أكبر عملية نصب فى أغسطس .. وسلم لى عالشفافية

[أبو محمد]

شعر الشعب المصرى بخازوق فى فاتورة كهرباء أغسطس .. كلنا شعرنا بيه مع إنه كان "سوكـِّيتى ومتشحم" علشان يبقى - كما فى العهد البائد - على كل إدرة حجر ، ولا حس ولا خبر

جاءنى محصل شركة الكهرباء الشهر الماضى وبمنتهى الأدب – كالعادة - قدم لى الخازوق .. قصدى فاتورة شهر أغسطس .. وبينما كنت أنظر إليها فاغرا فمى من هول المبلغ الذى لم أره على أى فاتورة كهربا من يوم ما اتجوزت .. سمعت جارى فى الدور الذى يعلونى يصيح فى المحصل اللى ساب لهم الوصل ونزل يحصل منى : "800 جنيه ليه يا حرامية ؟" .. وسمعت حرم المرحوم جارى فى نفس الدور الذى يعلونى : "700 جنيه ؟ ليه ؟ .. إلهى يخرب بيوتكم ؟" ..

أما أنا فنظرت إلى المحصل الغلبان وسألته : "950 جنيه ؟؟!! .. دى فاتورة شهر واحد ولا شهرين ؟!" .. قال لى "لا والله يا باشمهندس شهر أغسطس بس" .. دخلت الشقة "سوكـِّيتى" .. طلعت اللى فى جيبى وكملت من مصروف البيت اللى فى إيد الحاجة .. ودفعت للمحصل الغلبان الذى يتلقى الشتائم بالنيابة عن "أولى الأمر" ..

وقعدت أفكر .. واقول روحى .. ياروحى ياختى ، أغسطس ده كان الشهر اللى النور والميه مقطوعين فيه أغلب ساعات اليوم وخصوصا وقت الفطار فى رمضان باعتراف المسؤولين .. دا حتى الميليشيات الالكترونية ما أنكرتش ولكنها - كالعادة - ألقت بالمسؤولية على الفلول الخونة ، والثورة المضادة ، والدولة الغويطة .. مش مهم يا روحى مين السبب .. المهم إننا كنا عايشين فى الضلمة .. بأمارة الفانوس أبو 230 جنيه اللى بينوَّر توماتيكى لما نور الشركة يتقطع خبره .. أيوه ياروحى .. الفانوس اللى اشتريته فى رمضان علشان نفطر عليه وندعى : ذهب العطش وابتلت العروق "ساعة شق الريق بس" .. ونكمل الدعاء إن ربنا ينوَّر عقول بتوع الكهربا ويوزعوا الانقطاع ساعة الفطار على باقى مناطق اسكندرية ، ويشيلوا منطقتنا من دماغهم .. ده كان كلامى لروحى من ساعة ما دفعت الفاتورة المجعلصة دى

وفضلت من يومها أفكر وأفكر .. ثم أفكر وأفكر .. لغاية نافوخى ما وجعنى .. وهو كان موجوع أصلا من الخازوق "السوكـِّيتى المتشحم" .. وفضلت أفكر ثم أفكر إلى أن جاءنى – من يومين - المحصل الغلبان الذى أوكل إليه أولو الأمر مهمة تحصيل الفلوس وتحمـُّل الشتيمة عنهم .. سلمنى فاتورة شهر سبتمبر بابتسامة عريضة .. قلت له – فى عقل بالى – بتبتسم ليه يا غلبان ؟ .. مش حاشتمك انت .. هات يا خويا هات .. ماحنا خدنا عالخوازيق .. بصيت فى الفاتورة وعرفت نوع الابتسامة بتاعة المحصل الغلبان .. لقيت بقدرة قادر الفاتورة نزلت من 950 جنيه الشهر اللى فات إلى 250 جنيه الشهر ده .. إيه الحلاوة دى ؟ ..

