مشاكل الجيرة

[Cleo]

فى حديث شريف "قال رسول الله صلى الله عليه وسلم ولله لا يدخل الجنة ولا لا يدخل الجنة ولله لا يدخل الجنة"

فقال الصحابة "قد خاب وخسر... فمن هو يا رسول الله؟؟"

فقال صلى الله عليه "من لا يأمن جاره بوائقه - أى شروره و أذاه "

تحولت علاقة الجار بجاره إلى علاقة فتونة وبلطجة والبقاء للأقوى...

والخلافات دائما تافهة... لكن السمة الأساسية هى أنا ومن بعدى الطوفان. لو جار اشتكى واعترض عما يؤذيه، يمكنه ببساطه أن يخبط راسه فى أتخن حيط... هذا إن لم يتحول الأمر إلى سلسلة انتقامية من الأذى المتعمد.

فى بيتنا القديم، فى أحد الأدوار كانت تسكن سيدة كبيرة لكنها على قدر غريب من الافترا ودائمة التعدى على السكان، وكانت تدعى أنها مختلة عقليا..!! جارتها فى الشقة اللى جنبها سابت العمارة ومصر الجديدة كلها بسببها...!!!

زمان قالوا اختار الجار قبل الدار...

إاى تتعامل مع جارك المؤذى؟؟؟ وازاى تتقى شره؟؟

[METALLICA]

انا شخصياً . . أتجاهلهم تماماً ؛ فلا بد لهم أن يملوا من محاولتهم السخيفة لإثارة غضبي ؛ وهذا مايحدث بالفعل . . .

أرى تساؤلاً يلمع بأحد العقول . . . وماذا إذا مانجح في إحدى المحاولات من إثارة غضبك !!!

سأتوجه اليه بمنتهى الهدوء لافتاً نظره بمنتهى الأدب لما حدث مؤكداً ثقتي أنه لم يكن مقصوداً منه ذلك بالطبع . . . فتكون النتيجة انصياعه لكلامي بكثير من الخجل لما فعله .

أما إذا وصل الأمر لأسلوب متخلف للغاية تحت شعار البلطجة المجردة أو إدعاء الجنون أو الجنون الفعلي . . . أعتقد أن الإتصال بالجهات الأمنية هو أفضل حل

[yasovinas]

طبعاً موضوع اني اسيب السكن حالياً من رابع المستحيلات (حلم )

لكن في مثل بيقول

اصبر على جار السؤ يا يرحل يا تيجي مصيبه تشيله

طبعا برضه تحت ظروف الازمه السكانيه فانتظار الاحتمال الاول صعب يبقى فاضل لنا الاحتمال الثاني تيجي مصيبة تشيله وبرضه والله يا كليوا المصايب بقت بتستنضف يعني الكويس والطيب هو اللي تيجي المصيبة تعجب بيه وتشيلة

[se_ Elsyed]

معليش يا ميتاليكا إسمح لي انا ضحكت جداً على مداخلتك الحالمه الرومانسية .. مش إستهزاءً لا سمح الله ولكن لإنها غرقانة رومانسية ..

يا حبيب قلبي ده في ناس جبابرة ويخلوك تطلع من هدومك مش من بيتك وفي منتهى قلة الذوق وقلة الإيمان ايضاً .. تقوم تقولي أروح أقوله إنت ماكنش قصدك تعمل كده يا لئيم .. صح ؟

بيحكي لي واحد من أصدقائي في المنتدى معانا هنا ... مش عايز أقول إسمه ( وهو مجرمون ) إنه كان يا ماكان يا سعد يا إكرام كان ساكن في منطقة كانت حلوه إسمها مدينة نصر وفي أحد العماير الجميلة لحد ما سكن جنب ه واحد اعتقد فكهاني او عنده مقلة لب- فكرني يا مجمج كده كانت شغلانته إيه ؟- وإبتدا صاحبنا يتصرف بهمجية من اول فتح باب الشقة والقعاد في الصالة قدام الرايح واللي جاي وكإنه قاعد على الترعة لغاية سلة المهملات اللي بيحطها قدام شقتة ويترك الزبالة فيها بالإيام تإذي الناس والبشر جميعاً و يرد على السكان بفظاظة ...

لحد ما مجرمون كان بيبيع الشقة وكنت هادتبس فيها واشتريها منه - على أساس إن إحنا معلمين زي بعض .. يعني هو فكهاني وأنا حلاق يرفع على سكينة الموز أقوم غارز المقص في ودانه اليمين ... وكده يعني ... لكن عقلت الحمد لله وما عملتش كده ومجرمون هو اللي طفش ...

