هل يفكر مبارك فى التنحى ؟؟؟ ولا ايه الحكاية

[achnaton]

نقلت وكالات الأنباء خبرا عن تصريح لوزير اعلام الريادة السابق ورئيس مجلس الشورى الحالى أن مجلس الشعب سيختار مرشحا لرئاسة الجمهورة فى مارس القادم ..

فهل نصدق هذا الكلام .. أم أن جيمى سيدخل مجلس الشعب ليرشح نفسه ..

اقرأ واتسلى .. وخبر سعيد مبارك http://news.bbc.co.uk/hi/arabic/middle_eas...000/4140637.stm

[Sherief AbdelWahab]

أقولهالك إزاي:

من ناحية ح يترشح ح يترشح ، وح يبقى استفتاء مش انتخابات..

كل سنة وقلبك بخير يا عمنا إخناتون..

خلص الكلام

[yasovinas]

التصريح كان كالاتي

مجلس الشعب سوف يختار مرشح الرئاسه في مارس/2005 قبل فض الدورة البرلمانية وسوف يتم الاستقتاء على المرشح في صيف 2005 وفي شهر اكتوبر سوف يجتمع البرلمان مرة واحده خلال الاجازة لكي يؤدي الرئيس حسني مبارك اليمين للتجديد الفترة القادمه

التصريح كان كده في شهر اكتوبر سيجتمع المجلس حيث يؤدي السيد الرئيس حسني مبارك اليمين الدستورية يعني لا فيها استفتاء ولا انتخابات والعمليه روتين

طبعا عمنا صفوت الشريف من الحرس القديم ومن جبهة المعارضه ضد جيمي فهو قال التصريح بهذه الطريقه التي تبدو عبيطه كرساله للجميع ان الريس باقي وجمال مش هيشوفها على الاقل اليومين دول

[alnoobi]

السلام عليكم ..

ياجماعه أنا قلتها قبل كده الانتخاب زى جوازة الراجل :

تاخد فلانه و للا علانه ؟ ... طب ايه رأيك فى ترتانه ؟

الاستفتاء بقى زى جوازة البنت :

فلان طلب ايدك .. قلتى ايه ؟

و زى مانتوا عارفين ماعندناش بنات تقول لأ .. !!

و احنا شعب نصه بنات و النص التانى عيال مالوش دعوه بالجواز !

[عصام]

السلام عليكم ..

ياجماعه أنا قلتها قبل كده الانتخاب زى جوازة الراجل :

تاخد فلانه و للا علانه ؟ ... طب ايه رأيك فى ترتانه ؟

الاستفتاء بقى زى جوازة البنت :

فلان طلب ايدك .. قلتى ايه ؟

و زى مانتوا عارفين ماعندناش بنات تقول لأ .. !!

:rolleyes: rs: :)

والله تشبيه فى منتهى البلاغة .. ويعبر تماما عن الوضع ..

[se_ Elsyed]

, احنا شعب نصه بنات و النص التانى عيال مالوش دعوه بالجواز !

وأنا اعترض على الجملة دي تماماً ..

أولاً : لأن مصر بها من الرجال الكثيرين القادرين على تحمُل المئولية وتظهر معادنهم ساعة الشدائد ... ده مش كلام إنشاء ..

وإلا ما كانتش هاتقوم لنا قومة بعد عدة إنتكاسات تعرضنا إليها في 48 و52 ( ثورة الكاكي ) و56 و67 .. فمن كان يصدق بإننا سنخوض حرب 73 ونمرمغ راس إسرائيل ( ومن وراءها أمريكا ) في الوحل ..

وثانياً : مش عيب إن أي شعب يتعرض لإنتكاسات طارئة وبالتالي تطغي فيه ثُلة فاسدة وتطفو على الوجه وتحجُب كل ما هو جميل .

ثالثاً : الظلم هو الإستثناء والعدل هو القاعدة ولكن لابد من رجال أقوياء يقومون بتحقيقه .

[إبن مصر]

احسنت يا سى السيد واعجبنى اكثر لغه اعتراضك ....

[alnoobi]

وأنا اعترض على الجملة دي تماماً ..

