نفسى اعمل مشروع

[Cleo]

فيه ناس سبحان الله... عندها مقدرة غريبة انها تجيب "الفلوس من الهوا"... واحدة كانت معانا فى الشغل، كانت بتفكر تعمل مشروع تجيب تصميمات بوكيهات ورد وشوية حركات من بتوع ديكورات الأفراح من على الإنترنت و تنفذها حسب الطلب...

برضه العبقرى اللى اخترع حكاية انه يجيب تليفون محمول وكرسى يقعد بيه فى الشارع والمكالمة ب75 قرش الدقيقة ده واحد بجد عبقرى...

بس السؤال هو... ايه اللى بيخللى ريسك الخسارة فى الأعمال الحرة فى مصر عالى قوى كدة؟؟

[Tafshan]

بس السؤال هو... ايه اللى بيخللى ريسك الخسارة فى الأعمال الحرة فى مصر عالى قوى كدة؟؟

المشكلة الاساسيه هى ان الزبون - او المستهلك العادي - كلهم ضربهم السلك و لا يستطيعون تلبية احتياجاتهم و لذلك فأي تغير يؤثر بصورة عنيفه على السوق - هذا بالنسبه لشريحة الزبون الكحيان و النتيجه كما قال س س ...

اما عن المشروعات التى تحاك للطبقه الميسوره ، فهي شغاله عال العال ..

مثلاً كوش الافراح .. انا اعرف واحده بتشتغل بس مع الهاى لايف و دي بتأخذ في ايجار الكوشه مبلاغ تصل الى 25000 جنيه et:( ******** ..

قبل اختيار المشروع يجب ان نلاحظ الاتى :

المكان : ما هو النشاط المناسب للمكان من حيث التنافسيه ؟ ربما المكان يوحي بمشروع ناجح جداً رغم انه قد يكون غير ناجح في مكان اخر .. مثال : السوبر ماركت

الخبره : يجب اختيار مشروع لدينا حد ادنى من الخبره فيه - و لذلك اقترحت على محمد مشروع العياده ، و نلاحظ انه ممكن بيدأ المشروع بمجموعه من زملائه الخريجين الذين لديهم نفس المشاكل و يلحق بهم بعد تخرجه و يقوم في مشروعه مؤقتاً بدور اداري - و لا تنسى مدى جدوى الخدمات الطبيه في مصر ..

اختيار الزبون : لكل زبون احتياجاته الخاصه و افضل الزبائن هم ال A Class او الطبقه المستريحه في البلد ، و خاصةً مراهقينها ، و لذلك تنجح مشروعات الكوفي شوب و مطاعم التيك اواي لكنها مكلفه جداً من حيث الايجار و الدعايه و التمويل : لأنك لو عملت مشروع غير مكلف : الفكره ح تتسرق و تلاقي الف واحد عمل نفس المشروع و المشروع اتضرب !!!

لازلت اشجع محمد على مشروع مجمع العيادات ليس بكونه طبيب و انما بكونه تاجر مع اتباع الخطوات التاليه :

1- قم بمشاركة طبيب خريج تنطبق عليه شروط الترخيص بعمل شركه لادارة مجمع عيادات

2- قم بايجار شقه - يفضل ان تكون في منطقه شعبيه - لهذا الغرض

3- قم بتقسيم الشقه و عمل اقسام مختلفه يقوم بتشغيلها زملاء لك خريجين

4- اتفق مع زملائك ان يكون لهم نسبه من الفزيتا او الكشف و الباقي للمركز نظراً لتقديمه المكان و الدعايه و الاداره

مثل هذه العيادات في المناطق الشعبيه تعمل بصوره جيده جداً خاصةً اذا اخذت بمعيار الموقع اي التأجير في مكان قليل الخدمات الطبيه مما يؤكد جدواه ، و هناك ميزه مهمه جداً في هذا المشروع انه سيكون امتداد طبيعي لمستقبلك المهنى ... ربنا يوفقك

تم تعديل 26 ديسمبر 2004 بواسطة se_ Elsyed

[goold]

