استفسار بخصوص تطابق المؤهل مع التأشيرة

[elawadi]

السلام عليكم ورحمه الله وبركاته

اخوانى الكرام

عندى استفسار بخصوص تأشيرة من السعودية بمهنة اخصائى تسويق وانا حاصل على بكالوريوس ادارة اعمال و نظم معلومات ادراية والمهنة فى الجواز حاصل على بكالوريوس ادارة اعمال نظم معلومات ادارية

فهل لازم انى اغير الجواز الى اخصائى تسويق ولا المؤهل ممكن يتناسب مع التأشيرة فى السفارة من غير تغيير الجواز يا ريت حد يدلنى ولو لازم اغير الجواز اية هيا الاجراءات والاوراق المطلوبة للتغيير

وجزاكم الله خيرا

السلام عليكم ورحمه الله وبركاته

[alsaadani]

الأخ الفاضل

لابد من تغير المهنة فى الجواز الى أخصائي تسويق (نفس التأشيرة) والإجرآت انك تغير البطاقة الأول وبعدين تغير الجواز

فيه ناس بتغير البطاقة بفلوس وانا منصحكش بيهم عن تجربة

ممكن تغير البطاقة بعقد العمل بس يكون موثق واسأل أفضل فى الرقم القومي هما هيقلولك هما محتاجين ايه

[herohero]

بالنسبة لتغيير المهنة ف البطاقة عن طريق عقد

انا جربتها وكانت الخطوات كالاتي اللي عملتها

- عقد من السعودية موثق غرفة تجارية سعودية وخارجية وسفارة المصرية

- ف مصر توثقه من الخارجية ف اي فرع من فروع التوثيق

-تجيب استمارة رقم قومي وبتروح للسجل المدني ومعاك العقد الموثق وع اساسه بيكتب المهنة اللي ف العقد وبتكون

"اسم المهنة .....في الخارج "

-- لو انت مش عاوز طوابير وقرف انا بتعامل مع مكتب خدمات ف العباسية ادام المدخل لمصلحة الاحوال المدنية ف قمة الروعه بس بتدفع رسوم وبتقعد ف التكييف و3 ايام وتيجي تاخد بطاقتك وبتتصل قبلها بالتليفون وناس زي الفل

[ahmedraslan]

لا بد من تغير المهنة الي اخصائي تسويق بالجواز ... يعني اثبات المهنة بالجواز

كمان يا ريت لو تعمل حسابك في خطاب من صاحب العمل بالاستتثناء ... لان مؤهلك غير مطابق ... لان الان لا يصدر تاشيرة اخصائي تسويق الا لبكالريوس تجارة شعبة محاسبة ... وغير ذلك اما بخطاب صاحب عمل لو ربنا راضي عنك :) او من تحت التربيزة وامرك لله

[elawadi]

السلام عليكم ورحمه الله وبركاته

جزاكم الله خيرا اخوانى الكرام على ردودكم القيمة وبخصوص تغيير البطاقة بعقد العمل فالتأشيرة اللى انا طالع عليها تأشيرة حرة :) يعنى مفيش عقد :) بس المكتب قالى ممكن نعملك عقد عمل ودا هيتكلف 550 جنيه وهيكون موثق من السفارة والخارجية وتقدمه مع ورق البطاقة وتتغير عادى فهل دا حل كويس ؟؟

وبخصوص الكفيل انا كفيلى مؤسسة اسمها ذيبا عايض الحربى للمقاولات ببريدة - القصيم حد سمع عتها حاجة قبل كدا واية رأيكم فى اهل القصيم من حيث التعامل والاخلاق لان انا بسمع عنهم كلام كتير كويس لما كنت فى جدة السفرية اللى فاتت

سؤال اخير انا كنت خارج خروج وعودة من شهر 4 سنة 2011 يعنى السنة اللى فاتت وكانت التأشيرة ب 4 شهور ومرجعتش والحمد لله مفيش مشاكل بينى وبين الكفيل السابق فيها حاجة لو رجعت دلوقتى يعنى مفيش مشاكل على تأشيرة جديدة

وجزاكم الله خيرا

السلام عليكم ورحمه الله وبركاته

[elawadi]

وبخصوص خطاب الكفيل بالاستثناء فهو حاليا موجود معايا وموثق من الغرفة التجارية

[waaaf]

أخي الكريم

ياريت تديني إسم ورقم تليفون المكتب إللي هايعملك العقد بـ 550 جنيه لأني عندي نفس مشكلتك والمكتب قالي عايزين 1200 جنيه