بلاها مرسي ..... إختار شفيق

[Alshiekh]

عنوان غريب، مش كده؟

أولا أنا لا أؤيد شفيق ورأيي فيه انه لايصلح للرئاسة تماما مثل رأيي في محمد مرسي،

ولكن عند إختيار السيئ والأسوء، أجد انه هو السيئ وان محمد مرسي والتنظيم من وراءه هو الأسوء وتجربة 15 شهر هي عمر الثورة تشهد على تنظيمه بذلك.

وقبل ان تتهموني بالفلولية او بالجنون أو معادة الإسلام، تعالوا نفكر بالعقل وبالمنطق.

ليه شفيق مش مرسي؟

لان شفيق من السهل علينا اننا نشيله ومفيش حد حيتهمنا بأننا ضد الإسلام او اننا بنكره الإسلام.

لان شفيق لو حبينا نشيله الاخوان حيتعاونوا معانا إلا إذا عملوا اتفاق معاه.

طيب لو مرسي مش عاجبنا وحبينا نشيله، ايه اللي حيحصل؟

أولا قبل ان نشيل مرسي، لازم نشيل الاخوان وتنظيمهم ومرشدهم لانهم حيقفوا في وشنا زي لما عملوا عند مجلس الشعب، لاننا في الحقيقة مش حنشيل مرسي بس، بل حنشيل تنظيم دولي.

لاننا لو حبينا نشيل مرسي مش حنلاقي حد من الاخوان واقف معانا.

لاننا لو حبينا نشيل مرسي حيتهمونا بأننا كارهين للإسلام وبنحارب كل ماهو إسلامي، واديها خطب في المساجد ايشي تكفير وايشي دعوة للتوبة عن مهاجمة مرسي.

تعالوا كده نشوف عندنا في المنتدي مثلا،

أي عضو كتب حاجة ضد مرسي او الكتاتني او صبحي صالح او البلتاجي او المرشد سابقا وحاليا تم اتهامه بالعلمانية والليبرالية الفاشلة الكافرة الداعرة الهمايونية المهلبية الاسفلتية السوداوية الشاذة.

في حين ان الهجوم على شفيق او عمرو موسى او حتى البرادعي ، نجد الاستحسان والثناء والنجوم الخضراء نازلة ترف عمال على بطال، مع ان كل الهجوم على هؤلاء ليس له اي منطق سوى انهم ليسوا تابعين للسلف او الخلف قصدي الاخوان.

وبعدين تعالوا نحسبها، هو شفيق ومرسي مش الاثنين حصلوا تقريبا على نفس النسبة من التصويت؟

شفيق لاعمل سلاسل بشرية، ولاعمل 25 مؤتمر انتخابي في 25 محافظة في آن واحد ولم يتوقف البرلمان علشان اعضاؤه تلف المحافظات تدعو له ولم يدعي هو ولا مؤيدوه ان النتيجة محسومة لصالحه من الجولة الأولى، ىفي حين ان العكس هو ماحدث.

يبقى ليه مانفكرش بالعقل والمنطق ونشوف وجهة نظر الناس اللي اختاروا شفيق، وايضا وجهة نظر اللي لم يختاروا مرسي.

بقول الكلام ده علشان نبطل نسفه في رأي من اختاروا شفيق ونتهمهم بأنهم ضد الثورة وانهم يريدون انتاج النظام السابق وهذا غير حقيقي لان النظام السابق انتهى ولا يستطيع كائن ان يعيده إلا إذا مات الشعب المصري أو أخذ مخدر طويل المفعول.

ماذكرته كان مجرد نقاط بسيطة لاتحتاج تفكير ولا عصر مخ، لكن بالطبع التعمق في دراية الفكرة سيكون في صالح شفيق لو تمت تلك الدراسة بحيادية.

[طارق مصرى]

ليه شفيق مش مرسي؟

لان شفيق من السهل علينا اننا نشيله ومفيش حد حيتهمنا بأننا ضد الإسلام او اننا بنكره الإسلام.