دفعت "سوكـِّيتى" بس رجعت أكلم روحى واسألها

تكونش يا روحى الحاجة أم محمد قامت بعملية ترشيد للاستهلاك ، وطلعت لنا الهدوم القطن وحطت الهدوم التانية فى "صرة" ورمتها فوق الدولاب أو من الشباك ؟ .. تكونش – وانا مش واخد بالى - قعـَّدتنا فى أوضة واحدة طول اليوم فى الضلمة وبدون تكييف ؟ .. كل شئ جايز .. أصل الحاجة ام محمد لها تصرفات كده بدون شفافية .. لأنها مش من "الأخوات" .. بس والله هى من بيت كريم ومش "من على الرصيف" زى ما قال لنا الباشا "قبحى طالح"

نهايته

نسيت أقول إنى مأمور اتحاد الملاك فى العمارة .. وانا اللى بادفع فاتورة نور السلم وفاتورة الأسانسير برضه .. قلت اسوق فى الغلاسة واقارن بين فواتير العمارة عن شهر أغسطس وشهر سبتمبر .. طلـَّعت ملف العمارة ، وروح يا أغسطس تعالى يا سى بتمبر .. وألاقى إن فاتورة الأسانسير نزلت من 430 جنيه فى أغسطس إلى 235 جنيه فى سى بتمبر .. سألت روحى تانى .. يكونش استهلاك الاسانسير فى شهر أغسطس كان زايد عشان الناس كانت نازلة طالعة تشترى قزايز ميه وتملا الجرادل من العمارات اللى جنبنا اللى جراجاتها تحت الأرض ؟ .. قالت لى روحى اللى طلعت وقفت قدامى وحاطة إيدها فى جنابها : يمكن يا حاج ..

ما خدتش واديت مع روحى كتير فى كهربة الأسانسير لأنها كانت لسه واقفة قدامى عمالة تهز لى فى رجلها .. وانا عارف الوقفة دى ..

قلت اشوف فاتورة نور السلم .. لقيت السلم "الخلبوص" مستهلك كهربا فى شهر انقطاع الكهرباء المشهور باسم أغسطس بمبلغ فقط وقدره 36 جنيها مصريا لا غير .. وفى شهر سى بتمبر استهلك بمبلغ فقط وقدره 11 جنيها مصريا لا غير !!!! .. الله .. الله الله .. سألت روحى تانى .. مش برضه فى شهر سى بتمبر ابو 11 جنيه كانت ماكينة نور السلم عطلانة لغاية لما الحارس بلغنى بعد أسبوعين وغيرتها ؟ .. روحى نطت ووقفت فى مناخيرى وقالت لى : آه والله .. الله الله .. مش فضل نور السلم والع طول الليل والنهار لمدة اسبوعين ؟ .. هو إيه اللى بيحصل ؟ .. مين اللى شال الخازوق ؟

رديت عليها وقلت لها : أكيد هو .. هو مفيش غيره .. سيادة الأستاذ الدكتور المهندس الرئيس .. مفيش غيره حاسس بأهله وعشيرته ..

طويل العمر .. طوِّل عمره ، وزهزه عصره .. هاى هيء

يا ترى إيه أخبار خازوق أغسطس معاكم ؟

[capitshino]

أما أنا فنظرت إلى المحصل الغلبان وسألته : "950 جنيه ؟؟!! .. دى فاتورة شهر واحد ولا شهرين ؟

نفس السؤال اللى ٍسالته لى الحاجة بعد ما سمعت مبلغ الفاتورة

والدتى قالت لى انها المرة الاولى ان الفاتور تبقى عالية اوى كده . وتم توجيه التهمة الى التكيف

[التونسى]

انا على كده اتحسد ومن وسع .. 27 جنيه فقط لا غير .. مع الاعتراف انى مش بشغل التكييف كتير لاسباب صحيه . لكن النور بصراحه مكنش بيقطع الا بشكل بسيط جدا .. ودى للعلم من اقل الفواتير اللى بتيجى .. انا بيترواح فاتورتى بين خمسين الى 75 لما بيبقى حد عايش فى الشقه

[نورالعين]

للان محصل النور متغيب

وشكلنا كده دخلنا فيشهرين ثلاثة

انا بصراحة قلقانة على المحصل أكتر من الفاتورة

بعد ما قرأت حديثك الشيق مع نفسك :)

روحي وسوستلي يكونش احد مستلمى الخوازيق خلص عليه !!!!