وإلا ما كانتش هاتقوم لنا قومة بعد عدة إنتكاسات تعرضنا إليها في 48 و52 ( ثورة الكاكي ) و56 و67 .. فمن كان يصدق بإننا سنخوض حرب 73 ونمرمغ راس إسرائيل ( ومن وراءها أمريكا ) في الوحل ..

السلام عليكم ..

الأخ الكريم سى السيد .. تحيه طيبه

قبل كل حاجه .. سى السيد مايعترضش .. سى السيد يشخط و يزعق و أمينه تسمع الكلام .

و هنا المشكله الأبديه .. سى السيد .. الفرعون .. الزعيم الملهم .

سى السيد على رأس الدوله .. سى السيد على رأس الوزاره .. سى السيد على رأس المصلحه أو الهيئه ..

لا وجود للمعترضين و لا وجود للرأى الآخر .

و تتحدثون عن التنحى !!!!

بلاش الريس .. حد يعرف وزير مشى من نفسه لأى سبب ؟

وزير الأعلام الكويتى استقال من أيام خوفا من استجواب كان سيقدم ضده فى مجلس الأمه الكويتى .. الكويتى مش السويدى .

و سى السيد بيقول .. و الا ماكانتش هاتقوم لنا قومه .

هو احنا قامت لنا قومه يا سى السيد ؟

تم تعديل 5 يناير 2005 بواسطة alnoobi

[غريب الديار]

السلام عليكم و رحمة الله و بركاته

أولا ارجو قبولى كضعو جديد بينكم

ثانيا شوفوا يااولادى و انا باقول يااولادى مش أسوة بالزعيم المؤمن و لكن لأنى متأكد انى اكبركم سنا و على الرغم من انى مش عايش فى مصر من زمان و مبشوفهاش غير فى الزيارات بس اللى اقدر اقوله لكم ان الوضع السياسى فى مصر تردى الى مرحلة لم يصل اليها من قبل وده انعكس على الاوضاع الاجتماعية و الاقتصادية وحتى على اخلاقيات الناس.

و من نظرتى لمصر فى الخارج انا شايف ان نظام مبارك بيتحرك لاول مره من ربع قرن بخوف وحذر شديد نتيجة لوجود متغيرات كتير فى الساحة الدولية و المحلية .

من ناحية عاوز يكسب رضا امريكا و تأييدها للتوريث أو على الأقل للتجديد و فى هذا السبيل لايوجد لديه اى مانع فى بيع مصر ارض و شعب و تراث و حضارة لأعدائها و ده حال اى ديكتاتور يحكم بدون قاعدة شعبية تسانده و انما يعتمد على مساندة جهات خارجية.

و من الناحية التانية يخشى من الشعب الذى يعيش فى اسوأ فتراته على مر 7000 سنه اقتصاديا ، يخشى الافراط فى تملق الخارج على حساب ثوابت هذا الشعب فى ظل هذه الظروف الاقتصادية ، ان نظام مبارك يدرك انه لو طفح الكيل بالشعب المصرى فلن تستطيع اى قوه ايقافه.

ان محاولة التجديد لمبارك هى بمثابة تأكيد لحالة اليأس لدى الشباب المصرى ، اليأس من وجود اى مستقبل لهذا الشعب او لهذه البلد.

علينا ان نتعلم من اوكرانيا و من جورجيا ، فليتجمع كل من يريد ان يقول لا أو "كفاية" فى مكان واحد " ميدان التحرير مثلا " بدون عنف و بدون شغب فقط تتحد الايدى و تتوحد الكلمة لا لمبارك "كفــــــــــــــاية"

[alnoobi]

السلام عليكم ..

السيد الكريم غريب للدار

أولا : نورت المنتدى ..

ثانيا : تبقى أكبرنا سنا لو عديت الخمسين .. أخوك النوبى خمسين سنه فى أكتوبر انشاءالله .. وشايل هم الخمسين شمعه ح أطفيهم ازاى !! مابقاش فيه حيل ولا نفس .

ثالثا : ربنا يرد غربتك بالسلامه .

رابعا و خامسا و سادسا و سابعا ... الخ : احنا زهقنا .. مش باين لها نهار .. حتى شوية المظاهرات اللى حصلت كانوا العسكر بيسبقوا بالتواجد و بأعداد ما قولكشى - زى مايكون الأهلى بيلاعب الحوامديه فى الاستاد - احنا كنا جمهور الحوامديه !!