لو حبيت تشيل شفيق هتلاقى امن الدولة كهربا و كرابيج و اتهام بالعمالة لاسرائيل و تمويل من الخارج ده غير الامن المركزى و البلطجية يعنى خرطوش فى العين و سواطير و رصاص مطاطى و حى حضرتك نسيت كام واحد مات و اصيب بعاهه من اول الثورة الى الان ؟!!

لان شفيق لو حبينا نشيله الاخوان حيتعاونوا معانا إلا إذا عملوا اتفاق معاه.

و لو حبينا نشيل مرسى فى القوى الثورية و الشباب اللى اسقط بعون الله نظام مبارك و الفلول و المسيحين هيسعدوك برضه

طيب لو مرسي مش عاجبنا وحبينا نشيله، ايه اللي حيحصل؟

أولا قبل ان نشيل مرسي، لازم نشيل الاخوان وتنظيمهم ومرشدهم لانهم حيقفوا في وشنا زي لما عملوا عند مجلس الشعب، لاننا في الحقيقة مش حنشيل مرسي بس، بل حنشيل تنظيم دولي.

ليه لازم تشيل التنظيم ؟ انت لو حبيت تشيل مرسى و الاخوان و قفوا فى وشك هيعملوا ايه هيضربوك بالخرطوش و لا القنابل و لا ايه ؟

لاننا لو حبينا نشيل مرسي مش حنلاقي حد من الاخوان واقف معانا.

و لو حبيت تشيل شفيق مش هتلاقى و لا شرطة و لا جيش و لا النصارى و لا المنتفعين و البسطاء معاك شوف خد كام صوت حضرتك

لاننا لو حبينا نشيل مرسي حيتهمونا بأننا كارهين للإسلام وبنحارب كل ماهو إسلامي، واديها خطب في المساجد ايشي تكفير وايشي دعوة للتوبة عن مهاجمة مرسي.

مش كان فى خطباء و مشايخ بيحرموا الخروج على مبارك ؟ حصل ايه الشعب همه ؟ و لا اسقط مبارك

نسيت يا باشا ان نظام مبارك كان بيعين خطباء المساجد و اللى نالوا الرضا من امن الدولة ده غير اللى بيطلعوا فى التليفزيون الرسمى افتكر ايام السادات اللى كانوا مسمينه الرئيس المؤمن و لا دولة العلم و الايمان و كنش ساعتها نظام الاخوان اللى بيحكم

ننتخب مرسى لان الاخوان معندهمش امن دولة و لا شرطه و لا جيش و لا امن مركزى و لا مخابرات و لا رجال اعمال معاهم كل اللى فات ضدهم يعنى مش هيكون من مصلحتهم ان مرسى يحكم بعكس شفيق لو مسك مش هيخلونا نعمل ثورة تانى و هيكون حكم العسكر 60 سنة تانى , حكم شفيق يعنى انتقام حقيقى من الشعب من الشرطة و امن الدولة و رجال الاعمال و من شفيق اللى انضرب بالجزم لكن الاخوان هيحولوا يصلحوا الصورة ويكسبوا الناس

تم تعديل 26 مايو 2012 بواسطة طارق مصرى

[نوران]

[saifeldin]

السلام عليكم

هو فيه بس سؤال رفيع :

ليه حضرتك مرسي ومن وراءه الاخوان اسوأ (من وجهة نظرك) من شفيق ومن وراءه نظام ظالم ومستبد أذل الشعب لمدة 30 سنة؟؟؟؟؟؟؟؟؟

كيف تحكم على شيء لم تجربه؟؟

وارجوك لا تخبرني باداء مجلس الشعب .لان رغم بعض الاخطاء التي وقع فيها المجلس من اخوان وغير الاخوان هو افضل بكثير جدا من مجلس الحزب الوطني على اقل تقدير لن يترك البلد سداح مداح للرئيس والحكومة يعيثوا فيها فسادا ولم ولن يغير الدستور عشان خاطر عيون ابن سيادة الرئيس وغيره كثير وكثير وكثير

[Abu Reem]

بقول الكلام ده علشان نبطل نسفه في رأي من اختاروا شفيق ونتهمهم بأنهم ضد الثورة وانهم يريدون انتاج النظام السابق وهذا غير حقيقي لان النظام السابق انتهى ولا يستطيع كائن ان يعيده إلا إذا مات الشعب المصري أو أخذ مخدر طويل المفعول.

