لو زعلان لو زهقان لو طهقان لو مضايق

[goold]

مطلوب افكار نحل بها الاحوال ال ممكن نمر بها كلنا ممكن تدخل تتكلم عن حل لو زهقان زعلان تهقان مضايق ممكن تعمل ايه

كلنا بيجى علينا حالة من الحالات ده بس ممكن نصبر ونشغل نفسنا فى امور تغير حالنا لأحسن

يعنى لو زعلانه مع احد افراد الاسرة ممكن تصلحيه وتنسي اضحك اعمل له حاجة بيحبها قوله كلمه دلعه بيها قوله كلمه تخليه يكسف ويضحك

لو فى فراغ ممكن تعد تحاول تخيط حاجة جديدة من حاجة مستغنى عنها فى مجموعه ستات من لبنان عجبونى اوى تصور جابوا بنطلونات جنز ورسموا عليها واضافوا عليها قطع قماش صغيرة ملونه وترتر وباعوها بضعف ثمنها وكذلك عملوا تشيرتات

للموضوع تكملة تفاعلوا عنكم كثير يفيد

تم تعديل 26 ديسمبر 2004 بواسطة goold

[إثار]

موضوع ظريف كتيرلما بمر بالحاله دي بحل المشكله باني بشغل نفسي في شغل البيت مثلا وزمان كنت برسم tot:: وممكن لو عندي كتاب غير كتب الدراسه يبقى ممتاز او ممكن اتجول بين المواقع عالانترنت او اقرا قران اوانام اوووووو اقف فالبلكونه شويه et:(

[Scorpion]

في حالة غضبك أو حزنك أو ضيقك.. هناك في داخلك طاقة تريد الخروج للتنفيث قليلآ...

استخدام هذه الطاقة هو المحك....

تستطيع أن تبكي ...... اول حل سهل سلبي

تستطيع ان تتهور بعمل حماقة... تكسر فازة.. تشوط اي حاجة قدامك... او تتدخل في الغلط و تمد ايديك علي اللي مضايقك او فاكر انه سبب ضيقك.. تاني حل سلبي يزيد من المشكلة ...

تستطيع ان تخلو الي نفسك و تسمع موسيقي او تنام...

او كفكرة goold نحول الطاقة دي الي شيء ايجابي.. و كل واحد حسب هوايته...

بداية من ترتيب البيت... الي زرع نبتة في قصرية زرع نضعها في البلكونة... اصلاح شيء في البيت بدون الحاجة الي البحث عن تقني... الكتابة.... عرض المشكلة هنا في المحاورات و طرحها للبحث عن حل بين أصدقائنا .... صناعة شيء يدوي و لشعنونة هنا موضوع في غاية الجمال كنت أستخدمته انا شخصيآ في صنع أشكال مختلفة متخذآ من الشمع وسيلة...

أنا شخصيآ ... بعمل كلللللللللللللللللل الكلام ده...

تحياتي

[se_ Elsyed]

تصور جابوا بنطلونات جنز ورسموا عليها واضافوا عليها قطع قماش صغيرة ملونه وترتر وباعوها بضعف ثمنها وكذلك عملوا تشيرتات

ده إيه الأفكار اللي تودي ورا الشمس دي ؟

يعني بذمتك يا جولد .. لو أنا متضايق - زي اليومين دول كده - أفتح الدولاب واجيب بناطيلي الجينز وأرسم عليها عصافير وأحط عليها ترتر وأمشي كده في الشارع ؟ عشان بدل ما أبقى متضايق أبقى مجنون رسمي ؟ et:(

تستطيع ان تتهور بعمل حماقة... تكسر فازة.. تشوط اي حاجة قدامك... او تتدخل في الغلط و تمد ايديك علي اللي مضايقك او فاكر انه سبب ضيقك.. تاني حل سلبي يزيد من المشكلة ...

قشطع عليك يا سكوب يا مُشرف يا مشرفنا ..

تبقى أنا في كام واحد مضايقيني هل ممكن امد إيدي عليهم ... وعلى ضمانتك ؟ tot:: me0: ax: s-:

[mb14]

أقولك تعمل ايه لو انتى متضايق ومهموم و خلاص جربت كل الوسائل المعروفة وبردوا مش قادر تفلت من الضيق .

