الفقر أم الديكتاتوية..من يحرك التغيير؟

[Sherief AbdelWahab]

في دول كدول الخليج تعيش رفاهية اقتصادية وبداءة سياسية لا نسمع كثيراً عن مطالب بالتغيير ، ولا عن مظاهرات تطالب بإتاحة حق التصويت للنساء ، ولا عن مطالبات بإقامة انتخابات نيابية أو نظم برلمانية أو تداول للسلطة..

ألا تلاحظوا أن تلك الصيحات بالتغيير لا تظهر إلا في الدول العربية الضعيفة اقتصادياً مثل مصر وقبلها كانت سوريا قبل نظام الأسد وتوريثه للحكم في استفتاء كان الأول من نوعه الذي شهد نسبة 100%-بدلا من التسعات الشهيرة؟

خلص الكلام

[Tafshan]

الامن و الاقتصاد هم ركائز الدعاية الانتخابية في اي دولة ، بالله عليك : اليست لقمة العيش هى اهم ما يبحث عنه اي مخلوق ؟؟؟

طالما من يحكم بلدى يشبعنى مادياً فلماذا اطلب تغيره ؟؟؟

[وليد صفوت]

أعتقد أن الحاجات الاساسية المُلحة هى التى تجبر الانسان على الاعتراض و ربما الثورة ....كما حدث فى الثورة الفرنسية ....

فالإكتفاء من حيث المأكل و المشرب و الملبس يعتبر من الحاجات الاساسية المُلحة , التى تفرض نفسها على كل حاكم .....

و فى هذا نبأ سعيد لنا .....

أبشركم يا أعزائى ............................................... نحن فقراء !!!!

و معنى هذا اننا أقرب الى طلب التغيير من أهل الخليج و الدول الغنية أمثالها !

تحياتى ...و ربنا يفقرنا كمان و كمان ....

[Shedou]

كلما ارتفع المستوى الثقافي للناس اصبح الاكتفاء المادي عندهم بالعكس حافز انهم يرفضوا ويثوروا لان الاشباع المادي يخليهم اكثر قدرة على التفكير وعلى الاهتمام بغيرهم من الناس. انا لاحظت ده في نفسي اما كنت في الاعدادي وثانوي وكانت العائلة في مستوى مادى مستريح كنت حتى بافكر في بتوع افريقيا اللي جعانين وبفكر ازاي اصلح كل مشاكل مصر!! وهنا في امريكا اصحابي اللي بلتقي بيهم على المستوى الفكري كلهم طبعا ظروفهم المادية جيدة جدا وده الطبيعي هنا، واحد منهم من اصل لاتيني لكن عمره ما عاش هناك حلمه انه يروح امريكا اللاتينية يعمل مدارس جيدة المستوى للفقراء، وكلهم رافضين تماما لسياسة بلدهم وكارهين بالذات لبوش...الخ. وبعض الامريكان من فترة بيقولو انهم عايزين "يهاجروا" كندا عشان هما رافضين سياسة بلدهم، يعني المشكلة مش اقتصادية، لكن طبعاً مش الغالبية، على ما اعتقد، هي اللي بتفكر كده، وان كان اصحاب الفكر ده هم القادرين على التغيير الحقيقي لان اللي بيثوروا من شدة الجوع مش هيكون عندهم اساسا حسن تفكير وادارة للامور هتبقى هوجة مش ثورة وتغيير، كل التغيير الحقيقي اللي حصل في التاريخ كان بناء على موقف فكري، الانبياء مثلا التغيير بتاعهم كان مبعثه موقف فكري وعقائدي.

[ragab2]

الفقر أم الديكتاتوية

الديكتاتورية

تجيب الفقر

والفساد والسرقة والاختلاس والخراب

[emmyyy]

الفقر

عض قلبي و لاتعض رغيفي

اي شعب و فرله عيش و سمنه و سكر و لحمه....الخ و اعمل الي انت عايزه بعد كده

[Tafshan]

كلما ارتفع المستوى الثقافي للناس اصبح الاكتفاء المادي عندهم بالعكس حافز انهم يرفضوا ويثوروا لان الاشباع المادي يخليهم اكثر قدرة على التفكير وعلى الاهتمام بغيرهم من الناس.