سلام عليكم

مين فيكم عنده فكرة عن مشروع توكيل الاسمنت والحديد

لو حد عنده معلومات وتأمينة كام افيدونا

وبالمناسبة انا رأيت مشروع عجبنى فى صاله كبيرة مساحتها من 100 الى 150 متر تقريبا فاتح فيها صاله بلياردو وعامل ثلاجة فيها بارد وبسكويت وكمان بيعمل فى ركن مشروبات ساخنه وحاطت تلفزيون وكراسى وطاولات صغيرة وكنا بندور على شقة بجوار الجامعه للعيال وبعدين دلونا على المكان دة دخلنا لقينا صاحب لمكان دة شغال ايه كمان سمسار بيفرج الناس على الشقق والاراضى بجوار مشروعه ده ومشاء الله ممشى حالة حلو اوى

لما مشى معانا ساب ابنه لحد مارجع وكله ماشى فرجنا على عدد من الشقق ولما عجبتنا الشقه اخد ايجار شهر

عجبنى كثير حركة الشخص وشاطرته .

[se_ Elsyed]

أسف للتأخير وذلك لمشاغل العمل ونهاية العام والذي منه :

هادخل في الموضوع على طول والنهاردة عندي حتتين ( مش لحمه ) لكن مشروعين : :

1- المشروع الاول : هو مصنع او معمل لعمل صلصة الطماطم :

- حد ممكن يقول طب ما دي منتشرة كثير في مصر وعلى قفا مين يشيل ، أقول له لأ لكن إحنا عندنا أفكار مبتكرة بالصلاتو عالنبي ... حيث ان المشروع ده بالذات من اكثر المشاكل اللي بتواجه الناس اللي شغاله فيه هي عملية نقل المكون الرئيسي للصلصة وهي الطماطم من حقول الفلاحين للمصنع ولك ان تتخيل عزيزي المستثمر الصغير ( واخد بالك يا محمد يابو شلبي ) إن طن الطماطم بيطلع 100ك صلصة فقط والباقي بيبقى هالك ، فإذا قدرنا نسيطر على العملية دي بالنسبة للمحصول اللي بنجيبه من وجه بحري حيث إنها قريبة من القاهرة .. فما بالنا بالمحافظات الآخرى البعيدة ؟.

والجديد في هذه الفكرة إن إحنا هانعمل وحدات متنقلة ومجهزة فوق عربيات نقل أو ثلاث أرباع نقل للذهاب إلى أراضي الفلاحين اللي طبعاً هايفرحوا جداً إن في حد وفر عليهم النقل والبيع لتجار الجملة اللي بيستغلوهم ، وبالتالي العربيات هاتقف على راس الغيط وتقوم بغسل الطماطم وعصرها وغليها عشان ما تحمضش ومن ثم نقل المعجون للمصنع اللي هايبقى في محافظة القاهرة او أي محافظة آخرى وبالتالي تعليبة هناك بالطرق المعروفة ..

- والجديد في هذه الفكرة هي فكرة الوحدات المتنقلة اللي هاتخفض تكاليف النقل كثيراً جداً كما انها ستضمن الحصول على محصول الطماطم من اماكن مختلفة مهما بعُدت وبأسعار رخيصة جداً .

- والموضوع محتاج تفاصيل اكثر ممكن نناقشها جميعاً وياريت الجنس اللطيف في المنتدى يُلي بدلوه ويقول لنا عايز إيه جديد في معجون الطماطم أو الفكرة دي هاتلقى رواج ولا لأ ... وانا هاسمي المُنتج ده مبدئياً كده " معجون سانسون المجنون " على أساس إنه جايه من مجنونة يا قوطه وسانسون ده إسم الدلع بتاع سين سين .