تجيب صور أحلى ذكرياتك الجملية اللى طبعا فاتت منذ زمن يعنى مثلا صورك مع زمايلك فى الجامعة أو مع خطيبتك طبعا قبل ما تبقى مراتك دلوقتى (وهى سبب ضيقك ) وتتفرج عليها وتفتكر احلى ايامك على طووووول حا تنسى همك وترجع لـ أحلى الأيام وبعد شوية العملية حاتفك وتنسى الهم والغم .

[حرفوش]

إذا كنت / كنتى, زعلان / زعلانة,

إنزلوا إلى شوارع مدينتكم أو بلدتكم, و تمشوا فى الطريق لمدة 30 دقيقة, ولاحظوا الناس الماشية فى الطريق, و علامات الإحباط و السأم, و غياب الإبتسامة, و سوء الصحة, و بهدلة الملبس,و كمائن الأمن المركزى, و المطبات الصناعية التى إبتكرها أصحاب ورش صيانة السيارات, و البلاعات التى نزع الحانوتية غطائها, و : ..........

عندئذ, سوف تهون عليك بلاويك, و تحمد الله على ما أعطاك, و تعود اليك القناعة, و معها إبتسامة. :P rs: :P

[أنـفـــال]

أرى أن لدي حلاً آخر..

إذا ضاقت بك الدنيا..

اذهب فاغتسل و توضأ..

ثم بإمكانك الخروج من منزلك الى المسجد اذا كنت شاباً..

و اذا كنت فتاة.. فاجلسي في غرفتك..

ثم اجلس او اجلسي وحدك..

صل..

و أطل السجود.. و ابك بين يدي الله سبحانه و تعالى..

اقرأ القرآن..

ستجد في نفسك راحة كبيرة.. لن تجدها في غير تلك الطريقة مهما فعلت..!

أنفال

[سهيلة]

لما بكون مضايقة باخد عربيتى وامشى ف الشارع نص ساعة

او

ابص للسما شوية ويسلام لو كنت بالليل والقمر طالع بجد لما ابص للقمر والنجوم بنسى اى حاجة مضيقانى

بشوف قدرة الخالق وعظمتة واستهيف الحاجة اللى مضيقانى على طول

بس اسرع حاجة تقول دعاء االحزن

لا الة الا انت سبحانك انى كنت من الظالمين

على فكرة

مافيش حاجة تستاهل الزعل :)

[أبو العيال]

الصلاة .. ولا شيئ غير الصلاة هي التي تريح الإنسان وتذهب الهموم

أرحنا بها يا بلال

ثم الدعاء المأثور ( اللهم إني أعوذ بك من الهم والحزن .. وأعوذ بك من العجز والكسل .. وأعوذ بك من الجبن والبخل .. وأعوذ بك من غلبة الدين وقهر الرجال ) ثلاث مرات

وصدقوني .. دي وصفة متجربة ..

تم تعديل 17 مارس 2005 بواسطة أبو العيال

[المحامي]

إذا كنت / كنتى, زعلان / زعلانة,

إنزلوا إلى شوارع مدينتكم أو بلدتكم, و تمشوا فى الطريق لمدة 30 دقيقة, ولاحظوا الناس الماشية فى الطريق, و علامات الإحباط و السأم, و غياب الإبتسامة, و سوء الصحة, و بهدلة الملبس,و كمائن الأمن المركزى, و المطبات الصناعية التى إبتكرها أصحاب ورش صيانة السيارات, و البلاعات التى نزع الحانوتية غطائها, و : ..........

عندئذ, سوف تهون عليك بلاويك, و تحمد الله على ما أعطاك, و تعود اليك القناعة, و معها إبتسامة. :amb: wst:: :lol:

فعلا والله انت معاك حق وهو ده قعلا الي بيحصل في مصر بس ده يخليك تحزن طبعا وتتارف اكتر منتا قرفان يا الله الله المستعان ورنا يطلعنا منها علي خير

[عنبو]

اولا السلام عليكم ورحمة الله وبركاته

انا لما اكون مضايق بشوف انا عملت ايه من الذنوب فى اليوم ده واخد بعضى واطلع على المسجد اصلى واحافظ على الصلوات فى جماعه والحمد لله بحس براحه ورح تسامح جميله بس المشكله انى برجع بعد كده واسيب الصلاه فى المسجد

احيانا بحس انى ربنا بيبتلى الواحد بمشاكل علشان الواحد يقرب او يكون انذار ان الواحد لو بيعمل معصيه معينه يسيبها يعنى رسائل

