروا عساكر أمن مركزي من الدول المجاورة علشان يصوتوا؟

الموضوع بسيط، الاستمارات بتاعتهم والصناديق بتاعتهم، ولو عايزين يستولوا على السلطة الموضوع بسيط.

لو عندنا 8 مليون امن مركزي كان زمان الشعب لابس طرح ونايم في البيوت وحسني مبارك قاعد في قصر العروبة.

مش أي كلام نصدقه يادكتور

فاكر القصة بتاعة الحبر السري والاقلام اللي الكتابة بتاعتها حتتمسح بعد شوية وتطلع الاستمارات متعلم فيها على المرشح اللي العسكري عايزه.

عموما الاشاعات دي لها غرض وهدف ان من يخرج من الانتخابات يلاقي شماعة يعلق عليها خروجه.

8 مليون امن مركزي، يعني يتبقى من القوة الانتخابية 40 مليون، شيل منهم 25 مليون إمرأة يتبقى حوالي 15 مليون رجل ، نصفهم شباب ، يعني تبقى عسكري أمن مركزي لكل شاب، كلام لايدخل العقل.

[الدكتور ياسر]

أنا زيك مش مصدق يا أستاذ محمد ..

خصوصا جزئية تغيير الوظيفة في الرقم القومى ل 8000,000 جندى !!

بس الحقيقة أسلوب الصيدلى الذى يقسم بالله على حدوثها هو ما دفعنى الى نقلها ..

ولكن بصراحة لا أستبعد أبدا تزوير الانتخابات بشكل أو بآخر لصالح شفيق , خصوصا

مع الثقة الشديدة التى يؤكد بها فوزه , وخصوصا أيضا مع عودته المريبة للسباق

بعد يوم واحد من استبعاده بسبب قانون العزل السياسي ,,

هذا بالاضافة الى قضايا اهدار المال العام التى يتم التستر عليها في حين يتم

الآن التحقيق مع ابو الفتوح ومرسي وأبو اسماعيل في النيابة بحجة الدعاية المخالفة ..

[Abu Reem]

ولو أن في مصر كل شيء جايز....ولكن انا هاحاول بكره اسأل عن هذه المسألة احد ممن يعرفون خبايا. السجلات المدنية وهو ضابط على أي حال ، ولكن طبعا لن اسأل بطريقة مباشرة

- ومن هنا لحد ما يجيني الرد...لا اتوقع صحة هذا العدد..يعني نسبة الكتلة التصويتية لن تزيد كثيرا عن عدد من قام بالتصويت في انتخابات البرلمان

يعني مثلا لو كان عدد الناخبين في انتخابات مجلس الشعب كان اكثر قليلا من 30 مليون فمن الطبيعي ان تزيد هذه النسبة في انتخابات الرئاسة لتصبح اكثر قليلا او تساوي 35 مليون وحتي 37 او 38 مليون

- لذلك فلو كان عدد اصوات المجندين او رجال الشرطة والجيش هو 10 مليون سيتم تغيير مهنتهم في بطاقاتهم الشخصية فسيكون غريبا وواضحا جدا لو

وجدنا اعداد الناخبين قفز فجأة الي 45 مليون او اكثر..فحتما هذا سيزيد الريبة ويبعث الشك

- كما ان المهنة لو تغيرت فماذا عن الاسماء ..يعني لو تم الكشف عن اي اسم من اسماء احد الضباط وتم اثبات ان هذا الاسم موجود من ضمن اسماء المصوتين فستتم كشف المسألة.

- قد يقوموا بتزوير مليون او اثنين لصالح شفيق او موسى لكي يضمنوا دخولهم الاعادة ولكن هذا ايضا به مخاطرة...لانه من الصعب ضمان ان احد هؤلاء الملايين الذين تم تزوير مهنتهم في البطاقة ان يحتفظ بهذا السر.. فقد يكشف هذا الامر دون قصد وبالتالي يتسرب الامر ..ويتم الطعن في النتيجة وسرعان ما ينكشف الأمر وتبقى فضيحة...للمجلس العسكري

- على العموم يظل كل شيء وارد...وحتما الشعب ليس غبي ويستطيع أن يكشف اي تلاعب خاصة لو كان بطريقة فجة ويستطيع أن يكشف أي نتائج غير متوقعة ويبحث ورائها حتى يأتي بدليل التزوير أو التلاعب...