تم تعديل 6 يناير 2005 بواسطة alnoobi

[أسد]

أوافق النوبي جزئياً .. زسي السيد جزئياً أيضاً ...

فلا نحن شعب مدجن قد تم ترويضة بالكلية ..

ولا نحن شعب المغاوير والثوار ...

الشعب المصري شعب مشغول بلقمة عيشه ..

شعب ورث الخوف من الإعتراض على الحاكم .. وهذا منذ زمن بعيد ...

ولكننا شعب حر بدون شك ...

لم يكن في ميراثنا الثورة على الحاكم...

ولكن كان في ميراثنا الكثير والكثير من القيم المحترمة والعظيمة ... وللأسف بدأنا نفقد الكثير منها ..

نتيجة لضغوط كثيرة من الظلم والإستبداد والفقر ...

لو عادت تلك القيم ...

لما كان هناك فرصة لكل هؤلاء الفاسدون لأن يصعدوا ....

هؤلاء الناس في سلطة الحكم في مصر ..

تربعوا على مقاعدهم مدعومين بالفساد والفاسدين ...

ونحن إن لم نعطي فرصة للفساد والفاسدين ... لما وجدوا من يدعمهم ....

فلن تكون فرصة لنفعل كما فعل الأوكران ... جنود الحاكم أسرع وأقوى ..

وعصاهم أغلظ وأكثر ألماً ....

وفي رأيي ... وبهدوء شديد ...

الطريقة المثل .. هي أن كل منا يتوقف عن أي فعل يدعم الفساد والفاسدون .. وبهذا لن يجد هؤلاء الغذاء الذي يحييهم ...

والطريقة الممكنة الآن ..

هي أن يتنحى مبارك ..

فرفقاً بنا نحن شعب مصر ...

نوجه له نداء ...

أن يتنحى ...

[وليد صفوت]

أوافق النوبي جزئياً .. سي السيد جزئياً أيضاً ...

فلا نحن شعب مدجن قد تم ترويضة بالكلية ..

ولا نحن شعب المغاوير والثوار ...

الشعب المصري شعب مشغول بلقمة عيشه ..

شعب ورث الخوف من الإعتراض على الحاكم .. وهذا منذ زمن بعيد ...

ولكننا شعب حر بدون شك ...

لم يكن في ميراثنا الثورة على الحاكم...

ولكن كان في ميراثنا الكثير والكثير من القيم المحترمة والعظيمة ... وللأسف بدأنا نفقد الكثير منها ..

نتيجة لضغوط كثيرة من الظلم والإستبداد والفقر ...

لو عادت تلك القيم ...

لما كان هناك فرصة لكل هؤلاء الفاسدون لأن يصعدوا ....

هؤلاء الناس في سلطة الحكم في مصر ..

تربعوا على مقاعدهم مدعومين بالفساد والفاسدين ...

ونحن إن لم نعطي فرصة للفساد والفاسدين ... لما وجدوا من يدعمهم ....

فلن تكون فرصة لنفعل كما فعل الأوكران ... جنود الحاكم أسرع وأقوى ..

وعصاهم أغلظ وأكثر ألماً ....

وفي رأيي ... وبهدوء شديد ...

الطريقة المثل .. هي أن كل منا يتوقف عن أي فعل يدعم الفساد والفاسدون .. وبهذا لن يجد هؤلاء الغذاء الذي يحييهم ...

والطريقة الممكنة الآن ..

هي أن يتنحى مبارك ..

فرفقاً بنا نحن شعب مصر ...

نوجه له نداء ...

أن يتنحى ...

صحيح هذا الكلام ,......

و انا أضيف بأن المصرى يخاف حتى من قطع مساعدته لهذا الفساد , و اكاد اقسم بالله ان كل موظفين الشركات يعلمون تماماً مخالفات و تجاوزات مديريهم ( من الفاسدين ) و لا يجرؤن على مواجهته ,....و قد تأكدت من هذا من أكثر من صديق فى اكثر من موقع عمل .......

الكل يخاف من المواجهة .... حيث انه سيقف ساعتها وحده فى مواجهة الفساد ( متمثلاً فى مديره ) ,.... فالكل سيخاف من تلك اللحظة ,.....ربما أكثر من خوفه من العقاب نفسه !!!