ربانيه للعبد علشان يتعظ ويرك المعصيه بسم الله الرحمن الرحيم """ وَمَا كُنَّا مُعَذِّبِينَ حَتَّى نَبْعَثَ رَسُولاً ""

[msayed]

لما اكون زهقان ومتضايق

بأردد بتركيز شديد دعاء الهم والحزن

"اللهم إني عبدك ابن عبدك ابن أمتك ناصيتي بيدك، ماضِ في حكمك، عدل في قضاؤك، أسألك بكل اسم هو لك سميت به نفسك أو أنزلته في كتابك، أو علمته أحداً من خلقك أو استأثرت به في علم الغيب عندك أن تجعل القرآن ربيع قلبي، ونور صدري، وجلاء حزني وذهاب همي"

"اللهم إني أعوذ بك من الهم والخزن، والعجز والكسل والبخل والجبن، وضلع الدين وغلبة الرجال"

********************

وبعدين احاول أشغل نفسى بأى حاجة مفيدة حسب المتاح وقتها.

أقلب فى الإنترنيت أبحث عن اى موضوع أقرأه.

أحط مناخيرى فى أى مشكلة فى محاورات المصريين أقول آراء فاشلة وأشاكس الناس.

وغالباً الزهق بيروح بعد كده، أظن إنى بأنقله لواحد تانى عبر الإنترنيت.. وربنا معاه.

*******************

ولو اتضايقت الساعة تسعة بأفتح تسعين دقيقة أشوف بلاوى الناس عشان الضيق يروح.

أما لو الضيق جه الساعة عشرة بأفتح العاشرة مساءاً.

لما الضيق بييجى يوم الخميس ما باعرفش صرفه لأن البرامج دى أجازة.

*******************

طب لو إنت مش متضايق خالص ومعنوياتك عالية جداً وعاوز تعكنن على نفسك وعلى كل إللى فى البيت معاك حتى ابنك النونو تعمل إييييه؟.

وصفة مضمونة

إتفرج على حالة حوار بتاع عمرو عبد السميع.. وإدعيلى.

*******************

[Ahmed Unknown]

انا كنت امبارح حاسس بزهق فظيع و مش قادر حتى اشتغل ولا اتكلم مع حد , شىء طبيعى جدا لواحد عايش فى الرياض cr((:

اول حاجة مسكت الموبايل و قعدت ادور فى الفونبوك لحد ما لقيت نمر ة واحد صاحبى قمت مكلمه لحسن حظى قالى احنا خارجين الوقتى خرجنا قعدنا مع بعض ساعتين و اتفرجنا على ماتش تشيلسى و ارسنال

و بعديها و انا مروح افتكرت انى كان عندى شغل و مينفعش نأجل عمل اليوم الى الغد فرجعت على الشركة تانى و قعدت اشتغلت كده ساعتين لحد ما خلصت

نزلت على الساعة 10 بالليل و طبعا لسه زهقان و قلت لنفسى هروح البيت اعمل ايه

قمت طالع على الجيم قضيت هناك ساعتين لما اتهديت

روحت البيت اترميت فى السرير و مدريتش عن الدنيا الا الساعة 10 الصبح

طبعا جيت الغشل الساعة 11 بس الحمد لله حالة الزهق و القرف راحجت cr((: cr((: cr((: :happy:

[mffaswan]

فيه فيلم وثائقي اسمه The Secret و الفيلم ده بيناقش قضية في غاية الأهمية .. و اللي هي كيف تستغل الطاقة بداخلك لتنعم بالسعادة ..

طبعاً بسبب الفكر العلماني للمُخرج ده بيخليه يبعد تماماً عن الدين .. اللي هو في الأصل وضّح لنا كمسلمين أن الأقتراب أكثر من الله .. هو سر السعادة .. و لكن كيفية هذا الأقتراب هو مشكلتنا جميعاً ..

ناس تقول الصلاة .. لكن فيه ناس تقول أني باصلي و اقعد أقرأ القرآن .. صحيح بأشعر بإعتدال المزاج و المشاعر بعدها .. لكن سرعان ما يعاود الأحساس بالقهر و الحزن و الضيق الهجوم على قلبي و عقلي ..

و ناس تقول مارس رياضة أو أعمل حاجة انت بتحبها .. و برضه تلاقي ناس تقول أن ده مسكن مؤقت .. و ساعات بيفقد المسكّن ده تأثيره بعد فترة ..

