عندك بطاقة انتخابية؟

[se_ Elsyed]

لما يكون فيه إنتخابات يبقى أطلع بطاقة .. مش يكون عندنا حاجة خزعبلية إسمها إستفتاء إختار من بين الأقواس ( محمد حسني مبارك - حسني مبارك - مبارك ) يبقى إيه الفايدة ..

أما عن إنتخابات مجلس الشعب فلا فائدة منها هي الآخرى .. فكيف سيقف شخص مستقل أو من الاحزاب العيانة أمام غول الحزب الوطني اللي بيصرف من جيب صاحب المحل اللهم إلا في حالات قليلة بغرض وضع قليلاً من الكريم شانتية على الجثة المتحللة واللي إسمها ديمقراطية وحرية رأي وكلام الأفلام ده ...

أما لو كان عندنا إنتخابات بجد فالواحد لن يتوانى إنه يتحمل المشاق من اجل أن يختار الشخص الذي يمثله ..

[alnoobi]

السلام عليكم ..

أنا يا أخوانى و أخواتى عشت الغربه حتى سنة 1994 و بعد عودتى ومن دلائل انخراطى فى الحياه المصريه قمت باءستخراح بطاقه انتخابيه .. و للحق كانت الاجراءات فى غاية السهوله .. ذهبت الى القسم و سجلت اسمى فى القوائم و حددوا لى موعدا راجعتهم فيه و استلمت البطاقه ..

مرات استخدامى للبطاقه حملت خطا بيانيا يمثل انحدار شكل الممارسه فى السنوات التاليه حتى انتخابات مجلس الشعب الأخيره و الأسوأ و التى تمت تحت اشراف رجال القضاء وأحكى لكم على ماحدث معى يومها :

أخذت طريقى الى لجنتى الانتخابيه فى الصباح الباكر .. اللجنه فى أحدى المدارس .. تم اغلاق الشارع اللى فيه اللجنه بمتاريس و شوية عساكر و .. لف من الناحيه التانيه يا أستاذ !!

أنا و باقى الأساتذه اللى تصادف وجودهم لفينا من الناحيه التانيه .. لقينا ايه ؟؟ .. خير اللهم اجعله خير .. ظابط يقول لكرم جابر قوم و أنا أقعد مطرحك .. لم غطيان الكازوزه فى الشارع كلها و حطها على كتافه !!! و حواليه مجموعة عساكر على مخبرين على مسجلين خطر و سادين الشارع و الباشا عمال يزعق ( اللى معاه البطاقه الحمرا بس يعدى ) فأنا و بسلامة نيه أرفع البطاقه الحمرا يروح الباشا باصص الناحيه التانيه !! .. وكل فتره تيجى مجموعه و تعدى من الكردون المعمول و تدخل تنتخب و أنا عمال أرفع البطاقه و الباشا عمال يبص الناحيه التانيه .

المهم .. باب التسجيل مفتوح للى ماعندوش بطاقه انتخابيه و ذلك حتى 31 يناير .. رجاء للجميع .. سجلوا .. هى دى أول خطوه .. و رجاء آخر .. انصحوا كل من حولكم بالتسجيل ..مشوار صغير لقسم الشرطه الذى تتبعه .. و تحصل على بطاقة انتخاب .. حقنا و ما نفرطش فيه.. على الأقل علشان الباشا اياه لما يسألنا على البطاقه الحمرا نوريهاله و نروح و علشان هو كمان يعرف يبص الناحيه التانيه.. انشاء الله بكره أحسن من النهارده .

تم تعديل 9 يناير 2005 بواسطة alnoobi

[غريب الديار]

عندى بطاقتين واحده فى محل الميلاد و التانية فى محل الاقامة و كنت باصر على استخدامهم قلت بيهم لا لمبارك 8 مرات و محصلش حاجه والبطاقتين معايا و مش عارف ممكن انتخب فى السفاره و لا لأ عشان المرة الوحيده اللى قصدت فيها السفارة لحل مشكله قالولى انهم هنا بغرض التمثيل الدبلوماسى بس مش عشان يحلوا مشاكل الرعاع من الشعب !!. التغيير فى مصر يااختى لا يمكن يتم عن طريق صندوق الانتخابات لأن النظام عندنا مستقر من 7000 سنه و عايز كارثه او مصيبه تغيره ، بصى لشعار الحزب الوطنى ( استقرار - تنمية - تقدم - مش عارف ايه)