ولو ان الاستاذ / طارق المصري ...رد فأوفى. الا انني استوقفني. هذه الجزئية في الاقتباس اعلاه والذي معناه أن من ينتخب شفيق او يمتنع عن الادلاء بصوته لا يكون ضد الثورة !!؟؟

لأ. ده يكون ضد الثورة ونص وتلات اربع كمان..كيف لمن يتجرأ ويساند احد اركان النظام السابق ألا يكون ضد الثورة ...امال ضد ايه يعني ؟

وانا عن نفسي اعتقد ان كل من أيد الثورة سيذدري ويحتقر كل من سيساند شفيق....لانه بهذا يعلن بوضوح انه ليس مع الثورة ولا مع من قامت من اجله الثورة من أهمية التخلص من حكم العسكر الديكتاتوري ، وحكم الانظمة السابقة التي سلبت الاموال ونهبت خيرات البلد واعتقلت الرجال وانتهكت حرمات البيوت

فهل نهب الاخوان بلدهم ، وهل باعوا غازها وانتهكوا حرمة اخوانهم في الوطن ، وهل اخذوا فرصة الحكم اساسا لكي نحاسبهم ؟؟؟

من يريد ان ينتخب موسى فهو حر ولا يشرف الاخوان ولا يشرف الثوار ولا يشرف مؤيدي الثورة بأي حال من الاحوال....لا نريد منه من احد...فالاخوان سيحصلوا على اصوات كل من ايد الثورة وهم كثيرون...ولله الحمد ويكفينا اصوات من اظهرت الثورة معدنهم عندما حانت لحظة الحسم وترفعوا عن مقايضة الااخوان في سبيل اعطائهم اصواتهم لانهم ادركوا ان الخلاف السياسي لا يعني الانحياز الى المجرمين الواضح والثابت اجرامهم

ولن يزيدنا كثيرا مليون او 2 مليون صوت سيذهبوا لشفيق او يمتنعوا... فهنيئا لشفيق باصواتهم

ولكنهم سيظلوا اعداء الثورة في نظرنا مهما فعلوا لاخفاء هذا الامر ...لان الامر واضح لا لبس فيه ...، ولا يلوموا الا انفسهم لو فاز مرسي وشعروا بعدها من ازدراء كل مؤيدي الثورة

ارجوكم لا تعطوا محمد مرسي اصواتكم ....يامن ترون الاخوان شراً مستطيرا......فيشرفنا عدم الحصول على مثل هذه الاصوات ...

[نوران]

تم تعديل 26 مايو 2012 بواسطة نوران

[همسة الغامدي]

مرحبا بك اخي العزيز

في البداية انا اتفهم وجهة نظرك في خوفك من سيطرة الاخوان

وهذا شئ طبيعي ولكن يا اخي الكريم خوفك مبني على استنتاجك واستقرائك لمواقف الاخوان بعد الثورة

لكنك ومعك الجميع لم تجربوا الاخوان وتشاهدوا ادارتهم للبلد ولم تعرفوا سياساتهم داخليا او خارجيا

كل مالدينا هو كلام نظري فقط طبعا كان للاخوان اخطاء ولا احد ينكر هذا ولن ندافع عن اخطائهم فقط لاننا نريد مرشحهم

لكنها اخطاء سياسية لم يكن ثمنها دماء ابناء مصر او كرامة الشعب او اقتصاد البلد

وبالتالي فهم اقل الضررين لو حسبتها من وجهة نظر ان الاثنين ضرر او الاثنين سيئين

اقل حاجة يامحمد انتخاب مرسي يعني نجاح الثورة لانها جابت نظام جديد وريئس جديد لاعلاقة له بالنظام القديم

اما شفيق فهو يعني ماكانش لو لازمة كل اللي عمله المصريين في السنة والنصف اللي فاتوا

محمد ايها الاخ العزيز الحياة علمتنا الا نحكم على شئ قبل ان نجربه ..