لكن أنا بصراحة بعد ما أتفرجت على الفيلم ده حسيت أني ممكن أتحكم في الشعور اللي ممكن ينتابني و أحوله لشعور تاني، يعني بالبلدي أنت اللي تتحكم في المشاعر اللي بتحركك

و علشان كلامي يبقى أبسط شوية، لما الواحد بيصحى الصبح يلاقي المية مقطوعة أو يلاقي عجل السيارة فاضي، أو أي شيء من هذا القبيل، بيتملكك شعور بالضيق، الشعور ده لما يتملكك يخليك تتنفرز و تيجي تقلب صفحة تقوم قاطعها، أو تدوس زرار تروح كاسره أو تفتح ضرفة تروح خالعها من مكانها، كل ده ممكن يزيد شعورك بالضيق و النرفزة .. هنا بقى مربط الفرس، يعني أزاي لو حصل معايا شيء زي كده أحول المشاعر دي لشيء تاني ..

و نيجي لنقطة الربط بالدين، المسلم مطالب بالمثول بين يدي الله كل يوم 5 مرات على الأقل، فالمفروض لما الواحد يعرف يتحكم في مشاعره كويس، هايقدر يصفي ذهنه تمام و يصلي بخشوع، و لما يقرأ القرآن، هايستوعب كويس جداً اللي بيقراه .. و هو ده علاج الضيق و الكآبه و الحزن .. طبعاً مع ما هو معروف من أحاديث الرسول صلى الله عليه و سلم اللي بتشرح القلب و الصدر ..

أنصحكم بمشاهدة الفيلم .. مع ربطه تمام الربط بتعاليم الدين الأسلامي الحنيف، و أن شاء الله هتلاقوا نفسكم بتتخطوا المشكلات النفسية الناتجة من اضطراب المشاعر بكل سهولة و يسر بعون الله ..

لكم التحية

[عندى أمل]

بالإضافة للأدعية اللى الأخوة و الأخوات ذكروها و كمان الصلاة و باقى الأفكار التانية للخروج من حالة الحزن و الضيق فيه كمان حاجة تانية مهمة جدا

الإستغفار

دى طريقة عرفتها من بعض الأخوة و الأخوات الأفاضل

لما أحس بحزن أو ضيق بأستغفر الله سبحانه و تعالى على الأقل مائة مرة أو افضل أستغفر لحد ما احساس الحزن و الضيق يروح

و الحمد لله بأحس بسكينة و إطمئنان بعدها و عشان كده كل يوم بأستغفر الله سبحانه و تعالى مئات المرات حتى قبل ما أحس بأى حزن أو ضيق و الحمد لله إحساس الحزن و الضيق راح

[اسماعيل امين]

إذا كنت / كنتى, زعلان / زعلانة,

إنزلوا إلى شوارع مدينتكم أو بلدتكم, و تمشوا فى الطريق لمدة 30 دقيقة, ولاحظوا الناس الماشية فى الطريق, و علامات الإحباط و السأم, و غياب الإبتسامة, و سوء الصحة, و بهدلة الملبس,و كمائن الأمن المركزى, و المطبات الصناعية التى إبتكرها أصحاب ورش صيانة السيارات, و البلاعات التى نزع الحانوتية غطائها, و : ..........

عندئذ, سوف تهون عليك بلاويك, و تحمد الله على ما أعطاك, و تعود اليك القناعة, و معها إبتسامة. :lol: :rolleyes:

------------

الاخ المحترم حرفوش

ذكرتني بنكته :-

شخص اشتعلت النار في منزله ...صرخ طالبا النجده ....حريقه ...حريقه ....القي اليه شخص اخر (المنقذ)بـ جركن بنزين وعلبه كبريت وولاعه .

المفروض ان غالبيه الشباب المتعلم كل منهم له هويه يحبها يطلق فيها طاقته الوجدانيه يهرب اليها في ساعات الفراغ القاتل او ساعات الحزن .تعلمها خلال النشاط الجماعي مع زملاؤه وتحت اشراف اساتذته في مرحله التعليم الاساسي او الثانوي او العالي .وهو ما يطلق عليه النشاط العلمي . وهو شئ شائع ومنتشر في الدول المحترمه .ويلاقي اهتمام لديهم لفائدته .ويتم بشكل جماعي .