و عليه فإننا سنظل تحت وطأة الفساد و ستنبت لدينا عقدة الدونية عندما ننظر الى مجتمعات مثل مجتمعات الخليج التى نمت و ازدهرت بينما نحن نسقط و نتراجع فكرياً و حضارياً ,..... ويتولد لدينا احساس بالحقد على تلك المجتمعات ( و هذا واضح جداً ) و نحاول ان نذكر انفسنا يوماً بعد يوم بأننا كنا ذات يوم أكثر الامم تحضراً ( منذ 7000 سنة ) و كل يوم نذكر انفسنا بأننا شعب الحضارة ,.... بأننا الفراعنة ,......

بينما نحن نسقط ,....

و نسقط ,....

و نسقط ,....

تحياتى ,...

[غريب الديار]

الاخ نوبى كل سنة و انت طيب و مشكلة الخمسين شمعة ممكن تتغلب عليها بطرق عدة ، فقد سبق لى التغلب عليها .

فى رأيي ان التضييق على الشعب اقتصاديا لجعله مشغول بالجرى وراء لقمة العيش هى نتيجة سياسة مدبرة لالهاء الشعب عن التفكير فى المصائب التى تجرى فى هذه البلد، بالاضافة الى سياسة التنفيس و هى ترك تيارات المعارضة تتكلم بحرية نوعية للتعبير عما يجيش فى صدر الشعب مع وجود خطوط حمراء طبعا

ان الشعب المصرى ينقسم اليوم الى اغلبية تلهث وراء قوت اليوم و اقلية تحاول المحافظة على مكاسبها التى نالتها بسبب عهد الثورة و ماتلاه و فى الوسط فئة تزداد قلة كل يوم تتفرج بحسرة على ما يجرى و تحاول فهمه دون القيام باى محاولة لتغييره و على هذه الفئة يقع عبء التغيير و تحريك الشعب للقيام بواجبه تجاه بلده

الاخ نوبى على الرغم من انى اهلاوى قديم بس اظن انى هبدأ اشجع الحواميدية

[أسد]

فى رأيي ان التضييق على الشعب اقتصاديا لجعله مشغول بالجرى وراء لقمة العيش هى نتيجة سياسة مدبرة لالهاء الشعب عن التفكير فى المصائب التى تجرى فى هذه البلد، بالاضافة الى سياسة التنفيس و هى ترك تيارات المعارضة تتكلم بحرية نوعية للتعبير عما يجيش فى صدر الشعب مع وجود خطوط حمراء طبعا

ان الشعب المصرى ينقسم اليوم الى اغلبية تلهث وراء قوت اليوم و اقلية تحاول المحافظة على مكاسبها التى نالتها بسبب عهد الثورة و ماتلاه و فى الوسط فئة تزداد قلة كل يوم تتفرج بحسرة على ما يجرى و تحاول فهمه دون القيام باى محاولة لتغييره و على هذه الفئة يقع عبء التغيير و تحريك الشعب للقيام بواجبه تجاه بلده

منذ أكثر من عشرون عاماً ... ونحن طلاب في الجامعة ...

كنا نقول هذا الكلام ...

ولا أعني أن هذا كلام طلاب ..

بل ما أعنيه .. أن هذه حقيقة قديمة ... أما الذي جد عن ذلك .. والإضافة التي أضافها عهد مبارك ...

هي الفساد الضخم .. فالفساد بطبيعة الحال كان موجود من قبل ذلك .. أما الفساد الضخم .. والذي أصبح مستشري الآن هو الجديد والإضافة التي أضافها مبارك لمصر ..

فعلى المستوى الإقتصادي والنهضة لمصر والمصريين .. فالجميع (من ناصر إلى مبارك) كل قدم لمصر والمصريين الحد الأدنى ... وكل دعانا نحن المصريين بالتعاون معه لكي يقدم لنا أقل القليل ... (بدءاً من ربط الحزام .. إلى التوقف عن الخلفة وكفاية عيال .. وأجيبلكوا منين .. إنتوا كتير ..)

والفساد يأكل ويتغذى من قوت المصريين وصحتهم ومستقبلهم ...

[مهيب]

ردا على الأخ أسد ..