فلنعطي الاخوان فرصة وربما كل هذا الخوف يطلع لامبرر له

ربما تحدثك نفسك بانتخاب شفيق نكاية بالاسوأ

لكن تذكر انك تعطي صوتك لمن يده ملوثةبدماء ابناء مصر الذين منحوك الحق لتدلي بصوتك بكل حرية

كلماتي اتمنى ان لا تغضبك لكنني لا اريدك ان تكون ذلك الرجل الذي احدى عيونه تؤلمه فيفقأ السليمة ليتخلص من الالم

دمت طيبا اخي الكريم

تم تعديل 26 مايو 2012 بواسطة همس

[ابوهنا]

هل الثوره التى حدثت بفضل الله قبل كل شئ

هل هذه الثوره هى دين وعقيده

وهل هى غايه ام وسيله؟

الاستاذ محمد اول مره اتفق مع حضرتك على الرغم من انى لست علمانى او ليبرالى واتمنى تطبيق شرع الله الذى يدعو الى ان اكون امن فى بيتى وعملى ومسجدى واملك قوت يومى واعيش حياه كريمه

انا انتخبت شفيق وان شاء الله سوف انتخبه فى الاعاده لانى لا اريد لمصر ان تحكم بفتاوى الشيخ الفلانى والشيخ العلانى

اريدها ان تحكم بالقانون

وبالقانون الاسلامى الذى يقره علماء البازهر ولامانع من اشتراك علماء اخرون معهم

على سبيل المثال نازل على الفيس بوك ان الشيخ نصر فريد واصل قال ان التصويت للفريق حرام شرعا وبحثت فى كلام الشيخ لم اجد انه قال ذلك

يعنى حتى كلام العلماء نحوره على هوانا

واذا كان الاخوان يخافون على الثوره فلما لايتنازل مرشحهم الى السيد حمدين وساعتها سوف اصوت الى حمدين

ولم يمنعنى من التصويت الى حمدين الا خوفا من تفتيت الاصوات

[moamana]

ياااااااااااه يا استاذ محمد شوف يا ما اتناقشنا و اتحاورنا و كنت مع حضرتك علطول الخطط بس معلش و من غير زعل المرة ديه انا مش مع حضرتك خالص

اولا و قبل اى كلام انا مش اخوان و اللى قرا ردودى طول الوقت هنا فى المنتدى يعرف اد ايه هاجمتهم و انى برادعاوية اصيلة بس انها فعلا اللحظة الفارقة على راى الشيخ حازم اللى عمرى ما اقتنعت به هو الاخر

شفيق ده قاتل بدم بارد فاسد و مرتشى و كل اللى يخطر على بالك

اما الاخوان فطماعون طماعون و ربما صبحوا متسلطين من اللى حصلهم على مر العصور من سجن و تعذيب .....الخ

طيب نجى الان احنا فهمنا نفسياتهم الى حد ما تاثيرهم علينا ايه بقى

واحد رغم ان الاخوان يبانوا ككتلة واحدة الا اننا عمرنا ما هننسى شبابهم الا نزلوا يوم 25 و 26 قبل ما المرشد يديهم الاذن عمرنا ما هننسى تاييدهم لابو الفتوح و محبتهم لصباحى ......سيبك من الكبار المهم فى المستقبل شباب الاخوان اغلبه صحيح اخوانجى لكن عقله متفتح و سليم و يمكن التفاهم معهم خاصة شبابهم و هم سريعوا التاثر بالحق و الاعتدال و لو نفذوا اوامر المرشد مرة ممكن لما يظلم مينفذوهاش تانى مرة ..........خاصة مع احترامى انهم الى الان الكلام اللى بيتقالهم احنا معناش اى سلطات على ارض الواقع لكن قوتنا فى اتحادنا و انتم شايفنا بنكسب فى اى معركة

