كيف تتصرف في مثل تلك المواقف المحرجة ؟

[se_ Elsyed]

مع إن المواضيع دي ماركة مسجلة بإسم شعنونة إلا إني هاشمح بنفسي اخد التوكيل مؤقتاً لحد ما ترجع من المصيف ...

الأسبوع اللي فات إبن صاحب الشركة وهو مهندس معانا في الشركة إتصل يطلب حجز لأحد الفلبينيين .. فسألته : مين ده والتكاليف هاتتحمل على أي إدارة ؟ فقال لي إن ده السواق بتاعه وإن الرجل اعلن إسلامه قريب هو والشغالة الفلبينية وكمان تزوجوا النهاردة الصبح .. فمش معقول يقضوا شهر العسل وسط الناس والدوشة اللي في البيت .. فعشان كده هاعمل لهم الحجز ده مجاملة .. فقلت له جزاك الله خير .. وبالفعل بلغنا الفندق .. والراجل راح جاب العروسة من عند الحلاق وراحوا على الفندق ولقيت مدير الفندق بيتصل بي ورافض إنهم ينزلوا عنده - مع إننا عملاء للفندق والحيط في الحيط وهو أساساً صديقي .. ليه يا عم الحاج ؟ فقال لي إنهم معهمش قسيمة الزواج ... فقولت له طب هات اكلم العريس ،فقالي قسيمة إيه ؟ ده احنا لسة متجوزين النهاردة ولسه جاي انا والعروسة والموضوع ده بياخد له على الأقل إسبوع .. فقلت له إديني المدير : يا عم يهديك يرضيك ده انت بوظت اعصاب العريس وضربت كرسي في الكلوب في وش العروسة ... أبداً نوووو واي ... طب أبعت لك تعهد من الشركة بإن إحنا ضامنينهم وماتخافش مش هايعملوا شقاوة عندكو .... أبداً برضوا .. وخلينا في الامان يا عم .. لإنه بيخاف من التفتيش وممكن يروح فيها هو والفندق .

طبعاً العرسان قعدوا في الشارع وروحت متصل على إبن صاحب الشركة وراح بنفسه وساب بطاقته هناك وكتب تعهد إنه ضامنهم لإنهم على كفالته .. لحد ما عدت الليلة وجت لي الفواتير وما شاء الله لاحظت إن العرسان كانوا بياكلوا بإفترا وكله في مسرح العمليات مش في المطعم كمان .... يالله خليهم يعيشوا يومين rs: h): ..

السؤال بقى ... هو الواحد طول ما هو بيتحرك لازم يشيل قسيمة الجواز في جيبه ؟ طب هنا والزوجة بيبقى معاها جواز سفرها وفي نفس الوقت مُضافة على إقامة زوجها .. يعني ما فيش مشكلة ... طب في مصر بقى ؟.. مشكلة المشاكل فالبطاقة الشخصية للزوج والزوجة بيبقى مكتوب فيها متزوج فقط ولكن ما فيش إثبات إن دي زوجة ده وده زوج دي ... طب الواحد يعمل إيه في الموقف ده ؟

أنا حصل معايا نفس الموقف ده أول ما اتجوزت لكن كنت عارف حركات النص كم اللي ممكن تحصل وما تحركتش من البيت إلا بعد ما استلمت القسيمة بإيدي وفعلاً والله اللي عملت حسابه حصل وطلبوا إثبات مني في الفندق بإسكندرية لكن كنت عامل خطة مضادة ومجهز كل حاجة .. خصوصاً إن بطاقة زوجتي كانت لسة بمهنة " طالبة " يعني الناس كانوا هايقولوا دول هاربنين من المدرسة rs:

[عصام]

إيه يا س س؟

أين أنت من عصر العولمة؟

قسيمة إيه وبتنجان اللى انت بتقول عليه .. دا عندكوا .. فى دولة متأخرة متحجرة الفكر .. متدينة (نسبيا) rs:

ماحدش فى مصر بيطلب القسيمة إلا إذا كان منظر الراجل أو الست مثير للشبهات .. دا فى الفنادق المحترمة أما فى فنادق (دكة وللا سلم؟) فبرضه ما حدش بيطلب قسايم .. إصصصصصحى h):

و .. have Fun Sir rs:

[se_ Elsyed]

الموقف الثاني .. وده بيحصل كثير ..

- تلاقي واحد صاحبك بيتصل بك ويقولك إلحقني محفظتي إتنشلت او إني فوجئت إني نسيت الفلوس في البيت وانا بره دلوقت ومش عارف اعمل إيه ... وبينسى في ظل المشكلة اللي لخبطت كيانه إن في إختراع إسمه تاكسي وممكن ياخده لحد البيت ويطلع يجيب الفلوس ويحاسبه ...

الموقف الثالث :

لو أشتريت حاجة من محل وبمنتهى البساطة روحت ناسي و خارج من غير ما تحاسب وفجأة لقيت واحد بيجري وراك وبيقولك الحساب يا أستاذ ؟

بتعمل إيه غير إن وشك بيحمر ويخضر وتفتكر إن الناس هايفتكروا إنك " جنيفر كابرياتي " لاعبة التنس الامريكية الشهيرة اللي عندها هواية سرقة المحلات حتى لو كانت قيمة اللي بتسرقة قليلة جداً ؟

أنا عشت في دور كابرياتي الأسبوع اللي فات .. فكنا في أحد المحلات وأنا بأقوم بدور السواق وسايق عربية الواد علي .. وعمر عمال يبرطع في المحل ولقيته جايب لعبة وبيقولي إشتريهالي ... فقلت له لأ أنا لسه شاريلك لعبة أمبارح وروحت مرجعها مكانها .. المهم خرجنا من المحل لقيت الراجل بيجري ورايا وبيقولي إن الولد اخد اللعبة وراح دافيسها في عربية اخوه وكأن شيئاً لم يكن ... طبعاً منظري كان زبالة وقولت زمان الراجل أفتكر إني قائد تشكيل عصابي ومرة أجي له بعيل صغير ومرة تانية بقرد عشان نقشط المحل .. وكنت عايز أضرب عمر بالشلوت ( دبل كيك ) لكن امه اخدته من قدامي وحرمتني من متعة الشلوت ده ..

[se_ Elsyed]

ماحدش فى مصر بيطلب القسيمة إلا إذا كان منظر الراجل أو الست مثير للشبهات .. دا فى الفنادق المحترمة أما فى فنادق (دكة وللا سلم؟) فبرضه ما حدش بيطلب قسايم .. إصصصصصحى  h):

يعني عل ضمانتك يا فكيك .. ؟

يعني اطمئن وانزل مصر وأمشي بوصل النور وأقطع القسيمة ؟

طبعاً ساعتها لما أكلمك من القسم هاتشمت فيه وتيجي تغنيلي " يا حلوه يا بلحه يا مقمعه "

مش عارف ليه ما بقيتش أصدق بؤك يا إسو ..