اسف ، انا مختلف معاك : هل سمعت عن ثورات او صراع على السلطه في السويد او سويسرا ؟؟ الاجابه لأ لأنهم مش محتاجين السلطه ، كل الشعب معاه فلوس و لو ما اشتغلش بيأخذ معونه من الدوله ... يقول عايز تغير ليه ؟؟؟؟؟؟؟؟؟؟؟؟؟؟

[Asat]

الفقر ليس شرط للتغيير:

فردريك إنجلز: إبن أحد رجال الصناعة في ألمانيا, كتب مع ماركس "النظرية الشيوعية"

أسامة بن لادن: ابن أحد رجال الإعمار في السعودية يريد أن يغير الحكم في بلده

أيمن الظواهري: ابن عائلة ثرية يريد أن يغير الحكم في بلده

الدكتاتورية ليس شرط للتغيير:

هتلر: لا ديمقراطية و رضى الكثير من الشعب بنظام الحكم

الصين: لا ديمقراطية و رضى الكثير من الشعب بنظام الحكم

دول الخليج (ربما, ما عدا السعودية): لا ديمقراطية و رضى الكثير من الشعب بنظام الحكم

ما أريد أن أقوله هو إن الإنسان و ما يحتويه من داخله هو الذي يغير

إذا كان الإنسان هدفه المادة, فسيطالب بالتغيير من أجل الحصول على المادة

إذا كان الإنسان هدفه قيم, فسيطالب بالتغيير من أجل القيم

[Shedou]

ما أريد أن أقوله هو إن الإنسان و ما يحتويه من داخله هو الذي يغير

إذا كان الإنسان هدفه المادة, فسيطالب بالتغيير من أجل الحصول على المادة

إذا كان الإنسان هدفه قيم, فسيطالب بالتغيير من أجل القيم

صح، الله ينور!!

في السويد أو سويسرا فعلاً ما فيش صراع على السلطة، وده طبيعي، وليه يبقى فيه صراع على السلطة لو الأمور ماشية تماما، التغيير مش مطلوب للتغيير لكن لوجود وضع مرفوض. لكن الفقر والفقراء ما يقدروش يعملوا تغيير حقيقي، وشوف مصر، الفقر عامل تغييب، الناس مش هيثوروا بسبب الفقر إلا لو وصل الأمر لأنهم فعلاً ما يلاقوش ياكلوا، لكن الفقرا عمرهم ما هيثوروا عشان قضايا تانية أو عشان حقوقهم الأخرى الأكثر الإنسانية وحقوقهم في اختيار الحكام..الخ. وكمان مش هيفكروا في الآخرين لأن مشاكلهم كفاية عليهم، وثورة الجياع أو هوجة الجياع لو حصلت مش هييجي من وراها تغيير، كل اللي هيحصل هتبقى هوجة وتغيير وتكسير وبعدين برضه الحكومة المتسببة في الوضع ده هتقدر تسيطر على الأمور تاني بالقوة ما دام فيه جيش بيحميها. عشان كده ما فيش أمل في حدوث تغيير في مصر مثلاً إلا على إيد المتحررين من أغلال الفقر لكن عندهم ضمير إنساني بيخليهم يرفضوا الدكتاتورية وسوء الحكم لأنه بيخلي ناس كتير جداً تفقد انسانيتها بسبب الفقر والجهل.

واللي بقوله برضه إن المجتمعات الغنية هتلاقي فيها إقبال الناس على الإعمال التطوعية أكبر بكتير من البلاد الفقيرة، لأن المستوى المادي المريح بيخلي كل إنسان يظهر على حقيقيته، فيه منهم بيفضلوا الحياة والاستفادة من المستوى المادي وده بيكون كل همهم، وفيه ناس تانيين لأن فيه عندهم قيم مختلفة يبتدوا يفكروا ليه في ناس تانية عايشة في الفقر واحنا أغنيا...

عشان كده المجتمعات الغنية فيها مشاركة سياسية أكتر والناس أما بترفض شيء بيكون لها دور فاعل أكثر من الفقراء. الفقر زي الدكتاتورية وكل واحد منهم سبب ونتيجة للآخر، والتخلص منهم واجب كل من هو حر منهم أو من أحدهم. عشان كده أغنياء مصر مسئوليتهم أكبر من فقراءها، والدول الغنية وشعوبها مسؤليتها أكبر من شعوب الدول الفقيرة.