[MZohairy]

انا مش مصدق تفاصيل القصه

لكن مصدق نتيجة القصه

[ابراهيم عبد العزيز]

على الرغم من وجود بعض المبالغات في الرواية التي قصها الطبيب ( مثل نقطة تجييش 8 مليون جندي أمن مركزي )

إلا أنها تُثير القلق بالفعل

وللعلم فقد كشف حازم أبو إسماعيل منذ ثلاثة أشهر تقريبا عن نفس الأمر , وصرح بأن لديه معلومات مؤكدة عن أن الداخلية تقوم بإصدار بطاقات مدنية لأفراد الشرطة , ورأى أن في ذلك مقدمة لعمل ما , وهذا هو رابط تصريح أبو إسماعيل في مارس 2012 :

أبو إسماعيل: لدي معلومات مؤكدة عن إعداد بطاقات مدنية للشرطة قبل الانتخابات

ووقتها إستقبل الكثيرون كلامه هذا بسخرية

لكن عندما تتواتر الروايات عن هذه النقطة , فإن الأمر هنا يثير الربية

عموما سنرى كيف ستسير الإنتخابات ونسأل الله أن تكون هذه الأخبار كاذبة

ولا نملك الأن إلا تقديم حسن الظن إلى أن يثبت العكس .

تم تعديل 22 مايو 2012 بواسطة ابراهيم عبد العزيز

[ام سلمي]

بالنسبة لوجود اسماء ظباط جيش او شرطة او امن مركزي في قاعدة بيانات الناخبين ، فده اكيد صحيح

و عصام سلطان قدم للكتاتني مذكرة بالكلام ده ،

و لما اتسأل بجاتو عن الموضوع ده في المؤتمر اللي كان بيشرح فيه الانتخابات حتتم ازاي

ما نفاهوش ، و اكد ان في اسماء ظباط في قواعد البيانات و كانت الحجة اللي قالها ان ممكن يكونوا ما غيروش

المهنة في البطاقة و لذلك لم يستبعدوا من القوائم ، طبعا هو ما حددش نسبة قد ايه من الظباط دول

ممكن يبقوا موجودين في القوائم

اعتقد ان مش معقول المجلس العسكري ساكت و قاعد مستني يشوف مين اللي حيكسب و هل ياتري حيكون حد من اللي ممكن

يحاسبه علي الدماء و الاخطاء اللي حصلت طول فترة حكمه و اللا لا ، بالتأكيد انه مظبط امور احنا ما نعرفهاش

و بصراحة تصرفاته طول السنة اللي فات و ازاي عرف يخللي الناس يصدقوه و يكره الثوار و الاسلاميين في بعض

و عدم محاسبة اي من اللي قتل المتظاهرين ا و اللي قتلوا الناس في ماسبيرو و اللي كشفوا العذرية واللي

سحلوا البنات و البلطجية اللي قتلوا الناس في محمد محمود و العباسية و في الاخر يظهر كأنه برئ

تخللي الواحد ما يصدقش انه ممكن يسيب الامور تمشي طبيعي

و الحقيقة اني سمعت كمان ان في رشاوي بتتدفع للناس في بلد زوجي علشان ينتخبوا شفيق

طيب ايه الحال لو الكلام ده بيحصل في كل قري مصر مستغلين حاجة الناس للفلوس في القري دي

الامر بصراحة ما يطمنش و ربنا يستر

تم تعديل 22 مايو 2012 بواسطة ام سلمي

[فوس فوس]

انا مش مقتنع بحكاية التزوير لصالح الفريق شفيق لان كده معناه عودة زمن مبارك – الرئيس قائد عسكري على الجيش ومؤسسات الدولة - وهذا ما يرفضه المجلس العسكري أو الجيش بصفة عامة ويكفي ما مر به اثناء فترة حكم مبارك.. لكن الطموح الوارد للمجلس العسكري هو الاستقلال بنص الدستور...وساعتها مش هتفرق من رئيس الدولة..لانه ملزم حسب الاعلان الدستوري بكتابة دستور البلاد....وحركة صايعة منهم..يعرضوا عليه البنود المطلوبة الخاصة بالمؤسسة العسكرية...ويا يوافق عليها..يا اما يطبقوا الاعلان الدستوري باعادة انتخاب المجالس النيابية ورئيس الدولة حسب الدستور الجديد اللي ربما ينكتب بعد سنين.