2- المشروع الثاني : تدوير الكارتون :

ودي لقيت ولد من أصدقائي عاملها في الصيف اللي فات وبصراحة الفكرة جريئة وعجبتني والولد ما شاء الله علية عنده 25 سنة لكن جريء مش زي ناس قاعدة تعيط جنب الحيطة ومستنية الحكومة تعينها :

- صاحبنا راح أشترى حتة أرض سعرها رخيص في منطقة " القلج " ودي تبع محافظة القليوبية بعد المرج وعزبة النخل والحتت دي وراح إتفق – بعلاقات طبعاً – مع مصانع الكرتون اللي في العاشر من رمضان اللي بتعمل " باكنج " والعبوات والكراتين للمصانع وأتفق معاهم إنه يورد لهم 80 طن كرتون شهرياً على الأقل وعلى فكرة المصانع ما بتتفقش مع أي حد والسلام عشان تضمن إن هايكون عندها مادة أساسية تستطيع الحصول عليها بكميات وفيرة طوال الوقت لتلبية إحتياجات زبائنها ، وصاحبنا طبعاً كان متفق مع الناس اللي شغلانتها إنها بتلف في الشوارع وتستلقط الكراتين المستعملة ( بأشوفهم ماشيين بعربيات في الشوارع واول ما يشوف صندوق الزبالة كأنه لقى كنز وبيقوم ضارب غطس فيه ومطلع الكرتون زي الشعرة من العجينة ) وكمان اتفق مع – لا مؤخذه – مقالب الزبالة في منشية ناصر ومنطقة المرج وهما إمبراطوريات في الموضوع ده وهناك بيفرزوا القمامة كل حاجة لوحدها ( كرتون ، ورق ن زجاج ، حديد .... إلخ ) المهم - وبإختصار بياخد منهم طن الكرتون بـ 800 ج وبيبعوه للمصانع ب 1100 ج وراح إشترى عربية نص نقل مستعملة وبيخزن الحاجات دي في الأرض اللي عامل حواليها سور وكل ما يكمل التارجت بتاعه يورده للمصنع وما شاء الله شغال زي الفُل ، طب واحد يقولي مصانع الكرتون ما بتتفقش مع الناس دي ليه ... بالتأكيد طبعاً عشان عندهم حسابات تانية منها التكاليف وتعيين موظفين عندها يعملوا الشغل ده فبتلاقي إنه اوفر لها تاخد عن طريق مورد يضمن لها توريد المادة الخام دي بإنتظام ... بإختصار مصانع كثيرة شغاله بمبدا " شرا العبد ولا تربيته "

تابع معنا عزيزي المستثمر بقية الأفكار ... اللي لو حد قرأها ونفذها وما أفتكرنيش بحاجة هادعي عليه عشان حقوق الملكية الفكرية والذي منه .

[se_ Elsyed]

مين فيكم عنده فكرة عن مشروع توكيل الاسمنت والحديد

لو حد عنده معلومات وتأمينة كام افيدونا

اكثر واحد ممكن يفيدك في الموضوع ده هو " احمد باشا عز " بس لازم قبل ما تروحي له تغيري إسمك يا جولد - نصيحة اخ - يعني ممكن تسمي نفسك ( إستر بولونسكي او حتى ميتشولح ) لإن عز ما بيحبش غير اليهود أصحابه اللي بيبني لهم المستوطنات في غزة والأراضي الفلسطينية وعشان كده كاوي ضهر الناس في مصر وحاطط سيخ الحديد المحمي في صراصير ودانهم وخلى سعر الحديد نار يا حبيبي نار..

[Set_Amina]

طيب ايه رأيكم في زراعة المشروم في مصر؟؟

لو فيه حد عنده اي فكرة ان مشروع زي كده رجاء يفيدني

وانت يا س س بافكرك باتفاقنا القديم في المشاركة والمضي في اي مشروع مفيد قدما مع بعض،، نسيت ولا ايه؟؟ h):

[se_ Elsyed]

طيب ايه رأيكم في زراعة المشروم في مصر؟؟

لو فيه حد عنده اي فكرة ان مشروع زي كده رجاء يفيدني

وانت يا س س بافكرك باتفاقنا القديم في المشاركة والمضي في اي مشروع مفيد قدما مع بعض،، نسيت ولا ايه؟؟ :rolleyes:

انا على العهد يا أمونه أنا على العهد ...