اما شفيق فمن اعوانه و من حوله كى نثق اننا ممكن نشيله يا راجل نستنى تانى نشيل واحد بس المرة ديه بعد ما فاز فى انتخابات يدعى انها نزيهة .....اعوانه ناس مغيبة عقولها ناس جهلة بيتقالهم عذبوا الناس دول و موتوهم دول من انصار اليهود و متمولين من ايران فى نفس الوقت و يصدقوا ....فاكر فيلم الكرنك احنا اخدنا 30سنة ........عايز كم سنة كمان

معلش ارجع تانى للى حضرتك خايف منه و هو الارهاب الدينى صح انا عايشة فى السعودية حيث اقصى درجات الارهاب الدينى و الفكرى بس للامانه الشديدة الشديدة و بوضعى مليون خط ان منهج الاخوان ليس وهابى بل وسطى .....وسطى ...اكثر منه ارهابى

انا اختار السعودية فى الحياة على اوروبا مثلا اللى شوية شوية احنا بنتحول ليهم فى العرى الثقافى و الاجتماعى بعيدا عن الوسطية السياسية اللى عمرنا ما هنشوفها تحت حكم شفيق برده

و معلش بعيدا عن التطرف الدينى لماذا اغلب اصوات المسيحيين لشفيق و طبعا الان لا محالة صوتهم لشفيق لانهم لا يريدون تطبيق الشريعة الاسلامية ام لا يريدون الاخوان ....كن امينا معغ نفسك وجاوب سؤالى ........هل لو كان الاخوان مش طماعين او منافقين هل كان الفلول و المسيحيين سينتخبون مرسى ام شفيق برده

الاجابة واضحة و معروفة لانها النفس البشرية التى جبلت على الخوف من الاخر و رفض سيطرته و هيمنته عليك ....لذلك فمهما خرج الامر بره الدين يظل فى صميم الامر سلاح قوى يستخدم

[طارق مصرى]

من صور العبقرية ايضا

((لن أنتخب مرسى لان الاخوان سيعيدون انتاج الحزب الوطنى بشكل اخر لذا سأنتخب شفيق الذى من المؤكد سيعيد الحزب الوطنى و نظام مبارك ))

[Om Zayd]

الحمد لله على سلامتك يا مؤمنة

[ابوهنا]

العجيب ان من اعطوا اصواتهم للفريق لم يخرج منهم كلمه خارجه ضد الاخرين

تعال للطرف الاخر المفروض ان مايسمى طرف اسلامى او طرف ثورى تجد البذاءه والتهجم والسفه ضد من اختار شفيق

[طارق مصرى]

((الاخوان سيكفرون من يعارض مرسى و سيهتمون بمصالحهم الشخصية فقط و يحكموننا بالحديد و النار وووو..الخ))

ده على اسا اننا عايشين فى كوكب تانى و مش معاشرين الاخوان اللى هم الطبيب و المهندس و المحامى و العامل و زميلك فى الجامعة و اللى شفنا من افرادهم الاحترام و الاخلاق و مساعدة الناس و التساهل كثيرا فى الامور الشرعية التى بها خلاف مش عارف الناس بتجيب القصص دى منين؟!!

