إلحقووووووونى !,................ موبايلى اتسرق !!!

[yasovinas]

شوف يا باشا انت اول حاجه تاخد اطره وتروح لام سحلول اللي في العمود تجيب لك قرارة لكن موضوع ان الشركه تعرف الشريحه مكانها فين فهذا ممكن في حالة ان الشريحه تكون مستخدمه اما غير كده فعليك وعلى خالتك ام سحلول

من مده واحد زميلي نسي موبايله في التاكسي والسواقين هنا كلهم باتان وهم جنسية بين الباكستان والافغان طبعا بيتكلموا عربي جميل جداً

المهم صاحبنا بعد ما لاحظ انه نسي الموبايل في التاكسي جري على اول هاتف واتصل بيه رد علية السواق

الو

الو رفيق

انا في يركب تاكسي مال انت سوا سوا

زين شو في

هذا موبايل مال انا يركب داخل تاكسي مال انت

رفيق هذا كلام مني مني موبايل اول مال انت الحين موبايل مال انا

وقفل الخط

اتصل صاحبنا تاني

رفيق هذا موبايل مال انا

شو انت مخ مافي مخ نيه انا شو يخبر هذا موبايل اول مال انت الحين موبايل مال انا

الترجمه الحرفيه لما سبق

هو ما قاله لك اخونا اسو

[se_ Elsyed]

إسمع نصيحتي يا ملك الكمانجه ، إنت قدمك نقطتين .. قصدي طريقتين :

1- هو إنك تسيب إمتحاناتك ومذاكرتك وتعمل كبسات مفاجئة على سوق السيدة عائشة وشارع عبد العزيز وتقلب الدنيا على العده وياريت تكون فيها علامة مميزة ( بشلة ، ضربة مطوه ... كده يعني " عشان لما تلاقي الحرامي بيبيعها تروح طابق في صفارة رقبته وتاخد حقك منه ( أنظر تعليق إسو )

2- الحل الثاني إستوحيته من فيلم جهاد وسلامه وطريق الندامة ... إنت تجيب الكمانجة بتاعتك وتغطي عينك الشمال وتدور في الأتوبيسات المكيفة وتحكي قصة الموبيل بتاعك .. يمكن الحرامي يكون موجود بالصدفة ويدلك على بلطاي قصدي على المحمول ، وإن ما حصلش يبقى هاتلم لم محترم من الناس اللي قلبها هيرق عليك ويدولك اللي فيه النصيب .. وساعتها هاتجيب لاب توب مش محمول .... وإبقى أفتكرنا خصوصاُ وإحنا داخلين على أيام مفترجة .

[ماجد]

عزيزى Violinking

أولا : عظم الله أجرك و ابدلك خيرا منه ..... ngh:

دى كاس دايره و لازم كلنا نشرب منها ... :D

ثانيا : هل من الممكن ان تعود العده ......

نظريا ممكن أوى ..... ازاى طيب

اولا تبلغ الشركة المنتجه لو شاريه من التوكيل بحيث يكتبوا عندهم انه مسروق .... لو جالهم علشان السوفتووير يتغير مثلا لفك كلمات السر .

ثانيا : لو سبت الشريحه مفتوحه يوم أو اتنين بعد ماتعمل محضر فى البوليس و يكون عندك واسطه . يمكن الحرامى يتكلم فى التليفون .

تجيب من الشركه كشف بالمكالمات و الأرقام اللى انطلبت من الموبايل او طلبته .

يقوم رجال المباحث بطلب هذه الأرقام و تهديد اصحابها بالكشف عن ارقامهم و اسمائهم و تهديدهم بالزج باسمهم فى عصابة سرقة الموبايلات ان لم يكشفوا عن اسم من تكلم معهم من هذا الرقم .ولا مانع من ارسال مخبر لهم فى البيت لو كان بينهم من هو صاحب خط ارضى وده تقدر تجيبه بسهوله.

بالطريقه دى لو الحرامى استخدم التليفون فهاييجى بنسبة 95 % و ده حصل معى اكثر من مره .

اما لو رمى الشريحه على طول فمش ممكن ....

و عوضك على الله على اية حال .....

[ابو يوسف]

من منطلق اللى يشوف بلوة غيره تهون عليه بلوته ...

أنا مديرى اتسرق منه نوت بوك بـ 11000 جنيه !!

ومن جوة مكتبه !!! ngh:

و بعد س و ج و ص و ع ...

قيدت القضية ضد مجهول ..

و مازال البحث عن المجهول مستمر :D mc:

و بسؤال ودى منى – و أنا أتقمص شخصية الحقق كونان - لأحد العاملين بالنظافة (السوابق) :

- تفتكر ازاى يخرج جهاز بالحجم ده من الأمن ؟؟

فرد عليا بثقة ..