تقوم تقولي ألفت نظرة ؟ ..

لأ بجد دي مشكلة مزمنة وحاجة تنغص على الواحد عيشته وتخليه يكره الناس كلها ويروح يسكن في جزيرة منعزلة ...

ومالهاش حل غير إن الواحد يدعي على جار السو ده او يأجر حد يخلص عليه ... ما هي بجد حاجة تزهق ...

ده الرسول قال " مازال جبريل يوصيني بالجار حتى ظننت انه سيورثني "

يعني هايشارك ولادي في ورثهم بعد ما اموت من كثر العلاقة الوطيدة اللي المفروض تبقى بين الجيران اللي هما أقرب الناس للواحد من إخوته واهله اللي ممكن يكونوا عايشين في مدينة أو بلد تانية ...

[se_ Elsyed]

خلينا بقى نتكلم ونقترح حلول فعالة بدل من الشكوى والولولة الفاضية إللي لا بتقدم ولا بتأخر :

- أنا بأعتقد إن من ضمن أسباب مشاكل الجيرة هي حالة الجفاء والمعُزلة التي يفرضها الجيران على انفسهم وتجده يتعامل مع الجار على إنه عدو .. بدون أي مسببات .. فتجده مثلاً يقابل جاره في الأسانسير ويرمي على السلام ووالله العظيم بتحصل في أوقات إنه يطنش وما يردش على أساس إنه بيفكر إنه طالما سلم عليه النهاردة يبقى هايطلب منه حاجة بكره وهلم جره ...

فبالتالي إذا سلك الإنسان هذا الطريق يبقى لا يلومن إلا نفسه لو وجد يوماً ما معاملة سيئة من جارة مهما كانت ...

وليس معنى ذلك إننا ننادي بالإختلاط الزيادة عن الحد بين الجيران .. ولكن على الأقل لابد أن يكون هناك حد ادنى من العلاقات الإنسانية الغير قائمة على اهداف أو مصالح بينهم .

- كذلك قيام الشخص بمبادرات طيبة تجاه جاره تجعل الآخرين يحترمونه ويحافظون على علاقات الجيرة ... يعني لو في جار جديد لي جه العمارة إيه المانع إني أستئذنه إني اجي أشرب معاه القهوة وأزورة .. واخد له حزمة ورد من بتاعت اخونا الطفشان حشيش او حتى ماكينة حلاقة ناسيت من ام موسيين ومافيش مانع إني اخد له دقنه بالمرة وبكده ابقى وفرت عليه زيارة للحلاق ... أظن كده يبقى عداني العيب ولو رفض الزيارة دي يبقى مابدهاش وهي الحرب إذاً :blink: :) ... لا بجد قد يكون لكل واحد ظروفه ولكن على الأقل يبقى أنا عملت اللي عليه وأظهرت بوادر حُسن النية ...

- وممكن من وقت والتاني لو ربنا كرمنا بكيلو لحمة أثيوبي من اللي متاكله قبل كده يبقى أبعت له طبق شوربه وأكثر الميه على قد ما قدر بحيث تتحسب عليه جميلة وفي نفس الوقت ما كلفتنيش حاجة ... او بمعنى اخر تبادل الزيارات والهدايا البسيطة في المناسبات الإجتماعية ....

- وعلى فكرة النساء او الجنس اللطيف عموماً بيقع عليهم عبء كبير في المواضيع اللي زي دي .. يعني الرجالة مهدود حيلها طول النهار في الشغل - شايفك يا دكتورة فريدة وهاتيجي تقوليلي دلوقت ماحنا كمان بنشتغل يا سي س س - وبالتالي النساء أو ربات البيوت ( مش صفية المهندس ) بيكون امامهم مجال لتبادل الزيارات مع زوجات الجيران التانيين وكل واحده تعرف التانية طابخه إيه النهاردة وكده وتتوطد العلاقة بينهم وبيبقى هناك أُلفة تصبح حاجزاً لتخطي أي خلافات جيرانية ...

وكفاية بقى انا تعبت هو انا اللي عندي جيران لوحدي ...

[راضي]

تصحيح واجب

اخونا العزيز سي السيد كتب :

ده الرسول قال " مازال جبريل يوصيني بالجار حتى ظننت انه سيورثني "

وصحيح الحديث هو

عن ابن عمر وعائشة م قالا: قال رسول الله صلى الله عليه وسلم ما زال جبريل يوصيني بالجار حتى ظننت أنه سيورثه . رواه البخاري ومسلم.