ولكن انا أخدت عهد على نفسي إني ماعملش أيتوها حاجة طول مانا بره مصر وده من قرصات عديدة تعرضت لها .. حيث إني أؤمن بمقولة " ما حك جلدك مثل ظفرك " ومعليش في التعبير حتى لو عامل مشروع مع اخويا فمش هايخاف على مالي مثلما أخاف أنا ..

وانا بالفعل عامل مشروعين مع اخويا الكبير ولكني تنازلت عنهما بطيب خاطر لعدة أسباب :

أولاً : هو مالوش مصدر دخل غيرهما ... وأنا الحمد لله مش محتاج لهذا الدخل وبالتالي أشعر والحمد لله رب العالمين بالبركة في رزقي المحدود هذا . .

ثانياً : مازلت أُقدر له جهودة الجبارة وزي ما بنقول بالبلدي هو شايل البيت عندنا وواخد باله من والدتي واختي الصغيرة اللي على وش جواز بعد وفة الوالد خصوصاً إنب ماليش غير أخين صبيان بس هو وواحد تاني أصغر مننا لسه ماتأهلش جيبته معايا هنا من سنة ونص عشان يكون نفسه وبالتالي فهو راجل البيت حالياً في مصر... وده دور لا يُقدر بمال ولا يستدعي إن أقعد احاسبة أخر كل عام على المكسب والخسارة وخصوصاً أيضاً بإنه ساب شغله في السعودية برضوا طوعاً وعن طيب خاطر بعد 5 سنوات تقريباً في عمل محترم بالسعودية لكي يُلازم والدي المريض في أيامه الاخيرة قبل وفاته وكان يذهب معه للمستشفى 3 مرات أسبوعياً للغسيل الكلوي .

ثالثاً : التنازل ده طبعاً مؤقت لحد ما أنزل أستقر في مصر ولما أنزل هاحاول أطور المشروعين دول وأضيف عليهم أفكار جديدة مفيدة لي وله .

رابعاً : صلة الاخوة تمنعنى الآن في ان تكون بيننا عقود ومواثيق رسمية وده ضد مبدأي فبالتالي بأريح نفسي - مؤقتاً - وبأقول كبر دماغك ويكفي إني في الاجازة بأحلق كل يوم ببلاش وباخد حقي ناشف أنا وعيالي :lol: afr2: bk: وكل اللي شغالين معانا عارفين إن انا شريك وهو من إحترامه لا يدعي يوماً بإنه صاحب المشروعين أبداً .

[se_ Elsyed]

طيب ايه رأيكم في زراعة المشروم في مصر؟؟

لو فيه حد عنده اي فكرة ان مشروع زي كده رجاء يفيدني

بصي يا امونه .. دراسات الجدوى ومعرفة الأرضية الصحيحة التي سيقوم عليها أي مشروع لابد ان تُدرس جيداً قبل بداية المشروع ..

يعني ما ينفعش اجي قي مصر واعمل مشروع تأجير طائرات هليكوبتر أو مطعم مثلاً الحد الادنى للاكل فيه هو 500 جنية ( 80 دولار .. ده مبلغ كلام فارغ طبعاً عندكوا في اوروبا لكنه خزعبلي في مصر )

حلو قوي ..

المشرم بره مصر سواء في دول الخليج او دول أوروبا مش أمله ومش حاجة غريبة .. لكن انا أؤكد لك إنه في مصر إن معظمنا كان بيسمع عنه فقط نظراً لإننا - او أنا على الأقل - من الطبقة المتوسطة التى ترى بإنه سلعة ترفيهة جداً ..

طب إيه سُبل نجاح مثل هذه المشروعات :

1- انا سمعت عن ناس عامله المشروع ده في شقق سكنية وبتزرعة على أرفف خشبية في قش الرز المُشبع بروث الحيوانات - على حد علمي - وهو يؤدي لنتائج جيده ..

2- لكن مشكلته الأساسية تتوقف على كلمة سحرية واحده وهي التسويق ثم التسويق ثم التسويق .

3- لإن ما أعتقدتش حد هايشتري السلعة دي منك غير الفنادق الخمس نجوم والمطاعم الهاي كلاس ومطاعم البيتزا ... وهما ممكن يتغلبوا على الحصول على هذه السلعة عن طريق المعلبات المستوردة .. وبالتالي انا لازم سعري يكون تنافسي ولازم كمان أضمن لهم دوام التوريد ..