تحب نخرج مديرك نفسه من غير ما حد ياخد باله !!!!

B) B)

[وليد صفوت]

عزيزى فيولين:

الموبيل نفسه فى عامل أمان لحماية الموبيل من السرقة. ممكن طبعا ضبط الموبيل بخمسة أرقام ككلمة سر... هذه الأرقام هى 12345 ك default تأتى من شركة nokia المصنعة للموبيل... طبعا المفروض صاحب الموبيل يغير هذه الأرقام الى خمسة أرقام أخرى والتى يطلبها الموبيل ك security code فى حالة تغيير الشريحة... وأنا أتكلم عن موبيلات nokia ... ولا أعرف النظام فى بقية الأنواع... لكن الحماية من السرقة لهذه الآلآت أصبح common sense... طبعا لو أنت حامى موبيلك بكلمة سر سيجعل هذا الموبيل بلا قيمة فى يد صاحبه بعد تغيير الشريحة التى ستقوم أنت بألغائها...

لكن أثناء زيارتى لشارع عبد العزيز قبل كده لقيت ناس ممكن تتعامل مع النقطة دى.. ال security code يعنى لكن لا أعلم أذا كانوا بينجحوا ولا لأ...

عموما ياريت تكون حميت جهازك على الأقل لتكبد الأعداء بعض الخسائر...

بالمناسبة أنت آداب أيه؟ أوعه تكون حلوان!!!

ايوة ...... انا عامل فعلا الكود ده ..... و كمان موبايلى فرنساوى و محدش بيعرف يتعامل معاه لانه ماركة مش مشهورة ........

و كمان انا لما حاولت اتصل بيه بعد دقائق من سرقته لاقيته مقفول ...... يعنى إستحالة يتفتح تانى ......

ده معناه انهم حيعملوا حاجة من إتنين ..... يا يحاولوا عند واحد محترف من بتوع شارع عبد العزيز ..... يا يبيعوه خرده ........

و فى الحالتين انا برضو مفروس ....

[وليد صفوت]

ابقى الموبيل اللي جاي سميه برعي علشان ما يضعش تااني . . . . . .

ماهو المصيبة ان صاحبه مكانش عارف إسمه !! B) ماهو لو كان يعرف انه مدلع و ابن ناس و مش وش بهدله ..... مكانش خده ...... :D

انت اتسرق منك الموبايل مرة واحدة بس ؟؟؟؟؟

يا بختك !!!!

إزاى ؟؟؟؟؟؟؟ هوا المفروض انه يتسرق منى كام مرة ؟؟؟؟؟؟ ngh:

yasovinas ..... ماهو انا بتصل على أمل أن نملة ترد عليا حتى ...و اتفاوض معاها على اى حاجة ...... انما أزاى و الموبايل أصلا مش ممكن يتفتح تانى mc:

[وليد صفوت]

إسمع نصيحتي يا ملك الكمانجه ، إنت قدمك نقطتين .. قصدي طريقتين :

1- هو إنك تسيب إمتحاناتك ومذاكرتك وتعمل كبسات مفاجئة على سوق السيدة عائشة وشارع عبد العزيز وتقلب الدنيا على العده وياريت تكون فيها علامة مميزة ( بشلة ، ضربة مطوه ... كده يعني " عشان لما تلاقي الحرامي بيبيعها تروح طابق في صفارة رقبته وتاخد حقك منه ( أنظر تعليق إسو ) 

2- الحل الثاني إستوحيته من فيلم جهاد وسلامه وطريق الندامة ... إنت تجيب الكمانجة بتاعتك وتغطي عينك الشمال وتدور في الأتوبيسات المكيفة وتحكي قصة الموبيل بتاعك .. يمكن الحرامي يكون موجود بالصدفة ويدلك على بلطاي قصدي على المحمول  ، وإن ما حصلش يبقى هاتلم لم محترم من الناس اللي قلبها هيرق عليك ويدولك اللي فيه النصيب .. وساعتها هاتجيب لاب توب مش محمول .... وإبقى أفتكرنا خصوصاُ وإحنا داخلين على أيام مفترجة .

س س ....... حرااااااااام عليك .....

انا ركبى سابت من الضحك ...... عمال اضحك و اعيط عشان الموبايل !

بس تصدق فكرة عملية لإستغلال مواهبى الفنية فى القضية الاساسية ..... ngh:

عموماً بابا لسة واصل حالا من الشغل ...... و بعد لما افاق من الخبر ...و اخدت اللى فيه النصيب mc:

قاللى مش مهم . :D

و بعد كده مافيش موبايل .... B) مافيش موبايل أكتر من 500 جنية !!!!!!!

أنا رديت عليه نفس الرد بتاع إسو .................. إبقى قابلنى !