[se_ Elsyed]

تصريح غريب لمدير حملة ترشيح شفشق

قال النهاردة إنه

لن يوجد لحملتهم أي مندوب أو من له توكيل لمتابعة الإنتخابات في أي لجنة ....لأننا نثق في نزاهة القضاء المصري

قول والله ؟

دي اول مره أشوفها في إنتخابات بصراحة

يعني مرشح الاخوان هاينزل ما لا يقل عن 150 الف متابع ومندوب ويباتوا بكره أمام اللجان لحد بعد بكره ... وهايحضرا الفرز طبعاً

وأبو الفتوح معاه 100 الف متطوع معاهم توكيلات

وحمدين معاه عدد كبير من المتطوعين

وده شيء مشروع ومطلوب في الإنتخابات اللي زي دي

[آل مصريم]

الكلام أبعد من أن يصدقه أى عاقل ببساطه... بسبب الرقم الضخم اللى قاله... 8 مليون... عسكرى أمن مركزى... المفروض اللى بيعمل حاجه كده بيعملها فى السر... و بيختار لها أشخاص يثق فى قدرتهم على الكتمان و كلنا عارفين إن جنود الأمن المركزى بيكونوا غالبا من الناس البسطاء جدا .. اللى يصعب أعطائهم مسؤليه غير القوه العضليه... و موضوع قيامهم بمثل هذا و كتمانه مش متوقع منهم... يعنى الخطه السريه ديه غبيه ولا تخرج إلا من غبى... و العالم ديه مش أغبيا

الحكايه بسيطه...ء

و ياريت تكتب له على الفيس بوك برضه.. تعليقا

و تذكره وإن إختلف السبب بالآيه

لَئِن لَّمْ يَنتَهِ الْمُنَافِقُونَ وَالَّذِينَ فِي قُلُوبِهِم مَّرَضٌ وَالْمُرْجِفُونَ فِي الْمَدِينَةِ لَنُغْرِيَنَّكَ بِهِمْ ثُمَّ لا يُجَاوِرُونَكَ فِيهَا إِلاَّ قَلِيلا

فإن أبى فإنقل له عنى... ما كتبته فى موضوع مشابه

الحمد لله الذى عافانا مما إبتلاه به و فضلنا على كثير من خلقه تفضيلا

من أرسل لك هذه الرساله... إما من الخايبين اللى عارفين إنهم ساقطين... يعنى ساقطين

أو ربما يكون شخص مقتنع تماما بما يقول

فى الحاله ديه يبأه مصاب بضلالات الاضطهاد و العظمه فى آن,... و على خلفيه من شخصيه سكيزوتيبال

يعنى مرض ذهانى و إضطراب شخصيه و العياذ بالله

و مش حينفعه فى العلاج لا الدكتور عكاشه ولا الدكتور عادل صادق الله يرحمه ولا حتى فرويد

و ليس له إلا العباسيه المستشفى مش الميدان

...

[WASEET]

الانتخابات ستكون نزيهه تماما ... لانهم يعلموا ان التزوير سيكون مفضوح وسيؤدي لثورة تطيح بهم ... ما يريده المجلس العسكري هو نموذج عصام شرف2 ... رئيس ثوري لا يتم تسليمه صلاحيات فعليه وبالتالي يفشل في عمل إي أصلاح حقيقي ثم يتم تدبير انفلات امني وحوادث ارهابيه وبالتالي يكفر الناس بفكرة الرئيس المدني ويرحبوا بحكم الجيش ويكفروا بالديمقراطية بل لا يفكروا في أي ثوره ثانيه لعشرات السنين .... وفي افضل الاحوال سيتركوا الرئيس المدني في منصبه بينما القرار النهائي لهم مثل النموذج التركي قبل ان يتمكن اردوغان من الاطاحه بحكم الجنرالات

[طارق مصرى]

الانتخابات ستكون نزيهه تماما ... لانهم يعلموا ان التزوير سيكون مفضوح وسيؤدي لثورة تطيح بهم ... ما يريده المجلس العسكري هو نموذج عصام شرف2 ... رئيس ثوري لا يتم تسليمه صلاحيات فعليه وبالتالي يفشل في عمل إي أصلاح حقيقي ثم يتم تدبير انفلات امني وحوادث ارهابيه وبالتالي يكفر الناس بفكرة الرئيس المدني ويرحبوا بحكم الجيش ويكفروا بالديمقراطية بل لا يفكروا في أي ثوره ثانيه لعشرات السنين .... وفي افضل الاحوال سيتركوا الرئيس المدني في منصبه بينما القرار النهائي لهم مثل النموذج التركي قبل ان يتمكن اردوغان من الاطاحه بحكم الجنرالات