ما أنعفش أقول للزبون أنا هاورد لك بظروفها وإنت وحظك .. الشهر ده 100 ك والشهر الجاي مافيش واللي بعده خمسين وهكاذا ... ده تهريج طبعاً وكده انا هالخبط له كل حساباته .

فلو نضمن حكاية التسويق دي أنا متاكد إنه هايبقى مشروع عظيم وناجح 100 %

[solimano]

تحية طيبة

الشباب قاموا بمشروعات جميلة منها

مصنع اكياس بلاستيك

مصنع مسامير

وكانت تجارب ناجحة طبعا وفقا لمقومات معينة وللسوق المستهدف بالاضافة الى المسائل الفنية والادارية

ما أردت ان اطرحه هنا وفى عجالة رؤوس الموضوعات لما رأيت أنه يمكن ان يكون مشروع ناجح وتأتى التفاصيل فيما بعد ان شاء الله.

[بنت شعنونة]

الأكل و المواصلات وعن تجربة

بس مش الأكل المطبوخ عشان داعليه مشاكل كتير

يعني الخضاروالفاكهة كان مشروع يكسب دهههههههههب بس لازم تقف فيه بنفسك اوتشرف عليه على الأقل يوم اه ويوم لا

مكسب الفاكهة 300% من سعرها

يعني اناكنت بجيب 3كراتين تفاح = 10 كيلو بحوالي 30 جنيه

وكنت ابيع الكيلو ب 8 جنيه في المتوسط او 6 جنيه لو عاوزةاخلص من البضاعة! :huh:

المواصصلات

الميكروباص او الاتوبيسات مكسبها كويييييس جداااااا بس لازم تكون بلطجي عشان تعرف تتعامل مع السواقين ويخافوا منك

[محمد شلبى]

المواصصلات

الميكروباص او الاتوبيسات مكسبها كويييييس جداااااا بس لازم تكون بلطجي عشان تعرف تتعامل مع السواقين ويخافوا منك

المواصصلات

الميكروباص او الاتوبيسات مكسبها كويييييس جداااااا بس لازم تكون بلطجي عشان تعرف تتعامل مع السواقين ويخافوا منك

بلطجى :huh:

الله يكرمك يا شعنن,دا انا بخاف من القطة

[se_ Elsyed]

طيب حد ممكن يدلنى هل ممكن انى آخد قرض ومنين وازاى؟

للرفع

عليك وعلى الصندوق الإجتماعي .

[mb14]

الأخ العزيز /د.محمد شلبى وGreen bird

يوجد مشروع ممتاز جدا ومربح جدا وهو

عمل مكتب لتجارة الكيماويات والأجهزة العلمية فهو مربح جدا

ولكن مشكلته هو البدايه برأس مال معقول وامكانية الصبرلأن الشركات لن تورد الفلوس الا بعد الأستلام ب 3 او4 شهور من استلام البضاعه .

وايضا وجود حد معرفه بالخارج لأمكانية ارسال بعض المواد من الخارج مباشرة بدون المرور على التوكيل بمصر للمنافسه السعرية لأن اغلب التوكيلات بتبيع بسعر مرتفع لأنه ضامن انى الشركات الكبرى( خصوصا) سوف تلجأ للتوكيل اولا .

المجال واسع لمكتب الكيماويات يشمل (الكيماويات الأجهزة العلمية للشركات ومعامل التحاليل والجامعات ..............)