وشكرا

[الطاحونة الفكرية]

كليوباترا

واضح ان جيرانك مزعلينك

معلش كل الناس كدة

و السبب الاساسي الحسد الجار بيبص دايما لجارة و أقدر الناس لحسدة لقربه الشديد منه .

على فكرة دي مشكلة ملهاش حل .

بس أنها توصل لقله الادب دة بس بيحدث في المناطق اللي مستواها متدني .

vmp:

[Cleo]

كليوباترا

واضح ان جيرانك مزعلينك

معلش كل الناس كدة

و السبب الاساسي الحسد الجار بيبص دايما لجارة و أقدر الناس لحسدة لقربه الشديد منه .

على فكرة دي مشكلة ملهاش حل .

بس أنها توصل لقله الادب دة بس بيحدث في المناطق اللي مستواها متدني .

vmp:

أبدا ولله... إحنا كنا ساكنين أصلا فى أرض الجولف ودى حتى تعتبر راقية إلى حدما.

لكن اللى بيحصل مثلا:

- واحد يقتطع جزء من الرصيف ويحط عليه سلاسل بقفل ويخصصها لسيارته هو لوحده. ولو هو مش موجود، محدش يقدر مكانه عشان فيه سلاسل..!!

- واحد يبقى راكب الأسانسير بطوله... لوحده... ولو حد تانى حاول يوقف الأسانسير فى دور تانى عشان ينزل بيه، يقوم بسرعة الشخص اللى جوة الأسانسير يفضل يدوس على زرار غلق الباب بسرعة قبل ما اللى بره يفتح الباب ويشاركة الركوبة..!!

- عاوزين يخلصوا من شقاوة عيالهم، يبعتوهم يلعبوا كورة فى الشارع الساعة 2 بالليل... ومالكش حق تعترض عشان هم أحرار وانت مش هاتكبت حريتهم

- صوت الستريو لما ينزل دق على نافوخ الناس فى وقت قيلولة أو ساعة متأخرة أو وقت مذاكرة وامتحانات

[Mohammad Abouzied]

للأسف تأثير الجار على حياة الفرد وافراد عائلته كبيرة جدا قد تصل الى انهيار مستقبل الاطفال ويمكن تصل الى هدم اسر

ويمكن ازمة السكن واضطرار الفرد الاستمرار في نفس السكن مع الجار وتحمل رزائله ومشاكلة تكون من الاسباب الحقيقية لتدهور الحياة الاقتصادية والثقافية والاجتماعية في المجتمع المصري

اذكر تماما عندما كنت صغير ودخلت علينا جارتنا وطلبت من امي انها تمسك اخي الصغير لابنها لكي يضربه لكي يتوقف عن البكاء مما جعلني اجري على ابنها وانهال عليه بالضرب وكنت السبب في مشاكل معهم لا حصر لها ولا عد اخذت من ذاكرتي جزء كبير يستحيل ان انساه ابدا ما حييت حتى بعد ان علمت انها ماتت وابنها ايضا مات في حادث والباقي فقط بنات تزوجوا وسكنو بعيد عن منزل والدي ولكني عندما اتذكرهم تنتابني شعور اخرج به عن طبيعتي الهادئة

هذا الوضع خلاني اخاف الجار مهما كان ولا ايريد الاختلاط به بأي حال من الاحوال بل اكثر من ذلك اخذت اربع شقق لي في اماكن متنوعه وفرشتهم ولن استقر في اي واحدة فيهم اكثر من شهر انشاء الله بل بل يمكن يمكن اقامتي سوف تكون في مزرعتي بعيدا عن الجيران ومشاكلهم

الجار السو اعوز بالله منه فهو فعلا مدمر لكل شئ ممكن يكون جميل في حياتك وفعلا الجار قبل الدار

عموما انا حاليا ساكن في عمارة مفيش جار يعرف جارة ودا الى مريحني فعلا

[se_ Elsyed]

عموما انا حاليا ساكن في عمارة مفيش جار يعرف جارة ودا الى مريحني فعلا

بس إسمح لي كده غلط يا استاذ محمد ...