[أبو محمد]

انا على كده اتحسد ومن وسع .. 27 جنيه فقط لا غير .. مع الاعتراف انى مش بشغل التكييف كتير لاسباب صحيه . لكن النور بصراحه مكنش بيقطع الا بشكل بسيط جدا .. ودى للعلم من اقل الفواتير اللى بتيجى .. انا بيترواح فاتورتى بين خمسين الى 75 لما بيبقى حد عايش فى الشقه

وده هنا فى بلدنا يا شاعر ؟

وبالمصرى ولا باللستللينى ؟

عارف لو قلتلى هنا ، حيبقى ذنبى فى رقبتك

f((:

[أبو محمد]

للان محصل النور متغيب

وشكلنا كده دخلنا فيشهرين ثلاثة

انا بصراحة قلقانة على المحصل أكتر من الفاتورة

بعد ما قرأت حديثك الشيق مع نفسك :)

روحي وسوستلي يكونش احد مستلمى الخوازيق خلص عليه !!!!

ما تقلقيش آ نور .. تلاقيه ما جالكيش عشان انتى اللى كنتى منورة الشقة :)

[همسة الغامدي]

الاب الغالي (ابو محمد)

حقيقة انا مدينة لك بشكر لان موضوعاتك فتحت (شهية قلمي) للكتابة والرد

طبعا لم تستوقفني هنا الشفافية اللي (مش متشافة) لكن بهرني اسلوبك وانت تكتب (كوميديا سوداء )

لديك قريحة (فكاهية)قابلة للانفجار ضحكا بمجرد المرور عليها ...

وهنا ساشكرك ثانية لانك اضحكتني رغم حزني الذي احاربه بابتسامة

ش

ك

ر

ا

[التونسى]

انا على كده اتحسد ومن وسع .. 27 جنيه فقط لا غير .. مع الاعتراف انى مش بشغل التكييف كتير لاسباب صحيه . لكن النور بصراحه مكنش بيقطع الا بشكل بسيط جدا .. ودى للعلم من اقل الفواتير اللى بتيجى .. انا بيترواح فاتورتى بين خمسين الى 75 لما بيبقى حد عايش فى الشقه

وده هنا فى بلدنا يا شاعر ؟

وبالمصرى ولا باللستللينى ؟

عارف لو قلتلى هنا ، حيبقى ذنبى فى رقبتك

f((:

انا متواجد فى مصر بقالى شهرين .. وفاتورة الثلاث شهور الاخيره بما فيهم اخر فاتوره مابين العشرين والتلاتين جنيه .. دا حتى انا فوجئت بمحصل الغاز من اسبوعين بيقولى عليكم 74 شهر متدفعوش .. اتارينى كنت بدفع الرسوم السنويه بس .. المهم قدر لى ال74 شهر ب 100 جنيه بس !!!!! .. تخيل .. تصور .. سيبك انت .. هو المُرزق مُرزق فى اى مكان هههههههههههههههههههههههه

[أسد]

والدتي في بورسعيد

تعيس لوحدها في شقة .. وتقيم معها بشكل مستمر سيدة تقوم على مساعدتها لكبر سنها

شكت لي من قيمة فواتير الكهرباء في تلك الشهور أيضاً ...

صحيح أن فاتورة سبتمبر كانت أقل من أغسططس بحوال 100 جنيه ... في حين أن فاتورة أغسطس كانت 550 جنيه

تكييف واحد فقط يعمل في نفس الوقت

ما هو مش معقول حتبقى لوحدها ومشغلى أكثر من تكييف

ثلاجة وغسالة وسخان ...

بس خلاص ..

قيمة فواتير الكهرباء كانت مجنونة في أغسطس بالفعل

فس شقتي في القاهرة ... أسرتي كانت مقيمة فيها في أغسطس

الفاتورة كانت أكبر من 700 بقليل ...

الحقيقة لم أنتبه لعملية النصب تلك !!!!!

