بعيداً عن تعب الأعصاب من السياسة Let's have FUN

[se_ Elsyed]

النهاردة هاقدم لكم موهبتين عاوزين حد يكتشفهم .. أو عاوزين مؤسسة فنية تتبناهم – ينوبكو ثواب –

الموهبة الاول هي علي عليوه ياللي .. أغلس مغني أوبرا ممكن تقابله في كوكب المريخ ... لكن موهوب بجد .. ومتقمص دور مغني أوبرا لدرجة تحس إنه أخد تلامة الحلاقين وبقى سمج وأول ما ينطق لازم يجيلك شعور إنك عاوز تناوله شلوت في مناخيرة او ودنه أيهما أقرب لك ..

http://www.youtube.com/watch?v=y4Qnf1F-H-o

هابتدي أبسط الفن النخبوي ده للناس .. فببساطة نقول لهم إن الأوبرا هو فن كلاسيكي راقي لا يفهمه إلا النخبة المثقفة .. اما اللي واخد على شعبولا أو أخره سعد الصغير .. فهايعتبر ده جعير ونهيق ... وأغلب الأوبرات العظيمة بتبقى باللغة الإيطالية – سكوربيون .... هاحتاجك خليك جنبي اللهي يستر عرضك – وبالتالي إنت ممكن تعمل دماغ اوبرا صح من غير ما تكون فاهم ولا كلمة ... وبالتالي برضوا ممكن تفتكر إن الأوبريت ده عبارة عن كلمة واحده بتتكرر .. زي اللي بيقوله إبني علي دلوقت " فيجارو .. فيجارووووووووووو .. فيجاروووووووووو " وده مش صحيح ... أبسليوتلي

فزمان قوي كانت الناس رايقه .. وما عندهمش تعقيدات .. ولا 28 حرف ولا جرامر وفيرب تو بي والباسط بارطيسبول والحاجات المجعلصه دي ... كانت الحياة بسيطة .. والناس طيبين واللي في قلبهم على لسانهم .. وكانوا متفاهمين مع بعض .. يعني الواحد بيفهم التاني حتى من غير ما يتكلم او يقول حاجه ... عشان كده الكلمة اللي بتحسبها انت متكررة .. كانت بالنسبة لهم ذات معاني مختلفه حسب مخرج الألفاظ وهي خارجة منين – وكل واحد وضميره بقى – وحسب كمان طول الكلمة وقوتها ... يعني فيجارو . لوحدها .. غير فيجارووووووووووووووووووووووو وكدهوت

وهابسط أكتر وأديكو فكرة عن العرض الاوبرالي ده بيحكي عن إيه

- أولاً الأوبرا دي بتنافس أوبرا عايدة للفنان العظيم " فيردي " ... وهما الأتنين بيبدلوا الاماكن مع بعض .. يعني سنة تبقى عايدة الاول وفيجارو التانية زي شفيق ومرسي .. وسنة مرسي الاول وييجي وراه شفيق .. وهكذا

- وبتدور احداث هذه الأوبرا في اواخر القرن الثامن قبل الميلاد .. وهي عبارة عن قصة حب جمعت بين بنت غنية إسمها " فيجارو " .. وبين الجنايني بتاع القصر بتاعهم وإسمه " كوستاليدس " هو إسمه مدي على يوناني لكن هو أبوه إيطالي وامه مش عارفين لها مله لحد دلوقت .. ما علينا بلاش نجيب في سيرة الناس ... والمقطع اللي شوفناه عبارة عن مناجاة من كوستاليدس لحبيبته فيجاروا .. وهو واقف تحت شباك الأوضة بتاعتها اللي في تاني دور ... وكان بيبث من خلال تلك المناجاة سمومه قصدي أشواقه وبيقول لها إنها وحشته وكدهوت وإنه قطف لها شوية ورد من جنينة أبوها وجايبهم للتعبير عن حبه ... وتستمر الاحداث .. إلى أن يكتشف أبوها تلك القصة الملتهبة ... ولأنه كان أب متفاهم ... فنزل على رغبة بنته اللي كان نفسها تتجوز كوستا .. ودفنه في الجنينة جنب شجرة الموز القبلية اهو منه يستخدمه سماد طبيعي . ومنه يبقى خلص على المغني المقرف ده اللي عملوا له كالو في نافوخه ....

