خطة إستفتاء اكتوبر - ما بين الرفض والقبول

[se_ Elsyed]

صحيح يا ولاد من شابه أباه فما ظلم ...

تصريحات السيد رئيس لجنة السياسات الاخيرة تؤكد على أنه يسير على نفس نهج والده الرئيس الاكبر والقائد محمد حسني مبارك :

الاهرام 13/1/2005م

جمال مبارك‏:‏ الترشيح لرئاسة الجمهورية قرار الرئيس

احترام إرادة الناخب في الاستفتاء والانتخابات

أعلن السيد جمال مبارك‏,‏ أمين لجنة السياسات بالحزب الوطني‏,‏ في لقائه مع أبناء شباب الحزب بالمحافظات ـ أن بدء الترشيح لرئاسة الجمهورية يتم وفقا لإجراءات وتوقيتات يحددها الدستور والقانون‏,‏ وأن قرار الترشيح هو قرار الرئيس‏,‏ وأن الحملة الانتخابية الرئاسية تبدأ بقرار صاحب الشأن بالترشيح‏,‏ ثم يبدأ التحرك الحزبي عقب إعلان القرار‏.‏

وأكد أن الحزب لم يبدأ بعد إجراءات ترشيح الرئيس‏,‏ وقال‏:‏ إن الحزب الوطني ملتزم بالفكر الجديد في إدارة الحملة الانتخابية للرئاسة والبرلمان‏,‏ وأن الناخب هو الذي سيحسم نتائج استفتاء الرئاسة‏,‏ وانتخابات البرلمان‏,‏ ويجب احترام إرادة الناخب في هذا الشأن‏,‏ وأي حديث غير ذلك هو تعد علي حق الناخب‏.‏

تعدِ على حق الناخب ... يعني إيه ناخب يا استاذ جمال لو سمحت ؟

يا عم جيمي إنت بتكلم عدم اللامؤخذه كوركات ولا هنود زي السيد الوالد اللي بيقول الملعب .. قصدي صناديق الإنتخابات هي اللي بيني وبين الخمس مرشحين .... وهو في إنتخابات من أساسه ؟ المفروض ما تقولش الناخب ولكن تسموه المُستفتي ، الـــ...... ولا بلاش دي عشان عيب فإحنا لسه بني آدمين برضوا ، تسموه المُساق ... جايه من السواقه حيث إن اللي ماتعرفوش سيادتك - وطبعاً تعرفه بس أنا بأستبهل - إن الناخبين بيُساقوا زي المعيز ويُشحن غالبيتهم في اتوبيسات الشركات والهيئات والمؤسسات الحكومية والقطاع العام وبيروحوا عشان هدف واحد فقط وهو إنهم يقولوا نعم لمبارك اللي ما فيش غيره .. ومن تثبُت عليه إنه قال غير كده يبقى يا ويله ويا سواد ليله .

يا اخي تعالى نفترض فرض جدلي من باب السفسطة البيزنطية ... إفرض مثلاً .... مثلاً يعني ... إن الشعب المصري بعد ما أكل لحمة العيد الأثيوبية اللي من غير دهن .. فاق وصحي من سباته العظيم اللي بقى له فيه أكثر من 50 عاماً من بعد الثورة المشؤمه .. وقرر الشعب بجميع أفراده - ماعدا بتوع الحزب الوطني الفاشي طبعاً - إنهم يقولوا بالفُم المليان لأ لمبارك .. وطلعت النتيجية 99.9 % كلهم بيقولوا لأ لمبارك وحرام على اهاليكم وحلوا عننا بقى وخدوا معاكم اللي إنتوا نهبتوه طوال 23 سنة وإحنا هانبدأ من الصفر وهانبني بلدنا بإيدنا ....

هاتعملوا إيه يا أستاذ جمال ؟ هاتحترموا إرادة الناخب برضوا وتسافروا تشتغلوا بره في السعودية والكويت .. ولا هاتسقوا لنا الرئيس بالمعلقة وتفرضوه علينا غصبٍ عن اهالينا زي كل مره ؟

أقولك أنا يا بتاع إحترام إرادة البيه الناخب .... طبعاً مجلس الأُنس هايعيد إنتخابه تاني وسيتم سحل جميع من قال " لا " وتكريم من قال نعم وخصوصاً آما نعيمه اللي قالت نعمين ...

صلي على الرسول يا جيمي وأعملوا اللي إنتوا عايزينه من سُكات بلا لجان إنتخابية بلا مؤتمرات ولا سفريات لأسوان وبدل سفر وشحططه إلا لو كنتوا روحتوا عشان تشتوا هناك يا لؤمه ...

البلد بلدكم والمال مالكم وإحنا ضيوف عليكم .. ومن حكم في ماله فما ظلم .

[Shams100]

والله هذا حرام ربنا موجود وان شاء الله النهايه قريبه لكل فرعون منافق ظالم

[Shams100]