[إبن مصر]

عدة زيادة ؟  ngh:

تكونش يابنى فاهم إكمنى مشرف .. يبقى لازم أمسك الستة ستومية وفيه اتنين غيرها سبير مرميين فى الدرج؟  mc:

إطلاقا .. أنا مبدئى .. عدة بتقول ألو .. وبترن .. وشكلها عادى .. ومش غالية ..

ليييييييييه؟  :D

علشان لما تتسرق .. ما انشرلهاش نعى فى الجرايد .. وامشى أدلل على عدة زيادة ..

إنما يبقى سهل أنزل وقتى كدا أشترى واحدة تانية ...

بكرامتى  :angry:  :angry:

قصدك حد معين بالكلمه دى يا اسو....

صحيح ربنا يقل منكم .....

اففففففففففففففففففففف B)

مليتوا البلد B)

يا ترى انت فين يا نيرون.

اعلن لو لم يظهر نيرون فقد استوليت على توقيعه ولزمته....

بس هه

[إبن مصر]

فيلو ....

بص يا ابنى..

انت تعمل زى شيبوب فى فبلم عنتره وتتنكر وتروح ارض بنى زياد تنظر هناك.

وبعدين ترجع تانى..

وعلى رأى المثل الى الكل قالوه لك...

ابقى قابلنى....

[se_ Elsyed]

سرقة أجهزة الموبيل منتشرة في السعودية برضوا بشكل كبير واللي مزودها إنك قليل لما تلاقي حد لسه شايل علبة زبادي - اللي هي العدد القديمة يعني - مع الإعتذار لإبن مصر ولإسو وكلاء شركة جُهينة كامبني ليمتد

- فمثلاً صاحبنا المدير العام من حوالي شهر لقيته بيتصل بي الساعة عشرة بالليل عشان أبعت فاكس لشركة الإتصالات يوقفوا الخط بتاعه ... ليه يا عم قالي إنه في الخبر وكان في السوبر ماركت مع الأولاد والشغالة فكان الواد إبنه الصغير بيشطح بعيد فراح معطي البوكيت بي سي بتاعه للشغالة وراح جري ورا الواد يمسكه ... صاحبتنا الفلبينية كانت بتجيب بقدونس وجرجير وحاجات من دي راحت نسيت الجهاز جنب البقدونس ... المهم خلصوا شرا ورجعوا البيت بيقول للمسكينة هاتي يا حاجة الجهاز ... قالت له جهاز إيه ؟.. ما راح في البقدونس ... أنا طبعاً ما سألتوش إنت عملت فيها إيه لإن الجهاز ثمنه 1000 دولار بالتمام والكمال .

- الأسبوع اللي فات راجع الشغل العصر لقيت واحد زميلنا سوري واقف قدام العمارة عمال يعيط .. إيه يابني قالي سيبت مكتبي حوالي 3 أو 4 دقايق رجعت مالقتش الموبيلين بتوعي ... واحد بتاع الشركة والتاني خاص به هو ... وصاحبنا اللي لطشهم راح قافل الأثنين وإضرب راسك في الحيط ...

وكثير وكثير من الحوادث المشابهة وبجد لحد دلوقت مالقتش حد عثر على جهاز موبيل وأتصل على صاحبه يسلمه له .. وكأن الضمير إنعدم .. اللهم إلا واحد سواق تاكسي باكستاني ... مدير شركتنا في مصر كان هنا ونسي اللاب توب بتاعه في تاكسي وخلص شغل وسافر مصر وأستعوض ربنا في الجهاز والداتا اللي عليه .. وبعد حوالي أسبوعين لقيت واحد بيتصل بي وبيقولي إنه سواق التاكسي وإنه لقى اللاب توب في الكرسي اللى ورا وكان بيفتش في الشنطة بتاعة الجهاز لقى الكارت بتاعي ، فاتصلت بالراجل في مصر أبشره فقال لي إديله اللي هو عايزة مكافأة له ولما اجي نتحاسب ... المهم تاني يوم الراجل جه الشركة وأقسم بالله أتحايل عليه إنه ياخد فلوس يمين شمال .... أبداً وكإني ضربته بالنار .....

يشاء السميع العليم نفس السواق ده يتصل بي بعد سنة أو اكثر ولقيته بيفكرني بنفسه فأفتكرته فقلت له إيه الخدمة اللي ممكن اعملها لك ؟... فقال لي إن في واحد سواق تاكسي صاحبه باكستاني برضوا لطش موبيل بتاع واحد ركب معاه وبالصدفة طلع مصري وجرجروا على القسم لإنه قفشه متلبس... فلو سمحت تيجي معانا القسم وتحنن قلب الراجل المصري ده عشان يسيبوا صاحبي ... فطبعاً إعتذرت له ...لإن دي كده فيها شهادة زور وهاروح أقول إيه .. إن صاحب الحرامي ده رجل أمين فعشان كده سيبوا الحرامي عشان خاطر عيونه ؟

[وليد صفوت]

فيلو ....

