جمال مبارك رئيس .. احنا زعلانين ليه ؟

[الطاحونة الفكرية]

منذ قيام ثورة 52 و تولي الرئيس جمال عبد الناصر الحكم و من بعده السادات و من بعده حسني مبارك و السياسة الداخلية نمط واحد لا يتغير و انما يتطور الى الأفضل .

و انا أرى ان مبارك امتدادا للسادات و أمتدادا لما كان يريد ان يفعله السادات

لذلك لكي نستمر في التطور للأمام لابد ان يكون الرئيس القادم هو :- (( جمال مبارك ))

ليه ؟

لأن الولد درس سياسة كويس و اتعلم من ابوه

و لانه هيتخذ نفس نهجه و لكن مع نوع من التطوير نظرا لأنه من جيل آخر اكثر تفتحا و تطورا .

لذلك فانا من متفائل و أول من سينتخب جمال رئيسا للجمهورية

حد عنده اعتراض ؟؟؟

vmp:

تم تعديل 9 يناير 2005 بواسطة esssothegreat

[Salwa]

ماشى ..

محدش عنده اى اعتراض ....

وهو فعلا تم ...طبخه....فى مطبخ الرئاسة ..

وانا ايضا سأنتخب جمال مبارك ............لو..

بدأ حكمه بمحاسبة كل المسئولين عن خراب مصر...

اقالة كل الوزراء الغير اكفاء ومحاسبتهم ومحاكماتهم ....

ومحاسبة وزراء سابقين لم يحاسبهم احد ...

احضار كل الاموال المهربة للخارج عن طريق الحبايب وحبايب الحبايب ...

قانون من اين لك هذا يسرى على الجميع .......واولهم ....عن نفسه وعن القريب والغريب ..

الغاء حسابات بنوك سويسرا ....وانعاش البلد اقتصاديا بالملايين المكدسة فى البنوك ....وليست مجهولة المصدر ...

هو شبع.....

صح ؟؟....

اين حسن النية ؟؟؟؟؟؟

.طيب واللى فات ....

اعتقد عمره ما مات ........

نبدأ صفحة جديدة ............زى ايام عصر الفروسية ..

بلاش نقول استفتاء ...خليه مبارزة ....

هو ...قصاد اربعة او خمسة برضه شباب زى الورد من شباب مصر ومثقين وواعيين ....

والبقاء للأنظف............

ده مجرد رأى على السريع ......

[الطاحونة الفكرية]

لا طبعا يا اخت سلوى مش هيبتدي باللي انتي بتقولي عليه دة

أنتي عايزة الدنيا تتقلب عليه و العملية تبوظ ؟؟؟

واحدة واحدة و كله هيبقى تمام

مشكلة الشعب المصري انه شعب ثوري ثائر من يومه :D

[مصرى]

خربانة من بيت النار

:D

[غريب الديار]

اتفق مع الطاحونة الفكرية فى انه لو آل الحكم الى جمال مبارك لايمكن أن يبدأ عهده بهذا الشكل لانه ببساطة امتداد لعهود الفساد السابقة و احد المشاركين و المبتكرين لاساليب الفساد الجديدة و اختلف معه فى ان الشعب المصرى شعب ثوري فعلى العكس تماما الشعب المصرى شعب مسالم و حمال أسية الى اقصى الدرجات فعدد الثورات التى قام بها طوال 7000 سنه لا يعد على اصابع اليد الواحده مع انه صاحب الرقم القياسي فى التعرض لاطول و ابشع حقب الفساد و الظلم فى العالم و بو رجعت للتاريخ او حتى للتراث الشعبى و الامثالو الكلام المتواتر على السنة البشر لوجدتنا ابعد الناس عن الثورة على سبيل المثال لا الحصر " ابعد عن الشر و غنى له - الباب اللى يجيلك منه الريح - و انا مالى ياعم - هو انا قد الحكومة " حتى فى التربية الكلاسيكية الشعبية الام بتخوف طفلها بالعسكرى ، و لكن احب الفت النظر ان الشعوب قليلة الثورات عندما تأتى بثورات فانها تكون عنيفة جدا مثل الثورة البلشفية و الثورة الفرنسية و ثورة رومانيا ، ندعو الله تجنيب مصر مثل هذه الثورات .

الخلاصة احنا شعب طيب جدا و بننسى بسرعه و لاتوجد لدينا تيارات سياسية شعبيه مترابطة او واضحه.

و على فكرة انا مش خايف من اللى يجيى بعد مبارك غير من اللى افسدوا مبارك و من قبله من الحكام ففى مصر شلة صحفيين استاذة فى صناعة الجبابرة و هذه مهنه متوارثه من ايام فرعون عندما يتقلد حاكم الحكم تبدأ شلة الهجاصين فى اقناعه بانه هو مبعوث العناية الالهية لانقاذ البلد و انه هو الزعيم الملهم و المفكر القائد و العالم الفذ و راعى الفنون و العلوم و المصيبة انه بيصدق

[alnoobi]

لذلك فانا من متفائل و أول من سينتخب جمال رئيسا للجمهورية

حد عنده اعتراض ؟؟؟

اعتراض .. يعنى ايه اعتراض ؟؟

يا جماعه ده شعب فريد من نوعه .. حد يعرف شعب تانى غيرنا حكمه عبيده .. مماليكه ؟!

حتى لما جاتنا الفرصه لحكم نفسنا مع بدايات القرن 19 بعد خروج الحمله الفرنسيه .. اتلم كبارات البلد و نصبوا ظابط ألبانى واليا على البلاد !!

طب ليه بقى الهوسه اللى احنا عاملينها دى ؟

مش بعيد لو جت لنا الفرصه تانى نجيب لنا المره دى ريس من الصين أو تايوان .. أرخص و متقفلين صح و بنضافه !!