إلا أنني سمعت الجميع بدون إستثناء يشكو من إرتفاع قيمة الفاتورة قائلين

إسحال إن ماكانتش الكهرباء كانت بتتقطع كام ساعة كل يوم ....

من يمكنه أن يؤكد لنا نزاهة الدولة والحكومة ؟؟؟ ويستطيع أن يؤكد لنا أنهم لم ينصبوا علينا وأن ماحدث كان أمراً عادياً .....؟؟؟؟

إذا لم يتضح الأمر .. فهؤلاء كسلفهم ... غير أمينون على مصر ولا على المصريين

ومن ليس لديه الحلول العاجلة لمشاكل مصر المزمنة والقديمة والمتوارثة ... فلماذا تصدى للمسئولية

[التونسى]

يا جماعة الخير .. مش يمكن ده استهلاكم الفعلى .. على اعتبار انه معروف ان التكييف بيستهلك كهربا كتير .. عن نفسى انا مش بشغله عمال على بطال .. مع الاعتبار ايضا انى بشغل السخان على طول .. وعندى موتور ميه .. وبشغل لامبات عاديه مش نيون الموفره .. ورغم ذلك الفواتير اهى فى ايدى . شهر اغسطس 29 جنيه .. شهر سبتمبر 27 جنيه .. شهر يوليو 21 جنيه

[Alshiekh]

يا جماعة الخير .. مش يمكن ده استهلاكم الفعلى .. على اعتبار انه معروف ان التكييف بيستهلك كهربا كتير .. عن نفسى انا مش بشغله عمال على بطال .. مع الاعتبار ايضا انى بشغل السخان على طول .. وعندى موتور ميه .. وبشغل لامبات عاديه مش نيون الموفره .. ورغم ذلك الفواتير اهى فى ايدى . شهر اغسطس 29 جنيه .. شهر سبتمبر 27 جنيه .. شهر يوليو 21 جنيه

مكن يكون محل اقامتك واقع في مربع الاخوان

في رمضان كانت كل المربعات حول منزلي تعاني من انقطاع الكهرباء بما فيهم المربع الواقع فيه مسجد تابع للأوقاف، بينما المربع الذي أقيم به لم يكن ممن عانوا من إنقطاع الكهرباء في اي من ايام رمضان لانه المسجد الواقع به هو مسجد السلفيين.

وإن بعض الظن إثم!!!

[التونسى]

يا جماعة الخير .. مش يمكن ده استهلاكم الفعلى .. على اعتبار انه معروف ان التكييف بيستهلك كهربا كتير .. عن نفسى انا مش بشغله عمال على بطال .. مع الاعتبار ايضا انى بشغل السخان على طول .. وعندى موتور ميه .. وبشغل لامبات عاديه مش نيون الموفره .. ورغم ذلك الفواتير اهى فى ايدى . شهر اغسطس 29 جنيه .. شهر سبتمبر 27 جنيه .. شهر يوليو 21 جنيه

مكن يكون محل اقامتك واقع في مربع الاخوان

في رمضان كانت كل المربعات حول منزلي تعاني من انقطاع الكهرباء بما فيهم المربع الواقع فيه مسجد تابع للأوقاف، بينما المربع الذي أقيم به لم يكن ممن عانوا من إنقطاع الكهرباء في اي من ايام رمضان لانه المسجد الواقع به هو مسجد السلفيين.

وإن بعض الظن إثم!!!