ثانيا المواد دى مدة الصلاحية بتكون كبيرة يعنى مش حا تفسد

وربنا يوفقكم جميعا

[ابو حلاوه]

دكتور محمد ..... حضرتك علي وشك ان تكون طبيبا ....... لو لديك مبلغ من المال تريد فعلا استثماره و الحصول علي عائد معنوي و مادي عشرات اضعاف ما يمكن ان تجده في اي مشروع اخر ..... انصحك ان تستثمره في دراستك للطب..... امتحان المعادلة الامريكية قد يكلفك حوالي 20 الف جنية و لكن تأكد انك ستحصل علي عشرات اضعاف ذلك المبلغ اذا وفقك الله وبذلت المجهود المطلوب

امتحان الزمالة البريطانية في اي تخصص سيكلفك اقل و لكن بالتأكيد ستحصل علي عائد يجازي ذلك عشرات المرات

العالم الغربي بيعاني حاليا وسيعاني في المستقبل من ندرة الاطباء ..... زيادة متوسط الاعمار و التقدم المستمر في المستوي الاقتصادي عوامل لم يأخذها واضعوا السياسات من 15 عاما في الغالبية العظمي من الدول الغربية و النتيجة ان بين الاحتياج الفعلي و عدد الاطباء الموجوده في سوق العمل يعاني من فجوه تزداد و لا تقل .... حتي في الدول التي كانت تعاني من زيادة مزمنة في تعداد الاطباء .. كانجلترا ....... نصيحة لك مهنتك مهنة نبيلة و تستحق كل الاحترام و انت بذلت اصعب ما في المشوار .... تقديرك في مصر و واسطتك في مصر بل و كليتك التي تخرجت منها من مصر ( طالما كان معترف بها من الWHO ليس لهم اي قيمة ... الزمالة او الUSMLE امتحانات صعبة و تحتاج الكثير من الوقت و المجهود والنجاح غير مضمون تماما و لكن نسبته اعلي كثيرا من الدخول في مشاريع لا تعرف عنها الكثير ........ اعرف شعور الاحباط و الظلم عند التخرج و لكن رؤيتك للمهنة و المستقبل ستختلف تماما بمجرد خروجك من مصر للمارسة الطب في دولة غربية ...... صل صلاة استخارة و اتخذ قرارك

[رومنسى جدا]

واللة يخوانا انا بجد بكون مبسوط لما بشوف الشباب بيفكروا فى مشاريع وصدقنى خلى عندك طموح وتوكل على اللة وربنا هيوفقك انا طالب جامعى وبشتغل من وانا عندى 15 سنة بجد يخواننا لو فكرنا هنعمل وعلى راى عمو احمد السقا لو فكرت تكون هتكون شكرا اخوكم ا

لرومنسى :)

[نورت مصر!!!]

انا عندي مشروع كويس كنت هعمله في مصر قبل السفر للخارج ومازال يراوضني ولا يحتاج مبالغ كبيره بس اداره جيده

بواقع خبرتي في مجال المقاولات (كهرباء وسباكه وديكور وصيانه اجهزه منزليه ) بالوراثهلكون العائله لها نفس الخط

المشروع خدمي الا وهوا شركه صيانه منزليه في الاحياء السكنيه او المجمعات

الموضوع محتاج

1 - شقه صغيره في عماره شعبيه اودو ارضي مجهز بغرفه كسكن للفنيين وعمل ديكورات جميله له ومكتب

2-بعض المطبوعات واستمارات تعاقد واستمارات صيانه لكل عميل

3-عدد(2)سياره سوزوكي بك اب صغيره او(2) موتوسكل او (2) دراجه حسب امكانياتك مطبوع عليها اسم الشركه او المكتب

4- توفير زي موحد مناسب ومطبوع عليه اسم المكتب او الشركه عمل بطاقات شخصيه لكل فني

وتقوم بعمل اعلانات عن طريق المطبوعات وتوزيعها علي اهالي الحي الي فيه المكتب

وتقوم بعمل الصيانه فقط من كهرباء وسباكه واجهزه منزليه للسكان مقابل مبلغ شهري وليكن 5جنيه لكل مشترك ونفرض لو عندك 500مشترك بس هيكون دخلك2500 جنيه

علما بان اي قطع غيار او اشياء سيتم تركيبها او تغيرها سيتم دفعها المشترك والعقد ينص علي ذلك مسبقا

هتقولي وهنجيب الفنيين منين؟؟؟؟؟؟؟

الموضوع ده سهل جدا انت لو من القاهره او الاسكندريه هيكون الموضوع سهل شويه اذاي .......