الاستقرار هو احد سمات الحكم فى مصر ( الاستقرار فى كرسى الحكم ) ، السلبيه الموجوده عند الشعب فى عدم استخراج بطاقات انتخابية او الذهاب الى لجان الانتخابات مع مايصاحبها من بهدله راجعه فى الاساس الى ان الشعب المصرى شعب ناصح و ذكى و عارف ان كل ده زى قلته و انها تمثيليه هابطه فعيب انه يشارك فيها

[عصام]

تم دمج الموضوعين لتطابقهما فى الإسم والمحتوى ..

الإدارة

إسو

[c'est la vie]

الاخ الفاضل اسو..

في موضوع هل لديك بطاقه انتخابيه في باب الموضوعات الجاده والذى تم ضمه لموضوع عندك بطاقه انتخابيه للفاضله جنة , كان هناك استفتاء وبه نتائج واحسب انها تمثل انعكاس قوى علي الموضوع , فهل اتجرأ وأطلب من حضرتك إضافة الاستفتاء ان كان يمكن ذلك ؟؟

شكراً لحضرتك.. http://www.egyptiantalks.org/invb/index.ph...ndpost&p=159601

[alnoobi]

عندى بطاقتين واحده فى محل الميلاد و التانية فى محل الاقامة و كنت باصر على استخدامهم قلت بيهم لا لمبارك 8 مرات

عم غريب .. ماتجرب تقول نعم المره دى !!

[amr2003]

سوف يظل الوضوع كما هو عليه ما لم نغير من طريقة تفكيرنا . .

كل شخص لم يستخرج بطاقة انتخابية أو استخرجها واشترك ، تسمح تقولوا لي كام واحد من الشعب عمل كده ؟!

10 % ؟!! 20 % ؟!!!

متهيقلي لو وصلنا ل 80 أو 70 % من الناخبين بدأوا يفكروا بإيجابية ويبطلوا السلبية والمبررات الواهية دية يبقى أكيد هنحصل على الحرية . .

أو على الأقل هنسرع من الوصول لها . .

لكن طول ما إحنا بنفكر بهذه السلبية ، والمبررات عشان بس مجرد نريح ضمائرنا ، يبقى أكيد مافيش حرية . .

أو على الأقل لن نحصل عليها قريبا

يا جماعة اعملوا حاجة بقى الله يكرمكم . . اعملوا حاجة وبطلوا التشائم دا . . اعملوا حاجة لبلدكم لوطنكم . .

أبويا طول اليوم عمال يتكلم عن الحرامية اللي ماسكين البلد ومخلين لقمة العيش صعبة . .

وأكيد كل المصريين بيتكلموا

أروح عند الحلاق ألاقيهم بيسبوا ويلعنوا . .

أروح عن جيراني ألاقيهم بيسبوا ويلعنوا . .

طب مع احترامي ليك يا أبويا ، إنتا عملت إيه لبلدك عشان تسب وتلعن ؟!

لا مؤاخذة إحنا شعب كلامنجي . . بنعرف نجلد الآخرين كويس أوي . . لكن لا ننظر لعيوبنا نحن . .

وسلمولي على الإيجابية . .

وسلمولي على أوكرانيا

وسلومولي على جورجيا . .

تم تعديل 16 يناير 2005 بواسطة amr2003

[amr2003]

أنا ورد لي خاطرة ثانية

لماذا يا جماعة الخير لا نفكر في الموضوع من منطلق آخر ؟!

لماذا لا نفكر في الموضوع على أنه واجب ديني ؟!

الله سبحانه وتعالى سوف يسألنا على الأخذ بالأسباب وليس عن النتائج . .

الله سبحانه سوف يسألك هل انتخبت أم لا ، ولن يسألك لماذا بقي مبارك في الحكم 30 عاما !!

يعني تخيل هذا !!! تخيل أنك تكرههم وتسبهم ، ولكن الله سيعتبرك مسئولا جزئيا عن استمرار وجودهم لأنك لم تأخذ بالأسباب !!

يارب الطف بنا

تم تعديل 16 يناير 2005 بواسطة amr2003