مفيش مانع ان يكون كلام التزوير صحيح لان مش شرط يكون فى سيناريو واحد لاجهاض الثورة لكن السيناريو تزهيق الناس من الثورة هو الاقرب و الشواهد تدل على ذلك

[الغريب]

طيب بالله عليكم

مؤتمر صحفي لشفيق صباح اليوم ، ممكن حد يفسر كلامه غير أنه دعائة إنتخابية صريحة في وقت الصمت الانتخابي

http://www.youtube.com/watch?v=bFzSlnVtqec

[WASEET]

الانتخابات ستكون نزيهه تماما ... لانهم يعلموا ان التزوير سيكون مفضوح وسيؤدي لثورة تطيح بهم ... ما يريده المجلس العسكري هو نموذج عصام شرف2 ... رئيس ثوري لا يتم تسليمه صلاحيات فعليه وبالتالي يفشل في عمل إي أصلاح حقيقي ثم يتم تدبير انفلات امني وحوادث ارهابيه وبالتالي يكفر الناس بفكرة الرئيس المدني ويرحبوا بحكم الجيش ويكفروا بالديمقراطية بل لا يفكروا في أي ثوره ثانيه لعشرات السنين .... وفي افضل الاحوال سيتركوا الرئيس المدني في منصبه بينما القرار النهائي لهم مثل النموذج التركي قبل ان يتمكن اردوغان من الاطاحه بحكم الجنرالات

مفيش مانع ان يكون كلام التزوير صحيح لان مش شرط يكون فى سيناريو واحد لاجهاض الثورة لكن السيناريو تزهيق الناس من الثورة هو الاقرب و الشواهد تدل على ذلك

طبعا انا متفق مع حضرتك ان عندهم اكتر من سيناريو وكل ما يفشل سناريو هينتقلوا للي بعده

[mamdowh]

عرفتوا مين اللى زور الانتخابات

V

V

V

V

V

V

V

V

V

V

V

V

V

V

الشعب..... اه والله

تم تعديل 25 مايو 2012 بواسطة mamdowh

[عادل أبوزيد]

قرات هذه القصة اكثر من مرة و ناقشها مع عدد من معارفي و توصلت الى انها لا يمكن ان تكون حقيقية بالكامل لعدة اسباب اولها و اهمها انك لا يمكن ان تخفي في مصر عملية واسعة النطاق لتغيير الرقم القومي حتى لو كنا نتكلم عن مجرد مليون حالة

ما سبق كان إستهلالا لابد منه

من جانب اخر الامور تدعو للريبة فظهو احمد شفيق فجأة في قامة المرشحين للرئاسة في مصر مع حملة كبيرة جداً من ال outdoor و هى كمية الإعلانات الكبيرة الزرقاء اللون ثم قيل ان سيادة الفريق اشتراها وقد كانت قدرت قيمتها من قبل بمبلغ يقترب من العشرين مليون من الجنيهات

كل ما سبق لا يبرر و لا يجزم و في نفس الوقت لا ينفي بشكل قاطع احتمال حدوث شئ ما غير قانوني او غير شرعي لصالح سيادة الفريق.

اليوم ظهر خبر في اليوم السابع عن بلاغ للنيابة عن قيام الداخلية بحملة تغيير كبيرة فى بطاقات الرقم القومي لعشرات الألوف من رجال وضباط الأمن. و البلاغ موثق و معه الكثير من الأدلة.

و كما قلت عن في بداية مداخلتي أني اميل الى عدم الثقة بهذه الاخبار الا ان الامر عندما يصل للبلاغ حقيقي موثق فالأمر يتطلب تمحيصا و فحصا قانوني ان لهذا البلاغ.

[متعب]

http://www.youtube.com/watch?v=qFPr3WT0P_k

[متعب]

http://www.youtube.com/watch?v=YzFTCn2rXA0&feature=player_embedded

[متعب]

تزوير بالاوراق الرسميه

[متعب]

http://www.youtube.com/watch?v=THQ03iGmBmw