[أبو محمد]

العجيب ان من اعطوا اصواتهم للفريق لم يخرج منهم كلمه خارجه ضد الاخرين

تعال للطرف الاخر المفروض ان مايسمى طرف اسلامى او طرف ثورى تجد البذاءه والتهجم والسفه ضد من اختار شفيق

ملاحظة فى محلها تماما

ولكن

أنت لا تعرف معنى الحرية

الحرية هى أن تكون حرا فى أن تشتم خصمك

وأن تقتله إذا رد عليك

[أبو محمد]

من يريد ان ينتخب موسى فهو حر

موسى مين يا عم ابو ريم

ما تشيله من دماغك بقى

[AbuZeyad]

تسلم يا استاذ طارق

الله ينور

[Alshiekh]

السلام عليكم

هو فيه بس سؤال رفيع :

ليه حضرتك مرسي ومن وراءه الاخوان اسوأ (من وجهة نظرك) من شفيق ومن وراءه نظام ظالم ومستبد أذل الشعب لمدة 30 سنة؟؟؟؟؟؟؟؟؟

كيف تحكم على شيء لم تجربه؟؟

وارجوك لا تخبرني باداء مجلس الشعب .لان رغم بعض الاخطاء التي وقع فيها المجلس من اخوان وغير الاخوان هو افضل بكثير جدا من مجلس الحزب الوطني على اقل تقدير لن يترك البلد سداح مداح للرئيس والحكومة يعيثوا فيها فسادا ولم ولن يغير الدستور عشان خاطر عيون ابن سيادة الرئيس وغيره كثير وكثير وكثير

جميل جدا سؤال حضرتك علشان كده حجاوب عليه

موضوع التجربة ده ، ممكن نجربه مع مرسي وممكن نجربه برضه مع شفيق

طيب الطفل الصغير لازم يجرب يتلسع من الحاجة الساخنة علشان يعرف يعني ايه ساخن وبارد ومن كده بيتعلم.

لكن الكبار مش لازم يجربوا الحاجة بنفسهم علشان يعرفوا النتيجة، كفاية قوي انهم ينظروا حولهم ويفكروا ويقرروا.

جميل؟

تجربة الاخوان شفناها مطبقة في عدة أماكن وبطرق مختلفة وجميعها ادت إلى كوارث،

إيران

السودان

أفغانستان

هل ترى ان أي من تلك التجارب حققت نجاحا؟ في رأيي لم يحدث.

تجربة الحكم الديني -في رأيي- هي تجربة فاشلة لانها تقسم الأمة وتقسم الناس وتعتمد الولاء بندا أساسيا في الإختيار، وكلما الولاء زاد للمرشد أو الإمام إرتفعت قيمة العضو ومركزه في التنظيم.

من أجل هذا فأنا لست على إستعداد للتجربة مع الإخوان.

نيجي لشفيق،

كما ذكرت سابقا انني كنت مع عبد المنعم أبو الفتوح كأحسن الوحشين، لان كل اللي كانوا باقيين على ساحة الترشح ينطبق عليهم مثل " مايبقى على المداود غير شر البقر "،

لكن بما ان ابو الفتوح مش متاح وموسى غير متاح وحمدين غير متاح، ولم يبقى سوى مرسي وشفيق، يبقى نتكلم عن شفيق لاني اتكلمت على مرسي.

شفيق -في رأيي- كان كبش فداء ولم يكن تكليفه بالوزارة لقتل الثوار وإنما كان لامتصاص غضب الثوار، وفي الوقت الذي حاول فيه ان يتقرب من الثوار كان هناك من يخطط ويدبر للعكس تماما، لا أبرئ شفيق من عداءه للثوار والبرادعي وقتها لانه في جميع الحالات كان مواليا للنظام السابق، ولكن أن نلقي عليه بمسئولية قتل الثوار وموقعة الجمل فهذا ظلم بين، مع ملاحظة انه تم تكليفه بالوزارة يوم 29 يناير ، يعني بعد خراب مالطة واصبح شفيق رئيس وزراء بلا صلاحيات أمنية حيث لم تكن هناك شرطة والجيش كان بالشوارع مع المتظاهرين وليس ضدهم.

علشان كده انا مش عارف ازاي نحمل شفيق مسئولية حاجة ماعملهاش.