اننى حقا لا أتذكر أنى درست فترة من تاريخ مصر لم يستشرى فيها الفساد ... وأقصد التاريخ الحديث طبعا .. حتى لا يحدثنى أحد عن مصر الاسلامية أو مصر محمد على .. فمنذ عصر الاحتلال الانجليزى مرورا بمصر الخديوية ثم مصر السلطنة و مصر المملكة .. حتى مصر الاشتراكية ... كان الفساد باقيا ...

أحيانا يخيل لى أن الفساد الادارى و السياسى هو أحد دعائم ذلك البلد ... يعنى .. زى النيل و الاهرامات و تمثال الكاتب الجالس القرفصاء ...

وبعدين الغريب فى الموضوع ان لسه الناس عندها أمل تتخلص من الفساد ده ... والله أنا خايف ليكون الفساد ده هو اللى مخللى مصر باقية لحد دلوقتى ... أصلها حاجة غريبة ... يعنى مثلا خدوا ثورة الكاكى (على رأى سى السيد) مثال ...

لما قامت الثورة أو الانقلاب .. كان أهدافهم ايه ... تطهير الجيش و التخلص من الاقطاع و مش عارف ايه و الهجص ده .... والعيال الشباب بتوع الثورة كانوا محروقين قوى من اللى حصلهم فى حرب 48 و فساد الجيش و بتاع ... طب شوف ايه اللى عملته الثورة بعدها ...

فساد حكم ... حدث ولا حرج ... ده كان فى حاجات عملوها يبان جنبها الملك فاروق و كأنه صلاح الدين الأيوبى ... على الأقل أيام الملك كنت تلاقى واحد صحفى متهم بالعيب فى الذات الملكية ... و لسه برة السجن و لسه بيكتب ... لكن أيام الكاكى .. كان فى حد يقدر يفتح بقه ؟؟ يا نهار أسود ... أيام الانجليز كان الشعب صاحى و موظف الحكومة بيشوف شغله .. لكن بعد البهوات اياهم .. طلعت مصطلحات زى ربى ولادك .. ياعم كل عيش ... أنا ماشى جنب الحيط ... ورا الشمس ... حاجات من دى ...

قالوا حرب 48 .. دى حرب 48 تعتبر انتصار بالنسبة للى حصلنا فى 67 ... طب ادى لا بقى فى أسلحة فاسدة و لا ملك ولا حاجة ... عملوا ايه ... أسوأ هزيمة لجيش فى تاريخ الحروب الحديثة .... ومحدش يكلمنى عن 73 .. لأن حرب 73 دى هى حرب مصر .. حرب المصريين ... مش حرب للثورة .. حرب للفلاح المصرى .. وللعقلية المصرية .... وللدبلوماسية و التخطيط .... حرب لشعب و قيادة مش حرب للثورة ....

قالوا هنقضى على الاقطاع و الفساد .. وآه على اللى كان بيعمله الاقطاعيين الجدد بعد كده ....

خلاصة القول ... أنا مش عارف احنا متضايقين ليه من الفساد .... ماحنا طول عمرنا عايشين فيه ... بيتهيألى لو الفساد طلع من مصر ... مصر هتفقد بريقها و طعمها ... يعنى بذمتكم ... و أنا راضى ذمتكم ... متخيلين مثلا واحد عادى كده من الشعب يطلع و يعرفنا هو ناوى ايه لما يحكم ... و معاه كذا منافس ... و الشعب بقى عمال يقارن ... ويقعدوا على القهاوى بالليل يتكلموا .. واللى يقولك أنا هارشح فلان ... واللى يخالفه فى الرأى ..

أو مثلا متخيلين تحصل حادثة لاقدر الله .. فقوم ايه (على رأى سليمان غانم) ييجى السيد الوزير و يقدم استقالته قدام مجلس الشعب كده وش ...

متخيلين ده يحصل فى مصر ... الغريبة يا أخى ... ان مصر دى عجيبة قوى ... بنحبها مووووت رغم كل عيوبها ... لكن أنا عن نفسى مش لاقى أحسن منها بلد ... بجد .... سافرت و سافروا أصحابى .... لكن دايما تفضل مصر ... بكل ما فيها و من فيها ....