عليك وعلي المحافظات الفنيين الشباب فيها كتير ورواتبهم قليله بالنسبه للمدن وما عليك الا اختيار اشخاص محترفين ولديهم اسلوب جيد للتعامل مع المشتركين وتحدد لهم راتب شهري بغض النظر اشتغل او لم يشتغل وانت في نفس الوقت لديك اشتركات بتحصلها كل شهر

الموضوع محتاج انسان قيادي لديه قدره علي احتواء المشاكل والقدره علي الالمام بالنواحي الفنيه والتعامل مع كافه اطياف المجتمع وارضاءه

[طارق صلاح فضل]

انا كمان بفكر اعمل مشروع سيبر نت بس مش عارف ارباحه هل هي معقولة ولالا ارجو من الاخوة يقولوا او يشرحوا المشروع من تكلفة مادية

[se_ Elsyed]

انا عندي مشروع كويس كنت هعمله في مصر قبل السفر للخارج ومازال يراوضني ولا يحتاج مبالغ كبيره بس اداره جيده

بواقع خبرتي في مجال المقاولات (كهرباء وسباكه وديكور وصيانه اجهزه منزليه ) بالوراثهلكون العائله لها نفس الخط

المشروع خدمي الا وهوا شركه صيانه منزليه في الاحياء السكنيه او المجمعات

الموضوع محتاج

1 - شقه صغيره في عماره شعبيه اودو ارضي مجهز بغرفه كسكن للفنيين وعمل ديكورات جميله له ومكتب

2-بعض المطبوعات واستمارات تعاقد واستمارات صيانه لكل عميل

3-عدد(2)سياره سوزوكي بك اب صغيره او(2) موتوسكل او (2) دراجه حسب امكانياتك مطبوع عليها اسم الشركه او المكتب

4- توفير زي موحد مناسب ومطبوع عليه اسم المكتب او الشركه عمل بطاقات شخصيه لكل فني

وتقوم بعمل اعلانات عن طريق المطبوعات وتوزيعها علي اهالي الحي الي فيه المكتب

وتقوم بعمل الصيانه فقط من كهرباء وسباكه واجهزه منزليه للسكان مقابل مبلغ شهري وليكن 5جنيه لكل مشترك ونفرض لو عندك 500مشترك بس هيكون دخلك2500 جنيه

علما بان اي قطع غيار او اشياء سيتم تركيبها او تغيرها سيتم دفعها المشترك والعقد ينص علي ذلك مسبقا

هتقولي وهنجيب الفنيين منين؟؟؟؟؟؟؟

الموضوع ده سهل جدا انت لو من القاهره او الاسكندريه هيكون الموضوع سهل شويه اذاي .......

عليك وعلي المحافظات الفنيين الشباب فيها كتير ورواتبهم قليله بالنسبه للمدن وما عليك الا اختيار اشخاص محترفين ولديهم اسلوب جيد للتعامل مع المشتركين وتحدد لهم راتب شهري بغض النظر اشتغل او لم يشتغل وانت في نفس الوقت لديك اشتركات بتحصلها كل شهر

الموضوع محتاج انسان قيادي لديه قدره علي احتواء المشاكل والقدره علي الالمام بالنواحي الفنيه والتعامل مع كافه اطياف المجتمع وارضاءه

فكرة مبتكرة وروعة صراحة وخصوصاً انها تعتمد على الاشتراك منخفض القيمة

لكن ممكن توضح لنا حساب الصنايعية الفنيين هايكون بالشغلانة ولا بالشهر .. تفرق كتير

[عبده بيه]

الكاتب نورت مصر

برافو عليك فكرتك جميلة جدا والا لو عملت الاتصالات شاملة الشركات والمكاتب والمحلات التي تقع في نفس الحي

لو اضافة عليها الخدمات اللاكترونية

تحياتي

[yasserelghoul]

مشروع مركز تدريب فى مجال الحاسب الآلى واللغات

هذا المشروع جميل جدا ولكن عندما يكون معتمد من جهة معينة كالتربية والتعليم أو الشئون الاجتماعية

فمن يعرف اجراءات اعتماده من الشئوت الاجتماعية رجاء أن يخبرنا بالاجراءات