وبعدين إذا كان مبارك وجمال وعلاء والعادلي وعز وسرور والشريف وباقي العصابة موجودين في السجن ومعظمهم يتم محاكمته بتهمة قتل المتظاهرين وموقعة الجمل، سابوا ليه شفيق لو كان هناك شيئ يدينه؟

هل كان شفيق أقوى وأعز من كل هؤلاء؟ على رأسه ريشة؟ لاأظن،

وأغلب الظن أن هناك دعاية قوية ضد شفيق استطاعت ان ترسخ في عقول الثوار رسخها من له مصلحة في القبض على كل مقدرات مصر في يده لتحقيق حلمه.

كل ما اقوله لا ابغي من وراءه إلا التحليل والبحث عن الحقيقة بعين حيادية بعيدا عن الانتماء لأي فصيل، ولذلك لن يري موضوعية كلامي كل من له انتماء لتيار ما.

علشان كده أرجو من الجميع أخذ رأيي بموضوعية لانني لاأبغي إلا صالح مصر، وفي النهاية طالما إرتضينا الديموقراطية حكما فلنقبل ماتأتي به لنا.

زكما قلت سابقا في مداخلة أخرى ان الشعوب طالما آمنت بالديمقراطية فلتحافظ عليها وتقبل بنتيجتها وتحارب من أجل إستمرارها حتى لو جاءت بعكس مايريده فصيل منها،

ولذلك سواء جاء مري أو شفيق للرئاسة فليس أقل من التعاون مع أي منهما لصالح الوطن وليس لصالح جماعة أو تيار.

وليول الله الأصلح لمصر ولشعب مصر.

[أبو محمد]

كما استخدم مبارك الأخوان كفزاعة

يستخدم الأخوان شفيق كهلاَّعة

[Abu Reem]

العجيب ان من اعطوا اصواتهم للفريق لم يخرج منهم كلمه خارجه ضد الاخرين

تعال للطرف الاخر المفروض ان مايسمى طرف اسلامى او طرف ثورى تجد البذاءه والتهجم والسفه ضد من اختار شفيق

ملاحظة فى محلها تماما

ولكن

أنت لا تعرف معنى الحرية

الحرية هى أن تكون حرا فى أن تشتم خصمك

وأن تقتله إذا رد عليك

ممكن حضرتك والاخ ابو هنا تقول لنا من هنا تكلم ببذاءة عن مؤيدي شفيق ؟؟؟

وهل كلمة ضد الثورة تعتبر بذاءة ؟؟

وسؤال اخير ..ألم تجدوا بذاءة في القاء التهم على الاخوان ومؤيديهم ووصفهم بانهم كذا وكذا ...وكل هذا على اساس افتراضات في علم الغيب يلقيها. كارهي الاخوان ؟؟؟

[أبو محمد]

العجيب ان من اعطوا اصواتهم للفريق لم يخرج منهم كلمه خارجه ضد الاخرين

تعال للطرف الاخر المفروض ان مايسمى طرف اسلامى او طرف ثورى تجد البذاءه والتهجم والسفه ضد من اختار شفيق

ملاحظة فى محلها تماما

ولكن

أنت لا تعرف معنى الحرية

الحرية هى أن تكون حرا فى أن تشتم خصمك

وأن تقتله إذا رد عليك

ممكن حضرتك والاخ ابو هنا تقول لنا من هنا تكلم ببذاءة عن مؤيدي شفيق ؟؟؟

وهل كلمة ضد الثورة تعتبر بذاءة ؟؟

وسؤال اخير ..ألم تجدوا بذاءة في القاء التهم على الاخوان ومؤيديهم ووصفهم بانهم كذا وكذا ...وكل هذا على اساس افتراضات في علم الغيب يلقيها. كارهي الاخوان ؟؟؟

معلش يا بو ريم .. ولا يهمك

فيه طعون على عدد أصوات شفيق

وبكده عدد الخونة والعبيد والوسخين والذين يستحقون

الازدراء والاحتقار

ممكن يقل شوية أو كتير

وبكده تهدأ نفوس الثوار ومن يتمحكون فيهم