والموهية التانية .. ده فنان صادق عُمره ما عرف الكذب .. وإسمه " بودا " عبد الرحمن يعني ... وعنده 4 سنين .. بس عشان الاوبرا مُضرة للاطفال فبيفهم جمهورة إن عنده 10 سنين عشان يقدر يقدم فنه ويطرح نفسه وكدهوت .. وده مش عيب ما كل الفنانين بيلعبوا في عدادات عُمرهم .. وأقربهم الفنانة نجاة الصغيرة اللي بقى لها ييجي 70 سنة صغيرة ... هي جت عالواد اللي حيلتي يعني ووقفت ؟

انا هاسيب موهبته هي اللي تتكلم ومش هأثر عليكم

http://www.youtube.com/watch?v=_3FUnqCso74

وعشانا عليك يارب

وهابي نيو يير ... يعني أتمنى لكم وقت سعيد

حد عاوز مني حاجه قبل ما ألم العدة ؟

ملحوظة ( بقى لي يومين كل ما أكتئب عشان الإنتخابات وسنينها .. أروح ضارب لي حباية أوبرا من دول ... أقوم متهدول وغايب عن الوعي )

[عبير يونس]

بسم الله ما شاء الله

اللهم بارك لك فيهم

بس دول اتنين

فين التالت ؟ :blink:

لازم هو المخرج

:closedeyes:

ده فيديو يساعدهم على مزيد من التدريب

لمزيد من الاتقان

http://www.youtube.com/watch?v=QFFOHqx520E

[همسة الغامدي]

بسم الله ..ماشاء الله لاقوة الا بالله

ربي يخليهم ويرعاهم ويجعلهم لوالديهما قرة عين

فعلا السياسة صدعتنا وامرضتنا وجابت لنا الكآبة والهم

انا قررت اني ما اكتب ولاكلمة ..خلاص بجد اتخنقنا بنقول ونعيد نفس الكلام

شكرا لك يا ابو المواهب لو في امكانية تتصلوا (ارب قوت تالنت )يمكن يفوزوا !!!

[se_ Elsyed]

التالت فضل يعيط ويقول لي لو نشرت الفيديو هاخاصمك هههههههههههههه

.. أصله فضيحة

البيه غاوي رقص بريك دانس وهيب هب والهباب ده ...

وقدم فقرة مصورها ( هابعتها لك عالخاص ههههههههههههههه ) شوفتي البيني اديم اللي لما تعبان يقرصة بيقعد يتلوى إزاي على الأرض ؟.. مش بس كده .. ده التعبان من غباوته دخل جوه هدومه فكان عمال ينفض نفسه وكأنه اتجنن

[se_ Elsyed]

بسم الله ..ماشاء الله لاقوة الا بالله

ربي يخليهم ويرعاهم ويجعلهم لوالديهما قرة عين

فعلا السياسة صدعتنا وامرضتنا وجابت لنا الكآبة والهم

انا قررت اني ما اكتب ولاكلمة ..خلاص بجد اتخنقنا بنقول ونعيد نفس الكلام

شكرا لك يا ابو المواهب لو في امكانية تتصلوا (ارب قوت تالنت )يمكن يفوزوا !!!

الله يخليكي يا همس

فعلاً أراب جوت تالنت لحس دماغهم ..

بس انا مش هاشترك لهم .. أنا خايف على الجمهورب العربي يقلبها خريف عربي ويطالبوا برقبتي

[se_ Elsyed]

مش عارف علي وهو بيغني فكرني بالمطربة العظيمة جمالات كفته

انا باتأثر قوي بالأغنية .. خصوصاً الكوبلية بتاع " ضربني الحلو بالشلوت في راس قلبي وقال إخيه "

اصلي بأتخيل نفسي وأنا باخد الشلوت ده في معاميع قلبي ... شعور قاسي قوي

http://www.youtube.com/watch?v=iVYS_HXbPiU&feature=related