بص يا ابنى..

انت تعمل زى شيبوب فى فبلم عنتره وتتنكر وتروح ارض بنى زياد تنظر هناك.

وبعدين ترجع تانى..

وعلى رأى المثل الى الكل قالوه لك...

ابقى قابلنى....

طب ايه رأيك انى غيرت الشريحة .....و جبت واحدة جديدة ,.....و سجلت الserial number فى محضر فى القسم ,....و فى التوكيل كمان زى ما قاللى ماجد حبيبى ........ mfb:

و كلهم قالولى ....................

إبقى قابلنى :) :blink:

[مصرى]

فى حالة سرقة الموبايل .. الأفضل عدم الغاء الخط

مع ابلاغ الشرطة فورا وتحرير محضر بالواقعة .. والشرطة بدورها ستبلغ شركة المحمول .. وستترقب الشركة إجراء السارق لأى مكالمة من الهاتف

ومن خلال معرفة المتصل به .. واستجوابه سيتم تحديد شخصية السارق

كما يمكن تحديد المنطقة التى جرى منها الاتصال من خلال تحديد أقرب برج تقوية ارسال للهاتف المحمول

تكنولوجيا

[SnipeR]

و لو فيها غتاتة ممكن أعرف : هل صحيح أنى ممكن اروح فرع الشركة و هما يعرفولى مكان الشريحة بالتحديد فين ؟؟؟ لان كتير من صحابى قالولى كده ؟؟؟ فهل ده صح ؟؟؟

يافيولن كينج خد بقي من يالكلام السليم

انت تطلع علي شرطة النقل والمواصلات ومعاك علبه الجهاز وفاتورة الشراء اللي فيها ال imei

تبلغ بالسرقة واللي حصل ..

فنيا هم ليهم كونترول روم جوه موبينيل وكليك .. بيعمل سيرش علي رقم ال IMEI بتاع موبايلك ويحدد الخط اللي شغال عليه وبيانات صاحبة وموقعه كمان عن طريق ال GPS

عمليه تقنيه عبيطه نوعا ما كده وعلي فكره ده كان مقال كبير نزل في حوادث اخبار اليوم الاسبوع اللي فات او اللي قبله موش عارف مع مساعد الوزير لشرطة النقل والمواصلات

طبعا لاننا شعب ميعرفش اي حقوق ليه ولجل مانعلي ونعلي ونعلي لازم نطاطي نطاطي نطاطي منعرفش المعلومة دي.. h):

بس عشان تعمل بلاغ ويتحركو فيه لازم يكون معاك فاتورة الجهاز والعلبه كمستند ملكية

طبعا اغلب الاجهزة اللي بيقفشوها بيلاقوها شغاله مع ناس اشتروها م الحرامي وبردو الجهاز بيرجعلك

وانا متأكد من المعلومة دي لان لسه لي صديق عندو محلات في شارع عبد العزيز بطل يشتري اي جهاز مستعمل الا اذا كان معاه العلبه والكتالوج لان شرطة النقل والمواصلات جابته 3 مرات بسبب الاجهزة المسروقة ووصلوله بنفس الطريقه دي...

شفت الدنيا فيها امل ازاي h):

ابقي طمننا عملت ايه h):

[وليد صفوت]

يا سلاااااااااااااااااااام يا سنايبر أنت رجعتلى الامل من جديد فى عودة بوبو حبيب قلبى

أنا بإذن الله ححاول بكرة ( إذا فضيت بدرى من المذاكرة ) أنى اروح أعمل الحكاية دى .....

بس عندى سؤال أغتت من السؤال ده

ممكن أعرف فين شرطة النقل دى

شكراً كتير على النصيحة دى ...

تم تعديل 30 ديسمبر 2004 بواسطة Violinking

[ماجد]

عزيزى Violinking

اقترح عليك تجربة رقم 08008004800 وهو اتصال مجاني للإبلاغ عن أي حوادث أو مفقودات. وهو رقم تليفون مركز المفقودات لغاية ماحد يقولك على عنوان شرطة النقل و المواصلات اللى ضاع الموبايل فى دائرة نطاق عملها و لها طبعا فروع فى المترو لما تدخن سجاير بيودوك فيها h): و طبعا فى محطة مصر ( القطار )

[SnipeR]

اللي اعرفه ان ليهم مكتب كبير في محطة مصر الي ف ميدان رمسيس يافيولين وغالبا هو ده المكتب الرئيسي بتاعهم علي مااعتقد..