[Sherief AbdelWahab]

أعتقد أن نقل المؤتمر "الشعبي" لمبارك في أسوان وهو حدث لا يتكرر كثيرا على شاشة التليفزيون قد حسم تماماً الجدل حول أكذوبة وجود رئيس جديد لمصر..واللي مش مصدقني يجيب المساء النهاردة..بس ياخد حبايتن دوا الضغط الأول..وأنا غير مسئول بالمرة عن التوابع!

خلص الكلام

[theblackpirate2005]

مباربك هيتنحى بعد الولايه العاشره وده رغم توسلات الشعب المصرى ليه بالاستمرار

والبكى اللى ناس هيتعيط بيه عليه عشان العشره متهونش الا على ولاد الحرام واحنا شعب اصيل rs:

تم تعديل 10 يناير 2005 بواسطة theblackpirate2005

[mb14]

يا جماعه الراجل مش حايتنحى عشان مصلحة البلد

ومصلحة الشعب .

فى الشغل عندنا ناس حاتطلع معاش يعنى خلاص بقى وماشى بس كل شويه يسأل طاب وحتعملوا ايه من غيرى فى كذا وكذا مع انه خلاص وكان مستريح وبعيد عن الشغل بس عندهم احساس انى الشغل مش حايمشى من غيرهم(مش عيب فيهم ولا حاجه بس دى لآن قضى حياته فى المكان دى).

ما بالكم بقى بالريس وانتوا شايفين المنافقين فى كل مكان وكل حته يروحها مش ساييبين له فرصه ياخد نفسه من النفاق .

الجرايد... التليفزيون ...المستشارين ...الوزراء...

لو انا مكانه حصدق وحأقبل عشان ايه ...مصلحة هذا الشعب

[ali]

مبارك يرحب بمنافسيه على منصب الرئاسة

قال مبارك لدى سؤاله عن إعلان ثلاثة مثقفين مصريين ترشيح أنفسهم لمنافسته على منصب الرئاسة إن ذلك مؤشر على الديمقراطية وإنه يرحب بها.

قال مبارك إن منصب الرئيس يحرم شاغله من حياته الخاصة تماما فمن أجل الأمن الذي يحاط به الرؤساء لا يمكن الخروج بحرية إلى أي مكان و"رئيس مصر بمثابة معتقل".

ويقول الحزب الوطني الديمقراطي الحاكم الذي يرأسه مبارك الذي يتمتع بأغلبية ساحقة في المجلس إن تعديل الدستور ممكن بعد الاستفتاء القادم

[se_ Elsyed]

لو انا مكانه حصدق وحأقبل عشان ايه ...مصلحة هذا الشعب

لأ أسمح لي يا MB14 ... لقد تعودنا نحن الشعب المصري دائماً على إظهار رؤسائنا بمظهر الشهداء المغيبين عن الوعي واللي كل المصايب بتحصل من وراهم .. بداية من عصر عبد الناصر اللي الناس كانت بتمصمص شفايفها وبتقول إن اللي بيعملوا شمس بدران وعبد الحكيم عامر وصلاح نصر وبرتيته الفساد بتوع فيلل ترعة المريوطية .. كل ده بيحصل من ورا عبد الناصر يا عيني وغن عبد الناصر أية في الطُهر والنقاء وهما اللي خلابيص...

نفس الشيء برضوا عايزين تفهمونا إن الوزرا والإعلام وسمير رجب بينافقوا الريس فهو بيصدق إن البلد محتاج له فبيرشح نفسه ؟

يا عزيزي الرئيس مبارك في منتهى الذكاء وبياكل الحاجات دي بمزاجه وبيجدد ومتبت في الكرسي عشان مصلحته هو ..

لإنه لا يتخيل نفسه رئيس على المعاش أو حائز على لقب " رئيس سابق " وبالتالي يصبح عُرضه للمسائلة سواء من الشعب او من التاريخ .. وبالتالي أيضاً ممكن يحدث ما لا يحمد عقباه ويلاقي نفسه هو وولاده زي بينوشيه بتاع شيلي أو نواز شريف بتاع باكستان واللي دلوقت لاجيء سياسي في السعودية .. وغيرهم وغيرهم ..

وبالتالي أيضاً فهو يُفضل القتال حتى أخر نفس ويُفضل الموت على الكرسي بدل قلة الكرامة والبهدلة...

اللعبة مكشوفة وواضحة وده كرسي رئاسة مش كرسي دُخان الواحد يفرط فيه بالساهل ...