اما نحن كمصريين او عرب اكثر تحضر منهم فننظر الي ذلك علي انه مسخره وكلام فاضي ولا نهتم به في منظومه التعليم الا وقت المسابقات للحصول علي الجوائز ومعظمها نصب واحتيال .

لكي لا نخرج من الموضوع الاساسي ....الضيق قد يحدث نتيجه الفراغ القاتل (سوف يعاني منه شبابنا كثيرا والمحاليين الي المعاش رغم قدرتهم علي العطاء ) لو كان لدي كل منهم هوايه فرديه او جماعيه تعلمها خلال مرحله تعليمه المختلفه لما تعرض للفراغ القاتل الذي يعدعو الي الضيق .

[elfakhrany]

لو زهقان .. بفكر ايه الأسباب اللى خلتنى زهقان وافكر فيهاو احاول أحلها بطريقة عملية :lol:

[لولا]

لو زعلان ..لو زهقان .. لو طهقان .. لو متدايق

حالة استحالة ميكونش حد فينا ممرش بيها ..

المشكله ليست دائما فى الفراغ ..

ليست فى قلة الأنشطه على وجه الخصوص

قد نكون مزحومين فى العمل .. والبيت وهوايه او هوايات ومتابعه الأخبار والتواصل مع الغير ورغم ذلك تقتحم هذه الحالة حياتنا دون اى استئذان

فى وقت ما وتبدأ فى التأثير السلبى على التفكير والحالة والنفسيه والتفاعل مع الآخرين ..

وأظن السبب هو الروتين القاتل حتى وليس الفراغ لأن جدول الأيام قد يكون مزحوم بمسلسل عمل واحداث - روتينيه - لا تنتهى وهنا يمكن سر

الإنفجار المفاجيء والطهق !! انه الروتين !!

نحتاج حقا ان نخرج منه من وقت لآخر..

ان نتحرر من قيود الحياة اليوميه وتسلسلها الرتيب سواء كان تسلسل مزدحم بالأحداث او فارغ

نحتاج ان نذهب لمكان جديد ..

نتحدث احاديث جديده..

ونرى مناظر جديده

ربما لأجل هذا تجد المصايف مزدحمه جدا فى الصيف لأننى احس ان الناس فى حالة ملحه جدا جدا لتغسل نفوسها من لزوجه الحياة اليوميه

الممله وروتينها القاتل ..

الهروب للبحر هو هروب من كافه القيود ..

انبعاث جديد تحتاجه الأرواح المثقله فى دوامه الحياة سواء كان عمل او مذاكره او مسؤوليات رتيبه مكرره طوال العام.

الملل والطهق لا يمكن علاجه سوى بالتجديد ..

احيانا اعرف ان حدود الخروج من بوتقه الملل امامى لا تجد متسع من الخيارات عندما اكون فى السعوديه.. ساعتها ربما

تفيد بعض المحاوله فى خلق حالة احساس جديده حتى لو كانت قلب الشقه رأسا على عقب وتغيير اماكن الأثاث بشكل جذرى..

او مشاهده فيلم من عينه الأفلام التى تجعلك حقا تخرج من حالة الركود حتى لو لساعتين فقط هى مده الفيلم ..

واحيانا تتعدى المسألة حدود الملل والطهق .. تقفز للروح !!

انه شيء يصيب النفس بعمق شديد .. ساعتها لا تفيد محاولات الذهاب حتى للمريخ .. المسأله روحية بحته

وتحتاج فقط لروحانيات لحلها وهو شيء لن يكون سوى فى الدعاء .. الصلاة والدعاء والشكوى لله تغسل النفس عميقا جدا جدا..

تمنح طاقه لا يمكن ان تمنحها اى اشياء دنيويه .. تشمل القلب براحه هى جُل ما يحتاجه فى ازمته تلك ..

اما الزعل ..

عندما نزعل من الدنيا ومن ظروف نظن انها ظلمنتا قد يكون من المفيد ان نتذكر من هم لا يملكون ما نملك حتى ..

المسألة كلها تنبع من الداخل قبل الظروف وقبل الحياة ..

الرضا والقناعه والإيمان والسعاده الداخلية اشياء نملك ان نتوقف عندها ونحاول ما استطعنا ان نهذب انفسنا بها .

كلنا ننسي احيانا مانملك ونتوقف عند مالانملك .. ننسي ان ما بأيدينا لا يملكه آخرون .. الحمد الله حمد كثيرا مباركا يليق بجلال وجهه وعظيم سلطانه.

لولا