هههههههههههههههههههه أضحك الله سنك اخى الفاضل محمد .. بجد مش للدرجه دى يعنى .. على فكره لسه الاخوان متوغلوش ومتمكنوش لحد دلوقتى من البلد .. خصوصا فى الجانب الادارى والتنظيمى والوزارى .. وبعدين اساسا بورسعيد معروف عنها طول عمرها انها وفديه ليبراليه .. ويمكن فيها بعض المد السلفى .. لكن الناس هنا بصفه عامه فى بورسعيد مش بيميلوا للاخوان ..ان لم يكن مش بيطيقوهم أصلا .. بعترف ان بورسعيد معظمهم فلول وكنبجيه بسبب التجار والمنطقه الحره .. والدليل على ذلك ان بورسعيد من المدن القليله جدا فى مصر اللى حمدين وشفيق فازوا بها بمعظم الاصوات فى اتنتخابات الرئاسه .. معلومه اخرى فى سياق الموضوع ..بورسعيد تعتبر من اكتر محافظات مصر فى الدخول ومستوى المعيشه و انا ذات نفسى ساكن فى منطقه تعتبر راقيه وغاليه .. يعنى مفروض اكون تبع شريحه أعلى فى الدفع .. وهو ما لم يحدث .. مش بدافع والله .. بس انا بتكلم من خلال وقائع ومستندات فى ايديا ومستعد اصور وانزل الفواتير للتاكيد

[أبو محمد]

والدتي في بورسعيد

تعيس لوحدها في شقة .. وتقيم معها بشكل مستمر سيدة تقوم على مساعدتها لكبر سنها

شكت لي من قيمة فواتير الكهرباء في تلك الشهور أيضاً ...

صحيح أن فاتورة سبتمبر كانت أقل من أغسططس بحوال 100 جنيه ... في حين أن فاتورة أغسطس كانت 550 جنيه

تكييف واحد فقط يعمل في نفس الوقت

ما هو مش معقول حتبقى لوحدها ومشغلى أكثر من تكييف

ثلاجة وغسالة وسخان ...

بس خلاص ..

قيمة فواتير الكهرباء كانت مجنونة في أغسطس بالفعل

فس شقتي في القاهرة ... أسرتي كانت مقيمة فيها في أغسطس

الفاتورة كانت أكبر من 700 بقليل ...

الحقيقة لم أنتبه لعملية النصب تلك !!!!!

إلا أنني سمعت الجميع بدون إستثناء يشكو من إرتفاع قيمة الفاتورة قائلين

إسحال إن ماكانتش الكهرباء كانت بتتقطع كام ساعة كل يوم ....

من يمكنه أن يؤكد لنا نزاهة الدولة والحكومة ؟؟؟ ويستطيع أن يؤكد لنا أنهم لم ينصبوا علينا وأن ماحدث كان أمراً عادياً .....؟؟؟؟

إذا لم يتضح الأمر .. فهؤلاء كسلفهم ... غير أمينون على مصر ولا على المصريين

ومن ليس لديه الحلول العاجلة لمشاكل مصر المزمنة والقديمة والمتوارثة ... فلماذا تصدى للمسئولية

أهو الأمر اتضح يا ابو أدهم

ماهو بعد اللى حصل العشر أيام اللى فاتوا

يبقى لازم يقلعوا برقع الحيا وعينهم تبقى جامدة .. فى الهوجة

الخبر ده هدية لأخونا البصيلى "الشاعر" .. اللى ما كانش "شاعر" بالخازوق

إن شاء الله حيدفعوك 30 جنيه آ حودة بدل 29 .. عشان تحرَّم تنضم لمشجعى البلاك إيجلز

الحكومة توافق رسميًا على زيادة أسعار الكهرباء

[moslemah]

من شهر كانت والدتى بتمم على الفواتير و اكتشفت انه اخر شهر كان شهر مايو..

بعد اسبوع تقريبا لقينا المحصل منور البيت عندنا و جايب الست فواتير ...

لما استاذ محمد رفع الموضوع دلوقتى قلت ابص ع الفواتير لقيت ارقام جميله و نسب متفاوته بطريقه منوره...

رغم انه المفروض استهلاكنا بسيط والشقه دى من غير تكييف..كانت الفواتير كالآتى

43.5 - 39.8 - 55.8 <<< دى الأرقام المتوقعه ف الغالب

103.55 :blink:

8.15 :D واضح انهم نسيوا ان فى ناس فى الشقه

130.75 :) وبعدين افتكروهم bsh:)

بس انا سعيده انهم لما لقوا الناس اخدت بالها عملوها رسمى..انتوا فهمتوهم غلط ...اكيد مش هياخدوا حاجه لنفسهم..كله لله و للوطن يا جماعه. :D

صباحكم من نور ربنا..