يعني لو انا ماعرفش جاري اللي جنبي ولا قدر الله حصل لي شيء في منتصف الليل أو في أي وقت ويستلزم ذلك وجود شخص بجانبي ... تفتكر مين هايكون أقرب .. الجار أم الأقارب اللي ساكنين بعيد عن الواحد ؟

وبعدين زي ما دايماً بنقول إن الوسطية مطلوبة في كل شيء ... يعني لا جفاء وإنعزال ولا إختلاط اكثر من اللازم .

[عصام]

كنت ساكن فى أول جوازى ... (إييييييه كانت أياااام ) فى الهرم ..

قضيت هناك 3 سنين ... ماعرفتش جارى اللى فى الشقة اللى جنبى إسمه إيه؟ mfb: والله مع إنى حاولت ..

بس الظاهر إن العمارة كانت كلها كده .. لدرجة إننا كنا الصبح بنكون كل واحد فى عربيته بيسخن .. كلنا جنب بعض مواجهين العمارة .. يعنى كلنا شايفين بعض .. ومع ذلك تخيلوا مافيش حتى صباح الخير .. وإن أنا خدت المبادرة .. كانوا إما ما يردوش من الأساس .. أو يرد وهو محرج زى ما يكون بيقولك حاجة تكسف :blink: .. ..

لدرجة إنى شقتى اتسرقت فى يوم من الأيام .. إتسرقت بمعنى اتسرقت يعنى .. (ماسابش والله حتى الكوبايات mf-: .. ده حتى شرب سيجارتين مخدرات وطفاهم فى مكتبة التليفزيون .. منه لله htr:: )

وبينما المدام قد بدأت وصلة مما يشبه "الصويت" غلى حد ما من هول المفاجأة .. وجدت الجيران العائدين من عملهم بيعدوا من أمام الباب .. يبصوا بصة .. ويسألوا البواب "هوا فيه إيه؟" .. يرد "إتسرقوا" .. يردوا "آآآآآه ... إنزل اغسل العربية" ;) .. ويستمروا صاعدين .. mfb:

المهم بعد كدا انتقلت إلى مدينة الأحلام .. 9 أكتوبر :P .. حيث الحياة مختلفة وعدد البشر أقل ..

العمارة إلى جيت أسكن فيها كان فيها شقتين فقط ساكنين .. مما جعلنا كلنا 3 شقق ساكنة فى عمارة بها 24 شقة ..

فإذا بى أفاججأ إن الحياة رجعت زى الخمسينات .. :) والناس بتسأل علينا .. وإشى اللى حاى يساعد فى نقل العفش .. واشى اللى جايب معاه طقم شاى .. واشى اللى بيسأل عايزين حاجة؟ :blink: أنا الحقيقة اتجننت وقولت الناس دى مش طبيعية ..

تخيلوا إننا لحد النهارده بنفطر فى رمضان سوا .. وإن أى مستجد جه للسكن بعد كدا اندمج مع الباقين بمنتهى السهولة ؟

من غير ما اطول عليكوا .. انا اعتقد إن المسبب الأكبر لمشاكل الجيرة بكل انواعها هو ... العدد الكبير جدا من الناس .. الزحمة الشديدة .. الأخلاق اللى بقت زى الطين .. والمبادىء اللى انعدمت .. خلت الناس تفقد الثقة فى بعضها .. واتؤثر الوحدة

ما حدش يسألنى عملت إيه فى موضوع الشقة .. عشان ما باحبش افتكر موضوع المحضر اللى قطعوه بعد ما مشيت .. :blink:

[yasovinas]

الناس فعلاً اتغيرت عن زمان كتير

واحنا صغيرين (في الستينات) كان الجيران هم اهلنا والله اخوالي واعمامي كنت بشوفهم مرة في السنة او في المناسبات

لكن جيراني في العمارة كلها كلهم كانوا خالاتي واعمامي وطبعا اصحابي

اللعب مع بعض كل يوم عند واحد فينا نخبط ونلعب ونهيص واهله فرحانين بينا ولو في اي شقه في العمارة من البدروم الى السطوح (6×3)فيها اي شيء فرح حزن مرض نجاح اي شيء تلاقي كل الناس موجوده مع صاحب الشقة

حالياً اسكن في عمارة في حي يعتبر من الاحياء القديمة في اسكندريه محرم بيك واخترتة مخصوص علشان الاقي ناس زمان او على الاقل ريحتهم

لكن للاسف جاري لا اشوفه الا بالصدفة وبرضه يا يسلم على يا يطنش زوجته وزوجتى اصحاب بناته الصغار يشوفوني يستخبوا باقي الشقق في نفس الطابق لا اعرف عنهم شيء